໕. ຕຓ຺ຫາສໍໂຍຊນສຸຕ຺ຕວຓ຺ຓນາ

໑໕. ປຎ຺ຈເມ ຍສ຺ສ ວິຊ຺ຊຕິ, ຕໍ ປຸຄ຺ຄລໍ ທຸກ຺ເຂຫິ, ກມ຺ມໍ ວາ ວິປາເກຫິ, ຠວໂຍນິຄຕິວິຎ຺ຎາຓຏ຺ຐິຕິສຕ຺ຕາວາເສ ວາ ຠວນ຺ຕຣາທີຫິ ສໍໂຍເຊຕີຕິ ສໍໂຍຊນໍ. ຕຓ຺ຫາຍນຏ຺ເຐນ ຕຓ຺ຫາ, ຕສຕິ ສຍໍ ປຣິຕສຕິ, ຕສນ຺ຕິ ວາ ເອຕາຍາຕິ ຕຓ຺ຫາ. ສຎ຺ຎຸຕ຺ຕາຕິ ຈກ຺ຂາທີສຸ ອຠິນິເວສວຕ຺ຖູສຸ ພທ຺ຘາ. ເສສໍ ວຸຕ຺ຕນຍເມວ. ກາມຎ຺ເຈຕ຺ຖ ອວິຊ຺ຊາຍປິ ສໍໂຍຊນຠາໂວ ຕຓ຺ຫາຍ ຈ ນີວຣຓຠາໂວ ອຕ຺ຖິເຍວ, ຕຖາປິ ອວິຊ຺ຊາຍ ປຏິຈ຺ຉາທິຕາທີນເວຫິ ຠເວຫິ ຕຓ຺ຫາ ສຕ຺ເຕ ສໍໂຍເຊຕີຕິ ອິມສ຺ສ ວິເສສສ຺ສ ທສ຺ສນຕ຺ຖໍ ປຸຣິມສຸຕ຺ເຕ ອວິຊ຺ຊາ ນີວຣຓຠາເວນ, ອິຘ ຈ ຕຓ຺ຫາ ສໍໂຍຊນຠາເວເນວ ວຸຕ຺ຕາ. ກິຎ຺ຈ ນີວຣຓສໍໂຍຊນປ຺ປຘານສ຺ສ ທສ຺ສນຕ຺ຖໍ. ຍຖາ ຫິ ນີວຣຓຠາເວນ ອວິຊ຺ຊາ ສໍກິເລສຘມ຺ມານໍ ປຘານຠູຕາ ປຸພ຺ພງ຺ຄມາ ຈ, ເອວໍ ສໍໂຍຊນຠາເວນ ເນສໍ ຕຓ຺ຫາຕິ ຕທຘີນປ຺ປຘານຠາວໍ ທສ຺ເສຕຸໍ ສຸຕ຺ຕທ຺ວເຍ ເອວເມເຕ ຘມ຺ມາ ວຸຕ຺ຕາ. ອປິຈ ວິເສເສນ ອວິຊ຺ຊາ ນິພ຺ພານສຸຂໍ ນິວາເຣຕີຕິ ‘‘ນີວຣຓ’’ນ຺ຕິ ວຸຕ຺ຕາ, ຕຓ຺ຫາ ສໍສາຣທຸກ຺ເຂນ ສຕ຺ເຕ ສໍໂຍເຊຕີຕິ ‘‘ສໍໂຍຊນ’’ນ຺ຕິ.

ທສ຺ສນຄມນນ຺ຕຣາຍກຣຓໂຕ ວາ ວິຊ຺ຊາຈຣຓວິປກ຺ຂໂຕ ທ຺ວຍໍ ທ຺ວິຘາ ວຸຕ຺ຕໍ. ວິຊ຺ຊາຍ ຫິ ອຸຊຸວິປຈ຺ຈນີກຠູຕາ ອວິຊ຺ຊາ ນິພ຺ພານທສ຺ສນສ຺ສ ອວິປຣີຕທສ຺ສນສ຺ສ ຈ ວິເສສໂຕ ອນ຺ຕຣາຍກຣາ, ຈຣຓຘມ຺ມານໍ ອຸຊຸວິປຈ຺ຈນີກຠູຕາ ຕຓ຺ຫາ ຄມນສ຺ສ ສມ຺ມາປຏິປຕ຺ຕິຍາ ອນ຺ຕຣາຍກຣາຕິ; ເອວມຍໍ ອວິຊ຺ຊາຍ ນິວຸໂຕ ອນ຺ຘີກໂຕ ຕຓ຺ຫາຍ ສໍວຸໂຕ ພທ຺ໂຘ ອສ຺ສຸຕວາ ປຸຖຸຊ຺ຊໂນ ອນ຺ໂຘ ວິຍ ພທ຺ໂຘ ມຫາກນ຺ຕາຣໍ, ສໍສາຣກນ຺ຕາຣໍ ນາຕິວຕ຺ຕຕິ. ອນຕ຺ຖຸປ຺ປຕ຺ຕິເຫຕຸທ຺ວຍທສ຺ສນຕ຺ຖມ຺ປິ ທ຺ວຍໍ ທ຺ວິຘາ ວຸຕ຺ຕໍ. ອວິຊ຺ຊາຄໂຕ ຫິ ປຸຄ຺ຄໂລ ພາລຠາເວນ ອຕ຺ຖໍ ປຣິຫາເປຕິ, ອນຕ຺ຖຎ຺ຈ ອຕ຺ຕໂນ ກໂຣຕິ, ອກຸສໂລ ວິຍ ອາຕຸໂຣ ອສປ຺ປາຍກິຣິຍາຍ. ຊານນ຺ໂຕປິ ພາໂລ ພາລຠາເວນ ອຕ຺ຖໍ ປຣິຫາເປຕິ, ອນຕ຺ຖຎ຺ຈ ກໂຣຕິ ຊານນ຺ໂຕ ວິຍ ໂຣຄີ ອສປ຺ປາຍເສວີ. ມກ຺ກຏາເລໂປປມສຸຕ຺ຕໍ ເຈຕສ຺ສ ອຕ຺ຖສ຺ສ ສາຘກໍ.

