໑໗. ຈຣິຍານານຕ຺ຕຎາຓນິທ຺ເທສວຓ຺ຓນາ

໖໘. ຈຣິຍານານຕ຺ຕຎາຓນິທ຺ເທເສ ວິຎ຺ຎາຓຈຣິຍາຕິອາທີສຸ ອາຣມ຺ມເຓ ຈຣຕີຕິ ຈຣິຍາ, ວິຎ຺ຎາຓເມວ ຈຣິຍາ ວິຎ຺ຎາຓຈຣິຍາ. ອຎ຺ຎາເຓນ ຈຣຓໍ, ອຎ຺ຎາເຓນ ວາ ຈຣຕິ, ອຎ຺ຎາເຕ ວາ ຈຣຕິ, ອຎ຺ຎາຓສ຺ສ ວາ ຈຣຓນ຺ຕິ ອຎ຺ຎາຓຈຣິຍາ. ຎາຓເມວ ຈຣິຍາ, ຎາເຓນ ວາ ຈຣິຍາ, ຎາເຓນ ວາ ຈຣຕິ, ຎາເຕ ວາ ຈຣຕິ, ຎາຓສ຺ສ ວາ ຈຣຓນ຺ຕິ ຎາຓຈຣິຍາ. ທສ຺ສນຕ຺ຖາຍາຕິ ຣູປທສ຺ສນຕ຺ຖາຍ ປວຕ຺ຕາ. ອາວຊ຺ຊນກິຣິຍາພ຺ຍາກຕາຕິ ຠວງ຺ຄສນ຺ຕານໂຕ ອປເນຕ຺ວາ ຣູປາຣມ຺ມເຓ ຈິຕ຺ຕສນ຺ຕານໍ ອາວຊ຺ເຊຕິ ນາເມຕີຕິ ອາວຊ຺ຊນໍ, ວິປາກາຠາວໂຕ ກຣຓມຕ຺ຕນ຺ຕິ ກິຣິຍາ, ກຸສລາກຸສລວເສນ ນ ພ຺ຍາກຕາຕິ ອພ຺ຍາກຕາ. ທສ຺ສນຏ຺ໂຐຕິ ປສ຺ສນ຺ຕິ ເຕນ, ສຍໍ ວາ ປສ຺ສຕິ, ທສ຺ສນມຕ຺ຕເມວ ວາ ຕນ຺ຕິ ທສ຺ສນໍ, ທສ຺ສນເມວ ອຕ຺ໂຖ ທສ຺ສນຏ຺ໂຐ. ຈກ຺ຂຸວິຎ຺ຎາຓນ຺ຕິ ກຸສລວິປາກໍ ວາ ອກຸສລວິປາກໍ ວາ. ທິຏ຺ຐຕ຺ຕາຕິ ອທິຏ຺ເຐ ສມ຺ປຏິຈ຺ຉນສ຺ສ ອຠາວໂຕ ຈກ຺ຂຸວິຎ຺ຎາເຓນ ຣູປາຣມ຺ມຓສ຺ສ ທິຏ຺ຐຕ຺ຕາ. ອຠິນິໂຣປນາ ວິປາກມໂນຘາຕູຕິ ທິຏ຺ຐາຣມ຺ມຓເມວ ອາໂຣຫຕີຕິ ອຕິນິໂຣປນາ, ອຸຠຍວິປາກາ ສມ຺ປຏິຈ຺ຉນມໂນຘາຕຸ. ອຠິນິໂຣປິຕຕ຺ຕາຕິ ຣູປາຣມ຺ມຓໍ ອຠິຣຸຬ຺ຫຕ຺ຕາ. ວິປາກມໂນວິຎ຺ຎາຓຘາຕູຕິ ອຸຠຍວິປາກາ ສນ຺ຕີຣຓມໂນວິຎ຺ຎາຓຘາຕຸ. ເອສ ນໂຍ ໂສຕທ຺ວາຣາທີສຸປິ. ສນ຺ຕີຣຓານນ຺ຕຣໍ ໂວຏ຺ຐພ຺ພເນ ອວຸຕ຺ເຕປິ ອຏ຺ຐກຖາຈຣິເຍຫິ ວຸຕ຺ຕຕ຺ຕາ ລພ຺ຠຕີຕິ ຄເຫຕພ຺ພໍ. ວິຊານນຕ຺ຖາຍາຕິ ຘມ຺ມາຣມ຺ມຓສ຺ສ ເຈວ ຣູປາທິອາຣມ຺ມຓສ຺ສ ຈ ວິຊານນຕ຺ຖາຍ. ອາວຊ຺ຊນກິຣິຍາພ຺ຍາກຕາຕິ ມໂນທ຺ວາຣາວຊ຺ຊນຈິຕ຺ຕໍ. ວິຊານນຏ຺ໂຐຕິ ຕທນນ຺ຕຣຊວນວເສນ ອາຣມ຺ມຓສ຺ສ ວິຊານນເມວ ອຕ຺ໂຖ, ນ ອຎ຺ໂຎ. ອຸປຣິ ອກຸສລຊວນານໍ ວິປສ຺ສນາມຄ຺ຄຜລຊວນານຎ຺ຈ ວິສຸໍ ວຸຕ຺ຕຕ຺ຕາ ເສສຊວນານິ ອິຘ ຄເຫຕພ຺ພານິ ສິຍຸໍ. ‘‘ກຸສເລຫິ ກມ຺ເມຫິ ວິປ຺ປຍຸຕ຺ຕາ ຈຣຕີຕິ ວິຎ຺ຎາຓຈຣິຍາ’’ຕິອາທິວຈນໂຕ (ປຏິ. ມ. ໑.໗໐) ປນ ຫສິຕຸປ຺ປາທຈິຕ຺ຕຊວນເມວ ຄເຫຕພ຺ພໍ. ຉສຸ ທ຺ວາເຣສຸ ອເຫຕຸການໍເຍວ ຈິຕ຺ຕານໍ ວຸຕ຺ຕຕ຺ຕາ ທ຺ເວ ອາວຊ຺ຊນານິ ທ຺ເວ ປຎ຺ຈວິຎ຺ຎາຓານິ ທ຺ເວ ສມ຺ປຏິຈ຺ຉນານິ ຕີຓິ ສນ຺ຕີຣຓານິ ເອກໍ ຫສິຕຸປ຺ປາທຈິຕ຺ຕນ຺ຕິ ອຏ຺ຐາຣສ ອເຫຕຸກຈິຕ຺ຕານິເຍວ ວິຎ຺ຎາຓຈຣິຍາຕິ ເວທິຕພ຺ພານິ.

໖໙. ອິທານິ ວິສຍວິຊານນມຕ຺ຕຏ຺ເຐນ ວິຎ຺ຎາຓຈຣິຍາຕິ ທສ຺ເສຕຸໍ ນີຣາຄາ ຈຣຕີຕິອາທິມາຫ, ວິຎ຺ຎາຓຎ຺ຫິ ຣາຄາທິສມ຺ປໂຍເຄ ສທ຺ຘາທິສມ຺ປໂຍເຄ ຈ ອວຕ຺ຖນ຺ຕຣໍ ປາປຸຓາຕິ, ເຕສຸ ອສຕິ ສກາວຕ຺ຖາຍເມວ ຕິຏ຺ຐຕິ. ຕສ຺ມາ ນີຣາຄາທິວຈເນນ ເຕສໍ ວຸຕ຺ຕວິຎ຺ຎາຓານໍ ວິຎ຺ຎາຓກິຈ຺ຈມຕ຺ຕໍ ທສ຺ເສຕິ. ນຕ຺ຖິ ເອຕິສ຺ສາ ຣາໂຄຕິ ນີຣາຄາ. ນິຣາຄາຕິ ຣສ຺ສໍ ກຕ຺ວາປິ ປຐນ຺ຕິ. ໂສ ປນ ຣຊ຺ຊນວເສນ ຣາໂຄ. ອິຕເຣສຸ ທຸສ຺ສນວເສນ ໂທໂສ. ມຸຍ຺ຫນວເສນ ໂມໂຫ. ມຎ຺ຎນວເສນ ມາໂນ. ວິປຣີຕທສ຺ສນວເສນ ທິຏ຺ຐິ. ອຸທ຺ຘຕຠາໂວ, ອວູປສນ຺ຕຠາໂວ ວາ ອຸທ຺ຘຈ຺ຈໍ. ວິຈິກິຈ຺ຉາ ວຸຕ຺ຕຕ຺ຖາ. ອນຸເສນ຺ຕີຕິ ອນຸສຍາ. ‘‘ນິຣນຸສຍາ’’ຕິ ວຕ຺ຕພ຺ເພ ນານຸສຍາຕິ ວຸຕ຺ຕໍ, ໂສເຍວຕ຺ໂຖ. ປຣິຍຸຏ຺ຐານປ຺ປຕ຺ຕານເມເວຕ຺ຖ ອຠາໂວ ເວທິຕພ຺ໂພ. ນ ຫິ ວິຎ຺ຎາຓຈຣິຍາ ປຫີນານຸສຍານໍເຍວ ວຸຕ຺ຕາ. ຍາ ຈ ນີຣາຄາທິນາມາ, ສາ ຣາຄາທີຫິ ວິປ຺ປຍຸຕ຺ຕາວ ນາມ ໂຫຕີຕິ ປຣິຍາຍນ຺ຕຣທສ຺ສນຕ຺ຖໍ ຣາຄວິປ຺ປຍຸຕ຺ຕາຕິອາທິມາຫ. ປຸນ ອຎ຺ເຎຫິ ຈ ວິປ຺ປຍຸຕ຺ຕຕໍ ທສ຺ເສຕຸໍ ກຸສເລຫິ ກມ຺ເມຫີຕິອາທິມາຫ. ກຸສລານິເຍວ ຣາຄາທິວຊ຺ຊາຠາວາ ອນວຊ຺ຊານິ. ປຣິສຸທ຺ຘຠາວກເຣຫິ ຫິຣິໂອຕ຺ຕປ຺ເປຫິ ຍຸຕ຺ຕຕ຺ຕາ ສຸກ຺ການິ. ປວຕ຺ຕິສຸຂຕ຺ຕາ ສຸໂຂ ອຸທໂຍ ອຸປ຺ປຕ຺ຕິ ເອເຕສນ຺ຕິ ສຸຂຸທ຺ຣຍານິ, ສຸຂວິປາກຕ຺ຕາ ວາ ສຸໂຂ ອຸທໂຍ ວຑ຺ຒິ ເອເຕສນ຺ຕິ ສຸຂຸທ຺ຣຍານິ. ວຸຕ຺ຕວິປກ຺ເຂນ ອກຸສລານິ ໂຍເຊຕພ຺ພານິ. ວິຎ຺ຎາເຕ ຈຣຕີຕິ ວິຎ຺ຎາເຓນ ວິຎ຺ຎາຍມານໍ ອາຣມ຺ມຓໍ ວິຎ຺ຎາຕໍ ນາມ, ຕສ຺ມິໍ ວິຎ຺ຎາເຕ ອາຣມ຺ມເຓ. ກິໍ ວຸຕ຺ຕໍ ໂຫຕິ? ນີລວຓ຺ຓໂຍຄໂຕ ນີລວຕ຺ຖໍ ວິຍ ວິຎ຺ຎາຓໂຍຄໂຕ ວິຎ຺ຎາຕໍ ວິຎ຺ຎາຓໍ ນາມ ໂຫຕິ, ຕສ຺ມິໍ ວິຎ຺ຎາເຓ ຈຣຕີຕິ ວິຎ຺ຎາຓຈຣິຍາຕິ ວຸຕ຺ຕໍ ໂຫຕິ. ວິຎ຺ຎາຓສ຺ສ ເອວຣູປາ ຈຣິຍາ ໂຫຕີຕິ ວຸຕ຺ຕປ຺ປກາຣສ຺ສ ວິຎ຺ຎາຓສ຺ສ ວຸຕ຺ຕປ຺ປກາຣາ ຈຣິຍາ ໂຫຕີຕິ ອຕ຺ໂຖ. ‘‘ວິຎ຺ຎາຓສ຺ສ ຈຣິຍາ’’ຕິ ຈ ໂວຫາຣວເສນ ວຸຈ຺ຈຕິ, ວິຎ຺ຎາຓໂຕ ປນ ວິສຸໍ ຈຣິຍາ ນຕ຺ຖິ. ປກຕິປຣິສຸທ຺ຘມິທໍ ຈິຕ຺ຕໍ ນິກ຺ກິເລສຏ຺ເຐນາຕິ ອິທໍ ວຸຕ຺ຕປ຺ປກາຣໍ ຈິຕ຺ຕໍ ຣາຄາທິກິເລສາຠາເວນ ປກຕິຍາ ເອວ ປຣິສຸທ຺ຘໍ. ຕສ຺ມາ ວິຊານນມຕ຺ຕເມວ ຈຣິຍາຕິ ວິຎ຺ຎາຓຈຣິຍາຕິ ວຸຕ຺ຕໍ ໂຫຕິ. ນິກ຺ເລສຏ຺ເຐນາຕິປິ ປາໂຐ.

