໒໙-໓໑. ຎາຓຕ຺ຕຍນິທ຺ເທສວຓ຺ຓນາ

໗໘. ຎາຓຕ຺ຕຍນິທ຺ເທເສ ນິມິຕ຺ຕນ຺ຕິ ສງ຺ຂາຣນິມິຕ຺ຕໍ. ອນິມິຕ຺ເຕຕິ ສງ຺ຂາຣນິມິຕ຺ຕປຏິປກ຺ເຂ ນິພ຺ພາເນ. ອຘິມຸຕ຺ຕຕ຺ຕາຕິ ຕນ຺ນິນ຺ນຠາເວນ ຈິຕ຺ຕສ຺ສ ວິສ຺ສຏ຺ຐຕ຺ຕາ. ຜຸສ຺ສ ຜຸສ຺ສ ວຍໍ ປສ຺ສຕີຕິ ສງ຺ຂາຣນິມິຕ຺ຕໍ ຎາເຓນ ຜຸສິຕ຺ວາ ຜຸສິຕ຺ວາ ຕສ຺ສ ຠງ຺ຄໍ ວິປສ຺ສນາຎາເຓເນວ ປສ຺ສຕິ. ເອເຕນ ຠງ຺ຄານຸປສ຺ສນາ ສິທ຺ຘາ. ສາ ອນິຈ຺ຈານຸປສ຺ສນໍ ສາເຘຕິ, ອນິຈ຺ຈສ຺ສ ທຸກ຺ຂຕ຺ຕາ ສາ ທຸກ຺ຂານຸປສ຺ສນໍ, ທຸກ຺ຂສ຺ສ ອນຕ຺ຕຕ຺ຕາ ສາ ອນຕ຺ຕານຸປສ຺ສນນ຺ຕິ ເອວເມຕ຺ຖ ຕິສ຺ໂສ ອນຸປສ຺ສນາ ວຸຕ຺ຕາ ໂຫນ຺ຕິ. ອນິມິຕ຺ໂຕ ວິຫາໂຣຕິ ນິມິຕ຺ຕໍ ຠຍໂຕ ທິຏ຺ຐຕ຺ຕາ ໂສ ວິປສ຺ສນຕ຺ຕຍວິຫາໂຣ ອນິມິຕ຺ຕວິຫາໂຣ ນາມ ໂຫຕິ. ປຓິຘິນ຺ຕິ ຕຓ຺ຫໍ. ອປ຺ປຓິຫິເຕຕິ ຕຓ຺ຫາປຏິປກ຺ເຂ ນິພ຺ພາເນ. ອຠິນິເວສນ຺ຕິ ອຕ຺ຕາຠິນິເວສໍ. ສຸຎ຺ຎເຕຕິ ອຕ຺ຕວິຣຫິເຕ ນິພ຺ພາເນ. ສຸຎ຺ຎໂຕຕິ ສຸຎ຺ຎໍເຍວ ສຸຎ຺ຎໂຕ. ປວຕ຺ຕໍ ອຊ຺ຌຸເປກ຺ຂິຕ຺ວາຕິ ວິປາກປ຺ປວຕ຺ຕໍ ສງ຺ຂາຣຸເປກ຺ຂາຍ ອຊ຺ຌຸເປກ຺ຂິຕ຺ວາ. ສຸຄຕິສງ຺ຂາຕວິປາກປ຺ປວຕ຺ຕາຠິນນ຺ທິໂນ ຫິ ສຕ຺ຕາ. ອຍໍ ປນ ຜລສມາປຕ຺ຕິໍ ສມາປຊ຺ຊິຕຸກາໂມ ຕໍ ປວຕ຺ຕໍ, ສພ຺ພຎ຺ຈ ສງ຺ຂາຣຄຕໍ ອນິຈ຺ຈາທິໂຕ ປສ຺ສິຕ຺ວາ ອຊ຺ຌຸເປກ຺ຂຕິເຍວ. ເອວຎ຺ຫິ ທິຏ຺ເຐ ຜລສມາປຕ຺ຕິໍ ສມາປຊ຺ຊິຕຸໍ ສກ຺ໂກຕິ, ນ ອຎ຺ຎຖາ. ອາວຊ຺ຊິຕ຺ວາຕິ ອາວຊ຺ຊເນນ ອາວຊ຺ຊິຕ຺ວາ. ສມາປຊ຺ຊຕີຕິ ຜລສມາປຕ຺ຕິໍ ປຏິປຊ຺ຊຕິ. ອນິມິຕ຺ຕາ ສມາປຕ຺ຕີຕິ ນິມິຕ຺ຕໍ ຠຍໂຕ ທິສ຺ວາ ສມາປນ຺ນຕ຺ຕາ ອນິມິຕ຺ຕາ ສມາປຕ຺ຕິ ນາມ. ອນິມິຕ຺ຕວິຫາຣສມາປຕ຺ຕີຕິ ວິປສ຺ສນາວິຫາຣວເສນ ຈ ຜລສມາປຕ຺ຕິວເສນ ຈ ຕທຸຠຍໍ ນາມ ໂຫຕິ.

