໗. ອາຕາປີສຸຕ຺ຕວຓ຺ຓນາ

໓໔. ສຕ຺ຕເມ ອນາຕາປີຕິ ກິເລສານໍ ອາຕາປນຏ຺ເຐນ ອາຕາໂປ, ວີຣິຍໍ, ໂສ ເອຕສ຺ສ ອຕ຺ຖີຕິ ອາຕາປີ, ນ ອາຕາປີ ອນາຕາປີ, ສມ຺ມປ຺ປຘານວິຣຫິໂຕ ກຸສີໂຕຕິ ວຸຕ຺ຕໍ ໂຫຕິ. ໂອຕ຺ຕາໂປ ວຸຈ຺ຈຕິ ປາປຸຕ຺ຣາໂສ, ໂສ ເອຕສ຺ສ ອຕ຺ຖີຕິ ໂອຕ຺ຕາປີ, ນ ໂອຕ຺ຕາປີ ອໂນຕ຺ຕາປີ, ໂອຕ຺ຕາປຣຫິໂຕ. ອຖ ວາ ອາຕາປປ຺ປຏິປກ຺ໂຂ ອນາຕາໂປ, ໂກສຊ຺ຊໍ ໂສ ອສ຺ສ ອຕ຺ຖີຕິ ອນາຕາປີ. ຍໍ ‘‘ນ ໂອຕ຺ຕປຕິ ໂອຕ຺ຕປ຺ປິຕພ຺ເພນ, ນ ໂອຕ຺ຕປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ’’ຕິ ເອວໍ ວຸຕ຺ຕໍ, ຕໍ ອໂນຕ຺ຕປ຺ປໍ ອໂນຕ຺ຕາໂປ. ໂສ ອສ຺ສ ອຕ຺ຖີຕິ ອໂນຕ຺ຕາປີຕິ ເອວເມຕ຺ຖ ອຕ຺ໂຖ ເວທິຕພ຺ໂພ.

ອຠພ຺ໂພຕິ ອນຣໂຫ. ສມ຺ໂພຘາຍາຕິ ອຣິຍມຄ຺ຄຕ຺ຖາຍ. ນິພ຺ພານາຍາຕິ ກິເລສານໍ ອຈ຺ຈນ຺ຕວູປສມາຍ ອມຕມຫານິພ຺ພານາຍ. ອນຸຕ຺ຕຣສ຺ສ ໂຍຄກ຺ເຂມສ຺ສາຕິ ອຣຫຕ຺ຕຜລສ຺ສ. ຕຎ຺ຫິ ອຸຕ຺ຕຣິຕຣສ຺ສ ອຠາວໂຕ ອນຸຕ຺ຕຣໍ, ຈຕູຫິ ໂຍເຄຫິ ອນຸປທ຺ທຸຕຕ຺ຕາ ເຂມໍ ນິພ຺ຠຍນ຺ຕິ ໂຍຄກ຺ເຂມນ຺ຕິ ຈ ວຸຈ຺ຈຕິ. ອຘິຄມາຍາຕິ ປຕ຺ຕິຍາ. ອາຕາປີຕິ ວີຣິຍວາ. ໂສ ຫິ ‘‘ອາຣທ຺ຘວີຣິໂຍ ວິຫຣຕິ ອກຸສລານໍ ຘມ຺ມານໍ ປຫານາຍ, ກຸສລານໍ ຘມ຺ມານໍ ອຸປສມ຺ປທາຍ, ຖາມວາ ທຬ຺ຫປຣກ຺ກໂມ ອນິກ຺ຂິຕ຺ຕຘຸໂຣ ກຸສເລສຸ ຘມ຺ເມສູ’’ຕິ (ທີ. ນິ. ໓.໓໔໕) ເອວໍ ວຸຕ຺ເຕນ ວີຣິຍາຣມ຺ເຠນ ສມນ຺ນາຄໂຕ ກິເລສານໍ ອຈ຺ຈນ຺ຕເມວ ອາຕາປນສີໂລຕິ ອາຕາປີ. ໂອຕ຺ຕາປີຕິ ‘‘ຍໍ ໂອຕ຺ຕປຕິ ໂອຕ຺ຕປ຺ປິຕພ຺ເພນ, ໂອຕ຺ຕປຕິ ປາປການໍ ອກຸສລານໍ ຘມ຺ມານໍ ສມາປຕ຺ຕິຍາ’’ຕິ (ຘ. ສ. ໓໑) ເອວໍ ວຸຕ຺ເຕນ ໂອຕ຺ຕປ຺ເປນ ສມນ຺ນາຄຕຕ຺ຕາ ໂອຕ຺ຕປນສີໂລຕິ ໂອຕ຺ຕປ຺ປີ. ອຍຎ຺ຫິ ໂອຕ຺ຕາປີຕິ ວຸຕ຺ໂຕ. ຕທວິນາຠາວໂຕ ຫິຣິຍາ ຈ ສມນ຺ນາຄໂຕ ເອວ ໂຫຕີຕິ ຫິໂຣຕ຺ຕປ຺ປສມ຺ປນ຺ໂນ ອຓຸມຕ຺ເຕປິ ວຊ຺ເຊ ຠຍທສ຺ສາວີ ສີເລສຸ ປຣິປູຣກາຣີ ໂຫຕິ. ອິຈ຺ຈສ຺ສ ສີລສມ຺ປທາ ທສ຺ສິຕາ. ອາຕາປີຕິ ອິມິນາ ນເຍນສ຺ສ ກິເລສປຣິຕາປິຕາທີປເນນ ສມຖວິປສ຺ສນາຠາວນານຸຍຸຕ຺ຕຕາ ທສ຺ສິຕາ. ຍຖາວຸຕ຺ຕຎ຺ຈ ວີຣິຍໍ ສທ຺ຘາສຕິສມາຘິປຎ຺ຎາຫິ ວິນາ ນ ໂຫຕີຕິ ວິມຸຕ຺ຕິປຣິປາຈການິ ສທ຺ຘາປຎ຺ຈມານິ ອິນ຺ທ຺ຣິຍານິ ອຕ຺ຖໂຕ ວຸຕ຺ຕາເນວ ໂຫນ຺ຕິ. ເຕສຸ ຈ ສິທ຺ເຘສຸ ອນິຈ຺ເຈ ອນິຈ຺ຈສຎ຺ຎາ, ອນິຈ຺ເຈ ທຸກ຺ຂສຎ຺ຎາ, ທຸກ຺ເຂ ອນຕ຺ຕສຎ຺ຎາ, ປຫານສຎ຺ຎາ, ວິຣາຄສຎ຺ຎາ, ນິໂຣຘສຎ຺ຎາຕິ ຉ ນິພ຺ເພຘຠາຄິຍາ ສຎ຺ຎາ ສິທ຺ຘາ ເອວາຕິ. ເອວໍ ອິເມຫິ ທ຺ວີຫິ ຘມ຺ເມຫິ ສມນ຺ນາຄຕສ຺ສ ໂລກິຍານໍ ສີລສມາຘິປຎ຺ຎານໍ ສິຊ຺ຌນໂຕ ມຄ຺ຄຜລນິພ຺ພານາຘິຄມສ຺ສ ຠພ຺ພຕໍ ທສ຺ເສນ຺ໂຕ ‘‘ອາຕາປີ ຈ ໂຂ…ເປ… ອຘິຄມາຍາ’’ຕິ ອາຫ.

