໓໓. ອຣຓວິຫາຣຎາຓນິທ຺ເທສວຓ຺ຓນາ

໘໒. ອຣຓວິຫາຣຎາຓນິທ຺ເທເສ ອນິຈ຺ຈານຸປສ຺ສນາທໂຍ ວຸຕ຺ຕຕ຺ຖາ. ສຸຎ຺ຎໂຕ ວິຫາໂຣຕິ ອນຕ຺ຕານຸປສ຺ສນາຍ ວຸຏ຺ຐິຕສ຺ສ ສຸຎ຺ຎຕາກາເຣເນວ ປວຕ຺ຕາ ອຣຫຕ຺ຕຜລສມາປຕ຺ຕິ. ອນິມິຕ຺ໂຕ ວິຫາໂຣຕິ ອນິຈ຺ຈານຸປສ຺ສນາຍ ວຸຏ຺ຐິຕສ຺ສ ອນິມິຕ຺ຕາກາເຣນ ປວຕ຺ຕາ ອຣຫຕ຺ຕຜລສມາປຕ຺ຕິ. ອປ຺ປຓິຫິໂຕ ວິຫາໂຣຕິ ທຸກ຺ຂານຸປສ຺ສນາຍ ວຸຏ຺ຐິຕສ຺ສ ອປ຺ປຓິຫິຕາກາເຣນ ປວຕ຺ຕາ ອຣຫຕ຺ຕຜລສມາປຕ຺ຕິ. ສຸຎ຺ຎເຕ ອຘິມຸຕ຺ຕຕາຕິ ສຸຎ຺ຎເຕ ຜລສມາປຕ຺ຕິຍາ ປຸພ຺ພຠາຄປຎ຺ຎາວເສນ ອຘິມຸຕ຺ຕຕາ. ເສສທ຺ວເຍປິ ເອເສວ ນໂຍ. ປຐມໍ ຌານນ຺ຕິອາທີຫິ ອຣຫຕ຺ຕຜລສມາປຕ຺ຕິໍ ສມາປຊ຺ຊິຕຸກາມສ຺ສ ວິປສ຺ສນາຍ ອາຣມ຺ມຓຠູຕາ ຌານສມາປຕ຺ຕິໂຍ ວຸຕ຺ຕາ. ອຣຫໂຕເຍວ ຫິ ວິປສ຺ສນາຜລສມາປຕ຺ຕິປຓີຕາຘິມຸຕ຺ຕິຌານສມາປຕ຺ຕິໂຍ ສພ຺ພກິເລສານໍ ປຫີນຕ຺ຕາ ‘‘ອຣຓວິຫາໂຣ’’ຕິ ວຕ຺ຕຸໍ ອຣຫນ຺ຕິ.

ປຐເມນ ຌາເນນ ນີວຣເຓ ຫຣຕີຕິ ອຣຓວິຫາໂຣຕິ ປຐມຊ຺ຌານສມງ຺ຄີ ປຐເມນ ຌາເນນ ນີວຣເຓ ຫຣຕີຕິ ຕໍ ປຐມໍ ຌານໍ ອຣຓວິຫາໂຣຕິ ອຕ຺ໂຖ. ເສເສສຸປິ ເອເສວ ນໂຍ. ອຣຫໂຕ ນີວຣຓາຠາເວປິ ນີວຣຓວິປກ຺ຂຕ຺ຕາ ປຐມສ຺ສ ຌານສ຺ສ ນີວຣເຓ ຫຣຕີຕິ ວຸຕ຺ຕນ຺ຕິ ເວທິຕພ຺ພໍ. ວິປສ຺ສນາຜລສມາປຕ຺ຕິປຓີຕາຘິມຸຕ຺ຕິວເສນ ຕິຘາ ອຣຓວິຫາຣຎາຓໍ ອຸທ຺ທິສິຕ຺ວາ ກສ຺ມາ ຌານສມາປຕ຺ຕິໂຍວ ອຣຓວິຫາໂຣຕິ ນິທ຺ທິຏ຺ຐາຕິ ເຈ? ອຸທ຺ເທສວເສເນວ ຕາສໍ ຕິສ຺ສນ຺ນໍ ອຣຓວິຫາຣຕາຍ ສິທ຺ຘຕ຺ຕາ. ຜລສມາປຕ຺ຕິວິປສ຺ສນາຍ ປນ ຠູມິຠູຕານໍ ຌານສມາປຕ຺ຕີນໍ ອຣຓວິຫາຣຕາ ອວຸຕ຺ເຕ ນ ສິຊ຺ຌຕິ, ຕສ຺ມາ ອສິທ຺ຘເມວ ສາເຘຕຸໍ ‘‘ປຐມໍ ຌານໍ ອຣຓວິຫາໂຣ’’ຕິອາທິ ວຸຕ຺ຕນ຺ຕິ ເວທິຕພ຺ພໍ. ຕາສຎ຺ຫິ ອຣຓວິຫາຣຕາ ອຸທ຺ເທສວເສນ ອສິທ຺ຘາປິ ນິທ຺ເທເສ ວຸຕ຺ຕຕ຺ຕາ ສິທ຺ຘາຕິ. ເຕສໍ ວາ ໂຍຊິຕນເຍເນວ ‘‘ອນິຈ຺ຈານຸປສ຺ສນາ ນິຈ຺ຈສຎ຺ຎໍ ຫຣຕີຕິ ອຣຓວິຫາໂຣ, ທຸກ຺ຂານຸປສ຺ສນາ ສຸຂສຎ຺ຎໍ ຫຣຕີຕິ ອຣຓວິຫາໂຣ, ອນຕ຺ຕານຸປສ຺ສນາ ອຕ຺ຕສຎ຺ຎໍ ຫຣຕີຕິ ອຣຓວິຫາໂຣ, ສຸຎ຺ຎໂຕ ວິຫາໂຣ ອສຸຎ຺ຎຕໍ ຫຣຕີຕິ ອຣຓວິຫາໂຣ, ອນິມິຕ຺ໂຕ ວິຫາໂຣ ນິມິຕ຺ຕໍ ຫຣຕີຕິ ອຣຓວິຫາໂຣ, ອປ຺ປຓິຫິໂຕ ວິຫາໂຣ ປຓິຘິໍ ຫຣຕີຕິ ອຣຓວິຫາໂຣ, ສຸຎ຺ຎຕາຘິມຸຕ຺ຕຕາ ອສຸຎ຺ຎຕາຘິມຸຕ຺ຕິໍ ຫຣຕີຕິ ອຣຓວິຫາໂຣ, ອນິມິຕ຺ຕາຘິມຸຕ຺ຕຕາ ນິມິຕ຺ຕາຘິມຸຕ຺ຕິໍ ຫຣຕີຕິ ອຣຓວິຫາໂຣ, ອປ຺ປຓິຫິຕາຘິມຸຕ຺ຕຕາ ປຓິຫິຕາຘິມຸຕ຺ຕິໍ ຫຣຕີຕິ ອຣຓວິຫາໂຣ’’ຕິ ໂຍເຊຕ຺ວາ ຄເຫຕພ຺ພໍ.

ອຣຓວິຫາຣຎາຓນິທ຺ເທສວຓ຺ຓນາ ນິຏ຺ຐິຕາ.