໔໐. ທສ຺ສນວິສຸທ຺ຘິຎາຓນິທ຺ເທສວຓ຺ຓນາ

໙໑. ທສ຺ສນວິສຸທ຺ຘິຎາຓນິທ຺ເທເສ ສພ຺ເພ ຘມ຺ມາ ເອກສງ຺ຄຫິຕາຕິ ສພ຺ເພ ສງ຺ຂຕາສງ຺ຂຕາ ຘມ຺ມາ ເອເກນ ສງ຺ຄຫິຕາ ປຣິຈ຺ຉິນ຺ນາ. ຕຖຏ຺ເຐນາຕິ ຠູຕຏ຺ເຐນ, ອຕ຺ຕໂນ ອຕ຺ຕໂນ ສຠາວວເສນ ວິຊ຺ຊມານຕ຺ເຖນາຕິ ອຕ຺ໂຖ. ອນຕ຺ຕຏ຺ເຐນາຕິ ກາຣກເວທກສງ຺ຂາເຕນ ອຕ຺ຕນາ ຣຫິຕຏ຺ເຐນ. ສຈ຺ຈຏ຺ເຐນາຕິ ອວິສໍວາທກຏ຺ເຐນ, ອຕ຺ຕໂນ ສຠາວຎ຺ຎຖຕ຺ຕາຠາເວນາຕິ ອຕ຺ໂຖ. ປຏິເວຘຏ຺ເຐນາຕິ ສຠາວໂຕ ຎາເຓນ ປຏິວິຊ຺ຌິຕພ຺ພຏ຺ເຐນ. ອິຘ ໂລກຸຕ຺ຕຣຎາເຓນ ອສມ຺ໂມຫໂຕ ອາຣມ຺ມຓໂຕ ຈ ປຏິເວໂຘ ເວທິຕພ຺ໂພ. ອຠິຊານນຏ຺ເຐນາຕິ ໂລກິເກນ ຎາເຓນ ອາຣມ຺ມຓໂຕ, ໂລກຸຕ຺ຕເຣນ ຎາເຓນ ອສມ຺ໂມຫໂຕ ອາຣມ຺ມຓໂຕ ຈ ເຕສໍ ເຕສໍ ຘມ຺ມານໍ ສຠາວໂຕ ອຠິຊານິຕພ຺ພຏ຺ເຐນ. ‘‘ສພ຺ພໍ, ຠິກ຺ຂເວ, ອຠິຎ຺ເຎຍ຺ຍ’’ນ຺ຕິ (ສໍ. ນິ. ໔.໔໖) ຫິ ວຸຕ຺ຕໍ. ປຣິຊານນຏ຺ເຐນາຕິ ວຸຕ຺ຕນເຍເນວ ໂລກິຍໂລກຸຕ຺ຕເຣຫິ ຎາເຓຫິ ສຠາວໂຕ ອຠິຎ຺ຎາຕານໍ ຘມ຺ມານໍ ອນິຈ຺ຈາທິໂຕ ນິຍ຺ຍານາທິໂຕ ຈ ປຣິຈ຺ຉິນ຺ທິຕ຺ວາ ຊານິຕພ຺ພຏ຺ເຐນ. ‘‘ສພ຺ພໍ, ຠິກ຺ຂເວ, ປຣິຎ຺ເຎຍ຺ຍ’’ນ຺ຕິ ຫິ ວຸຕ຺ຕໍ. ຘມ຺ມຏ຺ເຐນາຕິ ສຠາວຘາຣຓາທິນາ ຘມ຺ມຏ຺ເຐນ. ຘາຕຸຏ຺ເຐນາຕິ ນິຊ຺ຊີວຕາທິນາ ຘາຕຸຏ຺ເຐນ. ຎາຕຏ຺ເຐນາຕິ ໂລກິຍໂລກຸຕ຺ຕເຣຫິ ຎາເຓຫິ ຎາຕຸໍ ສກ຺ກຸເຓຍ຺ຍຏ຺ເຐນ. ຍຖາ ທຏ຺ຐຸໍ ສກ຺ກຸເຓຍ຺ຍາທິນາ ອຕ຺ເຖນ ‘‘ທິຏ຺ຐໍ ສຸຕໍ ມຸຕໍ ວິຎ຺ຎາຕໍ ຣູປ’’ນ຺ຕິ ວຸຕ຺ຕໍ, ເອວມິຘາປິ ຎາຕຸໍ ສກ຺ກຸເຓຍ຺ຍຏ຺ໂຐ ຎາຕຏ຺ໂຐຕິ ເວທິຕພ຺ໂພ. ສຈ຺ຉິກິຣິຍຏ຺ເຐນາຕິ ອາຣມ຺ມຓໂຕ ປຈ຺ຈກ຺ຂກາຕພ຺ພຏ຺ເຐນ. ຜຸສນຏ຺ເຐນາຕິ ປຈ຺ຈກ຺ຂກຕສ຺ສ ອາຣມ຺ມຓໂຕ ປຸນປ຺ປຸນໍ ຜຸສິຕພ຺ພຏ຺ເຐນ. ອຠິສມຍຏ຺ເຐນາຕິ ໂລກິເກນ ຎາເຓນ ອຠິສມາຄນ຺ຕພ຺ພຏ຺ເຐນ. ກິຎ຺ຈາປິ ຫິ ‘‘ຕຖຏ຺ເຐ ປຎ຺ຎາ ສຈ຺ຈວິວຏ຺ເຏ ຎາຓໍ, ອຠິຎ຺ຎາປຎ຺ຎາ ຎາຕຏ຺ເຐ ຎາຓໍ, ສຈ຺ຉິກິຣິຍາປຎ຺ຎາ ຜສ຺ສນຏ຺ເຐ ຎາຓ’’ນ຺ຕິ ເອເກກເມວ ຎາຓໍ ວຸຕ຺ຕໍ. ອຏ຺ຐກຖາຍຎ຺ຈ –

