໑໒. ຜລຎາຓນິທ຺ເທສວຓ຺ຓນາ

໖໓. ຜລຎາຓນິທ຺ເທເສ ຕໍປໂຍຄປ຺ປຏິປ຺ປສ຺ສທ຺ຘຕ຺ຕາຕິ ຕສ຺ສ ອຊ຺ຌຕ຺ຕພຫິທ຺ຘາ ວຸຏ຺ຐານປໂຍຄສ຺ສ ປຏິປ຺ປສ຺ສທ຺ຘຕ຺ຕາ. ມຄ຺ໂຄ ຫິ ສກກ຺ຂເຓ ກິເລສປ຺ປຫາເນນ ອຸຠໂຕ ວຸຏ຺ຐານປໂຍຄໍ ກໂຣຕິ ນາມ, ຜລກ຺ຂເຓ ກິເລສານໍ ປຫີນຕ຺ຕາ ມຄ຺ຄສ຺ສ ອຸຠໂຕ ວຸຏ຺ຐານປໂຍໂຄ ປຏິປ຺ປສ຺ສທ຺ໂຘ ວູປສນ຺ໂຕ ນາມ ໂຫຕິ. ອຸປ຺ປຊ຺ຊຕີຕິ ມຄ຺ຄານນ຺ຕຣໍ ສກິໍ ວາ ທ຺ວິກ຺ຂຕ຺ຕຸໍ ວາ ອຸປ຺ປຊ຺ຊຕິ, ຜລສມາປຕ຺ຕິກາເລ ປນ ພຫຸກ຺ຂຕ຺ຕຸໍ, ນິໂຣຘາ ວຸຏ຺ຐຫນ຺ຕສ຺ສ ທ຺ວິກ຺ຂຕ຺ຕຸໍ ອຸປ຺ປຊ຺ຊຕິ, ສພ຺ພມ຺ປິ ຫິ ຕໍ ປໂຍຄປ຺ປຏິປ຺ປສ຺ສທ຺ຘຕ຺ຕາ ອຸປ຺ປຊ຺ຊຕິ. ມຄ຺ຄສ຺ເສຕໍ ຜລນ຺ຕິ ຜລໍ ອເປກ຺ຂິຕ຺ວາ ນປຸໍສກວຈນໍ ກຕໍ. ສກທາຄາມິມຄ຺ຄກ຺ຂຓາທີສຸປິ ເອເກກມຄ຺ຄງ຺ຄວເສເນວ ວຸຏ຺ຐານໂຍຊນາ ເວທິຕພ຺ພາ.

ຜລຎາຓນິທ຺ເທສວຓ຺ຓນາ ນິຏ຺ຐິຕາ.