ອຎ຺ຎາຓຈຣິຍາຍ ມນາປິເຍສູຕິ ມນສິ ອປ຺ເປນ຺ຕິ ປສີທນ຺ຕິ, ມນໍ ວາ ອປ຺ປາຍນ຺ຕິ ວຑ຺ເຒນ຺ຕີຕິ ມນາປານິ, ມນາປານິເຍວ ມນາປິຍານິ. ເຕສຸ ມນາປິເຍສຸ. ຕານິ ປນ ອິຏ຺ຐານິ ວາ ໂຫນ຺ຕຸ ອນິຏ຺ຐານິ ວາ, ຄຫຓວເສນ ມນາປິຍານິ. ນ ຫິ ອິຏ຺ຐສ຺ມິໍເຍວ ຣາໂຄ ອນິຏ຺ຐສ຺ມິໍເຍວ ໂທໂສ ອຸປ຺ປຊ຺ຊຕິ. ຣາຄສ຺ສ ຊວນຕ຺ຖາຍາຕິ ສນ຺ຕຕິວເສນ ຣາຄສ຺ສ ຊວນຕ຺ຖາຍ ປວຕ຺ຕາ. ອາວຊ຺ຊນກິຣິຍາພ຺ຍາກຕາຕິ ຈກ຺ຂຸທ຺ວາເຣ ອໂຍນິໂສ ມນສິກາຣຠູຕາ ອາວຊ຺ຊນກິຣິຍາພ຺ຍາກຕາ ມໂນຘາຕຸ. ຣາຄສ຺ສ ຊວນາຕິ ເຍຠຸຍ຺ເຍນ ສຕ຺ຕກ຺ຂຕ຺ຕຸໍ ຣາຄສ຺ສ ປວຕ຺ຕິ, ປຸນປ຺ປຸນໍ ປວຕ຺ໂຕ ຣາໂຄເຍວ. ອຎ຺ຎາຓຈຣິຍາຕິ ອຎ຺ຎາເຓນ ຣາຄສ຺ສ ສມ຺ຠວໂຕ ອຎ຺ຎາເຓນ ຣາຄສ຺ສ ຈຣິຍາຕິ ວຸຕ຺ຕໍ ໂຫຕິ. ເສເສສຸປິ ເອເສວ ນໂຍ. ຕທຸຠເຍນ ອສມເປກ຺ຂນສ຺ມິໍ ວຕ຺ຖຸສ຺ມິນ຺ຕິ ຣາຄໂທສວເສນ ສມເປກ຺ຂນວິຣຫິເຕ ຣູປາຣມ຺ມຓສງ຺ຂາເຕ ວຕ຺ຖຸສ຺ມິໍ. ໂມຫສ຺ສ ຊວນຕ຺ຖາຍາຕິ ວິຈິກິຈ຺ຉາອຸທ຺ຘຈ຺ຈວເສນ ໂມຫສ຺ສ ຊວນຕ຺ຖາຍ. ອຎ຺ຎາຓຈຣິຍາຕິ ອຎ຺ຎາຓສ຺ເສວ ຈຣິຍາ, ນ ອຎ຺ຎສ຺ສ. ວິນິພນ຺ຘສ຺ສາຕິອາທີນິ ມານາທີນໍ ສຠາວວຈນານິ. ຕຕ຺ຖ ວິນິພນ຺ຘສ຺ສາຕິ ອຸນ຺ນຕິວເສນ ວິນິພນ຺ຘິຕ຺ວາ ຐິຕສ຺ສ. ປຣາມຏ຺ຐາຍາຕິ ຣູປສ຺ສ ອນິຈ຺ຈຠາວາທິໍ ອຕິກ຺ກມິຕ຺ວາ ປຣໂຕ ນິຈ຺ຈຠາວາທິໍ ອາມຏ຺ຐາຍ ຄຫິຕາຍ. ວິກ຺ເຂປຄຕສ຺ສາຕິ ຣູປາຣມ຺ມເຓ ວິກ຺ຂິຕ຺ຕຠາວໍ ຄຕສ຺ສ. ອນິຏ຺ຐງ຺ຄຕາຍາຕິ ອສນ຺ນິຏ຺ຐານຠາວໍ ຄຕາຍ. ຖາມຄຕສ຺ສາຕິ ພລປ຺ປຕ຺ຕສ຺ສ. ຘມ຺ເມສູຕິ ຣູປາທີສຸ ວາ ຘມ຺ມາຣມ຺ມຓຠູເຕສຸ ວາ ຘມ຺ເມສຸ.