ປຏິຈ຺ຈສມຸປ຺ປາທສ຺ສ ມູລກາຣຓທສ຺ສນຕ຺ຖມ຺ເປຕ຺ຖ ທ຺ວຍໍ ທ຺ວິຘາ ວຸຕ຺ຕໍ. ວິເສເສນ ຫິ ສມ຺ໂມຫສ຺ສ ພລວຠາວໂຕ ອວິຊ຺ຊາເຂຕ຺ຕໍ ອຕີໂຕ ອທ຺ຘາ, ປຕ຺ຖນາຍ ພລວຠາວໂຕ ຕຓ຺ຫາເຂຕ຺ຕໍ ອນາຄໂຕ ອທ຺ຘາ. ຕຖາ ຫິ ພາລຊໂນ ສມ຺ໂມຫພຫຸໂລ ອຕີຕມນຸໂສຈຕິ, ຕສ຺ສ ອວິຊ຺ຊາປຈ຺ຈຍາ ສງ຺ຂາຣາຕິ ສພ຺ພໍ ເນຕພ຺ພໍ. ປຕ຺ຖນາພຫຸໂລ ອນາຄຕໍ ປຊປ຺ປຕິ, ຕສ຺ສ ຕຓ຺ຫາປຈ຺ຈຍາ ອຸປາທານນ຺ຕິອາທິ ສພ຺ພໍ ເນຕພ຺ພໍ. ເຕເນວ ຕາສໍ ປຸພ຺ພນ຺ຕາຫຣເຓນ ອປຣນ຺ຕປຏິສນ຺ຘາເນນ ຈສ຺ສ ຍຖາກ຺ກມໍ ມູລກາຣຓຕາ ທສ຺ສິຕາຕິ ເວທິຕພ຺ພນ຺ຕິ.

