ນວມຄາຖາວຓ຺ຓນາ
໙. ເອວໍ ເມຕ຺ຕາຠາວນາຍ ວຑ຺ຒນໍ ທສ຺ເສຕ຺ວາ ອິທານິ ຕໍ ຠາວນມນຸຍຸຕ຺ຕສ຺ສ ວິຫຣໂຕ ອິຣິຍາປຖນິຍມາຠາວໍ ທສ຺ເສນ຺ໂຕ ອາຫ ‘‘ຕິຏ຺ຐໍ ຈຣໍ…ເປ… ອຘິຏ຺ເຐຍ຺ຍາ’’ຕິ.
ຕສ຺ສຕ຺ໂຖ – ເອວເມຕໍ ເມຕ຺ຕໍ ມານສໍ ຠາເວນ຺ໂຕ ໂສ ‘‘ນິສີທຕິ ປລ຺ລງ຺ກໍ ອາຠຸຊິຕ຺ວາ ອຸຊຸໍ ກາຍໍ ປຓິຘາຍາ’’ຕິອາທີສຸ ວິຍ ອິຣິຍາປຖນິຍມໍ ອກຕ຺ວາ ຍຖາສຸຂໍ ອຎ຺ຎຕຣຎ຺ຎຕຣອິຣິຍາປຖພາຘນວິໂນທນໍ ກໂຣນ຺ໂຕ ຕິຏ຺ຐໍ ວາ ຈຣໍ ວາ ນິສິນ຺ໂນ ວາ ສຍາໂນ ວາ ຍາວຕາ ວິຄຕມິທ຺ໂຘ ອສ຺ສ, ອຖ ເອຕໍ ເມຕ຺ຕາຌານສຕິໍ ອຘິຏ຺ເຐຍ຺ຍ.
ອຖ ວາ ເອວໍ ເມຕ຺ຕາຠາວນາຍ ວຑ຺ຒນໍ ທສ຺ເສຕ຺ວາ ອິທານິ ວສີຠາວໍ ທສ຺ເສນ຺ໂຕ ອາຫ ‘‘ຕິຏ຺ຐໍ ຈຣ’’ນ຺ຕິ. ວສິປ຺ປຕ຺ໂຕ ຫິ ຕິຏ຺ຐໍ ວາ ຈຣໍ ວາ ນິສິນ຺ໂນ ວາ ສຍາໂນ ວາ ຍາວຕາ ອິຣິຍາປເຖນ ເອຕໍ ເມຕ຺ຕາຌານສຕິໍ ອຘິຏ຺ຐາຕຸກາໂມ ໂຫຕິ, ອຖ ວາ ຕິຏ຺ຐໍ ວາ ຈຣໍ ວາ…ເປ… ສຍາໂນ ວາຕິ ນ ຕສ຺ສ ຐານາທີນິ ອນ຺ຕຣາຍກຣານິ ໂຫນ຺ຕິ, ອປິຈ ໂຂ ຍາວຕາ ເອຕໍ ເມຕ຺ຕາຌານສຕິໍ ອຘິຏ຺ຐາຕຸກາໂມ ໂຫຕິ, ຕາວຕາ ວິຄຕມິທ຺ໂຘ ຫຸຕ຺ວາ ອຘິຏ຺ຐາຕິ, ນຕ຺ຖິ ຕສ຺ສ ຕຕ຺ຖ ທນ຺ຘາຍິຕຕ຺ຕໍ. ເຕນາຫ ‘‘ຕິຏ຺ຐໍ ຈຣໍ ນິສິນ຺ໂນ ວ, ສຍາໂນ ຍາວຕາສ຺ສ ວິຕມິທ຺ໂຘ. ເອຕໍ ສຕິໍ ອຘິຏ຺ເຐຍ຺ຍາ’’ຕິ.
ຕສ຺ສາຍມຘິປ຺ປາໂຍ – ຍໍ ຕໍ ‘‘ເມຕ຺ຕຎ຺ຈ ສພ຺ພໂລກສ຺ມິ, ມານສໍ ຠາວເຍ’’ຕິ ວຸຕ຺ຕໍ, ຕໍ ຍຖາ ຠາເວຍ຺ຍ, ຍຖາ ຐານາທີສຸ ຍາວຕາ ອິຣິຍາປເຖນ ຐານາທີນິ ວາ ອນາທິຍິຕ຺ວາ ຍາວຕາ ເອຕໍ ເມຕ຺ຕາຌານສຕິໍ ອຘິຏ຺ຐາຕຸກາໂມ ອສ຺ສ, ຕາວຕາ ວິຄຕມິທ຺ໂຘວ ຫຸຕ຺ວາ ເອຕໍ ສຕິໍ ອຘິຏ຺ເຐຍ຺ຍາຕິ.
ເອວໍ ເມຕ຺ຕາຠາວນາຍ ວສີຠາວໍ ທສ຺ເສນ຺ໂຕ ‘‘ເອຕໍ ສຕິໍ ອຘິຏ຺ເຐຍ຺ຍາ’’ຕິ ຕສ຺ມິໍ ເມຕ຺ຕາວິຫາເຣ ນິໂຍເຊຕ຺ວາ ອິທານິ ຕໍ ວິຫາຣໍ ຖຸນນ຺ໂຕ ອາຫ ‘‘ພ຺ຣຫ຺ມເມຕໍ ວິຫາຣມິຘມາຫູ’’ຕິ.
ຕສ຺ສຕ຺ໂຖ – ຍ຺ວາຍໍ ‘‘ສຸຂິໂນ ວາ ເຂມິໂນ ວາ ໂຫນ຺ຕູ’’ຕິອາທິ ກຕ຺ວາ ຍາວ ‘‘ເອຕໍ ສຕິໍ ອຘິຏ຺ເຐຍ຺ຍາ’’ຕິ ວຓ຺ຓິໂຕ ເມຕ຺ຕາວິຫາໂຣ. ເອຕໍ ຈຕູສຸ ທິພ຺ພພ຺ຣຫ຺ມອຣິຍອິຣິຍາປຖວິຫາເຣສຸ ນິທ຺ໂທສຕ຺ຕາ ອຕ຺ຕໂນປິ ປເຣສມ຺ປິ ອຕ຺ຖກຣຕ຺ຕາ ຈ ອິຘ ອຣິຍສ຺ສ ຘມ຺ມວິນເຍ ພ຺ຣຫ຺ມວິຫາຣມາຫຸ ເສຏ຺ຐວິຫາຣມາຫູຕິ, ຍໂຕ ສຕຕໍ ສມິຕໍ ອພ຺ໂພກິຓ຺ຓໍ ຕິຏ຺ຐໍ ຈຣໍ ນິສິນ຺ໂນ ວາ ສຍາໂນ ວາ ຍາວຕາສ຺ສ ວິຄຕມິທ຺ໂຘ, ເອຕໍ ສຕິໍ ອຘິຏ຺ເຐຍ຺ຍາຕິ.