໑໕. ປຣິກ຺ຂາຣຫາຣວິຠງ຺ຄວຓ຺ຓນາ

໔໙. ຕຕ຺ຖ ກຕໂມ ປຣິກ຺ຂາໂຣ ຫາໂຣຕິ ປຣິກ຺ຂາຣຫາຣວິຠງ຺ໂຄ. ຕຕ຺ຖ ໂຍ ຘມ຺ໂມ ຍໍ ຘມ຺ມໍ ຊນຍຕິ, ຕສ຺ສ ໂສ ປຣິກ຺ຂາໂຣຕິ ສງ຺ເຂປໂຕ ປຣິກ຺ຂາຣລກ຺ຂຓໍ ວຕ຺ວາ ຕໍ ວິຠາເຄນ ທສ຺ເສຕຸໍ ‘‘ກິໍລກ຺ຂໂຓ’’ຕິອາທິ ວຸຕ຺ຕໍ. ຕຕ຺ຖ ຫິໂນຕິ ອຕ຺ຕໂນ ຜລໍ ປຏິກາຣຓຠາວໍ ຄຈ຺ຉຕີຕິ ເຫຕຸ. ປຏິຈ຺ຈ ເອຕສ຺ມາ ຜລໍ ເອຕີຕິ ປຈ຺ຈໂຍ. ກິຎ຺ຈາປິ ເຫຕຸປຈ຺ຈຍສທ຺ເທຫິ ກາຣຓເມວ ວຸຈ຺ຈຕິ, ຕຖາປິ ຕຕ຺ຖ ວິເສສໍ ວິຠາເຄນ ທສ຺ເສຕຸໍ ‘‘ອສາຘາຣຓລກ຺ຂໂຓ’’ຕິອາທິ ວຸຕ຺ຕໍ. ສຠາໂວ ເຫຕູຕິ ສມານຠາໂວ ພີຊໍ ເຫຕຸ. ນນຸ ຈ ພີຊໍ ອງ຺ກຸຣາທິສທິສໍ ນ ໂຫຕີຕິ? ໂນ ນ ໂຫຕິ, ອຎ຺ຎໂຕ ຫິ ຕາທິສສ຺ສ ອນຸປ຺ປຊ຺ຊນໂຕ.

‘‘ຍຖາ ວາ ປນາ’’ຕິອາທິນາປິ ອຸທາຫຣຓນ຺ຕຣທສ຺ສເນນ ເຫຕຸປຈ຺ຈຍານໍ ວິເສສເມວ ວິຠາເວຕິ. ຕຕ຺ຖ ທຸທ຺ຘນ຺ຕິ ຂີຣໍ. ທຘິ ຠວຕີຕິ ເອກຕ຺ຕນເຍນ ອເຠໂທປຈາເຣນ ວາ ວຸຕ຺ຕໍ, ນ ອຎ຺ຎຖາ. ນ ຫິ ຂີຣໍ ທຘິ ໂຫຕິ. ເຕເນວາຫ – ‘‘ນ ຈຕ຺ຖິ ເອກກາລສມວຘານໍ ທຸທ຺ຘສ຺ສ ຈ ທຘິສ຺ສ ຈາ’’ຕິ. ອຖ ວາ ຆເຏ ທຸທ຺ຘໍ ປກ຺ຂິຕ຺ຕໍ ທຘິ ຠວຕິ, ທຘິ ຕຕ຺ຖ ກາລນ຺ຕເຣ ຊາຍຕິ ປຈ຺ຈຍນ຺ຕຣສມາໂຍເຄນ, ຕສ຺ມາ ນ ຈຕ຺ຖິ ເອກກາລສມວຘານໍ ທຸທ຺ຘສ຺ສ ຈ ທຘິສ຺ສ ຈ ຣສຂີຣວິປາກາທີຫິ ຠິນ຺ນສຠາວຕ຺ຕາ. ເອວເມວນ຺ຕິ ຍຖາ ເຫຕຸຠູຕສ຺ສ ຂີຣສ຺ສ ຜລຠູເຕນ ທຘິນາ ນ ເອກກາລສມວຘານໍ, ເອວມຎ຺ຎສ຺ສາປິ ເຫຕຸສ຺ສ ຜເລນ ນ ເອກກາລສມວຘານໍ, ນ ຕຖາ ປຈ຺ຈຍສ຺ສ, ນ ຫິ ປຈ຺ຈໂຍ ເອກນ຺ເຕນ ຜເລນ ຠິນ຺ນກາໂລ ເອວາຕິ. ເອວມ຺ປິ ເຫຕຸປຈ຺ຈຍານໍ ວິເສໂສ ເວທິຕພ຺ໂພຕິ ອຘິປ຺ປາໂຍ.

