໙. ປຣິວຕ຺ຕນຫາຣວິຠງ຺ຄວຓ຺ຓນາ

໓໕. ຕຕ຺ຖ ກຕໂມ ປຣິວຕ຺ຕໂນ ຫາໂຣຕິ ປຣິວຕ຺ຕນຫາຣວິຠງ຺ໂຄ. ຕຕ຺ຖ ຍສ຺ມາ ສໍວຓ຺ຓິຍມາເນ ສຸຕ຺ເຕ ຍຖານິທ຺ທິຏ຺ຐານໍ ກຸສລາກຸສລຘມ຺ມານໍ ປຏິປກ຺ຂຠູເຕ ອກຸສລກຸສລຘມ຺ເມ ປຫາຕພ຺ພຠາວາທິວເສນ ນິທ຺ຘາຣຓໍ ປຏິປກ຺ຂໂຕ ປຣິວຕ຺ຕນໍ, ຕສ຺ມາ ‘‘ສມ຺ມາທິຏ຺ຐິສ຺ສ ປຸຣິສປຸຄ຺ຄລສ຺ສ ມິຈ຺ຉາທິຏ຺ຐິ ນິຊ຺ຊິຓ຺ຓາ ຠວຕີ’’ຕິອາທິ ອາຣທ຺ຘໍ. ຕຕ຺ຖ ສມ຺ມາ ປສຕ຺ຖາ, ສຸນ຺ທຣາ ທິຏ຺ຐິ ເອຕສ຺ສາຕິ ສມ຺ມາທິຏ຺ຐິ, ຕສ຺ສ. ສາ ປນສ຺ສ ສມ຺ມາທິຏ຺ຐິຕາ ປຸພ຺ພຠາຄສມ຺ມາທິຏ຺ຐິຍາ ວາ ໂລກຸຕ຺ຕຣສມ຺ມາທິຏ຺ຐິຍາ ວາ ເວທິຕພ຺ພາ. ມິຈ຺ຉາທິຏ຺ຐິ ນິຊ຺ຊິຓ຺ຓາ ຠວຕີຕິ ປຸຣິມນເຍ ວິປສ຺ສນາສມ຺ມາທິຏ຺ຐິຍາ ປຫີນາ ໂຫຕິ, ວິກ຺ຂມ຺ຠິຕາຕິ ອຕ຺ໂຖ. ປຈ຺ຉິມນເຍ ປຐມມຄ຺ຄສມ຺ມາທິຏ຺ຐິຍາ ປຫີນາ ສມຸຈ຺ຉິນ຺ນາຕິ ອຕ຺ໂຖ.

