໕. ມຸສາວາທສຸຕ຺ຕວຓ຺ຓນາ

໒໕. ປຎ຺ຈເມ ເອກຘມ຺ມໍ ອຕີຕສ຺ສາຕິ ກາ ອຸປ຺ປຕ຺ຕິ? ຠຄວໂຕ ຠິກ຺ຂຸສງ຺ຆສ຺ສ ຈ ມຫາລາຠສກ຺ກາໂຣ ອຸປ຺ປຊ຺ຊິ, ຕິຕ຺ຖິຍານໍ ປຣິຫາຍິ. ເຕ ຫຕລາຠສກ຺ກາຣາ ນິປ຺ປຠາ ນິຕ຺ເຕຊາ ອິສ຺ສາປກຕາ ຈິຎ຺ຈມາຓວິກໍ ນາມ ປຣິພ຺ພາຊິກໍ ອຸຍ຺ໂຍເຊສຸໍ – ‘‘ເອຫິ, ຕ຺ວໍ ຠຄິນິ, ສມຓໍ ໂຄຕມໍ ອຠູເຕນ ອພ຺ຠາຈິກ຺ຂສ຺ສູ’’ຕິ. ສາ ຠຄວນ຺ຕໍ ຈຕຸປຣິສມຊ຺ເຌ ຘມ຺ມໍ ເທເສນ຺ຕໍ ອຸປຄນ຺ຕ຺ວາ ອຠູເຕນ ອພ຺ຠາຈິກ຺ຂິຕ຺ວາ ສກ຺ເກນສ຺ສາ ອຠູຕຠາເວ ປກາສິເຕ ມຫາຊເນນ ‘‘ຘີ ກາຬກຓ຺ຓີ’’ຕິ ວິຫາຣໂຕ ນິກ຺ກຑ຺ຒາປິຕາ ປຖວິຍາ ວິວເຣ ທິນ຺ເນ ອວີຈິຊາລານໍ ອິນ຺ຘນໍ ຫຸຕ຺ວາວ ອວີຈິນິຣເຍ ນິພ຺ພຕ຺ຕິ, ຠິຍ຺ໂຍໂສມຕ຺ຕາຍ ຕິຕ຺ຖິຍານໍ ລາຠສກ຺ກາໂຣ ປຣິຫາຍິ. ຠິກ຺ຂູ ຘມ຺ມສຠາຍໍ ກຖໍ ສມຸຏ຺ຐາເປສຸໍ ‘‘ອາວຸໂສ, ຈິຎ຺ຈມາຓວິກາ ເອວໍ ອຸຬາຣຄຸຓໍ ອຄ຺ຄທກ຺ຂິເຓຍ຺ຍໍ ສມ຺ມາສມ຺ພຸທ຺ຘໍ ອຠູເຕນ ອກ຺ໂກສິຕ຺ວາ ມຫາວິນາສໍ ປຕ຺ຕາ’’ຕິ. ສຕ຺ຖາ ອາຄນ຺ຕ຺ວາ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິຕ຺ວາ ‘‘ອິມາຍ ນາມາ’’ຕິ ວຸຕ຺ເຕ ‘‘ນ, ຠິກ຺ຂເວ, ອິທາເນວ, ປຸພ຺ເພປິ ສາ ມໍ ອຠູເຕນ ອກ຺ໂກສິຕ຺ວາ ມຫາວິນາສໍ ປຕ຺ຕາເຍວາ’’ຕິ ມຫາປທຸມຊາຕກມ຺ປິ ວິຕ຺ຖາເຣຕ຺ວາ ອຸປຣິ ຘມ຺ມໍ ເທເສນ຺ໂຕ ອິມິສ຺ສາ ອຏ຺ຐຸປ຺ປຕ຺ຕິຍາ ‘‘ເອກຘມ຺ມໍ ອຕີຕສ຺ສາ’’ຕິ ອິທໍ ສຸຕ຺ຕໍ ເທເສສິ.