໗໐. ຍສ຺ມາ ຣາຄາທໂຍ ອຎ຺ຎາເຓນ ໂຫນ຺ຕິ, ຕສ຺ມາ ຣາຄາທິສມ຺ປໂຍເຄນ ອຎ຺ຎາຓໍ ວິເສເສນ຺ໂຕ ສຣາຄາ ຈຣຕີຕິອາທິມາຫ. ຕຕ຺ຖ ສຣາຄາ ຈຣຕີຕິ ໂມຫມານທິຏ຺ຐິມານານຸສຍທິຏ຺ຐານຸສຍອວິຊ຺ຊານຸສຍຊວນວເສນ ຈຣິຍາ ເວທິຕພ຺ພາ. ສໂທສາ ຈຣຕີຕິ ໂມຫອວິຊ຺ຊານຸສຍຊວນວເສນ. ສໂມຫາ ຈຣຕີຕິ ຣາຄໂທສມານທິຏ຺ຐິອຸທ຺ຘຈ຺ຈວິຈິກິຈ຺ຉານຸສຍຊວນວເສນ. ສມານາ ຈຣຕີຕິ ຣາຄໂມຫກາມຣາຄຠວຣາຄາວິຊ຺ຊານຸສຍຊວນວເສນ. ສທິຏ຺ຐິ ຈຣຕີຕິ ຣາຄໂມຫກາມຣາຄາວິຊ຺ຊານຸສຍຊວນວເສນ. ສອຸທ຺ຘຈ຺ຈາ ຈຣຕິ ສວິຈິກິຈ຺ຉາ ຈຣຕີຕິ ໂມຫອວິຊ຺ຊານຸສຍຊວນວເສນ. ສານຸສຍາ ຈຣຕີຕິ ເອຕ຺ຖາປິ ວຸຕ຺ຕນເຍເນວ ເອເກກໍ ອນຸສຍໍ ມູລໍ ກຕ຺ວາ ຕສ຺ມິໍ ຈິຕ຺ເຕ ລພ຺ຠມານກເສສານຸສຍວເສນ ສານຸສຍຕາ ໂຍເຊຕພ຺ພາ. ຣາຄສມ຺ປຍຸຕ຺ຕາຕິອາທິ ສຣາຄາທິເວວຈນເມວ. ສາ ເອວ ຫິ ຈຣິຍາ ສມ຺ປໂຍຄວເສນ ສຫ ຣາຄາທີຫິ ວຕ຺ຕຕີຕິ ສຣາຄາທິອາທີນິ ນາມານິ ລຠຕິ. ຣາຄາທີຫິ ສມໍ ເອກຸປ຺ປາເທກນິໂຣເຘກວຕ຺ເຖກາຣມ຺ມຓາທີຫິ ປກາເຣຫິ ຍຸຕ຺ຕາຕິ ຣາຄສມ຺ປຍຸຕ຺ຕານີຕິອາທີນິ ນາມານິ ລຠຕິ. ສາເຍວ ຈ ຍສ຺ມາ ກຸສລາທີຫິ ກມ຺ເມຫິ ວິປ຺ປຍຸຕ຺ຕາ, ອກຸສລາທີຫິ ກມ຺ເມຫິ ສມ຺ປຍຸຕ຺ຕາ, ຕສ຺ມາປິ ອຎ຺ຎາຓຈຣິຍາຕິ ທສ຺ເສຕຸໍ ກຸສເລຫິ ກມ຺ເມຫີຕິອາທິມາຫ. ຕຕ຺ຖ ອຎ຺ຎາເຕຕິ ໂມຫສ຺ສ ອຎ຺ຎາຓລກ຺ຂຓຕ຺ຕາ ຍຖາສຠາເວນ ອຎ຺ຎາເຕ ອາຣມ຺ມເຓ. ເສສໍ ວຸຕ຺ຕຕ຺ຖເມວ.