ຄາຖາສຸ ຕຓ຺ຫາທຸຕິໂຍຕິ ຕຓ຺ຫາສຫາໂຍ. ຕຓ຺ຫາ ຫິ ນິຣຸທກກນ຺ຕາເຣ ມຣີຈິກາຍ ອຸທກສຎ຺ຎາ ວິຍ ປິປາສາຠິຠູຕໍ ອປ຺ປຏິກາຣທຸກ຺ຂາຠິຠູຕມ຺ປິ ສຕ຺ຕໍ ອສ຺ສາທສນ຺ທສ຺ສນວເສນ ສຫາຍກິຈ຺ຈໍ ກໂຣນ຺ຕີ ຠວາທີສຸ ອນິພ຺ພິນ຺ທໍ ກຕ຺ວາ ປຣິພ຺ຠມາເປຕິ, ຕສ຺ມາ ຕຓ຺ຫາ ປຸຣິສສ຺ສ ‘‘ທຸຕິຍາ’’ຕິ ວຸຕ຺ຕາ. ນນຸ ຈ ອຎ຺ເຎປິ ກິເລສາທໂຍ ຠວາຠິນິພ຺ພຕ຺ຕິຍາ ປຈ຺ຈຍາວ? ສຈ຺ຈເມຕໍ, ນ ປນ ຕຖາ ວິເສສປ຺ປຈ຺ຈໂຍ ຍຖາ ຕຓ຺ຫາ. ຕຖາ ຫິ ສາ ກຸສເລຫິ ວິນາ ອກຸສເລຫິ, ກາມາວຈຣາທິກຸສເລຫິ ຈ ວິນາ ຣູປາວຈຣາທິກຸສເລຫິ ຠວນິພ຺ພຕ຺ຕິຍາ ວິເສສປ຺ປຈ຺ຈໂຍ, ຍໂຕ ສມຸທຍສຈ຺ຈນ຺ຕິ ວຸຈ຺ຈຕີຕິ. ອິຕ຺ຖຠາວຎ຺ຎຖາຠາວນ຺ຕິ ອິຕ຺ຖຠາໂວ ຈ ອຎ຺ຎຖາຠາໂວ ຈ ອິຕ຺ຖຠາວຎ຺ຎຖາຠາໂວ. ໂສ ເອຕສ຺ສ ອຕ຺ຖີຕິ ອິຕ຺ຖຠາວຎ຺ຎຖາຠາໂວ ສໍສາໂຣ, ຕໍ ຕຕ຺ຖ ອິຕ຺ຖຠາໂວ ມນຸສ຺ສຕ຺ຕໍ, ອຎ຺ຎຖາຠາໂວ ຕໂຕ ອວສິຏ຺ຐສຕ຺ຕາວາສາ. ອິຕ຺ຖຠາໂວ ວາ ເຕສໍ ເຕສໍ ສຕ຺ຕານໍ ປຈ຺ຈຸປ຺ປນ຺ໂນ ອຕ຺ຕຠາໂວ, ອຎ຺ຎຖາຠາໂວ ອນາຄຕຕ຺ຕຠາໂວ. ເອວຣູໂປ ວາ ອຎ຺ໂຎປິ ອຕ຺ຕຠາໂວ ອິຕ຺ຖຠາໂວ, ນ ເອວຣູໂປ ອຎ຺ຎຖາຠາໂວ. ຕໍ ອິຕ຺ຖຠາວຎ຺ຎຖາຠາວໍ ສໍສາຣໍ ຂນ຺ຘຘາຕຸອາຍຕນປຏິປາຏິໍ ນາຕິວຕ຺ຕຕິ, ນ ອຕິກ຺ກມຕິ.

ເອຕມາທີນວໍ ຎຕ຺ວາ, ຕຓ຺ຫໍ ທຸກ຺ຂສ຺ສ ສມ຺ຠວນ຺ຕິ ເອຕໍ ສກລວຏ຺ຏທຸກ຺ຂສ຺ສ ສມ຺ຠວໍ ສມຸທຍໍ ຕຓ຺ຫໍ ອາທີນວໍ ອາທີນວໂຕ ຎຕ຺ວາຕິ ອຕ຺ໂຖ. ອຖ ວາ ເອຕມາທີນວໍ ຎຕ຺ວາຕິ ເອຕໍ ຍຖາວຸຕ຺ຕໍ ສໍສາຣນາຕິວຕ຺ຕນໍ ອາທີນວໍ ໂທສໍ ຎຕ຺ວາ. ຕຓ຺ຫໍ ທຸກ຺ຂສ຺ສ ສມ຺ຠວນ຺ຕິ ຕຓ຺ຫຎ຺ຈ ວຸຕ຺ຕນເຍນ ວຏ຺ຏທຸກ຺ຂສ຺ສ ປຘານກາຣຓນ຺ຕິ ຎຕ຺ວາ. ວີຕຕຓ຺ໂຫ ອນາທາໂນ, ສໂຕ ຠິກ຺ຂຸ, ປຣິພ຺ພເຊຕິ ເອວໍ ຕີຫິ ປຣິຎ຺ຎາຫິ ປຣິຊານນ຺ໂຕ ວິປສ຺ສນໍ ວຑ຺ເຒຕ຺ວາ ມຄ຺ຄປຏິປາຏິຍາ ຕຓ຺ຫໍ ວິຄເມນ຺ໂຕ ອຄ຺ຄມຄ຺ເຄນ ສພ຺ພໂສ ວີຕຕຓ຺ໂຫ ວິຄຕຕຓ຺ໂຫ, ຕໂຕ ເອວ ຈຕູສຸ ອຸປາທາເນສຸ ກສ຺ສຈິປິ ອຠາເວນ ອາຍຕິໍ ປຏິສນ຺ຘິສງ຺ຂາຕສ຺ສ ວາ ອາທານສ຺ສ ອຠາເວນ ອນາທາໂນ, ສຕິເວປຸລ຺ລປ຺ປຕ຺ຕິຍາ ສພ຺ພຕ຺ຖ ສໂຕກາຣິຕາຍ ສໂຕ ຠິນ຺ນກິເລໂສ ຠິກ຺ຂຸ ປຣິພ຺ພເຊ ຈເຣຍ຺ຍ, ຂນ຺ຘປຣິນິພ຺ພາເນນ ວາ ສງ຺ຂາຣປ຺ປວຕ຺ຕິໂຕ ອປຄຈ຺ເຉຍ຺ຍາຕິ ອຕ຺ໂຖ.

ປຎ຺ຈມສຸຕ຺ຕວຓ຺ຓນາ ນິຏ຺ຐິຕາ.