໓. ວິຊ຺ຊາສຸຕ຺ຕວຓ຺ຓນາ

໔໐. ຕຕິເຍ ປຸພ຺ພງ຺ຄມາຕິ ສຫຊາຕວເສນ, ອຸປນິສ຺ສຍວເສນ ຈາຕິ ທ຺ວີຫິ ອາກາເຣຫິ ປຸພ຺ພງ຺ຄມາ ປຸຣສ຺ສຣາ ປຘານກາຣຓໍ. ນ ຫິ ອວິຊ຺ຊາຍ ວິນາ ອກຸສລຸປ຺ປຕ຺ຕິ ອຕ຺ຖິ. ສມາປຕ຺ຕິຍາຕິ ສມາປຊ຺ຊນາຍ ສຠາວປຏິລາຠາຍ, ປວຕ຺ຕິຍາຕິ ອຕ຺ໂຖ. ຕຕ຺ຖ ອກຸສລປ຺ປວຕ຺ຕິຍາ ອາທີນວປ຺ປຏິຈ຺ຉາທເນນ ອໂຍນິໂສມນສິກາຣສ຺ສ ປຈ຺ຈຍຠາເວນ ອປ຺ປຫີນຠາເວນ ຈ ອກຸສລຘມ຺ມານໍ ອຸປນິສ຺ສຍຠາໂວ ທິສ຺ສຕິ.

ເອວໍ ພ຺ຍາຘິມຣຓາທິທຸກ຺ຂສ຺ສ ອຘິຏ຺ຐານຠາວໂຕ ສພ຺ພາປິ ຄຕິໂຍ ອິຘ ທຸຄ຺ຄຕິໂຍ. ອຖ ວາ ຣາຄາທິກິເລເສຫິ ທູສິຕາ ຄຕິໂຍ ກາຍວຈີຈິຕ຺ຕານໍ ປວຕ຺ຕິໂຍຕິ ທຸຄ຺ຄຕິໂຍ, ກາຍວຈີມໂນທຸຈ຺ຈຣິຕານິ. ອສ຺ມິໍ ໂລເກຕິ ອິຘ ໂລເກ ມນຸສ຺ສຄຕິຍໍ ວາ. ປຣມ຺ຫິ ຈາຕິ ຕໂຕ ອຎ຺ຎາສຸ ຄຕີສຸ. ອວິຊ຺ຊາມູລິກາ ສພ຺ພາຕິ ຕາ ສພ຺ພາປິ ທຸຈ຺ຈຣິຕສ຺ສ ວິປຕ຺ຕິໂຍ ວຸຕ຺ຕນເຍນ ອວິຊ຺ຊາປຸພ຺ພງ຺ຄມຕ຺ຕາ ອວິຊ຺ຊາມູລິກາ ເອວ. ອິຈ຺ຉາໂລຠສມຸສ຺ສຍາຕິ ອສມ຺ປຕ຺ຕວິສຍປຣິເຍສນລກ຺ຂຓາຍ ອິຈ຺ຉາຍ, ສມ຺ປຕ຺ຕວິສຍລຸພ຺ຠນລກ຺ຂເຓນ ໂລເຠນ ຈ ສມຸສ຺ສິຕາ ອຸປຈິຕາຕິ ອິຈ຺ຉາໂລຠສມຸສ຺ສຍາ.

ຍໂຕຕິ ຍສ຺ມາ ອວິຊ຺ຊາເຫຕຸ ອວິຊ຺ຊາຍ ນິວຸໂຕ ຫຸຕ຺ວາ. ປາປິຈ຺ໂຉຕິ ອວິຊ຺ຊາຍ ປຏິຈ຺ຉາທິຕຕ຺ຕາ ປາປິຈ຺ຉຕາຍ ອາທີນເວ ອປສ຺ສນ຺ໂຕ ອສນ຺ຕຄຸຓສມ຺ຠາວນວເສນ ໂກຫຎ຺ຎາທີນິ ກໂຣນ຺ໂຕ ປາປິຈ຺ໂຉ, ໂລເຠເນວ ອຕ຺ຣິຈ຺ຉຕາປິ ຄຫິຕາຕິ ທຏ຺ຐພ຺ພາ. ອນາທໂຣຕິ ໂລກາຘິປຕິໂນ ໂອຕ຺ຕປ຺ປສ຺ສ ອຠາເວນ ສພ຺ຣຫ຺ມຈາຣີສຸ ອາທຣຣຫິໂຕ. ຕໂຕຕິ ຕສ຺ມາ ອວິຊ຺ຊາປາປິຈ຺ຉຕາອຫິຣິກາໂນຕ຺ຕປ຺ປເຫຕຸ. ປສວຕີຕິ ກາຍທຸຈ຺ຈຣິຕາທິເຠທໍ ປາປໍ ອຸປຈິນຕິ. ອປາຍໍ ເຕນ ຄຈ຺ຉຕີຕິ ເຕນ ຕຖາ ປສຸເຕນ ປາເປນ ນິຣຍາທິເຠທໍ ອປາຍໍ ຄຈ຺ຉຕິ ອຸປປຊ຺ຊຕິ.

ຕສ຺ມາຕິ ຍສ຺ມາ ເອເຕ ເອວໍ ສພ຺ພທຸຈ຺ຈຣິຕມູລຠູຕາ ສພ຺ພທຸຄ຺ຄຕິປຣິກ຺ກິເລສເຫຕຸຠູຕາ ຈ ອວິຊ຺ຊາທໂຍ, ຕສ຺ມາ ອິຈ຺ຉຎ຺ຈ, ໂລຠຎ຺ຈ, ອວິຊ຺ຊຎ຺ຈ, ຈສທ຺ເທນ ອຫິຣິກາໂນຕ຺ຕປ຺ປຎ຺ຈ ວິຣາຊຍໍ ສມຸຈ຺ເຉທວເສນ ປຊຫໍ. ກຖໍ ວິຣາເຊຕີຕິ ອາຫ? ວິຊ຺ຊໍ ອຸປ຺ປາທຍນ຺ຕິ, ວິປສ຺ສນາປຏິປາຏິຍາ ຈ, ມຄ຺ຄປຏິປາຏິຍາ ຈ, ອຸສ຺ສກ຺ກິຕ຺ວາ ອຣຫຕ຺ຕມຄ຺ຄວິຊ຺ຊໍ ອຕ຺ຕໂນ ສນ຺ຕາເນ ອຸປ຺ປາທຍນ຺ໂຕ. ສພ຺ພາ ທຸຄ຺ຄຕິໂຍຕິ ສພ຺ພາປິ ທຸຈ຺ຈຣິຕສງ຺ຂາຕາ ທຸຄ຺ຄຕິໂຍ, ວຏ຺ຏທຸກ຺ຂສ຺ສ ວາ ອຘິຏ຺ຐານຠາວໂຕ ທຸກ຺ຂາ, ສພ຺ພາ ປຎ຺ຈປິ ຄຕິໂຍ ຊເຫ ປຊເຫຍ຺ຍ ສມຕິກ຺ກເມຍ຺ຍ. ກິເລສວຏ຺ຏປ຺ປຫາເນເນວ ຫິ ກມ຺ມວຏ຺ຏໍ ວິປາກວຏ຺ຏຎ຺ຈ ປຫີນໍ ໂຫຕີຕິ.

ຕຕິຍສຸຕ຺ຕວຓ຺ຓນາ ນິຏ຺ຐິຕາ.

ປຐມຠາຓວາຣວຓ຺ຓນາ ນິຏ຺ຐິຕາ.