ເອວໍ ພາຫິຣໍ ເຫຕຸປຈ຺ຈຍວິຠາຄໍ ທສ຺ເສຕ຺ວາ ອິທານິ ອຊ຺ຌຕ຺ຕິກໍ ທສ຺ເສຕຸໍ ‘‘ອຍຎ຺ຫິ ສໍສາໂຣ’’ຕິອາທິ ວຸຕ຺ຕໍ. ຕຕ຺ຖ ‘‘ອວິຊ຺ຊາ ອວິຊ຺ຊາຍ ເຫຕູ’’ຕິ ວຸຕ຺ເຕ ກິໍ ເອກສ຺ມິໍ ຈິຕ຺ຕຸປ຺ປາເທ ອເນກາ ອວິຊ຺ຊາ ວິຊ຺ຊນ຺ຕີຕິ? ອາຫ ‘‘ປຸຣິມິກາ ອວິຊ຺ຊາ ປຈ຺ຉິມິກາຍ ອວິຊ຺ຊາຍ ເຫຕູ’’ຕິ. ເຕນ ເອກສ຺ມິໍ ກາເລ ເຫຕຸຜລານໍ ສມວຘານໍ ນຕ຺ຖີຕິ ເອຕເມວຕ຺ຖໍ ສມຕ຺ເຖຕິ. ຕຕ຺ຖ ‘‘ປຸຣິມິກາ ອວິຊ຺ຊາ’’ຕິອາທິນາ ເຫຕຸຜລຠູຕານໍ ອວິຊ຺ຊານໍ ວິຠາຄໍ ທສ຺ເສຕິ. ‘‘ພີຊງ຺ກຸໂຣ ວິຍາ’’ຕິອາທິນາ ອິມມຕ຺ຖໍ ທສ຺ເສຕິ – ຍຖາ ພີຊໍ ອງ຺ກຸຣສ຺ສ ເຫຕຸ ໂຫນ຺ຕໍ ສມນນ຺ຕຣເຫຕຸຕາຍ ເຫຕຸ ໂຫຕິ. ຍໍ ປນ ພີຊໂຕ ຜລໍ ນິພ຺ພຕ຺ຕຕິ, ຕສ຺ສ ພີຊໍ ປຣມ຺ປຣເຫຕຸຕາຍ ເຫຕຸ ໂຫຕິ. ເອວໍ ອວິຊ຺ຊາຍປິ ເຫຕຸຠາເວ ທຏ຺ຐພ຺ພນ຺ຕິ.

ປຸນ ‘‘ຍຖາ ວາ ປນາ’’ຕິອາທິນາປິ ເຫຕຸປຈ຺ຈຍວິຠາຄເມວ ທສ຺ເສຕິ. ຕຕ຺ຖ ຖາລກນ຺ຕິ ທີປກປລ຺ລິກາ. ອນຄ຺ຄິກນ຺ຕິ ອຄ຺ຄິໍ ວິນາ. ທີເປຕຸນ຺ຕິ ຊາເລຕຸໍ. ອິຕິ ສຠາໂວ ເຫຕູຕິ ເອວໍ ປທີປຸຊ຺ຊາລນາທີສຸ ອຄ຺ຄິອາທິປທີປສທິສໍ ກາຣຓໍ ສຠາໂວ ເຫຕຸ. ປຣຠາໂວ ປຈ຺ຈໂຍຕິ ຕຕ຺ເຖວ ກປລ຺ລິກາວຏ຺ຏິເຕລາທິສທິໂສ ອຄ຺ຄິໂຕ ອຎ຺ໂຎ ສຠາໂວ ປຈ຺ຈໂຍ. ອຊ຺ຌຕ຺ຕິໂກຕິ ນິຍກຊ຺ຌຕ຺ຕິໂກ ນິຍກຊ຺ຌຕ຺ເຕ ຠໂວ. ພາຫິໂຣຕິ ຕໂຕ ພຫິຠູໂຕ. ຊນໂກຕິ ນິພ຺ພຕ຺ຕໂກ. ປຣິຄ຺ຄາຫໂກຕິ ອຸປຕ຺ຖມ຺ຠໂກ. ອສາຘາຣໂຓຕິ ອາເວຓິໂກ. ສາຘາຣໂຓຕິ ອຎ຺ເຎສມ຺ປິ ປຈ຺ຈຍຸປ຺ປນ຺ນານໍ ສມາໂນ.

