ຉຏ຺ຐຄາຖາວຓ຺ຓນາ
໖. ເອວໍ ຠຄວາ ‘‘ສຸຂິໂນ ວາ’’ຕິອາທີຫິ ອຑ຺ຒເຕຍ຺ຍາຫິ ຄາຖາຫິ ນານປ຺ປກາຣໂຕ ເຕສໍ ຠິກ຺ຂູນໍ ຫິຕສຸຂາຄມປຕ຺ຖນາວເສນ ສຕ຺ເຕສຸ ເມຕ຺ຕາຠາວນໍ ທສ຺ເສຕ຺ວາ ອິທານິ ອຫິຕທຸກ຺ຂານາຄມປຕ຺ຖນາວເສນາປິ ຕໍ ທສ຺ເສນ຺ໂຕ ອາຫ ‘‘ນ ປໂຣ ປຣໍ ນິກຸພ຺ເພຖາ’’ຕິ. ເອສ ໂປຣາໂຓ ປາໂຐ, ອິທານິ ປນ ‘‘ປຣໍ ຫີ’’ຕິປິ ປຐນ຺ຕິ, ອຍໍ ນ ໂສຠໂນ.
ຕຕ຺ຖ ປໂຣຕິ ປຣຊໂນ. ປຣນ຺ຕິ ປຣຊນໍ. ນ ນິກຸພ຺ເພຖາຕິ ນ ວຎ຺ເຈຍ຺ຍ. ນາຕິມຎ຺ເຎຖາຕິ ນ ອຕິກ຺ກມິຕ຺ວາ ມຎ຺ເຎຍ຺ຍ. ກຕ຺ຖຈີຕິ ກຕ຺ຖຈິ ໂອກາເສ, ຄາເມ ວາ ຄາມເຂຕ຺ເຕ ວາ ຎາຕິມຊ຺ເຌ ວາ ປູຄມຊ຺ເຌ ວາຕິອາທິ. ນນ຺ຕິ ເອຕໍ. ກຎ຺ຈີຕິ ຍໍ ກຎ຺ຈິ ຂຕ຺ຕິຍໍ ວາ ພ຺ຣາຫ຺ມຓໍ ວາ ຄຫຏ຺ຐໍ ວາ ປພ຺ພຊິຕໍ ວາ ສຸຂິຕໍ ວາ ທຸກ຺ຂິຕໍ ວາຕິອາທິ. ພ຺ຍາໂຣສນາ ປຏິຆສຎ຺ຎາຕິ ກາຍວຈີວິກາເຣຫິ ພ຺ຍາໂຣສນາຍ ຈ ມໂນວິກາເຣນ ປຏິຆສຎ຺ຎາຍ ຈ. ‘‘ພ຺ຍາໂຣສນາຍ ປຏິຆສຎ຺ຎາຍາ’’ຕິ ຫິ ວຕ຺ຕພ຺ເພ ‘‘ພ຺ຍາໂຣສນາ ປຏິຆສຎ຺ຎາ’’ຕິ ວຸຈ຺ຈຕິ, ຍຖາ ‘‘ສມ຺ມທຎ຺ຎາຍ ວິມຸຕ຺ຕາ’’ຕິ ວຕ຺ຕພ຺ເພ ‘‘ສມ຺ມທຎ຺ຎາ ວິມຸຕ຺ຕາ’’ຕິ, ຍຖາ ຈ ‘‘ອນຸປຸພ຺ພສິກ຺ຂາຍ ອນຸປຸພ຺ພກິຣິຍາຍ ອນຸປຸພ຺ພປຏິປທາຍາ’’ຕິ ວຕ຺ຕພ຺ເພ ‘‘ອນຸປຸພ຺ພສິກ຺ຂາ ອນຸປຸພ຺ພກິຣິຍາ ອນຸປຸພ຺ພປຏິປທາ’’ຕິ. ນາຎ຺ຎມຎ຺ຎສ຺ສ ທຸກ຺ຂມິຈ຺ເຉຍ຺ຍາຕິ ອຎ຺ຎມຎ຺ຎສ຺ສ ທຸກ຺ຂໍ ນ ອິຈ຺ເຉຍ຺ຍ. ກິໍ ວຸຕ຺ຕໍ ໂຫຕິ? ນ ເກວລໍ ‘‘ສຸຂິໂນ ວາ ເຂມິໂນ ວາ ໂຫນ຺ຕູ’’ຕິອາທິມນສິກາຣວເສເນວ ເມຕ຺ຕໍ ຠາເວຍ຺ຍ, ກິນ຺ຕຸ ‘‘ອໂຫວຕ ໂຍ ໂກຈິ ປຣປຸຄ຺ຄໂລ ຍໍ ກຎ຺ຈິ ປຣປຸຄ຺ຄລໍ ວຎ຺ຈນາທີຫິ ນິກຕີຫິ ນ ນິກຸພ຺ເພຖ, ຊາຕິອາທີຫິ ຈ ນວຫິ ມານວຕ຺ຖູຫິ ກຕ຺ຖຈິ ປເທເສ ກຎ຺ຈິ ປຣປຸຄ຺ຄລໍ ນາຕິມຎ຺ເຎຍ຺ຍ, ອຎ຺ຎມຎ຺ຎສ຺ສ ຈ ພ຺ຍາໂຣສນາຍ ວາ ປຏິຆສຎ຺ຎາຍ ວາ ທຸກ຺ຂໍ ນ ອິຈ຺ເຉຍ຺ຍາ’’ຕິ ເອວມ຺ປິ ມນສິກໂຣນ຺ໂຕ ຠາເວຍ຺ຍາຕິ.