໑໒. ໂອຕຣຓຫາຣວິຠງ຺ຄວຓ຺ຓນາ

໔໒. ຕຕ຺ຖ ກຕໂມ ໂອຕຣໂຓ ຫາໂຣຕິ ໂອຕຣຓຫາຣວິຠງ຺ໂຄ. ຕຕ຺ຖ ອເສກ຺ຂາ ວິມຸຕ຺ຕີຕິ ອຍໍ ເຕຘາຕຸເກ ວີຕຣາຄຕາ ອເສກ຺ຂາ ຜລວິມຸຕ຺ຕິ. ຕານິເຍວາຕິ ຕານິ ອເສກ຺ຂາຍໍ ວິມຸຕ຺ຕິຍໍ ສທ຺ຘາທີນິ. ອຍໍ ອິນ຺ທ຺ຣິເຍຫິ ໂອຕຣຓາຕິ ອເສກ຺ຂາຍ ວິມຸຕ຺ຕິຍາ ນິທ຺ຘາຣິເຕຫິ ສທ຺ຘາທີຫິ ອິນ຺ທ຺ຣິເຍຫິ ສໍວຓ຺ຓນາຍ ໂອຕຣຓາ.

ປຎ຺ຈິນ຺ທ຺ຣິຍານິ ວິຊ຺ຊາຕິ ສມ຺ມາສງ຺ກປ຺ໂປ ວິຍ ສມ຺ມາທິຏ຺ຐິຍາ ອຸປກາຣກຕ຺ຕາ ປຎ຺ຎາກ຺ຂນ຺ເຘ ສທ຺ຘາທີນິ ຈຕ຺ຕາຣິ ອິນ຺ທ຺ຣິຍານິ ວິຊ຺ຊາຍ ອຸປກາຣກຕ຺ຕາ ສງ຺ຄຓ຺ຫນວເສນ ວຸຕ຺ຕານິ. ສງ຺ຂາຣປຣິຍາປນ຺ນານີຕິ ປຎ຺ຈສຸ ຂນ຺ເຘສຸ ສງ຺ຂາຣກ຺ຂນ຺ເຘ ອນ຺ໂຕຄຘານິ. ເຍ ສງ຺ຂາຣາ ອນາສວາຕິ ຕໍ ສງ຺ຂາຣກ຺ຂນ຺ຘໍ ວິເສເສຕິ, ອຄ຺ຄຜລສ຺ສ ອຘິປ຺ເປຕຕ຺ຕາ. ຕໂຕ ເອວ ຈ ໂນ ຠວງ຺ຄາ. ຘມ຺ມຘາຕຸສງ຺ຄຫິຕາຕິ ອຏ຺ຐາຣສຘາຕູສຸ ຘມ຺ມຘາຕຸສງ຺ຄຫິຕາ. ຍທິປິ ປຸພ຺ເພ ວີຕຣາຄຕາ ອເສກ຺ຂາ ວິມຸຕ຺ຕິ ທສ຺ສິຕາ, ຕສ຺ສາ ປນ ປຏິປຕ຺ຕິທສ຺ສນຕ຺ຖໍ ‘‘ອຍໍ ອຫມສ຺ມີຕິ ອນານຸປສ຺ສີ’’ຕິ ທສ຺ສນມຄ຺ໂຄ ອິຘ ວຸຕ຺ໂຕຕິ ອິມມຕ຺ຖໍ ທສ຺ເສຕຸໍ ‘‘ອຍໍ ອຫມສ຺ມີຕິ ອນານຸປສ຺ສີ’’ຕິອາທິ ວຸຕ຺ຕໍ. ສພ຺ພໍ ວຸຕ຺ຕນຍເມວ.

໔໓. ນິສ຺ສິຕສ຺ສ ຈລິຕນ຺ຕິ ຕຓ຺ຫາທິຏ຺ຐິວເສນ ກມ຺ມໍ ອນວຏ຺ຐານໍ. ຈຸຕູປປາໂຕຕິ ອປຣາປຣໍ ຈວນໍ ອຸປປຕນຎ຺ຈ. ນິສ຺ສິຕປເທ ລພ຺ຠມານໍ ນິສ຺ສຍນໍ ອຸທ຺ຘຣນ຺ໂຕ ອາຫ – ‘‘ນິສ຺ສໂຍ ນາມາ’’ຕິ. ຕຓ຺ຫານິສ຺ສໂຍຕິ ຕຓ຺ຫາຠິນິເວໂສ. ໂສ ຫິ ຕຓ຺ຫາຈຣິຕສ຺ສ ປຕິຏ຺ຐາຠາເວນ ຕຖາ ວຸຕ຺ໂຕ. ເອວໍ ທິຏ຺ຐິນິສ຺ສໂຍປິ ທຏ຺ຐພ຺ໂພ. ຣຕ຺ຕສ຺ສ ເຈຕນາຕິ ເຈຕນາປຘານຕ຺ຕາ ສງ຺ຂາຣກ຺ຂນ຺ຘຘມ຺ມານໍ ເຈຕນາສີເສນ ຕຓ຺ຫໍ ເອວ ວທຕິ. ເຕເນວາຫ – ‘‘ອຍໍ ຕຓ຺ຫານິສ຺ສໂຍ’’ຕິ. ຍສ຺ມາ ປນ ວິປຣີຕາຠິນິເວໂສ ໂມຫສ຺ສ ພລວຠາເວ ເອວ ໂຫຕິ, ຕສ຺ມາ ‘‘ຍາ ມູຬ຺ຫສ຺ສ ເຈຕນາ, ອຍໍ ທິຏ຺ຐິນິສ຺ສໂຍ’’ຕິ ວຸຕ຺ຕໍ.

ເອວໍ ເຈຕນາສີເສນ ຕຓ຺ຫາທິຏ຺ຐິໂຍ ວຕ຺ວາ ອິທານິ ຕຕ຺ຖ ນິປ຺ປຣິຍາເຍນ ເຈຕນໍເຍວ ຄຓ຺ຫນ຺ໂຕ ‘‘ເຈຕນາ ປນ ສງ຺ຂາຣາ’’ຕິ ອາຫ. ຍາ ຣຕ຺ຕສ຺ສ ເວທນາ, ອຍໍ ສຸຂາ ເວທນາຕິ ສຸຂາຍ ເວທນາຍ ຣາໂຄ ອນຸເສຕີຕິ ກຕ຺ວາ ວຸຕ຺ຕໍ. ຕຖາ ອທຸກ຺ຂມສຸຂາຍ ເວທນາຍ ອວິຊ຺ຊາ ອນຸເສຕີຕິ ອາຫ – ‘‘ຍາ ສມ຺ມູຬ຺ຫສ຺ສ ເວທນາ, ອຍໍ ອທຸກ຺ຂມສຸຂາ ເວທນາ’’ຕິ. ອິຘ ເວທນາສີເສນ ເຈຕນາ ວຸຕ຺ຕາ. ຕຓ຺ຫາຍາຕິ ຕຓ຺ຫໍ. ທິຏ຺ຐິຍາຕິ ທິຏ຺ຐິໍ. ຍຖາ ວາ ເສສຘມ຺ມານໍ ຕຓ຺ຫາຍ ນິສ຺ສຍຠາເວ ປຸຄ຺ຄໂລ ຕຓ຺ຫາຍ ນິສ຺ສິໂຕຕິ ວຸຈ຺ຈຕິ. ເອວໍ ຕຓ຺ຫາຍ ເສສຘມ຺ມານໍ ປຈ຺ຈຍຠາເວ ປຸຄ຺ຄໂລ ຕຓ຺ຫາຍ ນິສ຺ສິໂຕຕິ ວຸຈ຺ຈຕີຕິ ອາຫ – ‘‘ຕຓ຺ຫາຍ ອນິສ຺ສິໂຕ’’ຕິ.

