ຠາເວຕພ຺ພນິທ຺ເທສວຓ຺ຓນາ

໒໕. ຠາເວຕພ຺ພນິທ຺ເທເສ ກາຍຄຕາສຕີຕິ ກາຍຄຕາສຕິສຸຕ຺ຕນ຺ເຕ (ມ. ນິ. ໓.໑໕໓ ອາທໂຍ) ວຸຕ຺ຕາ ອານາປານຈຕຸອິຣິຍາປຖຂຸທ຺ທກອິຣິຍາປຖທ຺ວຕ຺ຕິໍສາກາຣຈຕຸຘາຕຸນວສິວຖິກາປຏິກູລ- ວວຕ຺ຖາປກມນສິກາຣສມ຺ປຍຸຕ຺ຕາ ຍຖານຸຣູປໍ ຣູປຊ຺ຌານສມ຺ປຍຸຕ຺ຕາ ຈ ສຕິ. ສາ ຫິ ເຕສຸ ກາເຍສຸ ຄຕາ ປວຕ຺ຕາຕິ ກາຍຄຕາຕິ ວຸຈ຺ຈຕິ. ສາຕສຫຄຕາຕິ ມຘຸຣສຸຂເວທຍິຕສງ຺ຂາເຕນ ສາເຕນ ສຫ ເອກຸປ຺ປາທາທິຠາວໍ ຄຕາ. ຕພ຺ຠາເວ ໂວກິຓ຺ເຓ ອາຣມ຺ມເຓ ນິສ຺ສເຍ ສໍສຏ຺ເຐ ທິສ຺ສຕິ ສຫຄຕສທ຺ໂທ ປຎ຺ຈສຸ ອຕ຺ເຖສຸ ຊິນວຈເນ. ‘‘ຍາຍໍ ຕຓ຺ຫາ ໂປໂນພ຺ຠວິກາ ນນ຺ທິຣາຄສຫຄຕາ’’ຕິ (ວິຠ. ໒໐໓) ເອຕ຺ຖ ຕພ຺ຠາເວ, ນນ຺ທິຣາຄຠູຕາຕິ ອຕ຺ໂຖ. ‘‘ຍາ, ຠິກ຺ຂເວ, ວີມໍສາ ໂກສຊ຺ຊສຫຄຕາ ໂກສຊ຺ຊສມ຺ປຍຸຕ຺ຕາ’’ຕິ (ສໍ. ນິ. ໕.໘໓໒) ເອຕ຺ຖ ໂວກິຓ຺ເຓ, ອນ຺ຕຣນ຺ຕຣາ ອຸປ຺ປຊ຺ຊມາເນນ ໂກສຊ຺ເຊນ ໂວກິຓ຺ຓາຕິ ອຕ຺ໂຖ. ‘‘ລາຠີ ໂຫຕິ ຣູປສຫຄຕານໍ ວາ ສມາປຕ຺ຕີນໍ ອຣູປສຫຄຕານໍ ວາ ສມາປຕ຺ຕີນ’’ນ຺ຕິ (ປຸ. ປ. ໓-໘) ເອຕ຺ຖ ອາຣມ຺ມເຓ, ຣູປາຣູປາຣມ຺ມຓານນ຺ຕິ ອຕ຺ໂຖ. ‘‘ອຏ຺ຐິກສຎ຺ຎາສຫຄຕໍ ສຕິສມ຺ໂພຊ຺ຌງ຺ຄໍ ຠາເວຕີ’’ຕິ (ສໍ. ນິ. ໕.໒໓໘) ເອຕ຺ຖ ນິສ຺ສເຍ, ອຏ຺ຐິກສຎ຺ຎານິສ຺ສຍໍ ອຏ຺ຐິກສຎ຺ຎໍ ຠາເວຕ຺ວາ ປຏິລທ຺ຘນ຺ຕິ ອຕ຺ໂຖ. ‘‘ອິທໍ ສຸຂໍ ອິມາຍ ປີຕິຍາ ສຫຄຕໍ ໂຫຕິ ສຫຊາຕໍ ສມ຺ປຍຸຕ຺ຕ’’ນ຺ຕິ (ວິຠ. ໕໗໘) ເອຕ຺ຖ ສໍສຏ຺ເຐ, ສມ຺ມິສ຺ສນ຺ຕິ ອຕ຺ໂຖ. ອິມສ຺ມິມ຺ປິ ປເທ ສໍສຏ຺ໂຐ ອຘິປ຺ເປໂຕ. ສາຕສໍສຏ຺ຐາ ຫິ ສາຕສຫຄຕາຕິ ວຸຕ຺ຕາ. ສາ ຫິ ຐເປຕ຺ວາ ຈຕຸຕ຺ຖໍ ຌານໍ ເສເສສຸ ສາຕສຫຄຕາ ໂຫຕິ, ສຕິປິ ຈ ອຸເປກ຺ຂາສຫຄຕຕ຺ເຕ ເຍຠຸຍ຺ຍວເສນ ສາຕສຫຄຕາຕິ ວຸຕ຺ຕາ, ປຸຣິມຊ຺ຌານມູລກຕ຺ຕາ ວາ ຈຕຸຕ຺ຖຊ຺ຌານສ຺ສ ສາຕສຫຄຕາຍ ອຸເປກ຺ຂາສຫຄຕາປິ ວຸຕ຺ຕາວ ໂຫຕິ, ອຸເປກ຺ຂາຍ ປນ ສນ຺ເຕ ສຸເຂ ວຸຕ຺ຕຕ຺ຕາ ຠຄວຕາ ສາຕສຫຄຕາຕິ ຈຕຸຕ຺ຖຊ຺ຌານສມ຺ປຍຸຕ຺ຕາປິ ວຸຕ຺ຕາວ ໂຫຕິ.

ສມໂຖ ຈ ວິປສ຺ສນາ ຈາຕິ ກາມຈ຺ຉນ຺ທາທໂຍ ປຈ຺ຈນີກຘມ຺ເມ ສເມຕິ ວິນາເສຕີຕິ ສມໂຖ. ສມາຘິສ຺ເສຕໍ ນາມໍ. ອນິຈ຺ຈຕາທິວເສນ ວິວິເຘຫິ ອາກາເຣຫິ ຘມ຺ເມ ປສ຺ສຕີຕິ ວິປສ຺ສນາ. ປຎ຺ຎາເຍຕໍ ນາມໍ. ອິເມ ປນ ທ຺ເວ ທສຸຕ຺ຕຣປຣິຍາເຍ ປຸພ຺ພຠາຄາຕິ ວຸຕ຺ຕາ, ສງ຺ຄີຕິປຣິຍາເຍ ຈ ໂລກິຍໂລກຸຕ຺ຕຣມິສ຺ສກາຕິ. ຕໂຍ ສມາຘີຕິ ສວິຕກ຺ໂກ ສວິຈາໂຣ ສມາຘິ, ອວິຕກ຺ໂກ ວິຈາຣມຕ຺ໂຕ ສມາຘິ, ອວິຕກ຺ໂກ ອວິຈາໂຣ ສມາຘິ. ສມ຺ປໂຍຄວເສນ ວຕ຺ຕມາເນນ ສຫ ວິຕກ຺ເກນ ສວິຕກ຺ໂກ, ສຫ ວິຈາເຣນ ສວິຈາໂຣ. ໂສ ຂຓິກສມາຘິ, ວິປສ຺ສນາສມາຘິ, ອຸປຈາຣສມາຘິ, ປຐມຊ຺ຌານສມາຘິ. ນຕ຺ຖິ ເອຕສ຺ສ ວິຕກ຺ໂກຕິ ອວິຕກ຺ໂກ. ວິຕກ຺ກວິຈາເຣສຸ ວິຈາໂຣ ມຕ຺ຕາ ປຣມາ ປມາຓໍ ເອຕສ຺ສາຕິ ວິຈາຣມຕ຺ໂຕ, ວິຈາຣໂຕ ອຸຕ຺ຕຣິ ວິຕກ຺ເກນ ສມ຺ປໂຍຄໍ ນ ຄຈ຺ຉຕີຕິ ອຕ຺ໂຖ. ໂສ ປຎ຺ຈກນເຍ ທຸຕິຍຊ຺ຌານສມາຘິ, ຕທຸຠຍວິຣຫິໂຕ ອວິຕກ຺ໂກ ອວິຈາໂຣ ສມາຘິ. ໂສ ຈຕຸກ຺ກນເຍ ທຸຕິຍຊ຺ຌານາທິ, ປຎ຺ຈກນເຍ ຕຕິຍຊ຺ຌານາທິ ຣູປາວຈຣສມາຘິ. ອິເມ ຕໂຍປິ ໂລກິຍາ ເອວ. ສງ຺ຄີຕິປຣິຍາເຍ ອປເຣປິ ຕໂຍ ສມາຘີ ວຸຕ຺ຕາ – ‘‘ສຸຎ຺ຎໂຕ ສມາຘິ, ອນິມິຕ຺ໂຕ ສມາຘິ, ອປ຺ປຓິຫິໂຕ ສມາຘີ’’ຕິ (ທີ. ນິ. ໓.໓໐໕). ນ ເຕ ອິຘ ອຘິປ຺ເປຕາ.