ຄາຖາສຸ ກຸສີໂຕຕິ ມິຈ຺ຉາວິຕກ຺ກພຫຸລຕາຍ ກາມພ຺ຍາປາທວິຫິໍສາວິຕກ຺ກສງ຺ຂາເຕຫິ ກຸຈ຺ຉິເຕຫິ ປາປຘມ຺ເມຫິ ສິໂຕ ສມ຺ພນ຺ໂຘ ຍຸຕ຺ໂຕຕິ ກຸສີໂຕ. ກຸຈ຺ຉິຕໍ ວາ ສີທຕິ ສມ຺ມາປຏິປຕ຺ຕິໂຕ ອວສີທຕີຕິ ກຸສີໂຕ, ທ-ກາຣສ຺ສ ຕ-ກາຣໍ ກຕ຺ວາ. ຫີນວີຣິໂຍຕິ ນິພ຺ພີຣິໂຍ, ຈຕູສຸປິ ອິຣິຍາປເຖສຸ ວີຣິຍກຣຓຣຫິໂຕ. ອນຸສ຺ສາຫສໍຫນນສຠາວສ຺ສ ຈິຕ຺ຕາລສິຍສ຺ສ ຖິນສ຺ສ, ອສຕ຺ຕິວິຆາຕສຠາວສ຺ສ ກາຍາລສິຍສ຺ສ ມິທ຺ຘສ຺ສ ຈ ອຠິຓ຺ຫປ຺ປວຕ຺ຕິຍາ ຖິນມິທ຺ຘພຫຸໂລ. ປາປຊິຄຸຈ຺ຉນລກ຺ຂຓາຍ ຫິຣິຍາ ອຠາເວນ ຕປ຺ປຏິປກ຺ເຂນ ອຫິຣິເກນ ສມນ຺ນາຄຕຕ຺ຕາ ຈ ອຫິຣິໂກ. ຫິໂຣຕ຺ຕປ຺ປວີຣິຍານໍ ອຠາເວເນວ ສມ຺ມາປຏິປຕ຺ຕິຍໍ ນຕ຺ຖິ ເອຕສ຺ສ ອາທໂຣຕິ ອນາທໂຣ. ອຸຠຍຖາປິ ຕຖາ ຘມ຺ມປຸຄ຺ຄເລນ ທຸວິຘກິຣິຍາກຣເຓນ ອນາທໂຣ. ຜຸຏ຺ຐຸນ຺ຕິ ຜຸສິຕຸໍ. ສມ຺ໂພຘິມຸຕ຺ຕມນ຺ຕິ ສມ຺ໂພຘິສງ຺ຂາຕໍ ອຸຕ຺ຕມໍ ອຣຫຕ຺ຕໍ ອຘິຄນ຺ຕຸໍ ອຠພ຺ໂພຕິ ອຕ຺ໂຖ.

