໑໑. ອາປາຍິກສຸຕ຺ຕວຓ຺ຓນາ

໔໘. ເອກາທສເມ ອາປາຍິກາຕິ ອປາເຍ ນິພ຺ພຕ຺ຕິສ຺ສນ຺ຕີຕິ ອາປາຍິກາ. ຕຕ຺ຖາປິ ນິຣເຍ ນິພ຺ພຕ຺ຕິສ຺ສນ຺ຕີຕິ ເນຣຍິກາ. ອິທມປ຺ປຫາຍາຕິ ອິທໍ ອິທານິ ວກ຺ຂມານໍ ທຸວິຘໍ ປາປສມາຈາຣໍ ອປ຺ປຊຫິຕ຺ວາ, ຕຖາປຏິປຕ຺ຕິຕຖາປຄ຺ຄຫຓວເສນ ປວຕ຺ຕໍ ວາຈໍ ຈິຕ຺ຕໍ ທິຏ຺ຐິຎ຺ຈ ອປ຺ປຏິນິສ຺ສຊ຺ຊິຕ຺ວາຕິ ອຕ຺ໂຖ. ອພ຺ຣຫ຺ມຈາຣີຕິ ພ຺ຣຫ຺ມເສຏ຺ຐໍ ຈຣຕີຕິ ພ຺ຣຫ຺ມຈາຣີ, ພ຺ຣຫ຺ມາ ວາ ເສຏ຺ໂຐ ອາຈາໂຣ ເອຕສ຺ສ ອຕ຺ຖີຕິ ພ຺ຣຫ຺ມຈາຣີ, ນ ພ຺ຣຫ຺ມຈາຣີຕິ ອພ຺ຣຫ຺ມຈາຣີ, ພ຺ຣຫ຺ມຈາຣິປຏິຣູປໂກ ທຸສ຺ສີໂລຕິ ອຕ຺ໂຖ. ພ຺ຣຫ຺ມຈາຣິປຏິຎ຺ໂຎຕິ ‘‘ພ຺ຣຫ຺ມຈາຣີ ອຫ’’ນ຺ຕິ ເອວໍປຏິຎ຺ໂຎ. ປຣິປຸຓ຺ຓນ຺ຕິ ອຂຓ຺ຑາທິຠາເວນ ອວິກລໍ. ປຣິສຸທ຺ຘນ຺ຕິ ອຸປກ຺ກິເລສາຠາເວນ ປຣິສຸທ຺ຘໍ. ອມູລເກນາຕິ ທິຏ຺ຐາທິມູລວິຣຫິເຕນ, ທິຏ຺ຐໍ ສຸຕໍ ປຣິສງ຺ກິຕນ຺ຕິ ອິເມຫິ ໂຈທນາມູເລຫິ ວຊ຺ຊິເຕນ. ອພ຺ຣຫ຺ມຈຣິເຍນ ອເສຏ຺ຐຈຣິເຍນ. ອນຸທ຺ຘໍເສຕີຕິ ‘‘ປຣິສຸທ຺ໂຘ ອຍ’’ນ຺ຕິ ຊານນ຺ໂຕວ ປາຣາຊິກວຕ຺ຖຸນາ ຘໍເສຕິ ປຘໍເສຕິ, ໂຈເທຕິ ອກ຺ໂກສຕິ ວາ.

ຄາຖາສຸ ອຠູຕວາທີຕິ ປຣສ຺ສ ໂທສໍ ອທິສ຺ວາວ ອຠູເຕນ ຕຸຈ຺ເຉນ ມຸສາວາທໍ ກຕ຺ວາ ປຣໍ ອພ຺ຠາຈິກ຺ຂນ຺ໂຕ. ກຕ຺ວາຕິ ໂຍ ວາ ປນ ປາປກມ຺ມໍ ກຕ຺ວາ ‘‘ນາຫໍ ເອຕໍ ກໂຣມີ’’ຕິ ອາຫ. ອຸໂຠປິ ເຕ ເປຈ຺ຈ ສມາ ຠວນ຺ຕີຕິ ເຕ ອຸໂຠປິ ຊນາ ອິໂຕ ປຣໂລກໍ ຄນ຺ຕ຺ວາ ນິຣຍໍ ອຸປຄມນໂຕ ຄຕິຍາ ສມານາ ຠວນ຺ຕິ. ຕຕ຺ຖ ຄຕິເຍວ ເນສໍ ປຣິຈ຺ຉິນ຺ນາ, ນ ປນ ອາຍຸ. ພຫຸຎ຺ຫິ ປາປໍ ກຕ຺ວາ ຈິຣໍ ນິຣເຍ ປຈ຺ຈຕິ, ປຣິຕ຺ຕໍ ກຕ຺ວາ ອປ຺ປມຕ຺ຕກເມວ ກາລໍ. ຍສ຺ມາ ປນ ເຕສໍ ອຸຠິນ຺ນມ຺ປິ ກມ຺ມໍ ລາມກເມວ. ເຕນ ວຸຕ຺ຕໍ ‘‘ນິຫີນກມ຺ມາ ມນຸຊາ ປຣຕ຺ຖາ’’ຕິ. ‘‘ປຣຕ຺ຖາ’’ຕິ ປນ ປທສ຺ສ ປຸຣໂຕ ‘‘ເປຈ຺ຈາ’’ຕິ ປເທນ ສມ຺ພນ຺ໂຘ – ປຣຕ຺ຖ ເປຈ຺ຈ ອິໂຕ ຄນ຺ຕ຺ວາ ເຕ ນິຫີນກມ຺ມາ ສມາ ຠວນ຺ຕີຕິ.