ຈຕ຺ຕາໂຣ ສຕິປຏ຺ຐານາຕິ ກາຍານຸປສ຺ສນາສຕິປຏ຺ຐານໍ, ເວທນານຸປສ຺ສນາສຕິປຏ຺ຐານໍ, ຈິຕ຺ຕານຸປສ຺ສນາສຕິປຏ຺ຐານໍ, ຘມ຺ມານຸປສ຺ສນາສຕິປຏ຺ຐານໍ. ປຸພ຺ພຠາເຄ ຈຸທ຺ທສວິເຘນ ກາຍໍ ປຣິຄ຺ຄຓ຺ຫໂຕ ກາຍານຸປສ຺ສນາສຕິປຏ຺ຐານໍ, ນວວິເຘນ ເວທນໍ ປຣິຄ຺ຄຓ຺ຫໂຕ ເວທນານຸປສ຺ສນາສຕິປຏ຺ຐານໍ, ໂສຬສວິເຘນ ຈິຕ຺ຕໍ ປຣິຄ຺ຄຓ຺ຫໂຕ ຈິຕ຺ຕານຸປສ຺ສນາສຕິປຏ຺ຐານໍ, ປຎ຺ຈວິເຘນ ຘມ຺ເມ ປຣິຄ຺ຄຓ຺ຫໂຕ ຘມ຺ມານຸປສ຺ສນາສຕິປຏ຺ຐານໍ ເວທິຕພ຺ພໍ. ໂລກຸຕ຺ຕຣໍ ປນ ອິຘ ນ ອຘິປ຺ເປຕໍ. ປຎ຺ຈງ຺ຄິໂກ ສມາຘີຕິ ປຎ຺ຈ ອງ຺ຄານິ ອສ຺ສ ສນ຺ຕີຕິ ປຎ຺ຈງ຺ຄິໂກ, ຈຕຸຕ຺ຖຊ຺ຌານສມາຘິ. ປີຕິຜຣຓຕາ, ສຸຂຜຣຓຕາ, ເຈໂຕຜຣຓຕາ, ອາໂລກຜຣຓຕາ, ປຈ຺ຈເວກ຺ຂຓນິມິຕ຺ຕນ຺ຕິ ປຎ຺ຈ ອງ຺ຄານິ. ປີຕິໍ ຜຣມານາ ອຸປ຺ປຊ຺ຊຕີຕິ ທ຺ວີສຸ ຌາເນສຸ ປຎ຺ຎາ ປີຕິຜຣຓຕາ ນາມ. ສຸຂໍ ຜຣມານາ ອຸປ຺ປຊ຺ຊຕີຕິ ຕີສຸ ຌາເນສຸ ປຎ຺ຎາ ສຸຂຜຣຓຕາ ນາມ. ປເຣສໍ ເຈໂຕ ຜຣມານາ ອຸປ຺ປຊ຺ຊຕີຕິ ເຈໂຕປຣິຍປຎ຺ຎາ ເຈໂຕຜຣຓຕາ ນາມ. ອາໂລກໍ ຜຣມານາ ອຸປ຺ປຊ຺ຊຕີຕິ ທິພ຺ພຈກ຺ຂຸປຎ຺ຎາ ອາໂລກຜຣຓຕາ ນາມ. ປຈ຺ຈເວກ຺ຂຓຎາຓໍ ປຈ຺ຈເວກ຺ຂຓນິມິຕ຺ຕໍ ນາມ. ວຸຕ຺ຕມ຺ປິ ເຈຕໍ –

‘‘ທ຺ວີສຸ ຌາເນສຸ ປຎ຺ຎາ ປີຕິຜຣຓຕາ, ຕີສຸ ຌາເນສຸ ປຎ຺ຎາ ສຸຂຜຣຓຕາ, ປຣຈິຕ຺ຕປຎ຺ຎາ ເຈໂຕຜຣຓຕາ, ທິພ຺ພຈກ຺ຂຸປຎ຺ຎາ ອາໂລກຜຣຓຕາ, ຕມ຺ຫາ ຕມ຺ຫາ ສມາຘິມ຺ຫາ ວຸຏ຺ຐິຕສ຺ສ ປຈ຺ຈເວກ຺ຂຓຎາຓໍ ປຈ຺ຈເວກ຺ຂຓນິມິຕ຺ຕ’’ນ຺ຕິ (ວິຠ. ໘໐໔).

ຕຎ຺ຫິ ວຸຏ຺ຐິຕສມາຘິສ຺ສ ປວຕ຺ຕາກາຣຄຫຓໂຕ ນິມິຕ຺ຕນ຺ຕິ ວຸຕ຺ຕໍ. ຕຕ຺ຖ ຈ ປີຕິຜຣຓຕາ ສຸຂຜຣຓຕາ ທ຺ເວ ປາທາ ວິຍ, ເຈໂຕຜຣຓຕາ ອາໂລກຜຣຓຕາ ທ຺ເວ ຫຕ຺ຖາ ວິຍ, ອຠິຎ຺ຎາປາທກໍ ຈຕຸຕ຺ຖຊ຺ຌານໍ ມຊ຺ຌິມກາໂຍ ວິຍ, ປຈ຺ຈເວກ຺ຂຓນິມິຕ຺ຕໍ ສີສໍ ວິຍ. ອິຕິ ອາຍສ຺ມາ ຘມ຺ມເສນາປຕິ ສາຣິປຸຕ຺ຕຕ຺ເຖໂຣ ປຎ຺ຈງ຺ຄິກໍ ສມ຺ມາສມາຘິໍ ອງ຺ຄປຈ຺ຈງ຺ຄສມ຺ປນ຺ນໍ ປຸຣິສໍ ວິຍ ກຕ຺ວາ ທສ຺ເສສິ.

