໖. ທານສຸຕ຺ຕວຓ຺ຓນາ

໒໖. ຉຏ຺ເຐ ເອວຎ຺ເຈຕິ ເອຕ຺ຖ ເອວນ຺ຕິ ອຸປມາກາເຣ ນິປາໂຕ, ເຈຕິ ປຣິກປ຺ປເນ. ສຕ຺ຕາຕິ ຣູປາທີສຸ ສຕ຺ຕາ ວິສຕ຺ຕາ. ຊາເນຍ຺ຍຸນ຺ຕິ ພຸຊ຺ເຌຍ຺ຍຸໍ. ທານສໍວິຠາຄສ຺ສາຕິ ຍາຍ ຫິ ເຈຕນາຍ ອນ຺ນາທິເທຍ຺ຍຘມ຺ມໍ ສໍຫຣິຕ຺ວາ ອນຸກມ຺ປາປູຊາສຸ ອຎ຺ຎຕຣວເສນ ປເຣສໍ ທີຍຕິ, ຕໍ ທານໍ. ຍາຍ ປນ ອຕ຺ຕນາ ປຣິຠຸຎ຺ຊິຕພ຺ພຠາເວນ ຄຫິຕວຕ຺ຖຸສ຺ສ ເອກເທໂສ ສໍວິຠຊິຕ຺ວາ ທີຍຕິ, ອຍໍ ສໍວິຠາໂຄ. ວິປາກນ຺ຕິ ຜລໍ. ຍຖາຫໍ ຊານາມີຕິ ຍຖາ ອຫໍ ຊານາມິ. ອິທໍ ວຸຕ຺ຕໍ ໂຫຕິ – ຕິຣຈ຺ຉານຄຕສ຺ສປິ ທານໍ ທຕ຺ວາ ອຕ຺ຕຠາວສເຕ ປວຕ຺ຕສຸຂວິປຈ຺ຈນວເສນ ສຕຄຸຓາ ທກ຺ຂິຓາ ໂຫຕີຕິ ເອວມາທິນາ, ຠິກ຺ຂເວ, ເຍນ ປກາເຣນ ອຫໍ ທານສ຺ສ ສໍວິຠາຄສ຺ສ ຈ ວິປາກໍ ກມ຺ມວິປາກໍ ຎາຓພເລນ ປຈ຺ຈກ຺ຂໂຕ ຊານາມິ, ເອວໍ ອິເມ ສຕ຺ຕາ ຍທິ ຊາເນຍ຺ຍຸນ຺ຕິ. ນ ອທຕ຺ວາ ຠຸຎ຺ເຊຍ຺ຍຸນ຺ຕິ ຍໍ ຠຸຎ຺ຊິຕພ຺ພຍຸຕ຺ຕກໍ ອຕ຺ຕໂນ ອຕ຺ຖິ, ຕໂຕ ປເຣສໍ ນ ອທຕ຺ວາ ມຈ຺ຉຣິຍຈິຕ຺ເຕນ ຈ ຕຓ຺ຫາໂລຠວເສນ ຈ ຠຸຎ຺ເຊຍ຺ຍຸໍ, ທຕ຺ວາວ ຠຸຎ຺ເຊຍ຺ຍຸໍ. ນ ຈ ເນສໍ ມຈ຺ເຉຣມລໍ ຈິຕ຺ຕໍ ປຣິຍາທາຍ ຕິຏ຺ເຐຍ຺ຍາຕິ ອຕ຺ຕໂນ ສມ຺ປຕ຺ຕີນໍ ປເຣຫິ ສາຘາຣຓຠາວາສຫນລກ຺ຂຓໍ ຈິຕ຺ຕສ຺ສ ປຠສ຺ສຣຠາວທູສການໍ ອຸປກ຺ກິເລສຠູຕານໍ ກຓ຺ຫຘມ຺ມານໍ ອຎ຺ຎຕຣໍ ມຈ຺ເຉຣມລໍ. ອຖ ວາ ຍຖາວຸຕ຺ຕມຈ຺ເຉຣຎ຺ເຈວ ອຎ຺ຎມ຺ປິ ທານນ຺ຕຣາຍກຣໍ ອິສ຺ສາໂລຠໂທສາທິມລຎ຺ຈ ເນສໍ ສຕ຺ຕານໍ ຈິຕ຺ຕໍ ຍຖາ ທານເຈຕນາ ນ ປວຕ຺ຕຕິ, ນ ວາ ສຸປຣິສຸທ຺ຘາ ໂຫຕິ, ເອວໍ ປຣິຍາທາຍ ປຣິໂຕ ຄເຫຕ຺ວາ ອຠິຠວິຕ຺ວາ ນ ຕິຏ຺ເຐຍ຺ຍ. ໂກ ຫິ ສມ຺ມເທວ ທານຜລໍ ຊານນ຺ໂຕ ອຕ຺ຕໂນ ຈິຕ຺ເຕ ມຈ຺ເຉຣມລສ຺ສ ໂອກາສໍ ທເທຍ຺ຍ.