ເອວໍ ຠຄວາ ອຠູຕພ຺ຠກ຺ຂານວເສນ ຠູຕໂທສປຏິຈ຺ຉາທນວເສນ ຈ ປວຕ຺ຕສ຺ສ ມຸສາວາທສ຺ສ ວິປາກໍ ທສ຺ເສຕ຺ວາ ອິທານິ ຕສ຺ມິໍ ຐາເນ ນິສິນ຺ນານໍ ພຫູນໍ ປາປຠິກ຺ຂູນໍ ທຸຈ຺ຈຣິຕກມ຺ມສ຺ສ ວິປາກທສ຺ສເນນ ສໍເວຊນຕ຺ຖໍ ທ຺ເວ ຄາຖາ ອຠາສິ. ຕຕ຺ຖ ກາສາວກຓ຺ຐາຕິ ກສາວຣສປີຕຕ຺ຕາ ກາສາເວນ ວຕ຺ເຖນ ປລິເວຐິຕກຓ຺ຐາ. ປາປຘມ຺ມາຕິ ລາມກຘມ຺ມາ. ອສຎ຺ຎຕາຕິ ກາຍາທີຫິ ສຎ຺ຎມຣຫິຕາ. ປາປາຕິ ຕຖາຣູປາ ປາປປຸຄ຺ຄລາ, ປາເປຫິ ກມ຺ເມຫິ ອຸປປຊ຺ຊິຕ຺ວາ ‘‘ຕສ຺ສ ກາໂຍປິ ອາທິຕ຺ໂຕ ສມ຺ປຊ຺ຊລິໂຕ ສໂຊຕິຠູໂຕ, ສງ຺ຆາຏິປິ ອາທິຕ຺ຕາ’’ຕິອາທິນາ (ສໍ. ນິ. ໒.໒໑໘-໒໑໙; ປາຣາ. ໒໓໐) ລກ຺ຂຓສໍຍຸຕ຺ເຕ ວຸຕ຺ຕນເຍນ ມຫາທຸກ຺ຂໍ ອນຸຠວນ຺ຕິເຍວ.

ຕຕິຍຄາຖາຍ ອຍໍ ສງ຺ເຂປຕ຺ໂຖ – ຍຎ຺ເຈ ຠຸຎ຺ເຊຍ຺ຍ ທຸສ຺ສີໂລ ນິສ຺ສີລປຸຄ຺ຄໂລ ກາຍາທີຫິ ອສຎ຺ຎໂຕ ຣຏ຺ຐວາສີຫິ ສທ຺ຘາຍ ທິນ຺ນໍ ຍໍ ຣຏ຺ຐປິຓ຺ຑໍ ‘‘ສມໂຓມ຺ຫີ’’ຕິ ປຏິຊານນ຺ໂຕ ຄເຫຕ຺ວາ ຠຸຎ຺ເຊຍ຺ຍ, ຕໂຕ ອາທິຕ຺ໂຕ ອຄ຺ຄິວຓ຺ໂຓ ອໂຍຄຸໂຬວ ຠຸຕ຺ໂຕ ເສຍ຺ໂຍ ສຸນ຺ທຣຕໂຣ. ກິໍກາຣຓາ? ຕປ຺ປຈ຺ຈຍາ ຫິສ຺ສ ເອໂກວ ອຕ຺ຕຠາໂວ ຌາເຍຍ຺ຍ, ທຸສ຺ສີໂລ ປນ ຫຸຕ຺ວາ ສທ຺ຘາເທຍ຺ຍໍ ຠຸຎ຺ຊິຕ຺ວາ ອເນການິປິ ຊາຕິສຕານິ ນິຣເຍ ອຸປ຺ປຊ຺ເຊຍ຺ຍາຕິ.

ເອກາທສມສຸຕ຺ຕວຓ຺ຓນາ ນິຏ຺ຐິຕາ.