໒. ຘາຕຸສຸຕ຺ຕວຓ຺ຓນາ

໕໑. ທຸຕິເຍ ຘາຕຸໂຍຕິ ອຕ຺ຕໂນ ຜລສ຺ສ ສຠາວສ຺ສ ຈ ຘາຣຓຏ຺ເຐນ ຘາຕຸໂຍ. ຍຎ຺ເຈຕ຺ຖ ຜລນິພ຺ພຕ຺ຕກໍ, ຕໍ ອຕ຺ຕໂນ ຜລສ຺ສ ສຠາວສ຺ສ ຈ, ອິຕຣໍ ສຠາວສ຺ເສວ ຘາຣຓຏ຺ເຐນ ຘາຕຸ. ຣູປຘາຕູຕິ ຣູປຠໂວ. ຘາຕຸຍາ ອາຄຕຏ຺ຐາເນ ຠເວນ ປຣິຈ຺ຉິນ຺ທິຕພ຺ພໍ, ຠວສ຺ສ ອາຄຕຏ຺ຐາເນ ຘາຕຸຍາ ປຣິຈ຺ຉິນ຺ທິຕພ຺ພນ຺ຕິ ອິຘ ຠເວນ ປຣິຈ຺ເຉໂທ ກຖິໂຕ. ຕສ຺ມາ –

‘‘ກຕເມ ຘມ຺ມາ ຣູປາວຈຣາ? ເຫຏ຺ຐໂຕ ພ຺ຣຫ຺ມໂລກໍ ປຣິຍນ຺ຕໍ ກຣິຕ຺ວາ ອຸປຣິໂຕ ອກນິຏ຺ເຐ ເທເວ ອນ຺ໂຕ ກຣິຕ຺ວາ ເອຕ຺ຖາວຈຣາ ເອຕ຺ຖ ປຣິຍາປນ຺ນາ ຂນ຺ຘຘາຕຸອາຍຕນາ, ອິເມ ຘມ຺ມາ ຣູປາວຈຣາ’’ຕິ (ຘ. ສ. ໑໒໘໙) –

ເອວໍ ວຸຕ຺ຕາ ຣູປາວຈຣຘມ຺ມາ ຣູປຘາຕຸ. ອຣູປຘາຕູຕິ ອຣູປຠໂວ. ອິຘາປິ ຠເວນ ປຣິຈ຺ເຉໂທ ກຖິໂຕຕິ –

‘‘ກຕເມ ຘມ຺ມາ ອຣູປາວຈຣາ? ເຫຏ຺ຐໂຕ ອາກາສານຎ຺ຈາຍຕນູປເຄ ເທເວ ອນ຺ໂຕ ກຣິຕ຺ວາ, ອຸປຣິໂຕ ເນວສຎ຺ຎານາສຎ຺ຎາຍຕນູປເຄ ເທເວ ອນ຺ໂຕ ກຣິຕ຺ວາ, ເອຕ຺ຖາວຈຣາ ເອຕ຺ຖ ປຣິຍາປນ຺ນາ ຂນ຺ຘຘາຕຸອາຍຕນາ, ອິເມ ຘມ຺ມາ ອຣູປາວຈຣາ’’ຕິ (ຘ. ສ. ໑໒໙໑) –

ເອວໍ ວຸຕ຺ຕາ ອຣູປາວຈຣຘມ຺ມາ ອຣູປຘາຕຸ. ນິໂຣຘຘາຕູຕິ ນິພ຺ພານໍ ເວທິຕພ຺ພໍ.

ອປໂຣ ນໂຍ – ຣູປສຫິຕາ, ຣູປປຏິພທ຺ຘາ, ຘມ຺ມປ຺ປວຕ຺ຕິ ຣູປຘາຕຸ, ປຎ຺ຈໂວກາຣຠໂວ, ເອກໂວກາຣຠໂວ ຈ, ເຕນ ສກໂລ ກາມຠໂວ ຣູປຠໂວ ຈ ສງ຺ຄຫິໂຕ. ຣູປຣຫິຕາ ຘມ຺ມປ຺ປວຕ຺ຕິ ອຣູປຘາຕຸ, ຈຕຸໂວກາຣຠໂວ, ເຕນ ອຣູປຠໂວ ສງ຺ຄຫິໂຕ. ອິຕິ ທ຺ວີຫິ ປເທຫິ ຕໂຍ ຠວາ ສພ຺ພາ ສໍສາຣປ຺ປວຕ຺ຕິ ທສ຺ສິຕາ. ຕຕິຍປເທນ ປນ ອສງ຺ຂຕຘາຕຸເຍວ ສງ຺ຄຫິຕາຕິ ມຄ຺ຄຜລານິ ອິຘ ຕິກວິນິມຸຕ຺ຕຘມ຺ມາ ນາມ ຊາຕາ. ເກຈິ ປນ ‘‘ຣູປຘາຕູຕິ ຣູປສຠາວາ ຘມ຺ມາ, ອຣູປຘາຕູຕິ ອຣູປສຠາວາ ຘມ຺ມາຕິ ປທທ຺ວເຍນ ອນວເສສໂຕ ປຎ຺ຈກ຺ຂນ຺ຘາ ຄຫິຕາ’’ຕິ. ‘‘ຣູປຕຓ຺ຫາຍ ວິສຍຠູຕາ ຘມ຺ມາ ຣູປຘາຕຸ, ອຣູປຕຓ຺ຫາຍ ວິສຍຠູຕາ ອຣູປຘາຕູ’’ຕິ ຈ ວທນ຺ຕິ, ຕໍ ສພ຺ພໍ ອິຘ ນາຘິປ຺ເປຕໍ. ຕສ຺ມາ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ.

ຄາຖາສຸ ຣູປຘາຕຸໍ ປຣິຎ຺ຎາຍາຕິ ຣູປປຏິພທ຺ຘຘມ຺ມປວຕ຺ຕິໍ ຎາຕປຣິຎ຺ຎາທີຫິ ຕີຫິ ປຣິຎ຺ຎາຫິ ປຣິຊານິຕ຺ວາ. ອາຣຸປ຺ເປສຸ ອສຓ຺ຐິຕາຕິ ອຣູປາວຈຣຘມ຺ເມສຸ ຠວຣາຄວເສນ ຠວທິຏ຺ຐິວເສນ ຈ ນ ປຕິຏ຺ຐິຕາ ອນລ຺ລີນາ. ‘‘ອຣູເປສຸ ອສຓ຺ຐິຕາ’’ຕິ ຈ ປຐນ຺ຕິ, ໂສ ເອວ ອຕ຺ໂຖ. ເອຕ຺ຕາວຕາ ເຕຠູມກຘມ຺ມານໍ ປຣິຎ຺ຎາ ວຸຕ຺ຕາ. ນິໂຣເຘ ເຍ ວິມຸຈ຺ຈນ຺ຕີຕິ ເຍ ນິພ຺ພາເນ ອາຣມ຺ມຓຠູເຕ ອຄ຺ຄມຄ຺ຄຜລວເສນ ສມຸຈ຺ເຉທປຏິປ຺ປສ຺ສທ຺ຘີຫິ ອນວເສສກິເລສໂຕ ວິມຸຈ຺ຈນ຺ຕິ. ເຕ ຊນາ ມຈ຺ຈຸຫາຍິໂນຕິ ເຕ ຂີຓາສວຊນາ ມຣຓໍ ສມຕີຕາ.

ເອວໍ ຘາຕຸຕ຺ຕຍສມຕິກ຺ກເມນ ອມຕາຘິຄມໍ ທສ຺ເສຕ຺ວາ ‘‘ອຍຎ຺ຈ ປຏິປທາ ມຍາ ຄຕມຄ຺ໂຄ ຈ ຕຸມ຺ຫາກໍ ທສ຺ສິໂຕ’’ຕິ ຕຕ຺ຖ ເນສໍ ອຸສ຺ສາຫໍ ຊເນນ຺ໂຕ ທຸຕິຍໍ ຄາຖມາຫ. ຕຕ຺ຖ ກາເຍນາຕິ ນາມກາເຍນ ມຄ຺ຄຜເລຫິ. ຜຸສຍິຕ຺ວາຕິ ປຕ຺ວາ. ນິຣູປຘິນ຺ຕິ ຂນ຺ຘາທິສພ຺ພູປຘິຣຫິຕໍ. ອຸປຘິປ຺ປຏິນິສ຺ສຄ຺ຄນ຺ຕິ ເຕສໍເຍວ ຈ ອຸປຘີນໍ ປຏິນິສ຺ສຊ຺ຊນກາຣຓໍ. ນິພ຺ພານສ຺ສ ຫິ ມຄ຺ຄຎາເຓນ ສຈ຺ຉິກິຣິຍາຍ ສພ຺ເພ ອຸປຘໂຍ ປຏິນິສ຺ສຏ຺ຐາ ໂຫນ຺ຕີຕິ ຕໍ ເຕສໍ ປຏິນິສ຺ສຊ຺ຊນກາຣຓໍ. ສຈ຺ຉິກຕ຺ວາຕິ ກາເລນ ກາລໍ ຜລສມາປຕ຺ຕິສມາປຊ຺ຊເນນ ອຕ຺ຕປຈ຺ຈກ຺ຂໍ ກຕ຺ວາ ອນາສໂວ ສມ຺ມາສມ຺ພຸທ຺ໂຘ ຕເມວ ອໂສກໍ ວິຣຊໍ ນິພ຺ພານປທໍ ເທເສຕິ. ຕສ຺ມາ ຕທຘິຄມາຍ ອຸສ຺ສຸກ຺ກໍ ກາຕພ຺ພນ຺ຕິ.

ທຸຕິຍສຸຕ຺ຕວຓ຺ຓນາ ນິຏ຺ຐິຕາ.