໑໔. ປຈ຺ຈເວກ຺ຂຓຎາຓນິທ຺ເທສວຓ຺ຓນາ

໖໕. ປຈ຺ຈເວກ຺ຂຓຎາຓນິທ຺ເທເສ ມຄ຺ຄກ຺ຂເຓເຍວ ເຫຕຸຏ຺ເຐນ ປຐມໍ ມຄ຺ຄງ຺ຄານິ ວິສຸໍ ວິສຸໍ ວຕ຺ວາ ປຸນ ມຄ຺ຄງ຺ຄຠູເຕ ຈ ອມຄ຺ຄງ຺ຄຠູເຕ ຈ ຘມ຺ເມ ‘‘ພຸຊ຺ຌນຏ຺ເຐນ ໂພຘີ’’ຕິ ລທ຺ຘນາມສ຺ສ ອຣິຍສ຺ສ ອງ຺ຄຠາເວນ ໂພຊ຺ຌງ຺ເຄ ວິສຸໍ ທສ຺ເສສິ. ສຕິຘມ຺ມວິຈຍວີຣິຍສມາຘິສມ຺ໂພຊ຺ຌງ຺ຄາ ຫິ ມຄ຺ຄງ຺ຄາເນວ, ປີຕິປສ຺ສທ຺ຘິອຸເປກ຺ຂາສມ຺ໂພຊ຺ຌງ຺ຄາ ອມຄ຺ຄງ຺ຄານິ. ປຸນ ພລວເສນ ອິນ຺ທ຺ຣິຍວເສນ ຈ ວິສຸໍ ນິທ຺ທິຏ຺ເຐສຸ ສທ຺ຘາ ເອວ ອມຄ຺ຄງ຺ຄຠູຕາ. ປຸນ ມຄ຺ຄກ຺ຂເຓ ຊາເຕເຍວ ຘມ຺ເມ ຣາສິວເສນ ທສ຺ເສນ຺ໂຕ ອາຘິປເຕຍ຺ຍຏ຺ເຐນາຕິອາທິມາຫ. ຕຕ຺ຖ ອຸປຏ຺ຐານຏ຺ເຐນ ສຕິປຏ຺ຐານາຕິ ເອກາວ ນິພ຺ພານາຣມ຺ມຓາ ສຕິ ກາຍເວທນາຈິຕ຺ຕຘມ຺ເມສຸ ສຸຠສຸຂນິຈ຺ຈອຕ຺ຕສຎ຺ຎາປຫານກິຈ຺ຈສາຘນວເສນ ຈຕ຺ຕາໂຣ ສຕິປຏ຺ຐານາ ນາມ. ນິພ຺ພານາຣມ຺ມຓໍ ເອກເມວ ວີຣິຍໍ ອຸປ຺ປນ຺ນານຸປ຺ປນ຺ນານໍ ອກຸສລານໍ ປຫານານຸປ຺ປຕ຺ຕິກິຈ຺ຈສ຺ສ, ອນຸປ຺ປນ຺ນຸປ຺ປນ຺ນານໍ ກຸສລານໍ ອຸປ຺ປາທຏ຺ຐິຕິກິຈ຺ຈສ຺ສ ສາຘນວເສນ ຈຕ຺ຕາໂຣ ສມ຺ມປ຺ປຘານາ ນາມ.