ປສ຺ສທ຺ຘີຕິ ທຣຖປຏິປ຺ປສ຺ສມ຺ຠນາ. ກາຍິກາຕິ ກຣຊກາຍສນ຺ນິສ຺ສິຕາ. ເຈຕສິກາຕິ ຈິຕ຺ຕສນ຺ນິສ຺ສິຕາ. ຍສ຺ມາ ປນ ສາ ທຣຖປຏິປ຺ປສ຺ສທ຺ຘິ ກາຍຈິຕ຺ຕານໍ ສຸເຂ ສຕິ ປາກຏາ ໂຫຕິ, ຕສ຺ມາ ‘‘ຍໍ ກາຍິກໍ ສຸຂ’’ນ຺ຕິອາທິນາ ຜລູປຈາເຣນ ວຸຕ຺ຕາຍ ປສ຺ສທ຺ຘິຍາ ນຕິອຠາວສ຺ສ ກາຣຓຠາວໍ ທສ຺ເສຕຸໍ ‘‘ປສ຺ສທ຺ຘກາໂຍ’’ຕິອາທິ ວຸຕ຺ຕໍ. ໂສຕິ ເອວໍ ວິມຸຕ຺ຕຈິຕ຺ໂຕ ຂີຓາສໂວ. ຣູປສງ຺ຂເຍ ວິມຸຕ຺ໂຕຕິ ຣູປານໍ ສງ຺ຂຍສງ຺ຂາເຕ ນິພ຺ພາເນ ວິມຸຕ຺ໂຕ. ອຕ຺ຖີຕິປິ ນ ອຸເປຕີຕິ ສສ຺ສໂຕ ອຕ຺ຕາ ຈ ໂລໂກ ຈາຕິປິ ຕຓ຺ຫາທິຏ຺ຐິອຸປເຍນ ນ ອຸເປຕິ ນ ຄຓ຺ຫາຕິ. ນຕ຺ຖີຕິ ອສສ຺ສໂຕຕິ. ອຕ຺ຖິ ນຕ຺ຖີຕິ ເອກຈ຺ຈໍ ສສ຺ສຕໍ ເອກຈ຺ຈໍ ອສສ຺ສຕນ຺ຕິ. ເນວຕ຺ຖິ ໂນ ນຕ຺ຖີຕິ ອມຣາວິກ຺ເຂປວເສນ. ຄມ຺ຠີໂຣຕິ ອຸຕ຺ຕານຠາວເຫຕູນໍ ກິເລສານໍ ອຠາເວນ ຄມ຺ຠີໂຣ. ນິພ຺ພຸໂຕຕິ ອຕ຺ຖີຕິອາທິນາ ອຸປຄມນກິເລສານໍ ວູປສເມນ ປຣິນິພ຺ພຸໂຕ ສີຕິຠູໂຕ.

ອິຘາຄຕີຕິ ປຣໂລກໂຕ ອິຘ ອາຄຕິ. ຄຕີຕິ ອິຘໂລກໂຕ ປຣໂລກຄມນໍ. ຕໍ ປນ ປຸນພ຺ຠໂວຕິ ອາຫ ‘‘ເປຈ຺ຈຠໂວ’’ຕິ. ອິຘ ຫຸຣນ຺ຕິ ທ຺ວາຣາຣມ຺ມຓຘມ຺ມາ ທສ຺ສິຕາຕິ ‘‘ອຸຠຍມນ຺ຕເຣນາ’’ຕິ ປເທນ ທ຺ວາຣປ຺ປວຕ຺ຕຘມ຺ເມ ທສ຺ເສນ຺ໂຕ ‘‘ຜສ຺ສສມຸທິເຕສຸ ຘມ຺ເມສູ’’ຕິ ອາຫ. ຕສ຺ສຕ຺ໂຖ – ຜສ຺ເສນ ສທ຺ຘິໍ ຜສ຺ເສນ ກາຣຓຠູເຕນ ຈ ສມຸທິເຕສຸ ສມ຺ຠູເຕສຸ ວິຎ຺ຎາຓເວທນາສຎ຺ຎາເຈຕນາວິຕກ຺ກວິຈາຣາທິຘມ຺ເມສຸ. ອຕ຺ຕານໍ ນ ປສ຺ສຕີຕິ ເຕສໍ ຘມ຺ມານໍ ອນຕ຺ຕຠາເວເນວ ຕຕ຺ຖ ອຕ຺ຕານໍ ນ ປສ຺ສຕິ. ວິຣຊ຺ຊຕິ ວິຣາຄາ ວິມຸຈ຺ຈຕີຕິ ປເທຫິ ໂລກຸຕ຺ຕຣຘມ຺ມານໍ ປຏິຈ຺ຈສມຸປ຺ປາທຠາວໍ ທສ຺ເສນ຺ໂຕ ຕທຕ຺ຖຕາຍ ສີລາທີນມ຺ປິ ປຣິຍາເຍນ ຕພ຺ຠາວມາຫ ‘‘ໂລກຸຕ຺ຕໂຣ’’ຕິອາທິນາ.

໔໔. ນາມສມ຺ປຍຸຕ຺ໂຕຕິ ນາເມນ ມິສ຺ສິໂຕ. ສອຸປາທິເສສາ ນິພ຺ພານຘາຕູຕິ ອຣຫຕ຺ຕຜລໍ ອຘິປ຺ເປຕໍ. ຕຎ຺ຈ ປຎ຺ຎາປຘານນ຺ຕິ ອາຫ – ‘‘ສອຸປາທິເສສາ ນິພ຺ພານຘາຕຸ ວິຊ຺ຊາຕິ. ເສສໍ ສພ຺ພໍ ອຸຕ຺ຕານເມວ.

ໂອຕຣຓຫາຣວິຠງ຺ຄວຓ຺ຓນາ ນິຏ຺ຐິຕາ.