ອິທານິ ຍສ຺ມາ ກາຣຓໍ ‘‘ປຣິກ຺ຂາໂຣ’’ຕິ ວຸຕ຺ຕໍ, ກາຣຓຠາໂວ ຈ ຜລາເປກ຺ຂາຍ, ຕສ຺ມາ ກາຣຓສ຺ສ ໂຍ ກາຣຓຠາໂວ ຍຖາ ຈ ໂສ ໂຫຕິ, ຍຎ຺ຈ ຜລໍ ໂຍ ຈ ຕສ຺ສ ວິເສໂສ, ໂຍ ຈ ກາຣຓຜລານໍ ສມ຺ພນ຺ໂຘ, ຕໍ ສພ຺ພໍ ວິຠາເວຕຸໍ ‘‘ອວຸປຈ຺ເຉທຕ຺ໂຖ’’ຕິອາທິ ວຸຕ຺ຕໍ. ຕຕ຺ຖ ກາຣຓຜລຠາເວນ ສມ຺ພນ຺ຘຕາ ສນ຺ຕຕິ. ໂກ ຈ ຕຕ຺ຖ ສມ຺ພນ຺ໂຘ, ໂກ ກາຣຓຜລຠາໂວ ຈ? ໂສ ເອວ ອວຸປຈ຺ເຉທຕ຺ໂຖ. ໂຍ ຜລຠູໂຕ ອຎ຺ຎສ຺ສ ອກາຣຓໍ ຫຸຕ຺ວາ ນິຣຸຊ຺ຌຕິ, ໂສ ວຸປຈ຺ຉິນ຺ໂນ ນາມ ໂຫຕິ, ຍຖາ ຕໍ ອຣຫໂຕ ຈຸຕິຈິຕ຺ຕໍ. ໂຍ ປນ ອຕ຺ຕໂນ ອນຸຣູປສ຺ສ ຜລສ຺ສ ເຫຕຸ ຫຸຕ຺ວາ ນິຣຸຊ຺ຌຕິ, ໂສ ອນຸປຈ຺ຉິນ຺ໂນ ເອວ ນາມ ໂຫຕິ, ເຫຕຸຜລສມ຺ພນ຺ຘສ຺ສ ວິຊ຺ຊມານຕ຺ຕາຕິ ອາຫ – ‘‘ອວຸປຈ຺ເຉທຕ຺ໂຖ ສນ຺ຕຕິອຕ຺ໂຖ’’ຕິ.

