ຈຕຸຕ຺ຖຄາຖາວຓ຺ຓນາ
໔. ເອວໍ ຍາວ ອຸປຈາຣໂຕ ອປ຺ປນາໂກຏິ, ຕາວ ສງ຺ເຂເປນ ເມຕ຺ຕາຠາວນໍ ທສ຺ເສຕ຺ວາ ອິທານິ ວິຕ຺ຖາຣໂຕປິ ຕໍ ທສ຺ເສຕຸໍ ‘‘ເຍ ເກຈີ’’ຕິ ຄາຖາທ຺ວຍມາຫ. ອຖ ວາ ຍສ຺ມາ ປຸຖຸຕ຺ຕາຣມ຺ມເຓ ປຣິຈິຕໍ ຈິຕ຺ຕໍ ນ ອາທິເກເນວ ເອກຕ຺ເຕ ສຓ຺ຐາຕິ ອາຣມ຺ມຓປ຺ປເຠທໍ ປນ ອນຸຄນ຺ຕ຺ວາ ອນຸຄນ຺ຕ຺ວາ ກເມນ ສຓ຺ຐາຕິ, ຕສ຺ມາ ຕສ຺ສ ຕສຖາວຣາທິທຸກຕິກປ຺ປເຠເທ ອາຣມ຺ມເຓ ອນຸຄນ຺ຕ຺ວາ ອນຸຄນ຺ຕ຺ວາ ສຓ຺ຐານຕ຺ຖມ຺ປິ ‘‘ເຍ ເກຈີ’’ຕິ ຄາຖາທ຺ວຍມາຫ. ອຖ ວາ ຍສ຺ມາ ຍສ຺ສ ຍໍ ອາຣມ຺ມຓໍ ວິຠູຕໍ ໂຫຕິ, ຕສ຺ສ ຕຕ຺ຖ ຈິຕ຺ຕໍ ສຸຂໍ ຕິຏ຺ຐຕິ, ຕສ຺ມາ ເຕສໍ ຠິກ຺ຂູນໍ ຍສ຺ສ ຍໍ ວິຠູຕໍ ອາຣມ຺ມຓໍ, ຕສ຺ສ ຕຕ຺ຖ ຈິຕ຺ຕໍ ສຓ຺ຐາເປຕຸກາໂມ ຕສຖາວຣາທິທຸກຕິກາຣມ຺ມຓເຠທທີປກໍ ‘‘ເຍ ເກຈີ’’ຕິ ອິມໍ ຄາຖາທ຺ວຍມາຫ.
ເອຕ຺ຖ ຫິ ຕສຖາວຣທຸກໍ ທິຏ຺ຐາທິຏ຺ຐທຸກໍ ທູຣສນ຺ຕິກທຸກໍ ຠູຕສມ຺ຠເວສິທຸກນ຺ຕິ ຈຕ຺ຕາໂຣ ທຸເກ, ທີຆາທີຫິ ຈ ຉຫິ ປເທຫິ ມຊ຺ຌິມປທສ຺ສ ຕີສຸ ອຓຸກປທສ຺ສ ຈ ທ຺ວີສຸ ຕິເກສຸ ອຕ຺ຖສມ຺ຠວໂຕ ທີຆຣສ຺ສມຊ຺ຌິມຕິກໍ ມຫນ຺ຕາຓຸກມຊ຺ຌິມຕິກໍ ຖູລາຓຸກມຊ຺ຌິມຕິກນ຺ຕິ ຕໂຍ ຕິເກ ຈ ທີເປຕິ. ຕຕ຺ຖ ເຍ ເກຈີຕິ ອນວເສສວຈນໍ. ປາຓາ ເອວ ຠູຕາ ປາຓຠູຕາ. ອຖ ວາ ປາຓນ຺ຕີຕິ ປາຓາ, ເອເຕນ ອສ຺ສາສປສ຺ສາສປ຺ປຏິພທ຺ເຘ ປຎ຺ຈໂວກາຣສຕ຺ເຕ ຄຓ຺ຫາຕິ. ຠວນ຺ຕີຕິ ຠູຕາ, ເອເຕນ ເອກໂວກາຣຈຕຸໂວກາຣສຕ຺ເຕ ຄຓ຺ຫາຕິ. ອຕ຺ຖີຕິ ສນ຺ຕິ ສໍວິຊ຺ຊນ຺ຕິ.
ເອວໍ ‘‘ເຍ ເກຈິ ປາຓຠູຕຕ຺ຖີ’’ຕິ ອິມິນາ ວຈເນນ ທຸກຕິເກຫິ ສງ຺ຄເຫຕພ຺ເພ ສພ຺ພສຕ຺ເຕ ເອກໂຕ ທສ຺ເສຕ຺ວາ ອິທານິ ສພ຺ເພປິ ເຕ ຕສາ ວາ ຖາວຣາ ວ ນວເສສາຕິ ອິມິນາ ທຸເກນ ສງ຺ຄເຫຕ຺ວາ ທສ຺ເສຕິ.