‘‘ສມວາເຍ ຂເຓ ກາເລ, ສມູເຫ ເຫຕຸທິຏ຺ຐິສຸ;

ປຏິລາເຠ ປຫາເນ ຈ, ປຏິເວເຘ ຈ ທິສ຺ສຕີ’’ຕິ . –

ຄາຖາວຓ຺ຓນາຍໍ ອຠິສມຍສທ຺ທສ຺ສ ປຏິເວຘຕ຺ໂຖ ວຸຕ຺ໂຕ, ອິຘ ປນ ຍຖາວຸຕ຺ເຕນ ອຕ຺ເຖນ ເຕສໍ ນານຕ຺ຕໍ ເວທິຕພ຺ພໍ. ອຏ຺ຐກຖາຍເມວ ຫິ ໂສ ໂລກິຍຎາຓວເສນ ຘມ຺ມາຠິສມໂຍ ວຸຕ຺ໂຕຕິ.

ກາມຈ຺ຉນ຺ໂທ ນານຕ຺ຕນ຺ຕິ ວິກ຺ເຂປສພ຺ຠາວໂຕ ນານາຣມ຺ມຓຕ຺ຕາ ຈ ນານາສຠາໂວຕິ ອຕ຺ໂຖ. ເອວໍ ສພ຺ພກິເລສາ ເວທິຕພ຺ພາ. ເນກ຺ຂມ຺ມໍ ເອກຕ຺ຕນ຺ຕິ ຈິຕ຺ເຕກຄ຺ຄຕາສພ຺ຠາວໂຕ ນານາຣມ຺ມຓວິກ຺ເຂປາຠາວໂຕ ຈ ເອກສຠາວນ຺ຕິ ອຕ຺ໂຖ. ເອວໍ ສພ຺ພກຸສລາ ເວທິຕພ຺ພາ. ອິຘ ເປຍ຺ຍາເລນ ສໍຂິຕ຺ຕານໍ ພ຺ຍາປາທາທີນໍ ອກຸສລານໍ ຍຖາວຸຕ຺ເຕນ ອຕ຺ເຖນ ນານຕ຺ຕໍ ເວທິຕພ຺ພໍ. ວິຕກ຺ກວິຈາຣາທີນໍ ປນ ເຫຏ຺ຐິມານໍ ເຫຏ຺ຐິມານໍ ອຸປຣິມໂຕ ອຸປຣິມໂຕ ໂອຬາຣິກຏ຺ເຐນ ນານຕ຺ຕໍ ເວທິຕພ຺ພໍ. ຍສ຺ມາ ເອກສງ຺ຄຫິຕນານຕ຺ເຕກຕ຺ຕານໍ ປຏິເວໂຘ ມຄ຺ຄກ຺ຂເຓ ສຈ຺ຈປຏິເວເຘນ ສິຊ຺ຌຕິ, ຕສ຺ມາ ‘‘ປຏິເວໂຘ’’ຕິ ປທໍ ອຸທ຺ຘຣິຕ຺ວາ ສຈ຺ຈາຠິສມຍໍ ທສ຺ເສສິ.