ເຍ ຈສ຺ສ ມິຈ຺ຉາທິຏ຺ຐິປຈ຺ຈຍາຕິ ມິຈ຺ຉາຠິນິເວສເຫຕຸ ເຍ ອຣິຍານໍ ອທສ຺ສນກາມຕາທໂຍ ໂລຠາທໂຍ ປາຓາຕິປາຕາທໂຍ ຈ ອເນເກ ລາມກຏ຺ເຐນ ປາປກາ ອໂກສລ຺ລສມ຺ຠູຕຏ຺ເຐນ ອກຸສລາ ຘມ຺ມາ ອຸປ຺ປຊ຺ເຊຍ຺ຍຸໍ. ອິມສ຺ສ ອາຣທ຺ຘວິປສ຺ສກສ຺ສ ອຣິຍສ຺ສ ຈ. ຘມ຺ມາຕິ ສມຖວິປສ຺ສນາຘມ຺ມາ, ສຕ຺ຕຕ຺ຕິໍສໂພຘິປກ຺ຂິຍຘມ຺ມາ ວາ ອນຸປ຺ປນ຺ນາ ວາ ສມ຺ຠວນ຺ຕິ ອຸປ຺ປນ຺ນາ, ຠາວນາປາຣິປູຣິໍ ຄຈ຺ຉນ຺ຕິ. ສມ຺ມາສງ຺ກປ຺ປສ຺ສາຕິອາທີນມ຺ປິ ອິມິນາວ ນເຍນ ອຕ຺ໂຖ ເວທິຕພ຺ໂພ. ອຍໍ ປນ ວິເສໂສ – ສມ຺ມາວິມຸຕ຺ຕິອາທີນໍ ມິຈ຺ຉາວິມຸຕ຺ຕິ ອວິມຸຕ຺ຕາວ ສມານາ ‘‘ວິມຸຕ຺ຕາ ມຍ’’ນ຺ຕິ ເອວໍສຎ຺ຎິໂນ ອວິມຸຕ຺ຕິຍໍ ວາ ວິມຸຕ຺ຕິສຎ຺ຎິໂນ. ຕຕ຺ຣາຍໍ ວຈນຕ຺ໂຖ – ມິຈ຺ຉາ ປາປິກາ ວິມຸຕ຺ຕິ ວິໂມກ຺ໂຂ ເອຕສ຺ສາຕິ ມິຈ຺ຉາວິມຸຕ຺ຕິ. ອຏ຺ຐງ຺ຄາ ຈ ມິຈ຺ຉາວິມຸຕ຺ຕິ ຍຖາວຸຕ຺ເຕນາກາເຣນ ມິຈ຺ຉາຠິນິເວສວເສນ ຈ ປວຕ຺ຕາ ອນ຺ຕທ຺ວຍລກ຺ຂຓາ. ສມ຺ມາວິມຸຕ຺ຕິ ປນ ຜລຘມ຺ມາ, ມິຈ຺ຉາທິຏ຺ຐິເກ ສມາເສວໂຕ ມິຈ຺ຉາວິໂມກ຺ໂຂ ວາ ມິຈ຺ຉາວິມຸຕ຺ຕິ. ມິຈ຺ຉາວິມຸຕ຺ຕິຎາຓທສ຺ສນໍ ປນ ມິຈ຺ຉາວິໂມກ຺ເຂ ມິຈ຺ຉາທິຏ຺ຐິຍາ ຈ ສາຣນ຺ຕິ ຄຫຓວເສນ ປວຕ຺ໂຕ ອກຸສລຈິຕ຺ຕຸປ຺ປາໂທ ອນ຺ຕມໂສ ປາປໍ ກຕ຺ວາ ‘‘ສຸກຕໍ ມຍາ’’ຕິ ປຈ຺ຈເວກ຺ຂໂຕ ອຸປ຺ປນ຺ນໂມໂຫ ຈ. ສມ຺ມາວິມຸຕ຺ຕິຎາຓທສ຺ສນສ຺ສາຕິ ເອຕ຺ຖ ເສກ຺ຂານໍ ປຈ຺ຈເວກ຺ຂຓຎາຓໍ ສມ຺ມາວິມຸຕ຺ຕິຎາຓທສ຺ສນນ຺ຕິ ອຘິປ຺ເປຕໍ. ຕຎ຺ຫິ ອຸຕ຺ຕຣິຠາວນາປາຣິປູຣິຍາ ສໍວຕ຺ຕຕິ.

໓໖. ເອວໍ ສມ຺ມາທິຏ຺ຐິອາທິມຸເຂນ ມິຈ຺ຉາທິຏ຺ຐິອາທິໍ ທສ຺ເສຕ຺ວາ ປຸນ ປາຓາຕິປາຕອທິນ຺ນາທານກາເມສຸມິຈ຺ຉາຈາຣາທິໂຕ ເວຣມຓິຍາທີຫິ ປາຓາຕິປາຕາທີນໍ ປຣິວຕ຺ຕນໍ ທສ຺ເສຕຸໍ ‘‘ຍສ຺ສາ’’ຕິອາທິ ອາຣທ຺ຘໍ. ຕຕ຺ຖ ກາລວາທິສ຺ສາຕິ ລກ຺ຂຓວຈນໍ. ກາເລນ ສາປເທສໍ ປຣິຍນ຺ຕວຕິໍ ອຕ຺ຖສຎ຺ຫິຕນ຺ຕິ ໂສ ສມ຺ຜປ຺ປລາປສ຺ສ ປຫານາຍ ປຏິປນ຺ໂນ ໂຫຕີຕິ ວຸຕ຺ຕໍ.