ສຕິມາຕິ ຈິຣກຕຈິຣຠາສິຕານໍ ອນຸສ຺ສຣເຓ ສມຕ຺ຖສ຺ສ ສຕິເນປກ຺ກສ຺ສ ຠາເວນ ຈຕຸສຕິປຏ຺ຐານໂຍເຄນ ສຕິມາ. ນິປໂກຕິ ສຕ຺ຕຏ຺ຐານິຍສມ຺ປຊຎ຺ຎສງ຺ຂາເຕນ ເຈວ ກມ຺ມຏ຺ຐານປຣິຫຣຓປຎ຺ຎາສງ຺ຂາເຕນ ຈ ເນປກ຺ເກນ ສມນ຺ນາຄຕຕ຺ຕາ ນິປໂກ. ຌາຍີຕິ ອາຣມ຺ມຓູປນິຊ຺ຌາເນນ ລກ຺ຂຓູປນິຊ຺ຌາເນນ ຈາຕິ ທ຺ວີຫິປິ ຌາເນຫິ ຌາຍີ. ອປ຺ປມຕ຺ໂຕຕິ ‘‘ທິວສໍ ຈງ຺ກເມນ ນິສຊ຺ຊາຍ ອາວຣຓິເຍຫິ ຘມ຺ເມຫິ ຈິຕ຺ຕໍ ປຣິໂສເຘຕີ’’ຕິອາທິນາ ນເຍນ ກມ຺ມຏ຺ຐານຠາວນາຍ ອປ຺ປມຕ຺ໂຕ. ສໍໂຍຊນໍ ຊາຕິຊຣາຍ ເຉຕ຺ວາຕິ ຊາຕິຍາ ເຈວ ຊຣາຍ ຈ ສຕ຺ເຕ ສໍໂຍເຊຕີຕິ ສໍໂຍຊນນ຺ຕິ ລທ຺ຘນາມໍ ກາມຣາຄາທິກໍ ທສວິຘມ຺ປິ ກິເລສຊາຕໍ ອນຸສຍສມຸຄ຺ຆາຕວເສນ ມູລໂຕ ຉິນ຺ທິຕ຺ວາ. ອຖ ວາ ສໍໂຍຊນໍ ຊາຕິຊຣາຍ ເຉຕ຺ວາຕິ ຊາຕິຊຣາຍ ສໍໂຍຊນໍ ຉິນ຺ທິຕ຺ວາ. ຍສ຺ສ ຫິ ສໍໂຍຊນານິ ອຈ຺ຉິນ຺ນານິ, ຕສ຺ສ ຊາຕິຊຣາຍ ອຈ຺ເຉໂທ ອສມຸຄ຺ຆາໂຕວ. ຍສ຺ສ ປນ ຕານິ ຉິນ຺ນານິ, ຕສ຺ສ ຊາຕິຊຣາປິ ຉິນ຺ນາວ ກາຣຓສ຺ສ ສມຸຄ຺ຆາຕິຕຕ຺ຕາ. ຕສ຺ມາ ສໍໂຍຊນໍ ຉິນ຺ທນ຺ໂຕ ເອວ ຊາຕິຊຣາປິ ຉິນ຺ທຕິ. ເຕນ ວຸຕ຺ຕໍ ‘‘ສໍໂຍຊນໍ ຊາຕິຊຣາຍ ເຉຕ຺ວາ’’ຕິ. ອິເຘວ ສມ຺ໂພຘິມນຸຕ຺ຕຣໍ ຜຸເສຕິ ອິມສ຺ມິໍເຍວ ອຕ຺ຕຠາເວ ອຄ຺ຄມຄ຺ຄໍ ອຣຫຕ຺ຕໍ ວາ ຜຸເສ ປາປຸເຓຍ຺ຍ.

ສຕ຺ຕມສຸຕ຺ຕວຓ຺ຓນາ ນິຏ຺ຐິຕາ.