ຉ ອນຸສ຺ສຕິຏ຺ຐານານີຕິ ປຸນປ຺ປຸນໍ ອຸປ຺ປຊ຺ຊນໂຕ ສຕິໂຍ ເອວ ອນຸສ຺ສຕິໂຍ, ປວຕ຺ຕິຕພ຺ພຏ຺ຐານສ຺ມິໍເຍວ ປວຕ຺ຕຕ຺ຕາ ສທ຺ຘາປພ຺ພຊິຕສ຺ສ ກຸລປຸຕ຺ຕສ຺ສ ອນຸຣູປາ ສຕິໂຍຕິປິ ອນຸສ຺ສຕິໂຍ, ອນຸສ຺ສຕິໂຍ ເອວ ປີຕິອາທີນໍ ຐານຕ຺ຕາ ອນຸສ຺ສຕິຏ຺ຐານານິ. ກຕມານິ ຉ? ພຸທ຺ຘານຸສ຺ສຕິ ຘມ຺ມານຸສ຺ສຕິ ສງ຺ຆານຸສ຺ສຕິ ສີລານຸສ຺ສຕິ ຈາຄານຸສ຺ສຕິ ເທວຕານຸສ຺ສຕິ (ທີ. ນິ. ໓.໓໒໗). ໂພຊ຺ຌງ຺ຄາຕິ ໂພຘິຍາ, ໂພຘິສ຺ສ ວາ ອງ຺ຄາ. ອິທໍ ວຸຕ຺ຕໍ ໂຫຕິ – ຍາ ເອສາ ຘມ຺ມສາມຄ຺ຄີ ຍາຍ ໂລກຸຕ຺ຕຣມຄ຺ຄກ຺ຂເຓ ອຸປ຺ປຊ຺ຊມານາຍ ລີນຸທ຺ຘຈ຺ຈປຕິຏ຺ຐານາຍູຫນກາມສຸຂຕ຺ຕກິລມຖານຸໂຍຄອຸຈ຺ເຉທສສ຺ສຕາຠິນິເວສາທີນໍ ອເນເກສໍ ອຸປທ຺ທວານໍ ປຏິປກ຺ຂຠູຕາຍ ສຕິຘມ຺ມວິຈຍວີຣິຍປີຕິປສ຺ສທ຺ຘິສມາຘິອຸເປກ຺ຂາສງ຺ຂາຕາຍ ຘມ຺ມສາມຄ຺ຄິຍາ ອຣິຍສາວໂກ ພຸຊ຺ຌຕີຕິ ກຕ຺ວາ ໂພຘີຕິ ວຸຈ຺ຈຕິ. ພຸຊ຺ຌຕີຕິ ກິເລສສນ຺ຕານນິທ຺ທາຍ ວຸຏ຺ຐຫຕິ, ຈຕ຺ຕາຣິ ວາ ອຣິຍສຈ຺ຈານິ ປຏິວິຊ຺ຌຕິ, ນິພ຺ພານເມວ ວາ ສຈ຺ຉິກໂຣຕິ, ຕສ຺ສາ ຘມ຺ມສາມຄ຺ຄິສງ຺ຂາຕາຍ ໂພຘິຍາ ອງ຺ຄາຕິປິ ໂພຊ຺ຌງ຺ຄາ ຌານງ຺ຄມຄ຺ຄງ຺ຄາທໂຍ ວິຍ. ໂຍ ປເນສ ຍຖາວຸຕ຺ຕປ຺ປກາຣາຍ ເອຕາຍ ຘມ຺ມສາມຄ຺ຄິຍາ ພຸຊ຺ຌຕີຕິ ກຕ຺ວາ ອຣິຍສາວໂກ ໂພຘີຕິ ວຸຈ຺ຈຕິ, ຕສ຺ສ ໂພຘິສ຺ສ ອງ຺ຄາຕິປິ ໂພຊ຺ຌງ຺ຄາ ເສນງ຺ຄຣຖງ຺ຄາທໂຍ ວິຍ. ເຕນາຫຸ ອຏ຺ຐກຖາຈຣິຍາ ‘‘ພຸຊ຺ຌນກສ຺ສ ປຸຄ຺ຄລສ຺ສ ອງ຺ຄາຕິ ວາ ໂພຊ຺ຌງ຺ຄາ’’ຕິ. ອປິຈ ‘‘ໂພຊ຺ຌງ຺ຄາຕິ ເກນຏ຺ເຐນ ໂພຊ຺ຌງ຺ຄາ, ໂພຘາຍ ສໍວຕ຺ຕນ຺ຕີຕິ ໂພຊ຺ຌງ຺ຄາ’’ຕິອາທິນາ (ປຏິ. ມ. ໒.໑໗) ນເຍນ ໂພຊ຺ຌງ຺ຄຏ຺ໂຐ ເວທິຕພ຺ໂພ. ອຣິໂຍ ອຏ຺ຐງ຺ຄິໂກ ມຄ຺ໂຄຕິ ຕໍຕໍມຄ຺ຄວຊ຺ຌກິເລເສຫິ ອາຣກຕ຺ຕາ ອຣິຍຠາວກຣຕ຺ຕາ ອຣິຍຜລປຏິລາຠກຣຕ຺ຕາ ຈ ອຣິໂຍ. ອຏ຺ຐ ອງ຺ຄານິ ອສ຺ສາຕິ ອຏ຺ຐງ຺ຄິໂກ. ໂສຍໍ ຈຕຸຣງ຺ຄິກາ ວິຍ ເສນາ, ປຎ຺ຈງ຺ຄິກໍ ວິຍ ຈ ຕູຣິຍໍ ອງ຺ຄມຕ຺ຕເມວ ໂຫຕິ, ອງ຺ຄວິນິມຸຕ຺ໂຕ ນຕ຺ຖິ. ໂພຊ຺ຌງ຺ຄມຄ຺ຄງ຺ຄາ ໂລກຸຕ຺ຕຣາ, ທສຸຕ຺ຕຣປຣິຍາເຍນ ປຸພ຺ພຠາຄາປິ ລພ຺ຠນ຺ຕິ.

ນວ ປາຣິສຸທ຺ຘິປຘານິຍງ຺ຄານີຕິ ສີລວິສຸທ຺ຘິ ປາຣິສຸທ຺ຘິປຘານິຍງ຺ຄໍ, ຈິຕ຺ຕວິສຸທ຺ຘິ ປາຣິສຸທ຺ຘິປຘານິຍງ຺ຄໍ, ທິຏ຺ຐິວິສຸທ຺ຘິ ປາຣິສຸທ຺ຘິປຘານິຍງ຺ຄໍ, ກງ຺ຂາວິຕຣຓວິສຸທ຺ຘິ ປາຣິສຸທ຺ຘິປຘານິຍງ຺ຄໍ, ມຄ຺ຄາມຄ຺ຄຎາຓທສ຺ສນວິສຸທ຺ຘິ ປາຣິສຸທ຺ຘິປຘານິຍງ຺ຄໍ, ປຏິປທາຎາຓທສ຺ສນວິສຸທ຺ຘິ ປາຣິສຸທ຺ຘິປຘານິຍງ຺ຄໍ, ຎາຓທສ຺ສນວິສຸທ຺ຘິ ປາຣິສຸທ຺ຘິປຘານິຍງ຺ຄໍ, ປຎ຺ຎາ ປາຣິສຸທ຺ຘິປຘານິຍງ຺ຄໍ, ວິມຸຕ຺ຕິ ປາຣິສຸທ຺ຘິປຘານິຍງ຺ຄໍ (ທີ. ນິ. ໓.໓໕໙). ສີລວິສຸທ຺ຘີຕິ ວິສຸທ຺ຘິໍ ປາເປຕຸໍ ສມຕ຺ຖໍ ຈຕຸປາຣິສຸທ຺ຘິສີລໍ. ຕຎ຺ຫິ ທຸສ຺ສີລ຺ຍມລໍ ວິໂສເຘຕິ. ປາຣິສຸທ຺ຘິປຘານິຍງ຺ຄນ຺ຕິ ປຣິສຸທ຺ຘຠາວສ຺ສ ປຘານໍ ອຸຕ຺ຕມໍ ອງ຺ຄໍ. ຈິຕ຺ຕວິສຸທ຺ຘີຕິ ວິປສ຺ສນາຍ ປທຏ຺ຐານຠູຕາ ປຄຸຓາ ອຏ຺ຐ ສມາປຕ຺ຕິໂຍ. ຕາ ຫິ ກາມຈ຺ຉນ຺ທາທິຈິຕ຺ຕມລໍ ວິໂສເຘນ຺ຕິ. ທິຏ຺ຐິວິສຸທ຺ຘີຕິ ສປ຺ປຈ຺ຈຍນາມຣູປທສ຺ສນໍ. ຕຎ຺ຫິ ສຕ຺ຕທິຏ຺ຐິມລໍ ວິໂສເຘຕິ. ກງ຺ຂາວິຕຣຓວິສຸທ຺ຘີຕິ ປຈ຺ຈຍາກາຣຎາຓໍ. ເຕນ ຫິ ຕີສຸ ອທ຺ຘາສຸ ປຈ຺ຈຍວເສນ ຘມ຺ມາ ປວຕ຺ຕນ຺ຕີຕິ ປສ຺ສນ຺ໂຕ ຕີສຸປິ ອທ຺ຘາສຸ ສຕ຺ຕກງ຺ຂາມລໍ ວິຕຣນ຺ໂຕ ວິສຸຊ຺ຌຕິ. ມຄ຺ຄາມຄ຺ຄຎາຓທສ຺ສນວິສຸທ຺ຘີຕິ ອຸທຍພ຺ພຍານຸປສ຺ສນກ຺ຂເຓ ອຸປ຺ປນ຺ນາ ໂອຠາສຎາຓປີຕິປສ຺ສທ຺ຘິສຸຂອຘິໂມກ຺ຂປຄ຺ຄຫອຸປຏ຺ຐານອຸເປກ຺ຂານິກນ຺ຕີຕິ ທສ ວິປສ຺ສນຸປກ຺ກິເລສາ, ນ ມຄ຺ໂຄ, ວີຖິປຏິປນ຺ນໍ ອຸທຍພ຺ພຍຎາຓໍ ມຄ຺ໂຄຕິ ເອວໍ ມຄ຺ຄາມຄ຺ເຄ ຎາຓໍ ນາມ. ເຕນ ຫິ ອມຄ຺ຄມລໍ ວິໂສເຘຕິ. ປຏິປທາຎາຓທສ຺ສນວິສຸທ຺ຘີຕິ ວີຖິປຏິປນ຺ນໍ ອຸທຍພ຺ພຍານຸປສ຺ສນາຎາຓໍ ຠງ຺ຄານຸປສ຺ສນາຎາຓໍ ຠຍຕຸປຏ຺ຐານານຸປສ຺ສນາຎາຓໍ ອາທີນວານຸປສ຺ສນາຎາຓໍ ນິພ຺ພິທານຸປສ຺ສນາຎາຓໍ ມຸຎ຺ຈິຕຸກມ຺ຍຕາຎາຓໍ ປຏິສງ຺ຂານຸປສ຺ສນາຎາຓໍ ສງ຺ຂາຣຸເປກ຺ຂາຎາຓໍ ອນຸໂລມຎາຓນ຺ຕິ ອິມານິ ນວ ວິປສ຺ສນາຎາຓານິ. ຕານິ ຫິ ນິຈ຺ຈສຎ຺ຎາທິມລໍ ວິໂສເຘນ຺ຕິ. ຎາຓທສ຺ສນວິສຸທ຺ຘີຕິ ຈຕຸອຣິຍມຄ຺ຄປຎ຺ຎາ. ສາ ຫິ ສມຸຈ຺ເຉທໂຕ ສກສກມຄ຺ຄວຊ຺ຌກິເລສມລໍ ວິໂສເຘຕິ. ປຎ຺ຎາຕິ ອຣຫຕ຺ຕຜລປຎ຺ຎາ. ວິມຸຕ຺ຕີຕິ ອຣຫຕ຺ຕຜລວິມຸຕ຺ຕິ.

