໘. ປຏິສລ຺ລານສຸຕ຺ຕວຓ຺ຓນາ

໔໕. ອຏ຺ຐເມ ປຏິສລ຺ລານຣາມາຕິ ເຕຫິ ເຕຫິ ສຕ຺ຕສງ຺ຂາເຣຫິ ປຏິນິວຕ຺ຕິຕ຺ວາ ສລ຺ລານໍ ປຏິສລ຺ລານໍ, ເອກວິຫາໂຣ ເອກມນ຺ຕເສວິຕາ, ກາຍວິເວໂກຕິ ອຕ຺ໂຖ. ຕໍ ປຏິສລ຺ລານໍ ຣມນ຺ຕິ ໂຣຈນ຺ຕີຕິ ປຏິສລ຺ລານຣາມາ. ‘‘ປຏິສລ຺ລານາຣາມາ’’ຕິປິ ປາໂຐ. ຍຖາ ວຸຕ຺ຕໍ ປຏິສລ຺ລານໍ ອາຣມິຕພ຺ພໂຕ ອາຣາໂມ ເອເຕສນ຺ຕິ ປຏິສລ຺ລານາຣາມາ. ວິຫຣຖາຕິ ເອວໍຠູຕາ ຫຸຕ຺ວາ ວິຫຣຖາຕິ ອຕ຺ໂຖ. ປຏິສລ຺ລາເນ ຣຕາ ນິຣຕາ ສມ຺ມຸທິຕາຕິ ປຏິສລ຺ລານຣຕາ. ເອຕ຺ຕາວຕາ ຊາຄຣິຍານຸໂຍໂຄ, ຕສ຺ສ ນິມິຕ຺ຕຠູຕາ ວູປກຏ຺ຐກາຍຕາ ຈ ທສ຺ສິຕາ. ຊາຄຣິຍານຸໂຍໂຄ, ສີລສໍວໂຣ, ອິນ຺ທ຺ຣິເຍສຸ, ຄຸຕ຺ຕທ຺ວາຣຕາ, ໂຠຊເນ ມຕ຺ຕຎ຺ຎຸຕາ, ສຕິສມ຺ປຊຎ຺ຎນ຺ຕິ ອິເມຫິ ຘມ຺ເມຫິ ວິນາ ນ ວຕ຺ຕຕີຕິ ເຕປິ ອິຘ ອຕ຺ຖໂຕ ວຸຕ຺ຕາ ເອວາຕິ ເວທິຕພ຺ພາ.

ອຊ຺ຌຕ຺ຕໍ ເຈໂຕສມຖມນຸຍຸຕ຺ຕາຕິ ອຕ຺ຕໂນ ຈິຕ຺ຕສມເຖ ອນຸຍຸຕ຺ຕາ. ອຊ຺ຌຕ຺ຕໍ ອຕ຺ຕໂນຕິ ຈ ເອຕໍ ເອກຕ຺ຖໍ, ພ຺ຍຎ຺ຊນເມວ ນານໍ. ຠຸມ຺ມຕ຺ເຖ ເຈຕໍ ສມຖນ຺ຕິ ອນຸສທ຺ທໂຍເຄນ ອຸປໂຍຄວຈນໍ. ອນິຣາກຕຊ຺ຌານາຕິ ພຫິ ອນີຫຕຊ຺ຌານາ ອວິນາສິຕຊ຺ຌານາ ວາ. ນີຫຣຓໍ ວິນາໂສ ວາຕິ ອິທໍ ນິຣາກຕໍ ນາມ ‘‘ຖມ຺ຠໍ ນິຣໍກຕ຺ວາ ນິວາຕວຸຕ຺ຕີ’’ຕິອາທີສຸ (ສຸ. ນິ. ໓໒໘) ວິຍ. ວິປສ຺ສນາຍ ສມນ຺ນາຄຕາຕິ ສຕ຺ຕວິຘາຍ ອນຸປສ຺ສນາຍ ຍຸຕ຺ຕາ. ສຕ຺ຕວິຘາ ອນຸປສ຺ສນາ ນາມ ອນິຈ຺ຈານຸປສ຺ສນາ, ທຸກ຺ຂານຸປສ຺ສນາ, ອນຕ຺ຕານຸປສ຺ສນາ, ນິພ຺ພິທານຸປສ຺ສນາ, ວິຣາຄານຸປສ຺ສນາ, ນິໂຣຘານຸປສ຺ສນາ, ປຏິນິສ຺ສຄ຺ຄານຸປສ຺ສນາ ຈ, ຕາ ວິສຸທ຺ຘິມຄ຺ເຄ ວິຕ຺ຖາຣິຕາວ.