ຕຕ຺ຖ ຕສນ຺ຕີຕິ ຕສາ, ສຕຓ຺ຫານໍ ສຠຍານຎ຺ເຈຕໍ ອຘິວຈນໍ. ຕິຏ຺ຐນ຺ຕີຕິ ຖາວຣາ, ປຫີນຕຓ຺ຫາຠຍານໍ ອຣຫຕໍ ເອຕໍ ອຘິວຈນໍ. ນຕ຺ຖິ ເຕສໍ ອວເສສນ຺ຕິ ອນວເສສາ, ສພ຺ເພປີຕິ ວຸຕ຺ຕໍ ໂຫຕິ. ຍຎ຺ຈ ທຸຕິຍຄາຖາຍ ອນ຺ເຕ ວຸຕ຺ຕໍ, ຕໍ ສພ຺ພທຸກຕິເກຫິ ສມ຺ພນ຺ຘິຕພ຺ພໍ ‘‘ເຍ ເກຈິ ປາຓຠູຕຕ຺ຖິ ຕສາ ວາ ຖາວຣາ ວາ ອນວເສສາ, ອິເມປິ ສພ຺ເພ ສຕ຺ຕາ ຠວນ຺ຕຸ ສຸຂິຕຕ຺ຕາ. ເອວໍ ຍາວ ຠູຕາ ວາ ສມ຺ຠເວສີ ວາ, ອິເມປິ ສພ຺ເພ ສຕ຺ຕາ ຠວນ຺ຕຸ ສຸຂິຕຕ຺ຕາ’’ຕິ.
ອິທານິ ທີຆຣສ຺ສມຊ຺ຌິມາທິຕິກຕ຺ຕຍທີປເກສຸ ທີຆາ ວາຕິອາທີສຸ ຉສຸ ປເທສຸ ທີຆາຕິ ທີຆຕ຺ຕຠາວາ ນາຄມຈ຺ຉໂຄຘາທໂຍ. ອເນກພ຺ຍາມສຕປ຺ປມາຓາປິ ຫິ ມຫາສມຸທ຺ເທ ນາຄານໍ ອຕ຺ຕຠາວາ ອເນກໂຍຊນປ຺ປມາຓາ ຈ ມຈ຺ຉໂຄຘາທີນໍ ອຕ຺ຕຠາວາ ໂຫນ຺ຕິ. ມຫນ຺ຕາຕິ ມຫນ຺ຕຕ຺ຕຠາວາ ຊເລ ມຈ຺ຉກຈ຺ຉປາທໂຍ, ຖເລ ຫຕ຺ຖິນາຄາທໂຍ, ອມນຸສ຺ເສສຸ ທານວາທໂຍ. ອາຫ ຈ ‘‘ຣາຫຸຄ຺ຄໍ ອຕ຺ຕຠາວີນ’’ນ຺ຕິ (ອ. ນິ. ໔.໑໕). ຕສ຺ສ ຫິ ອຕ຺ຕຠາໂວ ອຸພ຺ເພເຘນ ຈຕ຺ຕາຣິ ໂຍຊນສຫສ຺ສານິ ອຏ຺ຐ ຈ ໂຍຊນສຕານິ, ພາຫູ ທ຺ວາທສໂຍຊນສຕປຣິມາຓາ, ປຎ຺ຎາສໂຍຊນໍ ຠມຸກນ຺ຕຣໍ, ຕຖາ ອງ຺ຄຸລນ຺ຕຣິກາ, ຫຕ຺ຖຕລານິ ທ຺ເວ ໂຍຊນສຕານີຕິ. ມຊ຺ຌິມາຕິ ອສ຺ສໂຄຓມຫິໍສສູກຣາທີນໍ ອຕ຺ຕຠາວາ. ຣສ຺ສກາຕິ ຕາສຸ ຕາສຸ ຊາຕີສຸ ວາມນາທໂຍ ທີຆມຊ຺ຌິເມຫິ ໂອມກປ຺ປມາຓາ ສຕ຺ຕາ. ອຓຸກາຕິ ມໍສຈກ຺ຂຸສ຺ສ ອໂຄຈຣາ ທິພ຺ພຈກ຺ຂຸວິສຍາ ອຸທກາທີສຸ ນິພ຺ພຕ຺ຕາ ສຸຂຸມຕ຺ຕຠາວາ ສຕ຺ຕາ ອູກາທໂຍ ວາ. ອປິຈ ເຍ ຕາສຸ ຕາສຸ ຊາຕີສຸ ມຫນ຺ຕມຊ຺ຌິເມຫິ ຖູລມຊ຺ຌິເມຫິ ຈ ໂອມກປ຺ປມາຓາ ສຕ຺ຕາ, ເຕ ອຓຸກາຕິ ເວທິຕພ຺ພາ. ຖູລາຕິ ປຣິມຓ຺ຑລຕ຺ຕຠາວາ ສິປ຺ປິກສມ຺ພຸກາທໂຍ ສຕ຺ຕາ.