ປຣິຎ຺ຎາ ປຏິເວຘໍ ປຏິວິຊ຺ຌຕີຕິ ປຣິຎ຺ຎາຠິສມເຍນ ອຠິສເມຕິ. ເອສ ນໂຍ ເສເສສຸ. ສຈ຺ຈາຠິສມຍກາລສ຺ມິຎ຺ຫິ ມຄ຺ຄຎາຓສ຺ສ ເອກກ຺ຂເຓ ປຣິຎ຺ຎາ, ປຫານໍ, ສຈ຺ຉິກິຣິຍາ, ຠາວນາຕິ ຈຕ຺ຕາຣິ ກິຈ຺ຈານິ ໂຫນ຺ຕິ. ຍຖາ ນາວາ ອປຸພ຺ພໍ ອຈຣິມໍ ເອກກ຺ຂເຓ ຈຕ຺ຕາຣິ ກິຈ຺ຈານິ ກໂຣຕິ, ໂອຣິມໍ ຕີຣໍ ປຊຫຕິ, ໂສຕໍ ຉິນ຺ທຕິ, ຠຓ຺ຑໍ ວຫຕິ, ປາຣິມໍ ຕີຣໍ ອປ຺ເປຕິ, ເອວເມວ ມຄ຺ຄຎາຓໍ ອປຸພ຺ພໍ ອຈຣິມໍ ເອກກ຺ຂເຓ ຈຕ຺ຕາຣິ ສຈ຺ຈານິ ອຠິສເມຕິ, ທຸກ຺ຂໍ ປຣິຎ຺ຎາຠິສມເຍນ ອຠິສເມຕິ, ສມຸທຍໍ ປຫານາຠິສມເຍນ ອຠິສເມຕິ, ມຄ຺ຄໍ ຠາວນາຠິສມເຍນ ອຠິສເມຕິ, ນິໂຣຘໍ ສຈ຺ຉິກິຣິຍາຠິສມເຍນ ອຠິສເມຕິ. ກິໍ ວຸຕ຺ຕໍ ໂຫຕິ? ນິໂຣຘໍ ອາຣມ຺ມຓໍ ກຕ຺ວາ ກິຈ຺ຈວເສນ ຈຕ຺ຕາຣິປິ ສຈ຺ຈານິ ປາປຸຓາຕິ ປສ຺ສຕິ ປຏິວິຊ຺ຌຕີຕິ. ຍຖາ ໂອຣິມໍ ຕີຣໍ ປຊຫຕິ, ເອວໍ ມຄ຺ຄຎາຓໍ ທຸກ຺ຂໍ ປຣິຊານາຕິ. ຍຖາ ໂສຕໍ ຉິນ຺ທຕິ, ເອວໍ ສມຸທຍໍ ປຊຫຕິ. ຍຖາ ຠຓ຺ຑໍ ວຫຕິ, ເອວໍ ສຫຊາຕາທິປຈ຺ຈຍຕາຍ ມຄ຺ຄໍ ຠາເວຕິ. ຍຖາ ປາຣິມໍ ຕີຣໍ ອປ຺ເປຕິ, ເອວໍ ປາຣິມຕີຣຠູຕໍ ນິໂຣຘໍ ສຈ຺ຉິກໂຣຕີຕິ ເອວໍ ອຸປມາສໍສນ຺ທນໍ ເວທິຕພ຺ພໍ.

ທສ຺ສນໍ ວິສຸຊ຺ຌຕີຕິ ຕໍຕໍມຄ຺ຄວຊ຺ຌກິເລສຕມປ຺ປຫາເນນ ຎາຓທສ຺ສນໍ ວິສຸທ຺ຘິຠາວໍ ປາປຸຓາຕິ. ທສ຺ສນໍ ວິສຸທ຺ຘນ຺ຕິ ຕສ຺ສ ຕສ຺ສ ຜລສ຺ສ ອຸປ຺ປາທກ຺ຂເຓ ຕສ຺ສ ຕສ຺ສ ມຄ຺ຄຎາຓສ຺ສ ກິຈ຺ຈສິທ຺ຘິປ຺ປຕ຺ຕິໂຕ ຎາຓທສ຺ສນໍ ວິສຸທ຺ຘິຠາວໍ ປຕ຺ຕໍ ໂຫຕິ. ສພ຺ພຘມ຺ມານໍ ເອກສງ຺ຄຫິຕາຍ ນານຕ຺ເຕກຕ຺ຕປຏິເວຘປຎ຺ຎາຍ ມຄ຺ຄຜລຎາເຓຫິ ສິທ຺ຘິໂຕ ອນ຺ເຕ ມຄ຺ຄຜລຎາຓານິ ວຸຕ຺ຕານິ.

ທສ຺ສນວິສຸທ຺ຘິຎາຓນິທ຺ເທສວຓ຺ຓນາ ນິຏ຺ຐິຕາ.