ຍສ຺ມາ ຈ ກາຣຓໂຕ ນິພ຺ພຕ຺ຕໍ ຜລໍ ນາມ, ນ ອນິພ຺ພຕ຺ຕໍ, ຕສ຺ມາ ‘‘ນິພ຺ພຕ຺ຕິອຕ຺ໂຖ ຜລຕ຺ໂຖ’’ຕິ ວຸຕ຺ຕໍ. ຍສ຺ມາ ປນ ປຸຣິມຠເວນ ອນນ຺ຕຣຠວປຏິສນ຺ຘານວເສນ ປວຕ຺ຕາ ອຸປປຕ຺ຕິກ຺ຂນ຺ຘາ ປຸນພ຺ຠໂວ, ຕສ຺ມາ ວຸຕ຺ຕໍ – ‘‘ປຏິສນ຺ຘິອຕ຺ໂຖ ປຸນພ຺ຠວຕ຺ໂຖ’’ຕິ. ຕຖາ ຍສ຺ສ ປຸຄ຺ຄລສ຺ສ ກິເລສາ ອຸປ຺ປຊ຺ຊນ຺ຕິ, ຕໍ ປລິພຸນ຺ເຘນ຺ຕິ ສມ຺ມາ ປຏິປຊ຺ຊິຕຸໍ ນ ເທນ຺ຕິ. ຍາວ ຈ ມຄ຺ເຄນ ອສມຸຄ຺ຆາຕິຕາ, ຕາວ ອນຸເສນ຺ຕິ ນາມ, ເຕນ ວຸຕ຺ຕໍ – ‘‘ປລິໂພຘຕ຺ໂຖ ປຣິຍຸຏ຺ຐານຕ຺ໂຖ, ອສມຸຄ຺ຆາຕຕ຺ໂຖ ອນຸສຍຕ຺ໂຖ’’ຕິ. ປຣິຎ຺ຎາຠິສມຍວເສນ ປຣິຎ຺ຎາເຕ ນ ກທາຈິ ຕໍ ນາມຣູປງ຺ກຸຣສ຺ສ ກາຣຓໍ ເຫສ຺ສຕີຕິ ອາຫ – ‘‘ອປຣິຎ຺ຎາຕຕ຺ໂຖ ວິຎ຺ຎາຓສ຺ສ ພີຊຕ຺ໂຖ’’ຕິ. ຍຕ຺ຖ ອວຸປຈ຺ເຉໂທ ຕຕ຺ຖ ສນ຺ຕຕີຕິ ຍຕ຺ຖ ຣູປາຣູປປ຺ປວຕ຺ຕິຍໍ ຍຖາວຸຕ຺ໂຕ ອວຸປຈ຺ເຉໂທ, ຕຕ຺ຖ ສນ຺ຕຕິໂວຫາໂຣ. ຍຕ຺ຖ ສນ຺ຕຕິ ຕຕ຺ຖ ນິພ຺ພຕ຺ຕີຕິອາທິ ປຈ຺ຈຍປຣມ຺ປຣທສ຺ສນໍ ເຫຕຸຜລສມ຺ພນ຺ຘວິຠາວນເມວ.

‘‘ຍຖາ ວາ ປນ ຈກ຺ຂຸຎ຺ຈ ປຏິຈ຺ຈາ’’ຕິອາທິນາ ‘‘ສຠາໂວ ເຫຕູ’’ຕິ ວຸຕ຺ຕເມວຕ຺ຖໍ ວິຠາເຄນ ທສ຺ເສຕິ. ຕຕ຺ຖ ສນ຺ນິສ຺ສຍຕາຍາຕິ ອຸປນິສ຺ສຍປຈ຺ຈຍຕາຍ. ມນສິກາໂຣຕິ ກິຣິຍາມໂນຘາຕຸ. ສາ ຫິ ຈກ຺ຂຸວິຎ຺ຎາຓສ຺ສ ວິຎ຺ຎາຓຠາເວນ ສມານຊາຕິຕາຍ ສຠາໂວ ເຫຕຸ. ສງ຺ຂາຣາ ວິຎ຺ຎາຓສ຺ສ ປຈ຺ຈໂຍ ສຠາໂວ ເຫຕູຕິ ປຸຎ຺ຎາທິອຠິສງ຺ຂາຣາ ປຏິສນ຺ຘິວິຎ຺ຎາຓສ຺ສ ປຈ຺ຈໂຍ, ຕຕ຺ຖ ໂຍ ສຠາໂວ, ໂສ ເຫຕູຕິ. ສງ຺ຂາຣາຕິ ເຈຕ຺ຖ ສພ຺ໂພ ໂລກິໂຍ ກຸສລາກຸສລຈິຕ຺ຕຸປ຺ປາໂທ ອຘິປ຺ເປໂຕ. ອິມິນາ ນເຍນ ເສສປເທສຸປິ ອຕ຺ໂຖ ເວທິຕພ຺ໂພ. ເອວໍ ໂຍ ໂກຈິ ອຸປນິສ຺ສໂຍ ສພ຺ໂພ ໂສ ປຣິກ຺ຂາໂຣຕິ ຍຖາວຸຕ຺ຕປ຺ປເຠໂທ ໂຍ ໂກຈິ ປຈ຺ຈໂຍ, ໂສ ສພ຺ໂພ ອຕ຺ຕໂນ ຜລສ຺ສ ປຣິກ຺ຂຣຓໂຕ ອຠິສງ຺ຂຣຓໂຕ ປຣິກ຺ຂາໂຣ. ຕສ຺ສ ນິທ຺ຘາເຣຕ຺ວາ ກຖນໍ ປຣິກ຺ຂາໂຣ ຫາໂຣຕິ.

ປຣິກ຺ຂາຣຫາຣວິຠງ຺ຄວຓ຺ຓນາ ນິຏ຺ຐິຕາ.