໑໑. ມຄ຺ຄຎາຓນິທ຺ເທສວຓ຺ຓນາ

໖໑. ມຄ຺ຄຎາຓນິທ຺ເທເສ ມິຈ຺ຉາທິຏ຺ຐິຍາ ວຸຏ຺ຐາຕີຕິ ທິຏ຺ຐານຸສຍປ຺ປຫາເນນ ສມຸຈ຺ເຉທວເສນ ທ຺ວາສຏ຺ຐິເຠທໂຕ ມິຈ຺ຉາທິຏ຺ຐິໂຕ ວຸຏ຺ຐາຕິ. ຕທນຸວຕ຺ຕກກິເລເສຫີຕິ ມິຈ຺ຉາທິຏ຺ຐິສມ຺ປໂຍຄວເສນ ຈ ມິຈ຺ຉາທິຏ຺ຐິອຸປນິສ຺ສເຍນ ຈ ອຸປ຺ປຊ຺ຊມາເນຫິ ມິຈ຺ຉາທິຏ຺ຐິອນຸວຕ຺ຕມາເນຫິ ນານາວິເຘຫິ ກິເລເສຫິ. ເຕນ ຕເທກຏ຺ຐກິເລສປ຺ປຫານໍ ວຸຕ຺ຕໍ ໂຫຕິ. ທຸວິຘຎ຺ຫິ ເອກຏ຺ຐໍ ສຫເຊກຏ຺ຐໍ ປຫາເນກຏ຺ຐຎ຺ຈ. ຕາຍ ທິຏ຺ຐິຍາ ສຫ ເອກສ຺ມິໍ ຈິຕ຺ເຕ, ເອກສ຺ມິໍ ປຸຄ຺ຄເລ ວາ ຍາວ ປຫານາ ຐິຕາຕິ ຕເທກຏ຺ຐາ. ທິຏ຺ຐິຍາ ຫິ ປຫີຍມານາຍ ທິຏ຺ຐິສມ຺ປຍຸຕ຺ເຕສຸ ທ຺ວີສຸ ອສງ຺ຂາຣິກຈິຕ຺ເຕສຸ ຕາຍ ທິຏ຺ຐິຍາ ສຫຊາຕາ ໂລໂຠ ໂມໂຫ ອຸທ຺ຘຈ຺ຈໍ ອຫິຣິກໍ ອໂນຕ຺ຕປ຺ປນ຺ຕິ ອິເມ ກິເລສາ, ທ຺ວີສຸ ສສງ຺ຂາຣິກຈິຕ຺ເຕສຸ ຕາຍ ທິຏ຺ຐິຍາ ສຫຊາຕາ ໂລໂຠ ໂມໂຫ ຖິນໍ ອຸທ຺ຘຈ຺ຈໍ ອຫິຣິກໍ ອໂນຕ຺ຕປ຺ປນ຺ຕິ ອິເມ ກິເລສາ ສຫເຊກຏ຺ຐວເສນ ປຫີຍນ຺ຕິ. ທິຏ຺ຐິກິເລເສເຍວ ປຫີຍມາເນ ເຕນ ສຫ ເອກສ຺ມິໍ ປຸຄ຺ຄເລ ຐິຕາ ອປາຍຄມນີຍາ ໂລໂຠ ໂທໂສ ໂມໂຫ ມາໂນ ວິຈິກິຈ຺ຉາ ຖິນໍ ອຸທ຺ຘຈ຺ຈໍ ອຫິຣິກໍ ອໂນຕ຺ຕປ຺ປນ຺ຕິ ອິເມ ກິເລສາ ປຫາເນກຏ຺ຐວເສນ ປຫີຍນ຺ຕິ. ຂນ຺ເຘຫີຕິ ຕທນຸວຕ຺ຕເກເຫວ ຂນ຺ເຘຫິ, ຕໍ ທິຏ຺ຐິໍ ອນຸວຕ຺ຕມາເນຫິ ສຫເຊກຏ຺ເຐຫິ ຈ ປຫາເນກຏ຺ເຐຫິ ຈ ຈຕູຫິ ອຣູປກ຺ຂນ຺ເຘຫິ, ຕໍສມຸຏ຺ຐານຣູເປຫິ ວາ ສຫ ປຎ຺ຈຫິ ຂນ຺ເຘຫິ ມິຈ຺ຉາທິຏ຺ຐິອາທິກິເລສປຈ຺ຈຍາ ອນາຄເຕ ອຸປ຺ປຊ຺ຊິຕພ຺ເພຫິ ວິປາກກ຺ຂນ຺ເຘຫິ. ພຫິທ຺ຘາ ຈ ສພ຺ພນິມິຕ຺ເຕຫີຕິ ຍຖາວຸຕ຺ຕກິເລສກ຺ຂນ຺ຘໂຕ ພຫິຠູເຕຫິ ສພ຺ພສງ຺ຂາຣນິມິຕ຺ເຕຫິ. ມິຈ຺ຉາສງ຺ກປ຺ປາ ວຸຏ຺ຐາຕີຕິ ໂສຕາປຕ຺ຕິມຄ຺ເຄນ ປຫາຕພ຺ເພສຸ ຈຕູສຸ ທິຏ຺ຐິສມ຺ປຍຸຕ຺ເຕສຸ, ວິຈິກິຈ຺ຉາສຫຄເຕ ຈາຕິ ປຎ຺ຈສຸ ຈິຕ຺ເຕສຸ ອປາຍຄມນີຍເສສາກຸສລຈິຕ຺ເຕສຸ ຈ ມິຈ຺ຉາສງ຺ກປ຺ປາ ວຸຏ຺ຐາຕິ.

ມິຈ຺ຉາວາຈາຍ ວຸຏ຺ຐາຕີຕິ ມຸສາວາທໂຕ ເຈວ ອປາຍຄມນີຍປິສຸຓຜຣຸສສມ຺ຜປ຺ປລາເປຫິ ຈ ວຸຏ຺ຐາຕິ. ມິຈ຺ຉາກມ຺ມນ຺ຕາ ວຸຏ຺ຐາຕີຕິ ປາຓາຕິປາຕາທິນ຺ນາທານມິຈ຺ຉາຈາເຣຫິ ວຸຏ຺ຐາຕິ. ມິຈ຺ຉາອາຊີວາ ວຸຏ຺ຐາຕີຕິ ກຸຫນາ ລປນາ ເນມິຕ຺ຕິກຕາ ນິປ຺ເປສິກຕາ ລາເຠນລາຠໍນິຊິຄີສນຕາ, ອາຊີວເຫຕຸເກຫິ ວາ ສຕ຺ຕຫິປິ ກາຍວຈີກມ຺ເມຫິ ວຸຏ຺ຐາຕິ. ມິຈ຺ຉາວາຍາມມິຈ຺ຉາສຕິມິຈ຺ຉາສມາຘີຫິ ວຸຏ຺ຐານໍ ມິຈ຺ຉາສງ຺ກປ຺ປວຸຏ຺ຐາເນ ວຸຕ຺ຕນເຍເນວ ເວທິຕພ຺ພໍ. ມິຈ຺ຉາສຕີຕິ ຈ ສຕິຍາ ປຏິປກ຺ຂາກາເຣນ ອຸປ຺ປຊ຺ຊມານາ ອກຸສລຈິຕ຺ຕຸປ຺ປາທມຕ຺ຕເມວ. ອຸປຣິມຄ຺ຄຕ຺ຕເຍ ‘‘ທສ຺ສນຏ຺ເຐນ ສມ຺ມາທິຏ຺ຐີ’’ຕິອາທີນິ ອຏ຺ຐ ມຄ຺ຄງ຺ຄານິ ຍຖາ ປຐມຊ຺ຌານິເກ ປຐມມຄ຺ເຄ ລພ຺ຠນ຺ຕິ, ຕເຖວ ລພ຺ຠນ຺ຕິ. ຕຕ຺ຖ ປຐມມຄ຺ເຄ ສມ຺ມາທິຏ຺ຐິ ມິຈ຺ຉາທິຏ຺ຐິໍ ປຊຫຕີຕິ ສມ຺ມາທິຏ຺ຐິ. ສມ຺ມາສງ຺ກປ຺ປາທໂຍປິ ມິຈ຺ຉາສງ຺ກປ຺ປາທີນໍ ປຊຫນຏ຺ເຐເນວ ເວທິຕພ຺ພາ. ເອວໍ ສນ຺ເຕ ປຐມມຄ຺ເຄເນວ ທ຺ວາສຏ຺ຐິຍາ ທິຏ຺ຐິຄຕານໍ ປຫີນຕ຺ຕາ ອຸປຣິມຄ຺ຄຕ຺ຕເຍນ ປຫາຕພ຺ພາ ທິຏ຺ຐິ ນາມ ນຕ຺ຖິ.

