ອຏ຺ຐມຄາຖາວຓ຺ຓນາ

໘. ເອວໍ ສພ຺ພາກາເຣນ ເມຕ຺ຕາຠາວນໍ ທສ຺ເສຕ຺ວາ ອິທານິ ຕສ຺ເສວ ວຑ຺ຒນໍ ທສ຺ເສນ຺ໂຕ ອາຫ ‘‘ເມຕ຺ຕຎ຺ຈ ສພ຺ພໂລກສ຺ມີ’’ຕິ.

ຕຕ຺ຖ ມິຊ຺ຊຕິ ຕາຍຕິ ຈາຕິ ມິຕ຺ໂຕ, ຫິຕຊ຺ຌາສຍຕາຍ ສິນິຍ຺ຫຕິ, ອຫິຕາຄມໂຕ ຣກ຺ຂຕິ ຈາຕິ ອຕ຺ໂຖ. ມິຕ຺ຕສ຺ສ ຠາໂວ ເມຕ຺ຕໍ. ສພ຺ພໂລກສ຺ມີຕິ ອນວເສເສ ສຕ຺ຕໂລເກ. ມນສິ ຠວນ຺ຕິ ມານສໍ. ຕຎ຺ຫິ ຈິຕ຺ຕສມ຺ປຍຸຕ຺ຕຕ຺ຕາ ເອວໍ ວຸຕ຺ຕໍ. ຠາວເຍຕິ ວຑ຺ຒເຍ. ນ ອສ຺ສ ປຣິມາຓນ຺ຕິ ອປຣິມາຓໍ, ອປ຺ປມາຓສຕ຺ຕາຣມ຺ມຓຕາຍ ເອວໍ ວຸຕ຺ຕໍ. ອຸທ຺ຘນ຺ຕິ ອຸປຣິ, ເຕນ ອຣູປຠວໍ ຄຓ຺ຫາຕິ. ອໂຘຕິ ເຫຏ຺ຐາ, ເຕນ ກາມຠວໍ ຄຓ຺ຫາຕິ. ຕິຣິຍນ຺ຕິ ເວມຊ຺ຌໍ, ເຕນ ຣູປຠວໍ ຄຓ຺ຫາຕິ. ອສມ຺ພາຘນ຺ຕິ ສມ຺ພາຘວິຣຫິຕໍ, ຠິນ຺ນສີມນ຺ຕິ ວຸຕ຺ຕໍ ໂຫຕິ. ສີມາ ນາມ ປຈ຺ຈຕ຺ຖິໂກ ວຸຈ຺ຈຕິ, ຕສ຺ມິມ຺ປິ ປວຕ຺ຕນ຺ຕິ ອຕ຺ໂຖ. ອເວຣນ຺ຕິ ເວຣວິຣຫິຕໍ, ອນ຺ຕຣນ຺ຕຣາປິ ເວຣເຈຕນາປາຕຸຠາວວິຣຫິຕນ຺ຕິ ອຕ຺ໂຖ. ອສປຕ຺ຕນ຺ຕິ ວິຄຕປຈ຺ຈຕ຺ຖິກໍ. ເມຕ຺ຕາວິຫາຣີ ຫິ ປຸຄ຺ຄໂລ ມນຸສ຺ສານໍ ປິໂຍ ໂຫຕິ, ອມນຸສ຺ສານໍ ປິໂຍ ໂຫຕິ, ນາສ຺ສ ໂກຈິ ປຈ຺ຈຕ຺ຖິໂກ ໂຫຕິ, ເຕນສ຺ສ ຕໍ ມານສໍ ວິຄຕປຈ຺ຈຕ຺ຖິກຕ຺ຕາ ອສປຕ຺ຕນ຺ຕິ ວຸຈ຺ຈຕິ. ປຣິຍາຍວຈນຎ຺ຫິ ເອຕໍ, ຍທິທໍ ປຈ຺ຈຕ຺ຖິໂກ ສປຕ຺ໂຕຕິ. ອຍໍ ອນຸປທໂຕ ອຕ຺ຖວຓ຺ຓນາ.

ອຍໍ ປເນຕ຺ຖ ອຘິປ຺ເປຕຕ຺ຖທີປນາ – ຍທິທໍ ‘‘ເອວມ຺ປິ ສພ຺ພຠູເຕສຸ ມານສໍ ຠາວເຍ ອປຣິມາຓ’’ນ຺ຕິ ວຸຕ຺ຕໍ, ຕຎ຺ເຈຕໍ ອປຣິມາຓໍ ເມຕ຺ຕໍ ມານສໍ ສພ຺ພໂລກສ຺ມິໍ ຠາວເຍ ວຑ຺ຒເຍ, ວຸຑ຺ຒິໍ ວິຣູຬ຺ຫິໍ ເວປຸລ຺ລໍ ຄມເຍ ປາປເຍ. ກຖໍ? ອຸທ຺ຘໍ ອໂຘ ຈ ຕິຣິຍຎ຺ຈ, ອຸທ຺ຘໍ ຍາວ ຠວຄ຺ຄາ, ອໂຘ ຍາວ ອວີຈິໂຕ, ຕິຣິຍໍ ຍາວ ອວເສສທິສາ. ອຸທ຺ຘໍ ວາ ອາຣຸປ຺ປໍ, ອໂຘ ກາມຘາຕຸໍ, ຕິຣິຍໍ ຣູປຘາຕຸໍ ອນວເສສໍ ຜຣນ຺ໂຕ. ເອວໍ ຠາເວນ຺ໂຕປິ ຈ ຕໍ ຍຖາ ອສມ຺ພາຘໍ ອເວຣໍ ອສປຕ຺ຕຎ຺ຈ ໂຫຕິ, ຕຖາ ສມ຺ພາຘເວຣສປຕ຺ຕານໍ ອຠາວໍ ກໂຣນ຺ໂຕ ຠາວເຍ. ຍໍ ວາ ຕໍ ຠາວນາສມ຺ປທໍ ປຕ຺ຕໍ ສພ຺ພຕ຺ຖ ໂອກາສໂລກວເສນ ອສມ຺ພາຘໍ, ອຕ຺ຕໂນ ປເຣສຸ ອາຆາຕປ຺ປຏິວິນຍເນນ ອເວຣໍ, ອຕ຺ຕນິ ຈ ປເຣສໍ ອາຆາຕວິນຍເນນ ອສປຕ຺ຕໍ ໂຫຕິ. ຕໍ ອສມ຺ພາຘມເວຣມສປຕ຺ຕໍ ອປຣິມາຓໍ ເມຕ຺ຕໍ ມານສໍ ອຸທ຺ຘໍ ອໂຘ ຕິຣິຍຎ຺ຈາຕິ ຕິວິຘປຣິຈ຺ເຉເທ ສພ຺ພໂລກສ຺ມິໍ ຠາວເຍ ວຑ຺ຒເຍຕິ.