ໂຍປິ ເນສໍ ອສ຺ສ ຈຣິໂມ ອາໂລໂປຕິ ເນສໍ ສຕ຺ຕານໍ ໂຍ ສພ຺ພປຈ຺ຉິມໂກ ອາໂລໂປ ສິຍາ. ຈຣິມໍ ກພຬນ຺ຕິ ຕສ຺ເສວ ເວວຈນໍ. ອິທໍ ວຸຕ຺ຕໍ ໂຫຕິ – ອິເມ ສຕ຺ຕາ ປກຕິຍາ ຍຕ຺ຕເກຫິ ອາໂລເປຫິ ສຍໍ ຍາເປຍ຺ຍຸໍ, ເຕສຸ ເອກເມວ ອາໂລປໍ ອຕ຺ຕໂນ ອຕ຺ຖາຍ ຐເປຕ຺ວາ ຕທຎ຺ເຎ ສພ຺ເພ ອາໂລເປ ອາຄຕາຄຕານໍ ອຕ຺ຖິການໍ ທຕ຺ວາ ໂຍ ຐປິໂຕ ອາໂລໂປ ອສ຺ສ, ໂສ ອິຘ ຈຣິໂມ ອາໂລໂປ ນາມ. ຕໂຕປິ ນ ອສໍວິຠຊິຕ຺ວາ ຠຸຎ຺ເຊຍ຺ຍຸໍ, ສເຈ ເນສໍ ປຏິຄ຺ຄາຫກາ ອສ຺ສູຕິ ເນສໍ ສຕ຺ຕານໍ ປຏິຄ຺ຄາຫກາ ຍທິ ສິຍຸໍ, ຕໂຕປິ ຍຖາວຸຕ຺ຕຈຣິມາໂລປໂຕປິ ສໍວິຠຊິຕ຺ວາວ ເອກເທສໍ ທຕ຺ວາວ ຠຸຎ຺ເຊຍ຺ຍຸໍ, ຍຖາຫໍ ທານສໍວິຠາຄສ຺ສ ວິປາກໍ ປຈ຺ຈກ຺ຂໂຕ ຊານາມິ, ເອວໍ ຍທິ ຊາເນຍ຺ຍຸນ຺ຕິ. ຍສ຺ມາ ຈ ໂຂຕິອາທິນາ ກມ຺ມຜລສ຺ສ ອປ຺ປຈ຺ຈກ຺ຂຠາວໂຕ ເອວເມເຕ ສຕ຺ຕາ ທານສໍວິຠາເຄສຸ ນ ປວຕ຺ຕນ຺ຕີຕິ ຍຖາຘິປ຺ເປຕມຕ຺ຖໍ ກາຣເຓນ ສມ຺ປຏິປາເທຕິ. ເອເຕເນວ ເຕສໍ ຕທຎ຺ຎປຸຎ຺ເຎສຸ ຈ ອປ຺ປຏິປຕ຺ຕິຍາ ອປຸຎ຺ເຎສຸ ຈ ປຏິປຕ຺ຕິຍາ ກາຣຓໍ ທສ຺ສິຕນ຺ຕິ ທຏ຺ຐພ຺ພໍ.