ຕຕ຺ຖ ສມ຺ມາທິຏ຺ຐີຕິ ນາມໍ ກຖໍ ໂຫຕີຕິ? ຍຖາ ວິສໍ ອຕ຺ຖິ ວາ ໂຫຕຸ ມາ ວາ, ອຄໂທ ອຄໂທຕ຺ເວວ ວຸຈ຺ຈຕິ, ເອວໍ ມິຈ຺ຉາທິຏ຺ຐິ ອຕ຺ຖິ ວາ ໂຫຕຸ ມາ ວາ, ອຍໍ ສມ຺ມາທິຏ຺ຐິ ເອວ ນາມ. ຍທິ ເອວໍ ນາມມຕ຺ຕເມເວຕໍ ໂຫຕິ, ອຸປຣິມຄ຺ຄຕ຺ຕເຍ ປນ ສມ຺ມາທິຏ຺ຐິຍາ ກິຈ຺ຈາຠາໂວ ອາປຊ຺ຊຕິ, ມຄ຺ຄງ຺ຄານິ ນ ປຣິປູເຣນ຺ຕິ. ຕສ຺ມາ ສມ຺ມາທິຏ຺ຐິ ສກິຈ຺ຈກາ ກາຕພ຺ພາ, ມຄ຺ຄງ຺ຄານິ ປຣິປູເຣຕພ຺ພານີຕິ. ສກິຈ຺ຈກາ ເຈຕ຺ຖ ສມ຺ມາທິຏ຺ຐິ ຍຖາລາຠນິຍເມນ ທີເປຕພ຺ພາ. ອຸປຣິມຄ຺ຄຕ຺ຕຍວຊ຺ໂຌ ຫິ ເອໂກ ມາໂນ ອຕ຺ຖິ, ໂສ ທິຏ຺ຐິຏ຺ຐາເນ ຕິຏ຺ຐຕິ, ສາ ຕໍ ມານໍ ປຊຫຕີຕິ ສມ຺ມາທິຏ຺ຐິ. ໂສຕາປຕ຺ຕິມຄ຺ຄສ຺ມິຎ຺ຫິ ສມ຺ມາທິຏ຺ຐິ ມິຈ຺ຉາທິຏ຺ຐິໍ ປຊຫຕິ. ໂສຕາປນ຺ນສ຺ສ ປນ ສກທາຄາມິມຄ຺ຄວຊ຺ໂຌ ມາໂນ ອຕ຺ຖິ, ຕໍ ມານໍ ປຊຫຕີຕິ ສມ຺ມາທິຏ຺ຐິ. ຕສ຺ເສວ ສຕ຺ຕອກຸສລຈິຕ຺ຕສຫຊາໂຕ ສງ຺ກປ຺ໂປ ອຕ຺ຖິ, ເຕເຫວ ຈິຕ຺ເຕຫິ ວາຈງ຺ຄໂຈປນໍ ອຕ຺ຖິ, ກາຍງ຺ຄໂຈປນໍ ອຕ຺ຖິ, ປຈ຺ຈຍປຣິໂຠໂຄ ອຕ຺ຖິ, ສຫຊາຕວາຍາໂມ ອຕ຺ຖິ, ອສ຺ສຕິຍຠາໂວ ອຕ຺ຖິ, ສຫຊາຕຈິຕ຺ເຕກຄ຺ຄຕາ ອຕ຺ຖິ, ເອເຕ ມິຈ຺ຉາສງ຺ກປ຺ປາທໂຍ ນາມ. ສກທາຄາມິມຄ຺ເຄ ສມ຺ມາສງ຺ກປ຺ປາທໂຍ ເຕສໍ ປຫາເນນ ສມ຺ມາສງ຺ກປ຺ປາທໂຍຕິ ເວທິຕພ຺ພາ. ເອວໍ ສກທາຄາມິມຄ຺ເຄ ອຏ຺ຐງ຺ຄານິ ສກິຈ຺ຈການິ ໂຫນ຺ຕິ. ສກທາຄາມິສ຺ສ ອນາຄາມິມຄ຺ຄວຊ຺ໂຌ ມາໂນ ອຕ຺ຖິ, ໂສ ທິຏ຺ຐິຏ຺ຐາເນ ຕິຏ຺ຐຕິ. ຕສ຺ເສວ ສຕ຺ຕຫິ ຈິຕ຺ເຕຫິ ສຫຊາຕາ ສງ຺ກປ຺ປາທໂຍ ອຕ຺ຖິ. ເຕສໍ ປຫາເນນ ອນາຄາມິມຄ຺ເຄ ອຏ຺ຐນ຺ນໍ ອງ຺ຄານໍ ສກິຈ຺ຈກຕາ ເວທິຕພ຺ພາ. ອນາຄາມິສ຺ສ ອຣຫຕ຺ຕມຄ຺ຄວຊ຺ໂຌ ມາໂນ ອຕ຺ຖິ, ໂສ ທິຏ຺ຐິຏ຺ຐາເນ ຕິຏ຺ຐຕິ. ຍານິ ປນສ຺ສ ປຎ຺ຈ ອກຸສລຈິຕ຺ຕານິ, ເຕຫິ ສຫຊາຕາ ສງ຺ກປ຺ປາທໂຍ ອຕ຺ຖິ. ເຕສໍ ປຫາເນນ ອຣຫຕ຺ຕມຄ຺ເຄ ອຏ຺ຐນ຺ນໍ ອງ຺ຄານໍ ສກິຈ຺ຈກຕາ ເວທິຕພ຺ພາ.

ໂອຬາຣິກາຕິ ກາຍວຈີທ຺ວາເຣ ວີຕິກ຺ກມສ຺ສ ປຈ຺ຈຍຠາເວນ ຖູລຠູຕມ຺ຫາ. ກາມຣາຄສຎ຺ໂຎຊນາຕິ ເມຖຸນຣາຄສງ຺ຂາຕາ ສຎ຺ໂຎຊນາ. ໂສ ຫິ ກາມຠເວ ສຎ຺ໂຎເຊຕີຕິ ສຎ຺ໂຎຊນນ຺ຕິ ວຸຈ຺ຈຕິ. ປຏິຆສຎ຺ໂຎຊນາຕິ ພ຺ຍາປາທສຎ຺ໂຎຊນາ. ໂສ ຫິ ອາຣມ຺ມເຓ ປຏິຫຎ຺ຎຕີຕິ ປຏິຆນ຺ຕິ ວຸຈ຺ຈຕິ. ເຕ ເອວ ຖາມຄຕຏ຺ເຐນ ສນ຺ຕາເນ ອນຸເສນ຺ຕີຕິ ອນຸສຍາ. ອຓຸສຫຄຕາຕິ ອຓຸຠູຕາ, ສຸຂຸມຠູຕາຕິ ອຕ຺ໂຖ. ຕພ຺ຠາເວ ຫິ ເອຕ຺ຖ ສຫຄຕສທ຺ໂທ. ສກທາຄາມິສ຺ສ ຫິ ກາມຣາຄພ຺ຍາປາທາ ທ຺ວີຫິ ກາຣເຓຫິ ອຓຸຠູຕາ ອຘິຈ຺ຈຸປ຺ປຕ຺ຕິຍາ ຈ ປຣິຍຸຏ຺ຐານມນ຺ທຕາຍ ຈ. ຕສ຺ສ ຫິ ພາລປຸຖຸຊ຺ຊນສ຺ສ ວິຍ ກິເລສາ ອຠິຓ຺ຫໍ ນ ອຸປ຺ປຊ຺ຊນ຺ຕິ, ກທາຈິ ກຣຫຈິ ອຸປ຺ປຊ຺ຊນ຺ຕິ. ອຸປ຺ປຊ຺ຊມານາ ຈ ພາລປຸຖຸຊ຺ຊນສ຺ສ ວິຍ ມທ຺ທນ຺ຕາ ຜຣນ຺ຕາ ຉາເທນ຺ຕາ ອນ຺ຘອນ຺ຘໍ ກໂຣນ຺ຕາ ນ ອຸປ຺ປຊ຺ຊນ຺ຕິ, ທ຺ວີຫິ ປນ ມຄ຺ເຄຫິ ປຫີນຕ຺ຕາ ມນ຺ທມນ຺ທາ ຕນຸກາກາຣາ ຫຸຕ຺ວາ ອຸປ຺ປຊ຺ຊນ຺ຕິ, ວີຕິກ຺ກມໍ ປາເປຕຸໍ ສມຕ຺ຖາ ນ ໂຫນ຺ຕິ. ເອວໍ ຕນຸຠູຕາ ອນາຄາມິມຄ຺ເຄນ ປຫີຍນ຺ຕິ ຣູປຣາຄາຕິ ຣູປຠເວ ຉນ຺ທຣາຄາ. ອຣູປຣາຄາຕິ ອຣູປຠເວ ຉນ຺ທຣາຄາ. ມານາຕິ ອຸນ຺ນຕິລກ຺ຂຓາ. ອຸທ຺ຘຈ຺ຈາຕິ ອວູປສມລກ຺ຂຓາ. ອວິຊ຺ຊາຍາຕິ ອນ຺ຘລກ຺ຂຓາຍ. ຠວຣາຄານຸສຍາຕິ ຣູປຣາຄາຣູປຣາຄວເສນ ປວຕ຺ຕຠວຣາຄານຸສຍາ.

໖໒. ອິທານິ ມຄ຺ຄຎາຓສໍວຓ຺ຓນໍ ກໂຣນ຺ໂຕ ອຊາຕໍ ຌາເປຕີຕິອາທິມາຫ. ຕຕ຺ຖ ຈ ອຊາຕໍ ຌາເປຕິ ຊາເຕນ, ຌານໍ ເຕນ ປວຸຈ຺ຈຕີຕິ ອຕ຺ຕໂນ ສນ຺ຕາເນ ປາຕຸຠູເຕນ ເຕນ ເຕນ ໂລກຸຕ຺ຕຣຊ຺ຌາເນນ ຕໍສມງ຺ຄີປຸຄ຺ຄໂລ ອຊາຕເມວ ຕໍ ຕໍ ກິເລສໍ ຌາເປຕິ ທຫຕິ ສມຸຈ຺ຉິນ຺ທຕິ, ເຕນ ກາຣເຓນ ຕໍ ໂລກຸຕ຺ຕຣໍ ຌານນ຺ຕິ ປວຸຈ຺ຈຕີຕິ ອຕ຺ໂຖ. ຌານວິໂມກ຺ເຂ ກຸສລຕາຕິ ຕສ຺ມິໍ ອຣິຍມຄ຺ຄສມ຺ປຍຸຕ຺ເຕ ວິຕກ຺ກາທິເກ ຌາເນ ຈ ວິໂມກ຺ຂສງ຺ຂາເຕ ອຣິຍມຄ຺ເຄ ຈ ອສມ຺ໂມຫວເສນ ກຸສລຕາຍ ປຐມມຄ຺ເຄເນວ ປຫີນາສຸ ນານາທິຏ຺ຐີສຸ ນ ກມ຺ປຕິ. ຌານໍ ນາມ ທຸວິຘໍ ອາຣມ຺ມຓູປນິຊ຺ຌານຎ຺ຈ ລກ຺ຂຓູປນິຊ຺ຌານຎ຺ຈ. ໂລກິຍປຐມຊ຺ຌານາທິກໍ ກສິຓາທິອາຣມ຺ມຓູປນິຊ຺ຌານຏ຺ເຐນ ຌານໍ, ວິປສ຺ສນາສງ຺ຂາຣານໍ ສຠາວສາມຎ຺ຎລກ຺ຂຓູປນິຊ຺ຌານຏ຺ເຐນ ຌານໍ, ໂລກຸຕ຺ຕຣໍ ນິພ຺ພາເນ ຕຖລກ຺ຂຓູປນິຊ຺ຌານຏ຺ເຐນ ຌານໍ. ອິຘ ປນ ໂຄຕ຺ຣຠຸນາປິ ສາຘາຣຓໍ ລກ຺ຂຓູປນິຊ຺ຌານຏ຺ຐໍ ອນາມສິຕ຺ວາ ອສາຘາຣເຓນ ກິເລສຌາປນຏ຺ເຐນ ຌານໍ ວຸຕ຺ຕໍ. ວິໂມກ຺ຂຏ຺ໂຐ ປເນຕ຺ຖ ນິພ຺ພານາຣມ຺ມເຓ ສຸຏ຺ຐຸ ອຘິມຸຈ຺ຈນຏ຺ໂຐ ກິເລເສຫິ ຈ ສຸຏ຺ຐຸ ມຸຈ຺ຈນຏ຺ໂຐ.