ທສ ກສິຓາຍຕນານີຕິ ‘‘ປຖວີກສິຓເມໂກ ສຎ຺ຊານາຕິ ອຸທ຺ຘໍ ອໂຘ ຕິຣິຍໍ ອທ຺ວຍໍ ອປ຺ປມາຓໍ, ອາໂປກສິຓເມໂກ ສຎ຺ຊານາຕິ…ເປ… ເຕໂຊກສິຓເມໂກ ສຎ຺ຊານາຕິ…ເປ… ວາໂຍກສິຓເມໂກ ສຎ຺ຊານາຕິ…ເປ… ນີລກສິຓເມໂກ ສຎ຺ຊານາຕິ…ເປ… ປີຕກສິຓເມໂກ ສຎ຺ຊານາຕິ…ເປ… ໂລຫິຕກສິຓເມໂກ ສຎ຺ຊານາຕິ…ເປ… ໂອທາຕກສິຓເມໂກ ສຎ຺ຊານາຕິ…ເປ… ອາກາສກສິຓເມໂກ ສຎ຺ຊານາຕິ…ເປ… ວິຎ຺ຎາຓກສິຓເມໂກ ສຎ຺ຊານາຕິ ອຸທ຺ຘໍ ອໂຘ ຕິຣິຍໍ ອທ຺ວຍໍ ອປ຺ປມາຓ’’ນ຺ຕິ (ອ. ນິ. ໑໐.໒໕; ທີ. ນິ. ໓.໓໖໐) ເອວໍ ວຸຕ຺ຕານິ ທສ. ເອຕານິ ຫິ ສກລຜຣຓຏ຺ເຐນ ກສິຓານິ, ຕທາຣມ຺ມຓານໍ ຘມ຺ມານໍ ເຂຕ຺ຕຏ຺ເຐນ ອຘິຏ຺ຐານຏ຺ເຐນ ວາ ອາຍຕນານິ. ອຸທ຺ຘນ຺ຕິ ອຸປຣິຄຄນຕລາຠິມຸຂໍ. ອໂຘຕິ ເຫຏ຺ຐາຠູມິຕລາຠິມຸຂໍ. ຕິຣິຍນ຺ຕິ ເຂຕ຺ຕມຓ຺ຑລມິວ ສມນ຺ຕາ ປຣິຈ຺ຉິນ຺ນໍ. ເອກຈ຺ໂຈ ຫິ ອຸທ຺ຘເມວ ກສິຓໍ ວຑ຺ເຒຕິ ເອກຈ຺ໂຈ ອໂຘ, ເອກຈ຺ໂຈ ສມນ຺ຕໂຕ. ເອໂກປິ ເຕນ ເຕນ ວາ ກາຣເຓນ ເອວໍ ປສາເຣຕິ ອາໂລກມິວ ຣູປທສ຺ສນກາໂມ. ເຕນ ວຸຕ຺ຕໍ – ‘‘ປຖວີກສິຓເມໂກ ສຎ຺ຊານາຕິ ອຸທ຺ຘໍ ອໂຘ ຕິຣິຍ’’ນ຺ຕິ (ອ. ນິ. ໑໐.໒໕; ທີ. ນິ. ໓.໓໖໐). ອທ຺ວຍນ຺ຕິ ອິທໍ ປນ ເອກສ຺ສ ອຎ຺ຎຠາວານຸປຄມນຕ຺ຖໍ ວຸຕ຺ຕໍ. ຍຖາ ຫິ ອຸທກໍ ປວິຏ຺ຐສ຺ສ ສພ຺ພທິສາສຸ ອຸທກເມວ ໂຫຕິ ນ ອຎ຺ຎໍ, ເອວເມວ ປຖວີກສິຓໍ ປຖວີກສິຓເມວ ໂຫຕິ, ນຕ຺ຖິ ຕສ຺ສ ອຎ຺ຎກສິຓສມ຺ເຠໂທຕິ. ເອສ ນໂຍ ສພ຺ພຕ຺ຖ. ອປ຺ປມາຓນ຺ຕິ ອິທໍ ຕສ຺ສ ຕສ຺ສ ຜຣຓອປ຺ປມາຓວເສນ ວຸຕ຺ຕໍ. ຕຎ຺ຫິ ມນສາ ຜຣນ຺ໂຕ ສກລເມວ ຜຣຕິ, ນ ‘‘ອຍມສ຺ສ ອາທິ ອິທໍ ມຊ຺ຌ’’ນ຺ຕິ ປມາຓໍ ຄຓ຺ຫາຕີຕິ. ອາກາສກສິຓນ຺ຕິ ກສິຓຸຄ຺ຆາຏິມາກາໂສ ປຣິຈ຺ເຉທາກາສກສິຓຎ຺ຈ. ວິຎ຺ຎາຓກສິຓນ຺ຕິ ກສິຓຸຄ຺ຆາຏິມາກາເສ ປວຕ຺ຕວິຎ຺ຎາຓໍ. ຕຕ຺ຖ ກສິຓວເສນ ກສິຓຸຄ຺ຆາຏິມາກາເສ, ກສິຓຸຄ຺ຆາຏິມາກາສວເສນ ຕຕ຺ຖ ປວຕ຺ຕວິຎ຺ຎາເຓ ອຸທ຺ຘໍອໂຘຕິຣິຍຕາ ເວທິຕພ຺ພາ, ປຣິຈ຺ເຉທາກາສກສິຓສ຺ສປິ ວຑ຺ຒນີຍຕ຺ຕາ ຕສ຺ສ ວເສນປີຕິ.

໒໖. ອິທານິ ຠາວນາປເຠທໍ ທສ຺ເສນ຺ໂຕ ທ຺ເວ ຠາວນາຕິອາທິມາຫ. ຕຕ຺ຖ ໂລກິຍາຕິອາທີສຸ ໂລໂກ ວຸຈ຺ຈຕິ ລຸຊ຺ຊນປລຸຊ຺ຊນຏ຺ເຐນ ວຏ຺ຏໍ, ຕສ຺ມິໍ ປຣິຍາປນ຺ນຠາເວນ ໂລເກ ນິຍຸຕ຺ຕາຕິ ໂລກິຍາ, ໂລກິຍານໍ ຘມ຺ມານໍ ຠາວນາ ໂລກິຍາ. ກິຎ຺ຈາປິ ຘມ຺ມານໍ ຠາວນາຕິ ໂວຫາຣວເສນ ວຸຈ຺ຈຕິ, ເຕຫິ ປນ ວິສຸໍ ຠາວນາ ນຕ຺ຖິ. ເຕ ເອວ ຫິ ຘມ຺ມາ ຠາວິຍມານາ ຠາວນາຕິ ວຸຈ຺ຈນ຺ຕິ. ອຸຕ຺ຕິຓ຺ຓາຕິ ອຸຕ຺ຕຣາ, ໂລເກ ອປຣິຍາປນ຺ນຠາເວນ ໂລກໂຕ ອຸຕ຺ຕຣາຕິ ໂລກຸຕ຺ຕຣາ.