ພ຺ຣູເຫຕາໂຣ ສຸຎ຺ຎາຄາຣານນ຺ຕິ ວຑ຺ເຒຕາໂຣ ສຸຎ຺ຎາຄາຣານໍ. ເອຕ຺ຖ ຈ ‘‘ສຸຎ຺ຎາຄາຣານ’’ນ຺ຕິ ຍໍກິຎ຺ຈິ ວິວິຕ຺ຕໍ ຠາວນານຸໂຍຄສ຺ສ ອນຸຈ຺ຉວິກຏ຺ຐານໍ. ສມຖວິປສ຺ສນາວເສນ ກມ຺ມຏ຺ຐານໍ ຄເຫຕ຺ວາ ຣຕ຺ຕິນ຺ທິວໍ ສຸຎ຺ຎາຄາຣໍ ປວິສິຕ຺ວາ ຠາວນານຸໂຍຄວເສນ ນິສີທມານາ ຠິກ຺ຂູ ‘‘ພ຺ຣູເຫຕາໂຣ ສຸຎ຺ຎາຄາຣານ’’ນ຺ຕິ ເວທິຕພ຺ພາ. ເອກຠູມິກາທິປາສາເທປິ ປນ ວາສໍ ກຸຣຸມານາ ຌາຍິໂນ ສຸຎ຺ຎາຄາຣານໍ ພ຺ຣູເຫຕາໂຣຕ຺ເວວ ເວທິຕພ຺ພາ.

ເອຕ຺ຖ ຈ ຍາ ‘‘ປຏິສລ຺ລານຣາມາ, ຠິກ຺ຂເວ, ວິຫຣຖ ປຏິສລ຺ລານຣຕາ’’ຕິ ວູປກຏ຺ຐກາຍຕາ ວິຫິຕາ, ສາ ປຣິສຸທ຺ຘສີລສ຺ສ, ນ ອສີລສ຺ສ ອວິສຸທ຺ຘສີລສ຺ສ ວາ ຕສ຺ສ ຣູປາຣມ຺ມຓາທິໂຕ ຈິຕ຺ຕວິນິວຕ຺ຕນສ຺ເສວ ອຠາວໂຕຕິ ອຕ຺ຖໂຕ ສີລວິສຸທ຺ຘິ ທສ຺ສິຕາຕິ ວຸຕ຺ໂຕວາຍມຕ຺ໂຖ. ‘‘ອຊ຺ຌຕ຺ຕໍ ເຈໂຕສມຖມນຸຍຸຕ຺ຕາ ອນິຣາກຕຊ຺ຌານາ’’ຕິ ປທທ຺ວເຍນ ສມາຘິຠາວນາ, ‘‘ວິປສ຺ສນາຍ ສມນ຺ນາຄຕາ’’ຕິ ອິມິນາ ປຎ຺ຎາຠາວນາ ວິຫິຕາຕິ ໂລກິຍາ ຕິສ຺ໂສ ສິກ຺ຂາ ທສ຺ສິຕາ.

ອິທານິ ຕາສຸ ປຕິຏ຺ຐິຕສ຺ສ ອວສ຺ສໍຠາວິຜລໍ ທສ຺ເສຕຸໍ ‘‘ປຏິສລ຺ລານຣາມານ’’ນ຺ຕິອາທິ ວຸຕ຺ຕໍ. ຕຕ຺ຖ ພ຺ຣູເຫຕານນ຺ຕິ ວຑ຺ເຒຕານໍ. ທ຺ວິນ຺ນໍ ຜລານນ຺ຕິ ຕຕິຍຈຕຸຕ຺ຖຜລານໍ. ປາຏິກງ຺ຂນ຺ຕິ ອິຈ຺ຉິຕພ຺ພໍ ອວສ຺ສໍຠາວີ. ອຎ຺ຎາຕິ ອຣຫຕ຺ຕໍ. ຕຎ຺ຫິ ເຫຏ຺ຐິມມຄ຺ຄຎາເຓຫິ ຎາຕມຣິຍາທໍ ອນຕິກ຺ກມິຕ຺ວາ ຊານນໂຕ ປຣິປຸຓ຺ຓຊານນຕ຺ຕາ ອຸປຣິ ຊານນກິຈ຺ຈາຠາວໂຕ ຈ ‘‘ອຎ຺ຎາ’’ຕິ ວຸຈ຺ຈຕິ. ສຕິ ວາ ອຸປາທິເສເສຕິ ສຕິ ວາ ກິເລສູປາທິເສເສ, ປຫາຕຸໍ ອສກ຺ກຸເຓຍ຺ເຍ ສຕິ. ຎາເຓ ຫິ ອປຣິປກ຺ເກ ເຍ ເຕນ ປຣິປກ຺ເກນ ປຫາຕພ຺ພກິເລສາ, ເຕ ນ ປຫີຍນ຺ຕິ. ຕໍ ສນ຺ຘາຍາຫ ‘‘ສຕິ ວາ ອຸປາທິເສເສ’’ຕິ. ສຕິ ຈ ກິເລເສ ຂນ຺ຘາຠິສງ຺ຂາຣາ ຕິຏ຺ຐນ຺ຕິ ເອວ. ອິຕິ ອິມສ຺ມິໍ ສຸຕ຺ເຕ ອນາຄາມິຜລໍ ອຣຫຕ຺ຕນ຺ຕິ ທ຺ເວ ຘມ຺ມາ ທສ຺ສິຕາ. ຍຖາ ເຈຕ຺ຖ, ເອວໍ ອິໂຕ ປເຣສຸ ທ຺ວີສຸ ສຸຕ຺ເຕສຸ.

