໖. ຈຕຸພ຺ຍູຫຫາຣສມ຺ປາຕວຓ຺ຓນາ

໖໘. ຣກ຺ຂີຍຕີຕິ ຣກ຺ຂິຕໍ. ອິທໍ ປທວເສນ ນິພ຺ພຈນໍ. ຍສ຺ມາ ປນ ອຕ຺ຖວເສນ ນິພ຺ພຈເນ ວຸຕ຺ເຕ ປທວເສນ ນິພ຺ພຈນໍ ວຸຕ຺ຕເມວ ໂຫຕິ, ຕສ຺ມາ ‘‘ຣກ຺ຂິຕໍ ປຣິປາລີຍຕີຕິ ເອສາ ນິຣຸຕ຺ຕີ’’ຕິ ວຸຕ຺ຕໍ. ຕຕ຺ຖ ອິຕິ-ສທ຺ໂທ ອາທ຺ຍຕ຺ໂຖ, ປກາເຣ ວາ. ເຕນ ເອວມາທິກາ ເອວໍປກາຣາ ວາ ເອສາ ນິຣຸຕ຺ຕີຕິ ວຸຕ຺ຕໍ ໂຫຕິ. ຕສ຺ມາ ຈິນ຺ເຕຕີຕິ ຈິຕ຺ຕໍ. ອຕ຺ຕໂນ ສນ຺ຕານໍ ຈິໂນຕີຕິ ຈິຕ຺ຕໍ, ປຈ຺ຈເຍຫິ ຈິຕນ຺ຕິ ຈິຕ຺ຕໍ, ຈິຕ຺ຕວິຈິຕ຺ຕຏ຺ເຐນ ຈິຕ຺ຕໍ, ຈິຕ຺ຕກຣຓຏ຺ເຐນ ຈິຕ຺ຕໍ. ສມ຺ມາ ສງ຺ກປ຺ເປຕີຕິ ສມ຺ມາສງ຺ກປ຺ໂປຕິອາທິນາ ນິຣຸຕ຺ຕິ ເວທິຕພ຺ພາ.

ອຍໍ ເອຕ຺ຖ ຠຄວໂຕ ອຘິປ຺ປາໂຍຕິ ‘‘ຣກ຺ຂິຕຈິຕ຺ໂຕ ອສ຺ສາ’’ຕິອາທິນາ ອິນ຺ທ຺ຣິຍສໍວຣາທໂຍ ທຸຄ຺ຄຕິປຫານຎ຺ຈ ວທໂຕ ຠຄວໂຕ ເອຕ຺ຖ ຄາຖາຍໍ ອຘິປ຺ປາໂຍ. ໂກກາລິໂກ ຫີຕິອາທິ ນິທານນິທ຺ເທໂສ. ຕຕ຺ຖ ຫິ-ສທ຺ໂທ ກາຣເຓ. ອິທໍ ວຸຕ຺ຕໍ ໂຫຕິ – ຍສ຺ມາ ໂກກາລິໂກ (ສໍ. ນິ. ໑.໑໘໑; ອ. ນິ. ໑໐.໘໙; ສຸ. ນິ. ໂກກາລິກສຸຕ຺ຕ) ອຣກ຺ຂິຕຈິຕ຺ຕຕາຍ ອຄ຺ຄສາວເກສຸ ຈິຕ຺ຕໍ ປໂທເສຕ຺ວາ ປທຸມນິຣຍໍ ອຸປປນ຺ໂນ, ຕສ຺ມາ ທຸຄ຺ຄຕິໂຍ ຊຫິຕຸກາໂມ ຣກ຺ຂິຕຈິຕ຺ໂຕ ອສ຺ສາຕິ ຠຄວາ ສຕິອາຣກ຺ເຂນ ເຈຕສາ ສມນ຺ນາຄໂຕ ສພ຺ພາ ທຸຄ຺ຄຕິໂຍ ຊຫຕີຕິ ອຕ຺ໂຖ. ສຸຕ຺ຕມ຺ຫິ ວຸຕ຺ຕໍ ‘‘ສຕິຍາ ຈິຕ຺ຕໍ ຣກ຺ຂິຕພ຺ພ’’ນ຺ຕິ ເທສນານຸສນ຺ຘິທສ຺ສນໍ.

ຈຕຸພ຺ຍູຫຫາຣສມ຺ປາຕວຓ຺ຓນາ ນິຏ຺ຐິຕາ.