໗໑. ຎາຓຈຣິຍາຍໍ ຍສ຺ມາ ວິວຏ຺ຏນານຸປສ຺ສນາທີນໍ ອນນ຺ຕຣປຈ຺ຈຍຠູຕາ ອາວຊ຺ຊນກິຣິຍາພ຺ຍາກຕາ ນຕ຺ຖິ, ຕສ຺ມາ ເຕສໍ ອຕ຺ຖາຍ ອາວຊ຺ຊນກິຣິຍາພ຺ຍາກຕໍ ອວຕ຺ວາ ວິວຏ຺ຏນານຸປສ຺ສນາທໂຍວ ວຸຕ຺ຕາ. ອນຸໂລມຎາຓຕ຺ຖາຍ ເອວ ຫິ ອາວຊ຺ຊນາ ໂຫຕິ, ຕໂຕ ວິວຏ຺ຏນານຸປສ຺ສນາມຄ຺ຄຜລານິ. ຜລສມາປຕ຺ຕີຕິ ເຈຕ຺ຖ ມຄ຺ຄານນ຺ຕຣຊາ ວາ ໂຫຕຸ ກາລນ຺ຕຣຊາ ວາ, ອຸໂຠປິ ອຘິປ຺ເປຕາ. ນີຣາຄາ ຈຣຕີຕິອາທີສຸ ຣາຄາທີນໍ ປຏິປກ຺ຂວເສນ ນີຣາຄາທິຕາ ເວທິຕພ຺ພາ, ວິຎ຺ຎາຓຈຣິຍາຍໍ ຣາຄາທີນໍ ອຠາວມຕ຺ຕຏ຺ເຐນ. ຎາເຕຕິ ຍຖາສຠາວໂຕ ຎາເຕ. ອຎ຺ຎາ ວິຎ຺ຎາຓຈຣິຍາຕິອາທີຫິ ຕິສ຺ສນ຺ນໍ ຈຣິຍານໍ ອຎ຺ຎມຎ຺ຎມສມ຺ມິສ຺ສຕໍ ທສ຺ເສຕິ. ວິຎ຺ຎາຓກິຈ຺ຈມຕ຺ຕວເສນ ຫິ ອເຫຕຸກຈິຕ຺ຕຸປ຺ປາທາ ວິຎ຺ຎາຓຈຣິຍາ, ອຎ຺ຎາຓກິຈ຺ຈວຕໍ ທ຺ວາທສນ຺ນໍ ອກຸສລຈິຕ຺ຕຸປ຺ປາທານໍ ວເສເນວ ອຎ຺ຎາຓຈຣິຍາ, ວິເສເສນ ຎາຓກິຈ຺ຈກາຣີນໍ ວິປສ຺ສນາມຄ຺ຄຜລານໍ ວເສນ ຎາຓຈຣິຍາ. ເອວມິມາ ອຎ຺ຎມຎ຺ຎມສມ຺ມິສ຺ສາ ຈ, ວິປສ຺ສນໍ ຐເປຕ຺ວາ ສເຫຕຸກກາມາວຈຣກິຣິຍາກຸສລາ ຈ, ສເຫຕຸກກາມາວຈຣວິປາກາ ຈ, ຣູປາວຈຣາຣູປາວຈຣກຸສລາພ຺ຍາກຕາ ຈ ຕີຫິ ຈຣິຍາຫິ ວິນິມຸຕ຺ຕາຕິ ເວທິຕພ຺ພາ. ນິພ຺ພານາຣມ຺ມຓາຍ ວິວຏ຺ຏນານຸປສ຺ສນາຍ ຎາຓຈຣິຍາຍ ນິທ຺ທິຏ຺ຐຕ຺ຕາ ນິພ຺ພານມຄ຺ຄຜລປຈ຺ຈເວກ຺ຂຓຠູຕານິ ເສກ຺ຂາເສກ຺ຂານໍ ປຈ຺ຈເວກ຺ຂຓຎາຓານິ ຎາຓຈຣິຍາຍ ສງ຺ຄຫິຕານີຕິ ເວທິຕພ຺ພານິ. ຕານິປິ ຫິ ວິເສເສນ ຎາຓກິຈ຺ຈກຣາເນວາຕິ.

ຈຣິຍານານຕ຺ຕຎາຓນິທ຺ເທສວຓ຺ຓນາ ນິຏ຺ຐິຕາ.