໑໓. ໂສຘນຫາຣວິຠງ຺ຄວຓ຺ຓນາ

໔໕. ຕຕ຺ຖ ກຕໂມ ໂສຘໂນ ຫາໂຣຕິ ໂສຘນຫາຣວິຠງ຺ໂຄ. ຕຕ຺ຖ ຠຄວາ ປທໍ ໂສເຘຕີຕິ ‘‘ອວິຊ຺ຊາຍ ນິວຸໂຕ ໂລໂກ’’ຕິ (ສຸ. ນິ. ໑໐໓໙; ຈູຬນິ. ອຊິຕມາຓວປຸຈ຺ຉາ ໕໘, ອຊິຕມາຓວປຸຈ຺ຉານິທ຺ເທສ ໒) ວທນ຺ໂຕ ຠຄວາ – ‘‘ເກນສ຺ສຸ ນິວຸໂຕ ໂລໂກ’’ຕິ (ສຸ. ນິ. ໑໐໓໘; ຈູຬນິ. ອຊິຕມາຓວປຸຈ຺ຉາ ໕໗, ອຊິຕມາຓວປຸຈ຺ຉານິທ຺ເທສ ໑) ອາຍສ຺ມຕາ ອຊິເຕນ ປຸຈ຺ຉາວເສນ ວຸຕ຺ຕໍ ປທໍ ໂສເຘຕິ ນາມ, ຕທຕ຺ຖສ຺ສ ວິສ຺ສຊ຺ຊນໂຕ. ໂນ ຈ ອາຣມ຺ຠນ຺ຕິ ນ ຕາວ ອາຣມ຺ຠໍ ໂສເຘຕິ, ຎາຕຸໍ ອິຈ຺ຉິຕສ຺ສ ອຕ຺ຖສ຺ສ ອປຣິໂຍສິຕຕ຺ຕາ. ສຸທ຺ໂຘ ອາຣມ຺ໂຠຕິ ຎາຕຸໍ ອິຈ຺ຉິຕສ຺ສ ອຕ຺ຖສ຺ສ ປໂພຘິຕຕ຺ຕາ ໂສຘິໂຕ ອາຣມ຺ໂຠຕິ ອຕ຺ໂຖ. ອຎ຺ຎາຓປກ຺ຂນ຺ທານໍ ທ຺ເວຬ຺ຫກຊາຕານໍ ວາ ປຸຈ຺ຉນກາເລ ປຸຈ຺ຉິຕານໍ ປຸຈ຺ຉາວິສໂຍ ອວິຊຏໍ ມຫາຄຫນໍ ວິຍ ມຫາທຸຄ຺ຄໍ ວິຍ ຈ ອນ຺ຘກາຣໍ ອວິຠູຕໍ ໂຫຕິ. ຍທາ ຈ ຠຄວຕາ ປຓ຺ຑິເຕຫິ ວາ ຠຄວໂຕ ສາວເກຫິ ອປເທ ປທໍ ທສ຺ເສນ຺ເຕຫິ ນິຊ຺ຊຏໍ ນິຄຸມ຺ພໍ ກຕ຺ວາ ປຎ຺ເຫ ວິສ຺ສຊ຺ຊິເຕ ມຫຕາ ຄນ຺ຘຫຕ຺ຖິນາ ອຠິຠວິຕ຺ວາ ໂອຠຄ຺ຄປທາລິໂຕ ຄຫນປ຺ປເທໂສ ວິຍ ວິຄຕນ຺ຘກາໂຣ ວິຠູໂຕ ອຸປຏ຺ຐຫມາໂນ ວິໂສຘິໂຕ ນາມ ໂຫຕິ.

ໂສຘນຫາຣວິຠງ຺ຄວຓ຺ຓນາ ນິຏ຺ຐິຕາ.