ຕຕ຺ຖ ເອກຘມ຺ມນ຺ຕິ ເອກໍ ວຈີສຈ຺ຈສງ຺ຂາຕໍ ຘມ຺ມໍ. ອຕີຕສ຺ສາຕິ ຍາ ສາ ອຏ຺ຐ ອນຣິຍໂວຫາເຣ ວຊ຺ເຊຕ຺ວາ ອຏ຺ຐສຸ ອຣິຍໂວຫາເຣສຸ ປຕິຏ຺ຐາປນຕ຺ຖໍ ‘‘ສຈ຺ຈໍ, ຠເຓ, ນາລິກ’’ນ຺ຕິ ອຣິເຍຫິ ຐປິຕາ ມຣິຍາທາ, ຕໍ ອຕິກ຺ກມິຕ຺ວາ ຐິຕສ຺ສ. ປຸຣິໂສ ເອວ ປຸຄ຺ຄໂລຕິ ປຸຣິສປຸຄ຺ຄໂລ, ຕສ຺ສ. ອກຣຓີຍນ຺ຕິ ກາຕຸໍ ອສກ຺ກຸເຓຍ຺ຍໍ. ສມ຺ປຊານມຸສາວາທີ ຫິ ປຸຄ຺ຄໂລ ກິຎ຺ຈິ ປາປກມ຺ມໍ ກຕ຺ວາ ‘‘ອິທໍ ນາມ ຕຍາ ກຕ’’ນ຺ຕິ ວຸຕ຺ເຕ ‘‘ນ ມຍາ ກຕ’’ນ຺ຕິ ມຸສາວາເທເນວ ປຣິຫຣິສ຺ສຕິ. ເອວຎ຺ຈ ປຏິປຊ຺ຊນ຺ໂຕ ກິຎ຺ຈິ ປາປກມ຺ມໍ ກໂຣຕິເຍວ, ນ ຕຕ຺ຖ ລຊ຺ຊຕິ ສຈ຺ຈມຣິຍາທາຍ ສມຕິກ຺ກນ຺ຕຕ຺ຕາ. ເຕນ ວຸຕ຺ຕໍ ‘‘ກຕມໍ ເອກຘມ຺ມໍ, ຍທິທໍ, ຠິກ຺ຂເວ, ສມ຺ປຊານມຸສາວາໂທ’’ຕິ.

ຄາຖາຍໍ ມຸສາວາທິສ຺ສາຕິ ມຸສາ ອຠູຕໍ ອຕຈ຺ຉໍ ປເຣສໍ ວິຎ຺ຎາປນວເສນ ວທນສີລສ຺ສ. ຍສ຺ສ ທສສຸ ວຈເນສຸ ເອກມ຺ປິ ສຈ຺ຈໍ ນຕ຺ຖິ, ເອວຣູເປ ວຕ຺ຕພ຺ພເມວ ນຕ຺ຖິ. ຊນ຺ຕຸໂນຕິ ສຕ຺ຕສ຺ສ. ສຕ຺ໂຕ ຫິ ຊາຍນຏ຺ເຐນ ‘‘ຊນ຺ຕູ’’ຕິ ວຸຈ຺ຈຕິ. ວິຕິຓ຺ຓປຣໂລກສ຺ສາຕິ ວິສ຺ສຏ຺ຐປຣໂລກສ຺ສ. ອີທິໂສ ຫິ ມນຸສ຺ສສມ຺ປຕ຺ຕິ ເທວໂລກສມ຺ປຕ຺ຕິ ອວສາເນ ນິພ຺ພານສມ຺ປຕ຺ຕີຕິ ອິມາ ຕິສ຺ໂສປິ ສມ຺ປຕ຺ຕິໂຍ ນ ປສ຺ສຕິ. ນຕ຺ຖິ ປາປນ຺ຕິ ຕສ຺ສ ຕາທິສສ຺ສ ອິທໍ ນາມ ປາປໍ ນ ກຕ຺ຕພ຺ພນ຺ຕິ ນຕ຺ຖີຕິ.

ປຎ຺ຈມສຸຕ຺ຕວຓ຺ຓນາ ນິຏ຺ຐິຕາ.