໗໙. ອິທານິ ສງ຺ຂາຣນິມິຕ຺ຕເມວ ວິຠຊິຕ຺ວາ ທສ຺ເສນ຺ໂຕ ຣູປນິມິຕ຺ຕນ຺ຕິອາທິມາຫ. ຊຣາມຣຓຄ຺ຄຫເຓ ວຕ຺ຕພ຺ພໍ ປຸພ຺ເພ ວຸຕ຺ຕເມວ. ‘‘ອຎ຺ໂຎ ອນິມິຕ຺ຕວິຫາໂຣ’’ຕິອາທີຫິ ວຸຕ຺ເຕເຍວ ນິຄເມຕ຺ວາ ທສ຺ເສຕິ. ສງ຺ເຂເປນ ວິຫາຣຏ຺ເຐ ຎາຓໍ ນາມ ຜລສມາປຕ຺ຕິຍາ ປຸພ຺ພຠາເຄ ສງ຺ຂາຣຸເປກ຺ຂາຎາເຓ ຐິຕສ຺ສ ວິປສ຺ສນາວິຫາຣນານຕ຺ເຕ ຎາຓໍ ສມາປຕ຺ຕຏ຺ເຐ ຎາຓໍ ນາມ ຜລສມາປຕ຺ຕິນານຕ຺ເຕ ຎາຓໍ. ວິຫາຣສມາປຕ຺ຕຏ຺ເຐ ຎາຓໍ ນາມ ຕທຸຠຍນານຕ຺ເຕ ຎາຓໍ. ວິປສ຺ສນາວິຫາເຣເນວ ວີຕິນາເມຕຸກາໂມ ວິປສ຺ສນາວິຫາຣເມວ ປວຕ຺ເຕຕິ, ຜລສມາປຕ຺ຕິວິຫາເຣເນວ ວີຕິນາເມຕຸກາໂມ ວິປສ຺ສນາປຏິປາຏິຍາ ອຸສ຺ສກ຺ກິຕ຺ວາ ຜລສມາປຕ຺ຕິວິຫາຣເມວ ປວຕ຺ເຕຕິ, ຕທຸຠເຍນ ວີຕິນາເມຕຸກາໂມ ຕທຸຠຍໍ ປວຕ຺ເຕຕິ. ເອວໍ ປຸຄ຺ຄລາຘິປ຺ປາຍວເສນ ຕິວິຘໍ ຊາຕໍ. ເສສເມຕ຺ຖ ວຕ຺ຕພ຺ພໍ ສງ຺ຂາຣຸເປກ຺ຂາຎາຓວຓ຺ຓນາຍໍ ວຸຕ຺ຕເມວ.

ຎາຓຕ຺ຕຍນິທ຺ເທສວຓ຺ຓນາ ນິຏ຺ຐິຕາ.