ຣູປຠວສງ຺ຂາເຕ ຣູເປ ອວຈຣນ຺ຕີຕິ ຣູປາວຈຣາ. ກຸສລສທ຺ໂທ ປເນຕ຺ຖ ອາໂຣຄ຺ຍອນວຊ຺ຊເຉກສຸຂວິປາເກສຸ ທິສ຺ສຕິ. ‘‘ກຈ຺ຈິ ນຸ ໂຠໂຕ ກຸສລໍ? ກຈ຺ຈິ ໂຠໂຕ ອນາມຍ’’ນ຺ຕິອາທີສຸ (ຊາ. ໑.໑໕.໑໔໖; ໒.໒໐.໑໒໙) ອາໂຣຄ຺ເຍ. ‘‘ກຕໂມ ປນ, ຠນ຺ເຕ, ກາຍສມາຈາໂຣ ກຸສໂລ? ໂຍ ໂຂ, ມຫາຣາຊ, ກາຍສມາຈາໂຣ ອນວຊ຺ໂຊ’’ຕິ (ມ. ນິ. ໒.໓໖໑) ຈ ‘‘ປຸນ ຈປຣໍ, ຠນ຺ເຕ, ເອຕທານຸຕ຺ຕຣິຍໍ, ຍຖາ ຠຄວາ ຘມ຺ມໍ ເທເສຕິ ກຸສເລສຸ ຘມ຺ເມສູ’’ຕິ (ທີ. ນິ. ໓.໑໔໕) ຈ ເອວມາທີສຸ ອນວຊ຺ເຊ. ‘‘ຕໍ ກິໍ ມຎ຺ຎສິ, ຣາຊກຸມາຣ, ກຸສໂລ ຕ຺ວໍ ຣຖສ຺ສ ອງ຺ຄປຈ຺ຈງ຺ຄານ’’ນ຺ຕິ? (ມ. ນິ. ໒.໘໗) ‘‘ກຸສລາ ນຈ຺ຈຄີຕສ຺ສ ສິກ຺ຂິຕາ ຈາຕຸຣິຕ຺ຖິໂຍ’’ຕິ (ຊາ. ໒.໒໒.໙໔) ຈ ອາທີສຸ ເຉເກ. ‘‘ກຸສລານໍ ຘມ຺ມານໍ ສມາທານເຫຕຸ ເອວມິທໍ ປຸຎ຺ຎໍ ປວຑ຺ຒຕີ’’ຕິ (ທີ. ນິ. ໓.໘໐) ‘‘ກຸສລສ຺ສ ກມ຺ມສ຺ສ ກຕຕ຺ຕາ ອຸປຈິຕຕ຺ຕາ’’ຕິ (ຘ. ສ. ໔໓໑) ຈ ອາທີສຸ ສຸຂວິປາເກ. ສ຺ວາຍມິຘ ອາໂຣຄ຺ເຍປິ ອນວຊ຺ເຊປິ ສຸຂວິປາເກປິ ວຏ຺ຏຕິ. ວຈນຕ຺ໂຖ ປເນຕ຺ຖ ກຸຈ຺ຉິເຕ ປາປເກ ຘມ຺ເມ ສລຍນ຺ຕິ ຈລຍນ຺ຕິ ກມ຺ເປນ຺ຕິ ວິທ຺ຘໍເສນ຺ຕີຕິ ກຸສລາ, ກຸຈ຺ຉິເຕນ ວາ ອາກາເຣນ ສຍນ຺ຕິ ປວຕ຺ຕນ຺ຕີຕິ ກຸສາ, ເຕ ອກຸສລສງ຺ຂາເຕ ກຸເສ ລຸນນ຺ຕິ ຉິນ຺ທນ຺ຕີຕິ ກຸສລາ, ກຸຈ຺ຉິຕານໍ ວາ ສານໂຕ ຕນຸກຣຓໂຕ ກຸສໍ, ຎາຓໍ. ເຕນ ກຸເສນ ລາຕພ຺ພາ ຄເຫຕພ຺ພາ ປວຕ຺ເຕຕພ຺ພາຕິ ກຸສລາ, ຍຖາ ວາ ກຸສາ ອຸຠຍຠາຄຄຕໍ ຫຕ຺ຖປ຺ປເທສໍ ລຸນນ຺ຕິ, ເອວມິເມປິ ອຸປ຺ປນ຺ນານຸປ຺ປນ຺ນຠາເວນ ອຸຠຍຠາຄຄຕໍ ສໍກິເລສປກ຺ຂໍ ລຸນນ຺ຕິ, ຕສ຺ມາ ກຸສາ ວິຍ ລຸນນ຺ຕີຕິ ກຸສລາ. ເຕສໍ ຣູປາວຈຣກຸສລານໍ ຠາວນາ. ອຣູປຠວສງ຺ຂາເຕ ອຣູເປ ອວຈຣນ຺ຕີຕິ ອຣູປາວຈຣາ. ເຕຠູມກວຏ຺ເຏ ປຣິຍາປນ຺ນາ ອນ຺ໂຕຄຘາຕິ ປຣິຍາປນ຺ນາ, ຕສ຺ມິໍ ນ ປຣິຍາປນ຺ນາຕິ ອປຣິຍາປນ຺ນາ, ໂລກຸຕ຺ຕຣາ.

ກາມາວຈຣກຸສລານໍ ຘມ຺ມານໍ ຠາວນາ ກສ຺ມາ ນ ວຸຕ຺ຕາຕິ ເຈ? ອປ຺ປນາປ຺ປຕ຺ຕາຍ ເອວ ຠາວນາຍ ອຠິຘມ຺ເມ ຠາວນາຕິ ອຘິປ຺ເປຕຕ຺ຕາ. ວຸຕ຺ຕຎ຺ຫິ ຕຕ຺ຖ –

‘‘ໂຍຄວິຫິເຕສຸ ວາ ກມ຺ມາຍຕເນສຸ ໂຍຄວິຫິເຕສຸ ວາ ສິປ຺ປາຍຕເນສຸ ໂຍຄວິຫິເຕສຸ ວາ ວິຊ຺ຊາຏ຺ຐາເນສຸ ກມ຺ມສ຺ສກຕໍ ວາ ສຈ຺ຈານຸໂລມິກໍ ວາ ຣູປໍ ອນິຈ຺ຈນ຺ຕິ ວາ, ເວທນາ ອນິຈ຺ຈາຕິ ວາ, ສຎ຺ຎາ ອນິຈ຺ຈາຕິ ວາ, ສງ຺ຂາຣາ ອນິຈ຺ຈາຕິ ວາ, ວິຎ຺ຎາຓໍ ອນິຈ຺ຈນ຺ຕິ ວາ ຍໍ ເອວຣູປໍ ອນຸໂລມິກໍ ຂນ຺ຕິໍ ທິຏ຺ຐິໍ ຣຸຈິໍ ມຸທິໍ ເປກ຺ຂໍ ຘມ຺ມນິຊ຺ຌານກ຺ຂນ຺ຕິໍ ປຣໂຕ ອສຸຕ຺ວາ ປຏິລຠຕິ, ອຍໍ ວຸຈ຺ຈຕິ ຈິນ຺ຕາມຍາ ປຎ຺ຎາ. ໂຍຄວິຫິເຕສຸ ວາ ກມ຺ມາຍຕເນສຸ…ເປ… ຘມ຺ມນິຊ຺ຌານກ຺ຂນ຺ຕິໍ ປຣໂຕ ສຸຕ຺ວາ ປຏິລຠຕິ, ອຍໍ ວຸຈ຺ຈຕິ ສຸຕມຍາ ປຎ຺ຎາ. ສພ຺ພາປິ ສມາປນ຺ນສ຺ສ ປຎ຺ຎາ ຠາວນາມຍາ ປຎ຺ຎາ’’ຕິ (ວິຠ. ໗໖໘).

