ປຎ຺ຈມຄາຖາວຓ຺ຓນາ

໕. ເອວໍ ຕີຫິ ຕິເກຫິ ອນວເສສໂຕ ສຕ຺ເຕ ທສ຺ເສຕ຺ວາ ອິທານິ ‘‘ທິຏ຺ຐາ ວາ ເຍ ວ ອທິຏ຺ຐາ’’ຕິອາທີຫິ ຕີຫິ ທຸເກຫິປິ ເຕ ສງ຺ຄເຫຕ຺ວາ ທສ຺ເສຕິ.

ຕຕ຺ຖ ທິຏ຺ຐາຕິ ເຍ ອຕ຺ຕໂນ ຈກ຺ຂຸສ຺ສ ອາປາຖມາຄຕວເສນ ທິຏ຺ຐປຸພ຺ພາ. ອທິຏ຺ຐາຕິ ເຍ ປຣສມຸທ຺ທປຣເສລປຣຈກ຺ກວາຬາທີສຸ ຐິຕາ. ‘‘ເຍ ວາ ທູເຣ ວສນ຺ຕິ ອວິທູເຣ’’ຕິ ອິມິນາ ປນ ທຸເກນ ອຕ຺ຕໂນ ອຕ຺ຕຠາວສ຺ສ ທູເຣ ຈ ອວິທູເຣ ຈ ວສນ຺ເຕ ສຕ຺ເຕ ທສ຺ເສຕິ, ເຕ ອປທທ຺ວິປທວເສນ ເວທິຕພ຺ພາ. ອຕ຺ຕໂນ ຫິ ກາເຍ ວສນ຺ຕາ ສຕ຺ຕາ ອວິທູເຣ, ພຫິກາເຍ ວສນ຺ຕາ ສຕ຺ຕາ ທູເຣ. ຕຖາ ອນ຺ໂຕອຸປຈາເຣ ວສນ຺ຕາ ອວິທູເຣ, ພຫິອຸປຈາເຣ ວສນ຺ຕາ ທູເຣ. ອຕ຺ຕໂນ ວິຫາເຣ ຄາເມ ຊນປເທ ທີເປ ຈກ຺ກວາເຬ ວສນ຺ຕາ ອວິທູເຣ, ປຣຈກ຺ກວາເຬ ວສນ຺ຕາ ທູເຣ ວສນ຺ຕີຕິ ວຸຈ຺ຈນ຺ຕິ.

ຠູຕາຕິ ຊາຕາ ອຠິນິພ຺ພຕ຺ຕາ. ເຍ ຠູຕາ ເອວ, ນ ປຸນ ຠວິສ຺ສນ຺ຕີຕິ ສງ຺ຂ຺ຍໍ ຄຈ຺ຉນ຺ຕິ, ເຕສໍ ຂີຓາສວານໍ ເອຕໍ ອຘິວຈນໍ. ສມ຺ຠວເມສນ຺ຕີຕິ ສມ຺ຠເວສີ. ອປ຺ປຫີນຠວສໍໂຍຊນຕ຺ຕາ ອາຍຕິມ຺ປິ ສມ຺ຠວໍ ເອສນ຺ຕານໍ ເສຂປຸຖຸຊ຺ຊນານເມຕໍ ອຘິວຈນໍ. ອຖ ວາ ຈຕູສຸ ໂຍນີສຸ ອຓ຺ຑຊຊລາພຸຊາ ສຕ຺ຕາ ຍາວ ອຓ຺ຑໂກສໍ ວຕ຺ຖິໂກສຎ຺ຈ ນ ຠິນ຺ທນ຺ຕິ, ຕາວ ສມ຺ຠເວສີ ນາມ, ອຓ຺ຑໂກສໍ ວຕ຺ຖິໂກສຎ຺ຈ ຠິນ຺ທິຕ຺ວາ ພຫິ ນິກ຺ຂນ຺ຕາ ຠູຕາ ນາມ. ສໍເສທຊາ ໂອປປາຕິກາ ຈ ປຐມຈິຕ຺ຕກ຺ຂເຓ ສມ຺ຠເວສີ ນາມ, ທຸຕິຍຈິຕ຺ຕກ຺ຂຓໂຕ ປຠຸຕິ ຠູຕາ ນາມ. ເຍນ ວາ ອິຣິຍາປເຖນ ຊາຍນ຺ຕິ, ຍາວ ຕໂຕ ອຎ຺ຎໍ ນ ປາປຸຓນ຺ຕິ, ຕາວ ສມ຺ຠເວສີ ນາມ, ຕໂຕ ປຣໍ ຠູຕາຕິ.