໑໕. ວຕ຺ຖຸນານຕ຺ຕຎາຓນິທ຺ເທສວຓ຺ຓນາ

໖໖. ວຕ຺ຖຸນານຕ຺ຕຎາຓນິທ຺ເທເສ ຈກ຺ຂຸໍ ອຊ຺ຌຕ຺ຕໍ ວວຕ຺ເຖຕີຕິ ອຊ຺ຌຕ຺ຕຠູຕໍ ຈກ຺ຂຸໍ ວວຕ຺ຖເປຕິ. ຍຖາ ໂສ ຈກ຺ຂຸໍ ວວຕ຺ຖເປຕິ, ຕຖາ ວຕ຺ຕຸກາໂມ ກຖໍ ຈກ຺ຂຸໍ ອຊ຺ຌຕ຺ຕໍ ວວຕ຺ເຖຕີຕິ ປຸຈ຺ຉິຕ຺ວາ ປຸນ ຈກ຺ຂຸ ອວິຊ຺ຊາສມ຺ຠູຕນ຺ຕິ ວວຕ຺ເຖຕີຕິອາທິນາ ວວຕ຺ຖາປນາກາຣໍ ທສ຺ເສຕິ. ຕຕ຺ຖ ອວິຊ຺ຊາຕຓ຺ຫາ ອຕີຕາ ອຸປຕ຺ຖມ຺ຠກເຫຕຸໂຍ, ກມ຺ມໍ ອຕີຕໍ ຊນກເຫຕຸ, ອາຫາໂຣ ອິທານິ ອຸປຕ຺ຖມ຺ຠກເຫຕຸ. ເອເຕນ ຈກ຺ຂູປຕ຺ຖມ຺ຠການິ ອຸຕຸຈິຕ຺ຕານິ ຄຫິຕາເນວ ໂຫນ຺ຕິ. ຈຕຸນ຺ນໍ ມຫາຠູຕານໍ ອຸປາທາຍາຕິ ອຸປໂຍຄຕ຺ເຖ ສາມິວຈນໍ, ຈຕ຺ຕາຣິ ມຫາຠູຕານິ ອຸປາທິຍິຕ຺ວາ ປວຕ຺ຕນ຺ຕິ ອຕ຺ໂຖ. ເອເຕນ ປສາທຈກ຺ຂຸຠາໂວ ທສ຺ສິໂຕ ໂຫຕິ, ສສມ຺ຠາຣຠາໂວ ປຏິກ຺ຂິຕ຺ໂຕ. ອຸປ຺ປນ຺ນນ຺ຕິ ອທ຺ຘາວເສນ, ສນ຺ຕຕິຂຓວເສນ ວາ ປຈ຺ຈຸປ຺ປນ຺ນໍ. ສມຸທາຄຕນ຺ຕິ ເຫຕຸໂຕ ສມຸຏ຺ຐິຕໍ. ເອຕ຺ຕາວຕາ ວິປສ຺ສນາປຸພ຺ພຠາເຄ ຈກ຺ຂຸວວຕ຺ຖານໍ ທສ຺ສິຕໍ. ອຫຸຕ຺ວາ ສມ຺ຠູຕນ຺ຕິອາທີຫິ ອນິຈ຺ຈານຸປສ຺ສນາ. ປຸພ຺ເພ ອຸທຍາ ອວິຊ຺ຊມານໂຕ ອຫຸຕ຺ວາ ສມ຺ຠູຕໍ, ອຸທ຺ຘໍ ວຍາ ອຠາວໂຕ ຫຸຕ຺ວາ ນ ຠວິສ຺ສຕິ. ອນ຺ຕວນ຺ຕໂຕຕິ ອນ຺ໂຕ ອສ຺ສ ອຕ຺ຖີຕິ ອນ຺ຕວາ, ອນ຺ຕວາ ເອວ ອນ຺ຕວນ຺ໂຕ ຍຖາ ‘‘ສຕິມນ຺ໂຕ, ຄຕິມນ຺ໂຕ, ຘິຕິມນ຺ໂຕ ຈ ໂຍ ອິສີ’’ຕິ (ເຖຣຄາ. ໑໐໕໒). ຕໂຕ ອນ຺ຕວນ຺ຕໂຕ, ຠງ຺ຄວິຊ຺ຊມານໂຕຕິ ອຕ຺ໂຖ. ອທ຺ຘຸວນ຺ຕິ ສພ຺ພາວຕ຺ຖານິປາຕິຕາຍ, ຖິຣຠາວສ຺ສ ຈ ອຠາວຕາຍ ນ ຖິຣໍ. ອສສ຺ສຕນ຺ຕິ ນ ນິຈ຺ຈໍ. ວິປຣິຓາມຘມ຺ມນ຺ຕິ ຊຣາຍ ເຈວ ມຣເຓນ ຈາຕິ ທ຺ເວຘາ ວິປຣິຓາມປກຕິກໍ. ຈກ຺ຂຸ ອນິຈ຺ຈນ຺ຕິອາທີນິ ຈກ຺ຂຸໍ ອນິຈ຺ຈໂຕຕິອາທີນິ ຈ ວຸຕ຺ຕຕ຺ຖານິ. ມໂນຕິ ອິຘ ຠວງ຺ຄມນສ຺ສ ອຘິປ຺ເປຕຕ຺ຕາ ອວິຊ຺ຊາສມ຺ຠູໂຕຕິອາທິ ຍຸຊ຺ຊຕິເຍວ. ອາຫາຣສມ຺ຠູໂຕຕິ ເອຕ຺ຖ ສມ຺ປຍຸຕ຺ຕຜສ຺ສາຫາຣມໂນສຎ຺ເຈຕນາຫາຣວເສນ ເວທິຕພ຺ພໍ. ອຸປ຺ປນ຺ໂນຕິ ຈ ອທ຺ຘາສນ຺ຕຕິວເສນ.

ວຕ຺ຖຸນານຕ຺ຕຎາຓນິທ຺ເທສວຓ຺ຓນາ ນິຏ຺ຐິຕາ.