ສາ ປນ ກາມາວຈຣຠາວນາ ອາວຊ຺ຊນຠວງ຺ຄປາເຕຫິ ອນ຺ຕຣິຕຕ຺ຕາ ຠາວນາຕິ ນ ວຸຕ຺ຕາຕິ ເວທິຕພ຺ພາ. ສພ຺ເພສໍ ປນ ປຸຎ຺ຎານໍ ຕິວິຘປຸຎ຺ຎກິຣິຍວຕ຺ຖູນໍ ອນ຺ໂຕຄຘຕ຺ຕາ ອຸປຈາຣສມາຘິວິປສ຺ສນາສມາຘີນໍ ຠາວນາມຍປຸຎ຺ຎຕາ ສິທ຺ຘາ. ອິຘ ປນ ໂລກິຍຠາວນາຍ ເອວ ສງ຺ຄຫິຕາ. ຣູປາຣູປາວຈຣານໍ ຕິວິຘຠາເວ ຫີນາຕິ ລາມກາ. ຫີນຸຕ຺ຕມານໍ ມຊ຺ເຌ ຠວາ ມຊ຺ຌາ, ມຊ຺ຌິມາຕິປິ ປາໂຐ. ປຘານຠາວໍ ນີຕາຕິ ປຓີຕາ, ອຸຕ຺ຕມາຕິ ອຕ຺ໂຖ. ອາຍູຫນວເສນ ອຍໍ ຫີນມຊ຺ຌິມປຓີຕຕາ ເວທິຕພ຺ພາ. ຍສ຺ສາ ຫິ ອາຍູຫນກ຺ຂເຓ ຉນ຺ໂທ ວາ ຫີໂນ ໂຫຕິ ວີຣິຍໍ ວາ ຈິຕ຺ຕໍ ວາ ວີມໍສາ ວາ, ສາ ຫີນາ ນາມ. ຍສ຺ສາ ເຕ ຘມ຺ມາ ມຊ຺ຌິມາ, ສາ ມຊ຺ຌິມາ ນາມ. ຍສ຺ສາ ເຕ ຘມ຺ມາ ປຓີຕາ, ສາ ປຓີຕາ ນາມ. ມຸທຸເກຫິ ວາ ອິນ຺ທ຺ຣິເຍຫິ ສມ຺ປຍຸຕ຺ຕາ ຫີນາ ນາມ, ມຊ຺ຌິເມຫິ ອິນ຺ທ຺ຣິເຍຫິ ສມ຺ປຍຸຕ຺ຕາ ມຊ຺ຌິມາ, ອຘິມຕ຺ເຕຫິ ອິນ຺ທ຺ຣິເຍຫິ ສມ຺ປຍຸຕ຺ຕາ ປຓີຕາ ນາມ. ອປຣິຍາປນ຺ນາຍ ຫີນມຊ຺ຌິມຕ຺ຕາຠາວາ ປຓີຕຕາ ເອວ ວຸຕ຺ຕາ. ສາ ຫິ ອຸຕ຺ຕມຏ຺ເຐນ ອຕປ຺ປກຏ຺ເຐນ ຈ ປຓີຕາ.

໒໗. ປຐມຠາວນາຈຕຸກ຺ເກ ຠາເວຕີຕິ ເອກສ຺ມິໍເຍວ ຂເຓ ຕຖາ ຕຖາ ປຏິວິຊ຺ຌນ຺ໂຕ ອຣິຍມຄ຺ຄໍ ຠາເວຕິ. ທຸຕິຍຠາວນາຈຕຸກ຺ເກ ເອສນາຠາວນາຕິ ອປ຺ປນາປຸພ຺ພຠາເຄ ຠາວນາ. ສາ ຫິ ອປ຺ປນໍ ເອສນ຺ຕິ ເອຕາຍາຕິ ເອສນາຕິ ວຸຕ຺ຕາ. ປຏິລາຠຠາວນາຕິ ອປ຺ປນາຠາວນາ. ສາ ຫິ ຕາຍ ເອສນາຍ ປຏິລພ຺ຠຕີຕິ ປຏິລາໂຠຕິ ວຸຕ຺ຕາ. ເອກຣສາຠາວນາຕິ ປຏິລາເຠ ວສີຠາວໍ ປຕ຺ຕຸກາມສ຺ສ ປໂຍຄກາເລ ຠາວນາ. ສາ ຫິ ເຕນ ເຕນ ປຫາເນນ ເຕຫິ ເຕຫິ ກິເລເສຫິ ວິມຸຕ຺ຕຕ຺ຕາ ວິມຸຕ຺ຕິຣເສນ ເອກຣສາຕິ ກຕ຺ວາ ເອກຣສາຕິ ວຸຕ຺ຕາ. ອາເສວນາຠາວນາຕິ ປຏິລາເຠ ວສິປ຺ປຕ຺ຕສ຺ສ ຍຖາຣຸຈິ ປຣິໂຠຄກາເລ ຠາວນາ. ສາ ຫິ ຠຸສໍ ເສວີຍຕີຕິ ອາເສວນາຕິ ວຸຕ຺ຕາ. ເກຈິ ປນ ‘‘ອາເສວນາຠາວນາ ວສີກມ຺ມໍ, ເອກຣສາຠາວນາ ສພ຺ພຕ຺ຖິກາ’’ຕິ ວຓ຺ຓຍນ຺ຕິ. ຈຕຸກ຺ກວິຠາເຄ ສມາຘິໍ ສມາປຊ຺ຊນ຺ຕານນ຺ຕິ ວຕ຺ຕມານສມີເປ ວຕ຺ຕມານວຈນໍ. ຕຕ຺ຖ ຊາຕາຕິ ຕສ຺ມິໍ ປຸພ຺ພຠາເຄ ຊາຕາ. ເອກຣສາ ໂຫນ຺ຕີຕິ ອປ຺ປນຸປ຺ປາທເນ ສມານກິຈ຺ຈາ ໂຫນ຺ຕິ. ສມາຘິໍ ສມາປນ຺ນານນ຺ຕິ ອປ຺ປິຕປ຺ປນານໍ. ຕຕ຺ຖ ຊາຕາຕິ ຕສ຺ສາ ອປ຺ປນາຍ ຊາຕາ. ອຎ຺ຎມຎ຺ຎໍ ນາຕິວຕ຺ຕນ຺ຕີຕິ ສມປ຺ປວຕ຺ຕິຍາ ອຎ຺ຎມຎ຺ຎໍ ນາຕິກ຺ກມນ຺ຕິ. ອຘິໂມກ຺ຂຏ຺ເຐນສທ຺ຘິນ຺ທ຺ຣິຍໍ ຠາວຍໂຕຕິອາທີສຸ ເອກກ຺ຂເຓປິ ເອເກກສ຺ສ ອິນ຺ທ຺ຣິຍສ຺ສ ສກສກກິຈ຺ຈກຣເຓ ຕໍຕໍນິສ຺ສຍວເສນ ສກສກກິຈ຺ຈກາຣການິ ເສສານິປິ ອິນ຺ທ຺ຣິຍານິ ວິມຸຕ຺ຕິຣເສນ ເອກຣສາ ໂຫນ຺ຕີຕິ ວິມຸຕ຺ຕິຣເສເນວ ເອກຣສຏ຺ເຐນ ຠາວນາ. ພລໂພຊ຺ຌງ຺ຄມຄ຺ຄງ຺ເຄສຸປິ ເອເສວ ນໂຍ. ເອກຣສາຕິ ຈ ລິງ຺ຄວິປລ຺ລາໂສ ກໂຕ.

ອິຘ ຠິກ຺ຂູຕິ ອິມສ຺ມິໍ ສາສເນ ຠິກ຺ຂຸ. ສໍສາເຣ ຠຍໍ ອິກ຺ຂຕີຕິ ຠິກ຺ຂຸ. ປຸພ຺ພຓ຺ຫສມຍນ຺ຕິອາທີສຸ ອຈ຺ຈນ຺ຕສໍໂຍຄຕ຺ເຖ ອຸປໂຍຄວຈນໍ, ອຕ຺ຖໂຕ ປນ ຠຸມ຺ມເມວ, ທິວສສ຺ສ ປຸພ຺ພກາເລຕິ ອຕ຺ໂຖ. ອາເສວຕີຕິ ວສິປ຺ປຕ຺ຕໍ ສມາຘິໍ ຠຸສໍ ເສວຕິ. ມຊ຺ຌນ຺ຫິກສມຍນ຺ຕິ ທິວສສ຺ສ ມຊ຺ຌກາເລ. ສາຍນ຺ຫສມຍນ຺ຕິ ທິວສສ຺ສ ສາຍນ຺ຫກາເລ. ປຸເຣຠຕ຺ຕນ຺ຕິ ທິວາຠຕ຺ຕໂຕ ປຸເຣກາເລ. ປຈ຺ຉາຠຕ຺ຕນ຺ຕິ ທິວາຠຕ຺ຕໂຕ ປຈ຺ຉາກາເລ. ປຸຣິເມປິ ຍາເມຕິ ຣຕ຺ຕິຍາ ປຐເມ ໂກຏ຺ຐາເສ. ກາເຬຕິ ກາຬປກ຺ເຂ. ຊຸຓ຺ເຫຕິ ສຸກ຺ກປກ຺ເຂ. ປຸຣິເມປິ ວໂຍຂນ຺ເຘຕິ ປຐເມ ວໂຍໂກຏ຺ຐາເສ, ປຐມວເຍຕິ ອຕ຺ໂຖ. ຕີສຸ ຈ ວເຍສຸ ວສ຺ສສຕາຍຸກສ຺ສ ປຸຣິສສ຺ສ ເອເກກສ຺ມິໍ ວເຍ ຈຕຸມາສາຘິການິ ເຕຕ຺ຕິໍສ ວສ຺ສານິ ໂຫນ຺ຕິ.