ຕຖຏ຺ເຐນ ສຈ຺ຈາຕິ ທຸກ຺ຂຠາວາທີສຸ ອວິສໍວາທກຏ຺ເຐນ ຈຕ຺ຕາຣິ ອຣິຍສຈ຺ຈານິ. ເອຕາເນວ ເຈຕ຺ຖ ປຏິເວຘຏ຺ເຐນ ຕທາ ສມຸທາຄຕານິ, ‘‘ອມໂຕຄຘໍ ນິພ຺ພານ’’ນ຺ຕິ ວິສຸໍ ວຸຕ຺ຕໍ ນິພ຺ພານຎ຺ຈ, ເສສາ ປນ ຘມ຺ມາ ປຏິລາຠຏ຺ເຐນ ຕທາ ສມຸທາຄຕາ. ‘‘ຕຖຏ຺ເຐນ ສຈ຺ຈາ ຕທາ ສມຸທາຄຕາ’’ຕິ ວຈນໂຕ ມຄ຺ຄຜລປຣິໂຍສາເນ ອວສ຺ສໍ ຈຕ຺ຕາຣິ ສຈ຺ຈານິ ປຈ຺ຈເວກ຺ຂຕີຕິ ນິຏ຺ຐເມຕ຺ຖ ຄນ຺ຕພ຺ພໍ. ‘‘ກຕໍ ກຣຓີຍໍ ນາປຣໍ ອິຕ຺ຖຕ຺ຕາຍາຕິ ປຊານາຕີ’’ຕິ (ທີ. ນິ. ໑.໒໔໘) ວຈນໂຕ ຈ ‘‘ທຸກ຺ຂໍ ເມ ປຣິຎ຺ຎາຕໍ, ສມຸທໂຍ ເມ ປຫີໂນ, ນິໂຣໂຘ ເມ ສຈ຺ຉິກໂຕ, ມຄ຺ໂຄ ຈ ເມ ຠາວິໂຕ’’ຕິ ປຈ຺ຈເວກ຺ຂຓໍ ວຸຕ຺ຕເມວ ໂຫຕິ. ຕຖາ ປຈ຺ຈເວກ຺ຂຓໍ ຍຸຊ຺ຊຕິ ຈ. ສມຸທໂຍຕິ ເຈຕ຺ຖ ຕໍຕໍມຄ຺ຄວຊ຺ໂຌເຍວ ເວທິຕພ຺ໂພ. ເອຕ຺ຖ ວຸຕ຺ຕສມຸທຍປຈ຺ຈເວກ຺ຂຓວເສເນວ ອຏ຺ຐກຖາຍໍ ທຸວິຘໍ ກິເລສປຈ຺ຈເວກ຺ຂຓໍ ມຄ຺ຄຜລນິພ຺ພານປຈ຺ຈເວກ຺ຂຓານິ ອິຘ ສຣູເປເນວ ອາຄຕານີຕິ ວຸຕ຺ຕານິ. ເກວລໍ ທຸກ຺ຂປຈ຺ຈເວກ຺ຂຓເມວ ນ ວຸຕ຺ຕໍ. ກິຎ຺ຈາປິ ນ ວຸຕ຺ຕໍ, ອຖ ໂຂ ປາຐສພ຺ຠາວໂຕ ຍຸຕ຺ຕິສພ຺ຠາວໂຕ ຈ ຄເຫຕພ຺ພເມວ. ສຈ຺ຈປຏິເວຘຕ຺ຖຎ຺ຫິ ປຏິປນ຺ນສ຺ສ ນິຏ຺ຐິເຕ ສຈ຺ຈປຏິເວເຘ ສຍໍ ກຕກິຈ຺ຈປຈ຺ຈເວກ຺ຂຓໍ ຍຸຕ຺ຕເມວາຕິ. ອວິກ຺ເຂປຏ຺ເຐນ ສມໂຖຕິອາທິ ມຄ຺ຄສມ຺ປຍຸຕ຺ເຕ ເອວ ສມຖວິປສ຺ສນາຘມ຺ເມ ເອກຣສຏ຺ເຐນ ອນຕິວຕ຺ຕນຏ຺ເຐນ ຈ ທສ຺ເສຕຸໍ ວຸຕ຺ຕໍ. ສໍວຣຏ຺ເຐນ ສີລວິສຸທ຺ຘີຕິ ສມ຺ມາວາຈາກມ຺ມນ຺ຕາຊີວາ ເອວ. ອວິກ຺ເຂປຏ຺ເຐນ ຈິຕ຺ຕວິສຸທ຺ຘີຕິ ສມ຺ມາສມາຘິ ເອວ. ທສ຺ສນຏ຺ເຐນ ທິຏ຺ຐິວິສຸທ຺ຘີຕິ ສມ຺ມາທິຏ຺ຐິເຍວ. ວິມຸຕ຺ຕຏ຺ເຐນາຕິ ສມຸຈ຺ເຉທວເສນ ມຄ຺ຄວຊ຺ຌກິເລເສຫິ ມຸຈ຺ຈນຏ຺ເຐນ, ນິພ຺ພານາຣມ຺ມເຓ ວາ ອຘິມຸຈ຺ຈນຏ຺ເຐນ. ວິໂມກ຺ໂຂຕິ ສມຸຈ຺ເຉທວິໂມກ຺ໂຂ, ອຣິຍມຄ຺ໂຄເຍວ. ປຏິເວຘຏ຺ເຐນ ວິຊ຺ຊາຕິ ສຈ຺ຈປຏິເວຘຏ຺ເຐນ ວິຊ຺ຊາ, ສມ຺ມາທິຏ຺ຐິເຍວ. ປຣິຈ຺ຈາຄຏ຺ເຐນ ວິມຸຕ຺ຕີຕິ ມຄ຺ຄວຊ຺ຌກິເລສານໍ ປຊຫນຏ຺ເຐນ ຕໂຕ ມຸຈ຺ຈນໂຕ ວິມຸຕ຺ຕິ, ອຣິຍມຄ຺ໂຄເຍວ. ສມຸຈ຺ເຉທຏ຺ເຐນ ຂເຍ ຎາຓນ຺ຕິ ກິເລສສມຸຈ຺ຉິນ຺ທນຏ຺ເຐນ ກິເລສກ຺ຂຍກເຣ ອຣິຍມຄ຺ເຄ ຎາຓໍ, ສມ຺ມາທິຏ຺ຐິເຍວ.