ສມາທຫິຕ຺ວາ ຍຖາ ເຈ ວິປສ຺ສຕີຕິ ອປ຺ປນູປຈາຣຂຓິກສມາຘີນໍ ອຎ຺ຎຕເຣນ ສມາຘິນາ ປຐມໍ ຈິຕ຺ຕສມາຘານໍ ກຕ຺ວາ ປຈ຺ຉາ ຍຖາ ວິປສ຺ສຕິ ຈ. ສມຸຈ຺ຈຍຕ຺ໂຖ ເຈ-ສທ຺ໂທ ວິປສ຺ສນໍ ສມຸຈ຺ຈິໂນຕິ. ວິປສ຺ສມາໂນ ຕຖາ ເຈ ສມາທເຫຕິ ວິປສ຺ສນາ ນາເມສາ ລູຂຠູຕາ ນິຣສ຺ສາທາ, ສມໂຖ ຈ ນາມ ສິນິທ຺ຘຠູໂຕ ສອສ຺ສາໂທ. ຕສ຺ມາ ຕາຍ ລູຂຠູຕໍ ຈິຕ຺ຕໍ ສິເນເຫຕຸໍ ວິປສ຺ສມາໂນ ຕຖາ ຈ ສມາທເຫ. ວິປສ຺ສມາໂນ ປຸນ ສມາຘິໍ ປວິສິຕ຺ວາ ຈິຕ຺ຕສມາຘານຎ຺ຈ ຕເຖວ ກເຣຍ຺ຍ, ຍເຖວ ວິປສ຺ສນນ຺ຕິ ອຕ຺ໂຖ. ອິຘ ເຈ-ສທ຺ໂທ ສມາທຫນໍ ສມຸຈ຺ຈິໂນຕິ. ອຸຠຍຕ຺ຖາປິ ຄາຖາພນ຺ຘານຸວຕ຺ຕເນນ ເຈ-ກາໂຣ ກໂຕ, ອຕ຺ໂຖ ປນ ຈ-ກາຣຕ຺ໂຖ ເອວ. ວິປສ຺ສນາ ຈ ສມໂຖ ຕທາ ອຫູຕິ ຍສ຺ມາ ສມຖວິປສ຺ສນານໍ ຍຸຄນທ຺ຘຠາເວ ສຕິ ອຣິຍມຄ຺ຄປາຕຸຠາໂວ ໂຫຕິ, ຕສ຺ມາ ອຣິຍມຄ຺ຄຊນນສມຕ຺ຖຕ຺ຕາ ຍທາ ຕທຸຠຍສມາໂຍໂຄ ໂຫຕິ, ຕທາ ວິປສ຺ສນາ ຈ ສມໂຖ ຈ ອຫຸ, ສມຖວິປສ຺ສນາ ຠູຕາ ນາມ ໂຫຕີຕິ ອຕ຺ໂຖ. ຕາ ຈ ສມຖວິປສ຺ສນາ ອຣິຍມຄ຺ຄາຠິມຸຂີກາເລ ຈ ມຄ຺ຄກ຺ຂເຓ ຈ ສມານຠາຄາ ຍຸຄນທ຺ຘາ ວຕ຺ຕເຣ ສມາໂນ ສໂມ ຠາໂຄ ໂກຏ຺ຐາໂສ ເອເຕສນ຺ຕິ ສມານຠາຄາ, ຍຸເຄ ນທ຺ຘາ ວິຍາຕິ ຍຸຄນທ຺ຘາ, ອຎ຺ຎມຎ຺ຎໍ ອນຕິວຕ຺ຕນຏ຺ເຐນ ສມຘຸຣາ ສມພລາຕິ ອຕ຺ໂຖ. ວິຕ຺ຖາໂຣ ປນສ຺ສ ຍຸຄນທ຺ຘກຖາຍໍ ອາວິຠວິສ຺ສຕິ.