໒໘. ຕຕິຍຠາວນາຈຕຸກ຺ເກ ຕຕ຺ຖ ຊາຕານໍ ຘມ຺ມານໍ ອນຕິວຕ຺ຕນຏ຺ເຐນາຕິ ຕຕ຺ຖ ເນກ຺ຂມ຺ມາທີສຸ ຠາວນາວິເສເສສຸ ຊາຕານໍ ສມາຘິປຎ຺ຎາສງ຺ຂາຕານໍ ຍຸຄນທ຺ຘຘມ຺ມານໍ ອຎ຺ຎມຎ຺ຎໍ ອນຕິກ຺ກມນຠາເວນ. ອິນ຺ທ຺ຣິຍານໍ ເອກຣສຏ຺ເຐນາຕິ ຕຕ຺ເຖວ ສທ຺ຘາທີນໍ ອິນ຺ທ຺ຣິຍານໍ ນານາກິເລເສຫິ ວິມຸຕ຺ຕຕ຺ຕາ ວິມຸຕ຺ຕິຣເສນ ເອກຣສຠາເວນ. ຕທຸປຄວີຣິຍວາຫນຏ຺ເຐນາຕິ ເຕສໍ ອນຕິວຕ຺ຕນເອກຣສຠາວານໍ ອນຸຈ຺ຉວິກສ຺ສ ວີຣິຍສ຺ສ ວາຫນຠາເວນ. ອາເສວນຏ຺ເຐນາຕິ ຍາ ຕສ຺ສ ຕສ຺ມິໍ ສມເຍ ປວຕ຺ຕາ ອາເສວນາ. ຕສ຺ສາ ອາເສວນາຍ ອາເສວນຠາເວນ.

ຣູປສຎ຺ຎນ຺ຕິ ກຸສລວິປາກກິຣິຍວເສນ ປຎ຺ຈທສວິຘໍ ຣູປາວຈຣຊ຺ຌານສງ຺ຂາຕໍ ຣູປສຎ຺ຎໍ. ຣູປາວຈຣຊ຺ຌານມ຺ປິ ຫິ ຣູປນ຺ຕິ ວຸຈ຺ຈຕິ ‘‘ຣູປີ ຣູປານິ ປສ຺ສຕີ’’ຕິອາທີສຸ (ທີ. ນິ. ໒.໑໗໔; ອ. ນິ. ໘.໖໖; ຘ. ສ. ໒໔໘), ຕສ຺ສ ຌານສ຺ສ ອາຣມ຺ມຓມ຺ປິ ‘‘ພຫິທ຺ຘາ ຣູປານິ ປສ຺ສຕິ ສຸວຓ຺ຓທຸພ຺ພຓ຺ຓານີ’’ຕິອາທີສຸ (ທີ. ນິ. ໒.໑໗໓; ອ. ນິ. ໘.໖໕-໖໖; ຘ. ສ. ໒໔໗, ໒໔໙). ຣູປາວຈຣຊ຺ຌານຎ຺ຫິ ສຎ຺ຎາສີເສນ ຣູເປ ສຎ຺ຎາຕິ ກຕ຺ວາ ຣູປສຎ຺ຎາຕິ ວຸຈ຺ຈຕິ. ປຏິຆສຎ຺ຎນ຺ຕິ ກຸສລວິປາກາ ປຎ຺ຈ, ອກຸສລວິປາກາ ປຎ຺ຈາຕິ ເອວໍ ທສວິຘໍ ປຏິຆສຎ຺ຎໍ. ທ຺ວິປຎ຺ຈວິຎ຺ຎາຓສມ຺ປຍຸຕ຺ຕາ ຫິ ສຎ຺ຎາ ຈກ຺ຂາທີນໍ ວຕ຺ຖູນໍ ຣູປາທີນໍ ອາຣມ຺ມຓານຎ຺ຈ ປຏິຆາເຕນ ອຸປ຺ປນ຺ນຕ຺ຕາ ປຏິຆສຎ຺ຎາຕິ ວຸຈ຺ຈຕິ. ຣູປສຎ຺ຎາ ສທ຺ທສຎ຺ຎາ ຄນ຺ຘສຎ຺ຎາ ຣສສຎ຺ຎາ ໂຜຏ຺ຐພ຺ພສຎ຺ຎາຕິປິ ເອຕິສ຺ສາ ເອວ ນາມໍ. ນານຕ຺ຕສຎ຺ຎນ຺ຕິ ອຏ຺ຐ ກາມາວຈຣກຸສລສຎ຺ຎາ, ທ຺ວາທສ ອກຸສລສຎ຺ຎາ, ເອກາທສ ກາມາວຈຣກຸສລວິປາກສຎ຺ຎາ, ທ຺ເວ ອກຸສລວິປາກສຎ຺ຎາ, ເອກາທສ ກາມາວຈຣກິຣິຍສຎ຺ຎາຕິ ເອວໍ ຈຕຸຈຕ຺ຕາລີສວິຘໍ ນານຕ຺ຕສຎ຺ຎໍ. ສາ ຫິ ນານຕ຺ເຕ ນານາສຠາເວ ຣູປສທ຺ທາທິເຠເທ ໂຄຈເຣ ປວຕ຺ຕາ ສຎ຺ຎາຕິ ນານຕ຺ຕສຎ຺ຎາ, ຈຕຸຈຕ຺ຕາລີສເຠທໂຕ ນານຕ຺ຕາ ນານາສຠາວາ ອຎ຺ຎມຎ຺ຎໍ ອສທິສາ ສຎ຺ຎາຕິ ວາ ນານຕ຺ຕສຎ຺ຎາຕິ ວຸຈ຺ຈຕິ. ສຎ຺ຎາພຫຸກຕ຺ເຕປິ ຊາຕິຄ຺ຄຫເຓນ ເອກວຈນໍ ກຕໍ.

ນິຈ຺ຈສຎ຺ຎນ຺ຕິ ນິຈ຺ຈນ຺ຕິ ສຎ຺ຎໍ ນິຈ຺ຈສຎ຺ຎໍ. ເອວໍ ສຸຂສຎ຺ຎໍ ອຕ຺ຕສຎ຺ຎໍ. ນນ຺ທິນ຺ຕິ ສປ຺ປີຕິກໍ ຕຓ຺ຫໍ. ຣາຄນ຺ຕິ ນິປ຺ປີຕິກໍ ຕຓ຺ຫໍ. ສມຸທຍນ຺ຕິ ຣາຄສ຺ສ ສມຸທຍໍ. ອຖ ວາ ຠງ຺ຄານຸປສ຺ສນາຍ ຠງ຺ຄສ຺ເສວ ທສ຺ສນໂຕ ສງ຺ຂາຣານໍ ອຸທຍໍ. ອາທານນ຺ຕິ ນິພ຺ພຕ຺ຕນວເສນ ກິເລສານໍ, ອໂທສທສ຺ສາວິຕາຍ ສງ຺ຂຕາຣມ຺ມຓສ຺ສ ວາ ອາທານໍ. ຆນສຎ຺ຎນ຺ຕິ ສນ຺ຕຕິວເສນ ຆນນ຺ຕິ ສຎ຺ຎໍ. ອາຍູຫນນ຺ຕິ ສງ຺ຂາຣານໍ ອຕ຺ຖາຍ ປໂຍຄກຣຓໍ. ຘຸວສຎ຺ຎນ຺ຕິ ຖິຣນ຺ຕິ ສຎ຺ຎໍ. ນິມິຕ຺ຕນ຺ຕິ ນິຈ຺ຈນິມິຕ຺ຕໍ. ປຓິຘິນ຺ຕິ ສຸຂປຕ຺ຖນໍ. ອຠິນິເວສນ຺ຕິ ອຕ຺ຖິ ອຕ຺ຕາຕິ ອຠິນິເວສໍ. ສາຣາທານາຠິນິເວສນ຺ຕິ ນິຈ຺ຈສາຣຕ຺ຕສາຣຄຫຓາຠິນິເວສໍ. ສມ຺ໂມຫາຠິນິເວສນ຺ຕິ ‘‘ອໂຫສິໍ ນຸ ໂຂ ອຫໍ ອຕີຕມທ຺ຘານ’’ນ຺ຕິອາທິວເສນ (ສໍ. ນິ. ໒.໒໐) ‘‘ອິສ຺ສຣໂຕ ໂລໂກ ສມ຺ໂຠຕີ’’ຕິອາທິວເສນ ຈ ສມ຺ໂມຫາຠິນິເວສໍ. ອາລຍາຠິນິເວສນ຺ຕິ ອາທີນວາທສ຺ສເນນ ອລ຺ລີຍິຕພ຺ພມິທນ຺ຕິ ອຠິນິເວສໍ. ອປ຺ປຏິສງ຺ຂນ຺ຕິ ອນຸປາຍຄຫຓໍ. ສຎ຺ໂຎຄາຠິນິເວສນ຺ຕິ ກາມໂຍຄາທິກໍ ກິເລສປ຺ປວຕ຺ຕິໍ.