ຉນ຺ທາທໂຍ ເຫຏ຺ຐາ ວຸຕ຺ຕນເຍເນວ ເວທິຕພ຺ພາ. ເກວລຎ຺ເຫຕ຺ຖ ມຄ຺ຄກ຺ຂເຓເຍວ ມຄ຺ຄສ຺ສ ອາທິມຊ຺ຌປຣິໂຍສານາກາເຣນ ທສ຺ສິຕາ. ວິມຸຕ຺ຕີຕິ ເຈຕ຺ຖ ມຄ຺ຄວິມຸຕ຺ຕິເຍວ. ‘‘ຕຖຏ຺ເຐນ ສຈ຺ຈາ’’ຕິ ເອຕ຺ຖ ຄຫິຕມ຺ປິ ຈ ນິພ຺ພານໍ ອິຘ ປຣິໂຍສານຠາວທສ຺ສນຕ຺ຖໍ ປຸນ ວຸຕ຺ຕນ຺ຕິ ເວທິຕພ຺ພໍ. ຜລກ຺ຂເຓປິ ເອເສວ ນໂຍ. ເອຕ຺ຖ ປນ ເຫຕຸຏ຺ເຐນ ມຄ຺ໂຄຕິ ຜລມຄ຺ຄຠາເວເນວ. ສມ຺ມປ຺ປຘານາຕິ ມຄ຺ຄກ຺ຂເຓ ຈຕຸກິຈ຺ຈສາຘກສ຺ສ ວີຣິຍກິຈ຺ຈສ຺ສ ຜລສ຺ສ ອຸປ຺ປາທກ຺ຂເຓ ສິທ຺ຘຕ຺ຕາ ວຸຕ຺ຕນ຺ຕິ ເວທິຕພ຺ພໍ. ອຎ຺ຎຖາ ຫິ ຜລກ຺ຂເຓ ສມ຺ມປ຺ປຘານາ ເອວ ນ ລພ຺ຠນ຺ຕິ. ວຸຕ຺ຕຎ຺ຫິ ມຄ຺ຄກ຺ຂເຓ ສຕ຺ຕຕິໍສ ໂພຘິປກ຺ຂິຍຘມ຺ເມ ອຸທ຺ຘຣນ຺ເຕນ ເຖເຣນ ‘‘ຜລກ຺ຂເຓ ຐເປຕ຺ວາ ຈຕ຺ຕາໂຣ ສມ຺ມປ຺ປຘາເນ ອວເສສາ ເຕຕ຺ຕິໍສ ຘມ຺ມາ ລພ຺ຠນ຺ຕີ’’ຕິ. ເອວເມວ ປຏິເວຘກິຈ຺ຈາທິສິທ຺ຘິວເສນ ສຈ຺ຈາທີນິປິ ຍຖາໂຍຄໍ ເວທິຕພ຺ພານິ. ວິໂມກ຺ໂຂຕິ ຈ ຜລວິໂມກ຺ໂຂ. ວິມຸຕ຺ຕີຕິ ຜລວິມຸຕ຺ຕິ. ປຏິປ຺ປສ຺ສທ຺ຘຏ຺ເຐນ ອນຸປ຺ປາເທ ຎາຓໍ ວຸຕ຺ຕຕ຺ຖເມວ. ວຸຏ຺ຐຫິຕ຺ວາຕິ ອນ຺ຕຣາ ວຸຏ຺ຐານາຠາວາ ຜລາວສາເນນ ເອວໍ ວຸຕ຺ຕໍ. ອິເມ ຘມ຺ມາ ຕທາ ສມຸທາຄຕາຕິ ອິເມ ວຸຕ຺ຕປ຺ປກາຣາ ຘມ຺ມາ ມຄ຺ຄກ຺ຂເຓ ຜລກ຺ຂເຓ ຈ ສມຸທາຄຕາຕິ ປຈ຺ຈເວກ຺ຂຕີຕິ ອິຕິ-ສທ຺ທໍ ປາຐເສສໍ ກຕ຺ວາ ສມ຺ພນ຺ໂຘ ເວທິຕພ຺ໂພ.

ປຈ຺ຈເວກ຺ຂຓຎາຓນິທ຺ເທສວຓ຺ຓນາ ນິຏ຺ຐິຕາ.