ທຸກ຺ຂາ ສງ຺ຂາຣາ ສຸໂຂ, ນິໂຣໂຘ ອິຕິ ທສ຺ສນໍ. ທຸຠໂຕ ວຸຏ຺ຐິຕາ ປຎ຺ຎາ, ຜສ຺ເສຕິ ອມຕໍປທນ຺ຕິ ທຸກ຺ຂາ ສງ຺ຂາຣາ, ສຸໂຂ ນິໂຣໂຘ ນິພ຺ພານນ຺ຕິ ປຏິປນ຺ນສ຺ສ ຕໂຕ ນິພ຺ພານທສ຺ສນໍ ອຣິຍມຄ຺ຄຎາຓໍ ທຸຠໂຕ ວຸຏ຺ຐິຕາ ປຎ຺ຎາ ນາມ. ສາ ເອວ ຈ ປຎ຺ຎາ ອມຕໍ ປທໍ ນິພ຺ພານໍ ອາຣມ຺ມຓຜຸສເນນ ຜຸສຕິ, ປຏິລຠຕີຕິ ອຕ຺ໂຖ. ນິພ຺ພານຎ຺ຫິ ອຕປ຺ປກຏ຺ເຐນ ອມຕສທິສນ຺ຕິ ອມຕໍ, ນາສ຺ສ ມຕໍ ມຣຓໍ ວໂຍ ອຕ຺ຖີຕິປິ ອມຕໍ, ປຸພ຺ພຠາຄໂຕ ປຏ຺ຐາຍ ມຫຕາ ອຸສ຺ສາເຫນ ມຫຕິຍາ ປຏິປທາຍ ປຊ຺ຊຕິ ປຏິປຊ຺ຊີຍຕີຕິ ປທນ຺ຕິ ວຸຈ຺ຈຕິ.

ວິໂມກ຺ຂຈຣິຍໍ ຊານາຕີຕິ ວິໂມກ຺ຂປວຕ຺ຕິໍ ອສມ຺ໂມຫວເສນ ຊານາຕິ, ປຈ຺ຈເວກ຺ຂຓວເສນ ຊານາຕິ. ‘‘ທຸຠໂຕ ວຸຏ຺ຐາໂນ ວິໂມກ຺ໂຂ, ທຸຠໂຕ ວຸຏ຺ຐານາ ຈຕ຺ຕາໂຣ ວິໂມກ຺ຂາ, ທຸຠໂຕ ວຸຏ຺ຐານານໍ ອນຸໂລມາ ຈຕ຺ຕາໂຣ ວິໂມກ຺ຂາ, ທຸຠໂຕ ວຸຏ຺ຐານປຏິປ຺ປສ຺ສທ຺ຘິ ຈຕ຺ຕາໂຣ ວິໂມກ຺ຂາ’’ຕິ ຫິ ອຸປຣິ ວິໂມກ຺ຂກຖາຍໍເຍວ (ປຏິ. ມ. ໑.໒໐໙ ອາທໂຍ) ອາຄຕາ ວິໂມກ຺ຂຈຣິຍາ ເວທິຕພ຺ພາ. ເຕສໍ ວິຕ຺ຖາໂຣ ຕຕ຺ເຖວ ອາຄໂຕ. ນານຕ຺ເຕກຕ຺ຕໂກວິໂທຕິ ເຕສໍ ວິໂມກ຺ຂານໍ ນານາຠາເວ ເອກຠາເວ ຈ ກຸສໂລ. ທຸຠໂຕ ວຸຏ຺ຐານວິໂມກ຺ຂວເສນ ຫິ ເຕສໍ ເອກຕ຺ຕໍ, ຈຕຸອຣິຍມຄ຺ຄວເສນ ນານຕ຺ຕໍ, ເອເກກສ຺ສາປິ ວາ ອຣິຍມຄ຺ຄສ຺ສ ອນຸປສ຺ສນາເຠເທນ ນານຕ຺ຕໍ, ອຣິຍມຄ຺ຄຠາເວນ ເອກຕ຺ຕໍ ເວທິຕພ຺ພໍ. ທ຺ວິນ຺ນໍ ຎາຓານໍ ກຸສລຕາຕິ ທສ຺ສນສງ຺ຂາຕສ຺ສ ຈ ຠາວນາສງ຺ຂາຕສ຺ສ ຈາຕິ ອິເມສໍ ທ຺ວິນ຺ນໍ ຎາຓານໍ ກຸສລຕາຍ. ທສ຺ສນນ຺ຕິ ຫິ ໂສຕາປຕ຺ຕິມຄ຺ໂຄ. ໂສ ຫິ ປຐມໍ ນິພ຺ພານທສ຺ສນໂຕ ທສ຺ສນນ຺ຕິ ວຸຕ຺ໂຕ. ໂຄຕ຺ຣຠຸ ປນ ກິຎ຺ຈາປິ ປຐມຕຣໍ ນິພ຺ພານໍ ປສ຺ສຕິ, ຍຖາ ປນ ຣຎ຺ໂຎ ສນ຺ຕິກໍ ເກນຈິເທວ ກຣຓີເຍນ ອາຄໂຕ ປຸຣິໂສ ທູຣໂຕວ ຣຖິກາຍ ຈຣນ຺ຕໍ ຫຕ຺ຖິກ຺ຂນ຺ຘຄຕໍ ຣາຊານໍ ທິສ຺ວາປິ ‘‘ທິຏ຺ໂຐ ເຕ ຣາຊາ’’ຕິ ປຸຏ຺ໂຐ ທິສ຺ວາ ກຕ຺ຕພ຺ພກິຈ຺ຈສ຺ສ ອກຕຕ຺ຕາ ‘‘ນ ປສ຺ສາມີ’’ຕິ ອາຫ, ເອວເມວ ນິພ຺ພານໍ ທິສ຺ວາ ກຕ຺ຕພ຺ພສ຺ສ ກິເລສປ຺ປຫານສ຺ສາຠາວາ ນ ‘‘ທສ຺ສນ’’ນ຺ຕິ ວຸຈ຺ຈຕິ. ຕຎ຺ຫິ ຎາຓໍ ມຄ຺ຄສ຺ສ ອາວຊ຺ຊນຏ຺ຐາເນ ຕິຏ຺ຐຕິ. ຠາວນາຕິ ເສສມຄ຺ຄຕ຺ຕຍໍ. ຕຎ຺ຫິ ປຐມມຄ຺ເຄນ ທິຏ຺ຐສ຺ມິໍເຍວ ຘມ຺ເມ ຠາວນາວເສນ ອຸປ຺ປຊ຺ຊຕິ, ນ ອທິຏ຺ຐປຸພ຺ພໍ ກິຎ຺ຈິ ປສ຺ສຕິ, ຕສ຺ມາ ‘‘ຠາວນາ’’ຕິ ວຸຈ຺ຈຕິ. ເຫຏ຺ຐາ ປນ ຠາວນາມຄ຺ຄສ຺ສ ອປຣິນິຏ຺ຐິຕຕ຺ຕາ ‘‘ທ຺ວິນ຺ນໍ ຎາຓານ’’ນ຺ຕິ ອວຕ຺ວາ ໂສຕາປຕ຺ຕິສກທາຄາມິອນາຄາມິມຄ຺ຄລາຠິໂນ ສນ຺ຘາຍ ‘‘ຌານວິໂມກ຺ເຂ ກຸສລຕາ’’ຕິ ວຸຕ຺ຕໍ, ອຣຫຕ຺ຕມຄ຺ຄລາຠິໂນ ປນ ຠາວນາມຄ຺ຄສ຺ສ ປຣິນິຏ຺ຐິຕຕ຺ຕາ ‘‘ທ຺ວິນ຺ນໍ ຎາຓານໍ ກຸສລຕາ’’ຕິ ວຸຕ຺ຕນ຺ຕິ ເວທິຕພ຺ພໍ.

ມຄ຺ຄຎາຓນິທ຺ເທສວຓ຺ຓນາ ນິຏ຺ຐິຕາ.