ປຸນ ‘‘ເຍ ຈ ໂຂ ເກຈີ’’ຕິອາທິນາ ສມ຺ມາທິຏ຺ຐິອາທິມຸເຂເນວ ມິຈ຺ຉາທິຏ຺ຐິອາທີຫິ ເອວ ປຣິວຕ຺ຕນໍ ປກາຣນ຺ຕເຣນ ທສ຺ເສຕິ. ຕຕ຺ຖ ສນ຺ທິຏ຺ຐິກາຕິ ປຈ຺ຈກ຺ຂາ. ສຫຘມ຺ມິກາຕິ ສກາຣຓາ. ຄາຣຍ຺ຫາຕິ ຄຣຫິຕພ຺ພຍຸຕ຺ຕາ. ວາທານຸວາທາຕິ ວາທາ ເຈວ ອນຸວາທາ ຈ. ‘‘ວາທານຸປາຕາ’’ຕິປິ ປາໂຐ, ວາທານຸປວຕ຺ຕິໂຍຕິ ອຕ຺ໂຖ. ປຸຊ຺ຊາຕິ ປູຊນີຍາ. ປາສໍສາຕິ ປສໍສິຕພ຺ພາ.

ປຸນ ‘‘ເຍ ຈ ໂຂ ເກຈີ’’ຕິອາທິນາ ມຊ຺ຌິມາຍ ປຏິປຕ຺ຕິຍາ ອນ຺ຕທ຺ວຍປຣິວຕ຺ຕນໍ ທສ຺ເສຕິ. ຕຕ຺ຖ ຠຸຎ຺ຊິຕພ຺ພາຕິອາທີນິ ຈຕ຺ຕາຣິ ປທານິ ວຕ຺ຖຸກາມວເສນ ໂຍເຊຕພ຺ພານິ. ຠາວຍິຕພ຺ພາ ພຫຸລີກາຕພ຺ພາຕິ ປທທ຺ວຍໍ ກິເລສກາມວເສນ. ເຕສໍ ອຘມ຺ໂມຕິ ຠາເວຕພ຺ໂພ ນາມ ຘມ຺ໂມ ສິຍາ, ກາມາ ຈ ເຕສໍ ຠາເວຕພ຺ພາ ອິຈ຺ຉິຕາ, ກາເມຫິ ຈ ເວຣມຓີ ກາມານໍ ປຏິປກ຺ໂຂ, ອິຕິ ສາ ເຕສໍ ອຘມ຺ໂມ ອາປຊ຺ຊຕີຕິ ອຘິປ຺ປາໂຍ.

ນິຍ຺ຍານິໂກ ຘມ຺ໂມຕິ ສຫ ວິປສ຺ສນາຍ ອຣິຍມຄ຺ໂຄ. ທຸກ຺ໂຂຕິ ປາປໍ ນິຊ຺ຊຣາເປສ຺ສາມາຕິ ປວຕ຺ຕິຕໍ ສຣີຣຕາປນໍ ວທຕິ. ສຸໂຂຕິ ອນວຊ຺ຊປຈ຺ຈຍປຣິໂຠຄສຸຂໍ. ເອເຕສຸປິ ວາເຣສຸ ວຸຕ຺ຕນເຍເນວ ອຘມ຺ມຠາວາປຕ຺ຕິ ວຕ຺ຕພ຺ພາ. ອິທານິ ອສຸຠສຎ຺ຎາທິມຸເຂນ ສຸຠສຎ຺ຎາທິປຣິວຕ຺ຕນໍ ທສ຺ເສຕຸໍ ‘‘ຍຖາ ວາ ປນາ’’ຕິອາທິ ວຸຕ຺ຕໍ. ອາຣທ຺ຘວິປສ຺ສກສ຺ສ ກິເລສາສຸຈິປຄ຺ຆຣຓວເສນ ເຕຠູມກສງ຺ຂາຣາ ອສຸຠໂຕ ອຸປຏ຺ຐຫນ຺ຕີຕິ ກຕ຺ວາ ວຸຕ຺ຕໍ ‘‘ສພ຺ພສງ຺ຂາເຣສຸ ອສຸຠານຸປສ຺ສິໂນ ວິຫຣໂຕ’’ຕິ. ‘‘ຍໍ ຍໍ ວາ ປນາ’’ຕິອາທິນາ ປຏິປກ຺ຂສ຺ສ ລກ຺ຂຓໍ ວິຠາເວຕິ. ຕຕ຺ຖ ອຊ຺ຌາປນ຺ໂນຕິ ອຘິອາປນ຺ໂນ, ອຠິອຸປຄໂຕ ປຣິຎ຺ຎາໂຕຕິ ອຕ຺ໂຖ.

ປຣິວຕ຺ຕນຫາຣວິຠງ຺ຄວຓ຺ຓນາ ນິຏ຺ຐິຕາ.