໑໓. ວິມຸຕ຺ຕິຎາຓນິທ຺ເທສວຓ຺ຓນາ

໖໔. ວິມຸຕ຺ຕິຎາຓນິທ຺ເທເສ ສກ຺ກາຍທິຏ຺ຐີຕິ ວິຊ຺ຊມານຏ຺ເຐນ ສຕິ ຂນ຺ຘປຎ຺ຈກສງ຺ຂາເຕ ກາເຍ, ສຍໍ ວາ ສຕີ ຕສ຺ມິໍ ກາເຍ ທິຏ຺ຐີຕິ ສກ຺ກາຍທິຏ຺ຐິ. ວິຈິກິຈ຺ຉາຕິ ວິຄຕາ ຈິກິຈ຺ຉາ, ສຠາວໍ ວາ ວິຈິນນ຺ໂຕ ເອຕາຍ ກິຈ຺ຉຕິ ກິລມຕີຕິ ວິຈິກິຈ຺ຉາ. ສີລພ຺ພຕປຣາມາໂສຕິ ສີເລນ ສຸທ຺ຘິ ວເຕນ ສຸທ຺ຘິ ສີລພ຺ພເຕນ ສຸທ຺ຘີຕິ ຄຫິຕອຠິນິເວໂສ. ໂສ ຫິ ສຠາວໍ ອຕິກ຺ກມິຕ຺ວາ ປຣໂຕ ອາມສຕີຕິ ສີລພ຺ພຕປຣາມາໂສ. ອຸຠິນ຺ນໍ ສມາເນປິ ທິຏ຺ຐິຠາເວ ຕກ຺ກຎ຺ຈ ປຣູປເທສຎ຺ຈ ວິນາ ປກຕິຍາ ເອວ ສກ຺ກາຍທິຏ຺ຐິຄຫຓໂຕ ປກຕິຠູຕາຍ ວີສຕິວຕ຺ຖຸກາຍ ສກ຺ກາຍທິຏ຺ຐິຍາ ປຫາເນເນວ ສພ຺ພທິຏ຺ຐິປ຺ປຫານທສ຺ສນຕ຺ຖໍ ສກ຺ກາຍທິຏ຺ຐິ ວຸຕ຺ຕາ. ສີລພ຺ພຕປຣາມາໂສ ປນ ‘‘ສຸທ຺ຘິປຏິປທໍ ປຏິປຊ຺ຊາມາ’’ຕິ ປຏິປນ຺ນານໍ ປຏິປທາຍ ມິຈ຺ຉາຠາວທສ຺ສນຕ຺ຖໍ ວິສຸໍ ວຸຕ຺ໂຕຕິ ເວທິຕພ຺ໂພ. ຕິຓ຺ຓມ຺ປິ ອນຸສຍປ຺ປຫາເນເນວ ປຫານໍ ທສ຺ເສຕຸໍ ທິຏ຺ຐານຸສໂຍ ວິຈິກິຈ຺ຉານຸສໂຍຕິ ວຸຕ຺ຕໍ, ນ ວິສຸໍ ກິເລສຕ຺ຕາ. ອຸປກ຺ກິເລສາຕິ ກິເລເສນ຺ຕິ ອຸປຕາເປນ຺ຕິ ວິພາເຘນ຺ຕີຕິ ກິເລສາ, ຖາມຄຕຏ຺ເຐນ ຠຸສາ ກິເລສາຕິ ອຸປກ຺ກິເລສາ. ສມ຺ມາ ສມຸຈ຺ຉິນ຺ນາ ໂຫນ຺ຕີຕິ ສມຸຈ຺ເຉທປ຺ປຫາເນນ ອນຸປ຺ປາທນິໂຣເຘນ ສມ຺ມາ ສມຸຈ຺ຉິນ຺ນາ ໂຫນ຺ຕິ. ສປຣິຍຸຏ຺ຐາເນຫີຕິ ຈິຕ຺ຕໍ ປຣິໂຍນນ຺ຘນ຺ຕານິ ອຸຏ຺ເຐນ຺ຕິ ອຸປ຺ປຊ຺ຊນ຺ຕີຕິ ປຣິຍຸຏ຺ຐານານິ, ສມຸທາຈາຣປ຺ປຕ຺ຕານໍ ກິເລສານເມຕໍ ອຘິວຈນໍ. ສຫ ປຣິຍຸຏ຺ຐາເນຫີຕິ ສປຣິຍຸຏ຺ຐານານິ. ເຕຫິ ສປຣິຍຸຏ຺ຐາເນຫິ ອນຸສຍິຕອຸປກ຺ກິເລເສຫິ. ຈິຕ຺ຕໍ ວິມຸຕ຺ຕໍ ໂຫຕີຕິ ເຕສໍ ອຠພ຺ພຸປ຺ປຕ຺ຕິກຠູຕຕ຺ຕາ ສນ຺ຕຕິວເສນ ປວຕ຺ຕມານໍ ຈິຕ຺ຕໍ ຕໂຕ ວິມຸຕ຺ຕໍ ນາມ ໂຫຕິ. ຕເທວ ສຸຏ຺ຐຸ ວິມຸຕ຺ຕຕ຺ຕາ ສຸວິມຸຕ຺ຕໍ. ຕໍວິມຸຕ຺ຕິຎາຕຏ຺ເຐນາຕິ ຕສ຺ສາ ວິມຸຕ຺ຕິຍາ ຊານນຏ຺ເຐນ.

ວິມຸຕ຺ຕິຎາຓນິທ຺ເທສວຓ຺ຓນາ ນິຏ຺ຐິຕາ.