ຄາຖາສຸ ເຍ ສນ຺ຕຈິຕ຺ຕາຕິ ເຍ ໂຍຄາວຈຣາ ຕທງ຺ຄວເສນ ວິກ຺ຂມ຺ຠນວເສວ ຈ ສມິຕກິເລສຕາຍ ສນ຺ຕຈິຕ຺ຕາ. ເນປກ຺ກໍ ວຸຈ຺ຈຕິ ປຎ຺ຎາ, ຕາຍ ສມນ຺ນາຄຕຕ຺ຕາ ນິປກາ. ອິມິນາ ເຕສໍ ກມ຺ມຏ຺ຐານປຣິຫຣຓຎາຓໍ ທສ຺ເສຕິ. ສຕິມນ຺ໂຕ ຈ ຌາຍິໂນຕິ ຐານນິສຊ຺ຊາທີສຸ ກມ຺ມຏ຺ຐານາວິຊຫນເຫຕຸຠູຕາຍ ສຕິຍາ ສຕິມນ຺ໂຕ, ອາຣມ຺ມຓູປນິຊ຺ຌານລກ຺ຂເຓນ ຌາເນນ ຌາຍິໂນ. ສມ຺ມາ ຘມ຺ມໍ ວິປສ຺ສນ຺ຕິ, ກາເມສຸ ອນເປກ຺ຂິໂນຕິ ປຸພ຺ເພເຍວ ‘‘ອຏ຺ຐິກງ຺ກລູປມາ ກາມາ’’ຕິອາທິນາ (ມ. ນິ. ໑.໒໓໔; ປາຈິ. ໔໑໗) ວຕ຺ຖຸກາເມສຸ ກິເລສກາເມສຸ ຈ ອາທີນວປຈ຺ຈເວກ຺ຂເຓນ ອນເປກ຺ຂິໂນ ອນຕ຺ຖິກາ ເຕ ປຫາຍ ອຘິຄຕໍ ອຸປຈາຣສມາຘິໍ ອປ຺ປນາສມາຘິໍ ວາ ປາທກໍ ກຕ຺ວາ ນາມຣູປໍ ຕສ຺ສ ປຈ຺ຈເຍ ຈ ປຣິຄ຺ຄເຫຕ຺ວາ ກລາປສມ຺ມສນາທິກ຺ກເມນ ສມ຺ມາ ອວິປຣີຕໍ ປຎ຺ຈກ຺ຂນ຺ຘຘມ຺ມໍ ອນິຈ຺ຈາທິໂຕ ວິປສ຺ສນ຺ຕິ.

ອປ຺ປມາທຣຕາຕິ ວຸຕ຺ຕປ຺ປກາຣາຍ ສມຖວິປສ຺ສນາຠາວນາຍ ອປ຺ປມຊ຺ຊເນ ຣຕາ ອຠິຣຕາ ຕຕ຺ຖ ອປ຺ປມາເທເນວ ຣຕ຺ຕິນ຺ທິວໍ ວີຕິນາເມນ຺ຕາ. ສນ຺ຕາຕິ ສມານາ. ‘‘ສຕ຺ຕາ’’ຕິປິ ປາໂຐ, ປຸຄ຺ຄລາຕິ ອຕ຺ໂຖ. ປມາເທ ຠຍທສ຺ສິໂນຕິ ນິຣຍູປປຕ຺ຕິອາທິກໍ ປມາເທ ຠຍໍ ປສ຺ສນ຺ຕາ. ອຠພ຺ພາ ປຣິຫານາຍາຕິ ເຕ ເອວຣູປາ ສມຖວິປສ຺ສນາຘມ຺ເມຫິ ມຄ຺ຄຜເລຫິ ວາ ປຣິຫານາຍ ອຠພ຺ພາ. ສມຖວິປສ຺ສນາໂຕ ຫິ ສມ຺ປຕ຺ຕໂຕ ນ ປຣິຫາຍນ຺ຕິ, ອິຕຣານິ ຈ ອປ຺ປຕ຺ຕານິ ປາປຸຓນ຺ຕິ. ນິພ຺ພານສ຺ເສວ ສນ຺ຕິເກຕິ ນິພ຺ພານສ຺ສ ຈ ອນຸປາທາປຣິນິພ຺ພານສ຺ສ ຈ ສນ຺ຕິເກ ເອວ, ນ ຈິຣສ຺ເສວ ນໍ ອຘິຄມິສ຺ສນ຺ຕີຕິ.

ອຏ຺ຐມສຸຕ຺ຕວຓ຺ຓນາ ນິຏ຺ຐິຕາ.