ທິຏ຺ເຐກຏ຺ເຐຕິ ທິຏ຺ຐີຫິ ສຫ ເອກສ຺ມິໍ ຐິຕາຕິ ທິຏ຺ເຐກຏ຺ຐາ. ເຕ ທິຏ຺ເຐກຏ຺ເຐ. ກິເລເສນ຺ຕິ ອຸປຕາເປນ຺ຕິ, ວິພາເຘນ຺ຕິ ວາຕິ ກິເລສາ. ເຕ ກິເລເສ. ທຸວິຘຎ຺ຫິ ເອກຏ຺ຐໍ ປຫາເນກຏ຺ຐໍ ສຫເຊກຏ຺ຐຎ຺ຈ. ປຫາເນກຏ຺ຐໍ ສກ຺ກາຍທິຏ຺ຐິປມຸຂາຫິ ເຕສຏ຺ຐິຍາ ທິຏ຺ຐີຫິ ສຫ (ປຏິ. ມ. ອຏ຺ຐ. ໒.໑.໑໑໘) ຍາວ ໂສຕາປຕ຺ຕິມຄ຺ເຄນ ປຫານາ, ຕາວ ເອກສ຺ມິໍ ປຸຄ຺ຄເລ ຐິຕາຕິ ອຕ຺ໂຖ. ອິທມິຘາຘິປ຺ເປຕໍ. ທສສຸ ຫິ ກິເລເສສຸ ອິຘ ທິຏ຺ຐິກິເລໂສເຍວ ອາຄໂຕ. ເສເສສຸ ປນ ອປາຍຄມນີໂຍ ໂລໂຠ ໂທໂສ ໂມໂຫ ມາໂນ ວິຈິກິຈ຺ຉາ ຖິນໍ ອຸທ຺ຘຈ຺ຈໍ ອຫິຣິກໍ ອໂນຕ຺ຕປ຺ປນ຺ຕິ ນວ ກິເລສາ ທິຏ຺ຐິຍາ ສຫ ປຫາເນກຏ຺ຐາ ຫຸຕ຺ວາ ໂສຕາປຕ຺ຕິມຄ຺ເຄນ ປຫີຍນ຺ຕິ, ຣາຄໂທສໂມຫປມຸເຂສຸ ວາ ທິຍຑ຺ເຒສຸ ກິເລສສຫສ຺ເສສຸ ໂສຕາປຕ຺ຕິມຄ຺ເຄນ ທິຏ຺ຐິຍາ ປຫີຍມານາຍ ທິຏ຺ຐິຍາ ສຫ ອປາຍຄມນີຍາ ສພ຺ພກິເລສາ ປຫາເນກຏ຺ຐວເສນ ປຫີຍນ຺ຕິ, ສຫເຊກຏ຺ເຐ ທິຏ຺ຐິຍາ ສຫ ເອກສ຺ມິໍ ຈິຕ຺ເຕ ຐິຕາຕິ ອຕ຺ໂຖ. ໂສຕາປຕ຺ຕິມຄ຺ເຄນ ຫິ ທ຺ວີສຸ ທິຏ຺ຐິສມ຺ປຍຸຕ຺ຕອສງ຺ຂາຣິກຈິຕ຺ເຕສຸ ປຫີຍມາເນສຸ ເຕຫິ ສຫຊາໂຕ ໂລໂຠ ໂມໂຫ ອຸທ຺ຘຈ຺ຈໍ ອຫິຣິກໍ ອໂນຕ຺ຕປ຺ປນ຺ຕິ ອິເມ ກິເລສາ ສຫເຊກຏ຺ຐວເສນ ປຫີຍນ຺ຕິ, ທ຺ວີສຸ ທິຏ຺ຐິສມ຺ປຍຸຕ຺ຕສສງ຺ຂາຣິກຈິຕ຺ເຕສຸ ປຫີຍມາເນສຸ ເຕຫິ ສຫຊາໂຕ ໂລໂຠ ໂມໂຫ ຖິນໍ ອຸທ຺ຘຈ຺ຈໍ ອຫິຣິກໍ ອໂນຕ຺ຕປ຺ປນ຺ຕິ ອິເມ ກິເລສາ ສຫເຊກຏ຺ຐວເສນ ປຫີຍນ຺ຕິ. ໂອຬາຣິເກ ກິເລເສຕິ ໂອຬາຣິກຠູເຕ ກາມຣາຄພ຺ຍາປາເທ. ອນຸສຫຄເຕ ກິເລເສຕິ ສຸຂຸມຠູເຕ ກາມຣາຄພ຺ຍາປາເທ. ສພ຺ພກິເລເສຕິ ມຄ຺ຄຕ຺ຕເຍນ ປຫີນາວເສເສ.

ວີຣິຍໍ ວາເຫຕີຕິ ໂຍຄາວຈໂຣ ວີຣິຍໍ ປວຕ຺ເຕຕິ. ເຫຏ຺ຐາ ເອສນາປຏິລາຠເອກຣສອາເສວນວຈນານິ ຠາວນານໍ ວິເສສທສ຺ສນຕ຺ຖໍ ວຸຕ຺ຕານິ ‘‘ເອວໍຠູຕາ ຈ ຠາວນາ’’ຕິ. ອິຘ ‘‘ຕຕ຺ຖ ຊາຕານໍ ຘມ຺ມານໍ ອນຕິວຕ຺ຕນຏ຺ເຐນ ອິນ຺ທ຺ຣິຍານໍ ເອກຣສຏ຺ເຐນ ຕທຸປຄວີຣິຍວາຫນຏ຺ເຐນ ອາເສວນຏ຺ເຐນາ’’ຕິ ວຈນານິ ຠາວນາເຫຕຸທສ຺ສນຕ຺ຖໍ ວຸຕ຺ຕານິ ‘‘ອິມິນາ ຈ ອິມິນາ ຈ ເຫຕຸນາ ຠາວນາ’’ຕິ. ເຫຏ຺ຐາ ອາເສວນາຠາວນາຕິ ນານາກ຺ຂຓວເສນ ວຸຕ຺ຕາ, ອິຘ ອາເສວນຏ຺ເຐນ ຠາວນາຕິ ເອກກ຺ຂຓວເສນາຕິ ວິເສໂສ. ຣູປໍ ປສ຺ສນ຺ໂຕ ຠາເວຕີຕິອາທີສຸ ຣູປາທີນິ ປສ຺ສິຕພ຺ພາກາເຣນ ປສ຺ສນ຺ໂຕ ຠາເວຕພ຺ພໍ ຠາວນໍ ຠາເວຕີຕິ ອຕ຺ໂຖ. ເອກຣສາ ໂຫນ຺ຕີຕິ ວິມຸຕ຺ຕິຣເສນ, ກິຈ຺ຈຣເສນ ວາ ເອກຣສາ ໂຫນ຺ຕິ. ວິມຸຕ຺ຕິຣໂສຕິ ສມ຺ປຕ຺ຕິຣໂສ. ກິຈ຺ຈສມ຺ປຕ຺ຕິອຕ຺ເຖນ ຣໂສ ນາມ ປວຸຈ຺ຈຕີຕິ ຫິ ວຸຕ຺ຕນ຺ຕິ.

ຠາເວຕພ຺ພນິທ຺ເທສວຓ຺ຓນາ ນິຏ຺ຐິຕາ.