ຄາຖາສຸ ຍຖາວຸຕ຺ຕໍ ມເຫສິນາຕິ ມເຫສິນາ ຠຄວຕາ ‘‘ຕິຣຈ຺ຉານຄເຕ ທານໍ ທຕ຺ວາ ສຕຄຸຓາ ທກ຺ຂິຓາ ປາຏິກງ຺ຂິຕພ຺ພາ’ ຕິອາທິນາ, ອິເຘວ ວາ ‘‘ເອວໍ ເຈ ສຕ຺ຕາ ຊາເນຍ຺ຍຸ’’ນ຺ຕິອາທິນາ ຍຖາວຸຕ຺ຕໍ, ຎາຓຈາເຣນ ຕໍ ຍຖາວຸຕ຺ຕໍ ຈິຕ຺ຕໍ ຎາຕນ຺ຕິ ອຕ຺ໂຖ. ວິປາກໍ ສໍວິຠາຄສ຺ສາຕິ ສໍວິຠາຄສ຺ສປິ ວິປາກໍ, ໂກ ປນ ວາໂທ ທານສ຺ສ. ຍຖາ ໂຫຕິ ມຫປ຺ຜລນ຺ຕິ ຍຖາ ໂສ ວິປາໂກ ມຫນ຺ຕໍ ຜລໍ ໂຫຕິ, ເອວໍ ອິເມ ສຕ຺ຕາ ຍທິ ຊາເນຍ຺ຍຸນ຺ຕິ ສມ຺ພນ຺ໂຘ. ວິເນຍ຺ຍ ມຈ຺ເຉຣມລນ຺ຕິ ມຈ຺ຉຣິຍມລໍ ອປເນຕ຺ວາ ກມ຺ມຜລສທ຺ຘາຍ ຣຕນຕ຺ຕຍສທ຺ຘາຍ ຈ ວິເສສໂຕ ປສນ຺ເນນ ຈິຕ຺ເຕນ ເຍສຸ ກິເລເສຫິ ອາຣກຕ຺ຕາ ອຣິເຍສຸ ສີລາທິຄຸຓສມ຺ປນ຺ເນສຸ ທິນ຺ນໍ ອປ຺ປກມ຺ປິ ທານໍ ມຫປ຺ຜລໍ ໂຫຕິ, ເຕສຸ ຍຸຕ຺ຕກາເລນ ທຊ຺ຊຸໍ ທເທຍ຺ຍຸໍ.

ມຫປ຺ຜລຠາວກຣຓໂຕ ທກ຺ຂິຓໍ ອຣຫນ຺ຕີຕິ ທກ຺ຂິເຓຍ຺ຍາ, ສມ຺ມາປຏິປນ຺ນາ, ເຕສຸ ທກ຺ຂິເຓຍ຺ເຍສຸ. ທກ຺ຂິຓໍ ປຣໂລກໍ ສທ຺ທຫິຕ຺ວາ ທາຕພ຺ພໍ ເທຍ຺ຍຘມ຺ມໍ ຍຖາ ຕໍ ທານໍ ໂຫຕິ ມຫາທານໍ, ເອວໍ ທຕ຺ວາ. ອຖ ວາ ພຫຸໂນ ອນ຺ນໍ ທຕ຺ວາ, ກຖໍ ປນ ອນ຺ນໍ ທາຕພ຺ພນ຺ຕິ ອາຫ ‘‘ທກ຺ຂິເຓຍ຺ເຍສຸ ທກ຺ຂິຓ’’ນ຺ຕິ. ອິໂຕ ມນຸສ຺ສຕ຺ຕາ ມນຸສ຺ສຕ຺ຕຠາວໂຕ ຈຸຕາ ປຏິສນ຺ຘິວເສນ ສຄ຺ຄໍ ຄຈ຺ຉນ຺ຕິ ທາຍກາ. ກາມກາມິໂນຕິ ກາເມຕພ຺ພານໍ ອຸຬາຣານໍ ເທວໂຠຄານໍ ປຏິລທ຺ຘຣູປວິຠເວນ ກມ຺ມຸນາ ອຸປຄມເນ ສາຘຸກາຣິຕາຍ ກາມກາມິໂນ ສພ຺ພກາມສມງ຺ຄິໂນ. ໂມທນ຺ຕິ ຍຖາຣຸຈິ ປຣິຈາເຣນ຺ຕີຕິ ອຕ຺ໂຖ.

ຉຏ຺ຐສຸຕ຺ຕວຓ຺ຓນາ ນິຏ຺ຐິຕາ.