໑໐. ປທຸຏ຺ຐຈິຕ຺ຕສຸຕ຺ຕວຓ຺ຓນາ

໒໐. ທສມສ຺ສ ກາ ອຸປ຺ປຕ຺ຕິ? ອຏ຺ຐຸປ຺ປຕ຺ຕິເຍວ. ເອກທິວສໍ ກິຣ ຠິກ຺ຂູ ຘມ຺ມສຠາຍໍ ສນ຺ນິສິນ຺ນາ ກຖໍ ສມຸຏ຺ຐາເປສຸໍ – ‘‘ອາວຸໂສ, ອິເຘກຈ຺ໂຈ ພຫຸໍ ປຸຎ຺ຎກມ຺ມໍ ກໂຣຕິ, ເອກຈ຺ໂຈ ພຫຸໍ ປາປກມ຺ມໍ, ເອກຈ຺ໂຈ ອຸຠຍໂວມິສ຺ສກໍ ກໂຣຕິ. ຕຕ຺ຖ ໂວມິສ຺ສກາຣິໂນ ກີທິໂສ ອຠິສມ຺ປຣາໂຍ’’ຕິ? ອຖ ສຕ຺ຖາ ຘມ຺ມສຠໍ ອຸປຄນ຺ວາ ປຎ຺ຎຕ຺ຕວຣພຸທ຺ຘາສເນ ນິສິນ຺ໂນ ຕໍ ກຖໍ ສຸຕ຺ວາ ‘‘ຠິກ຺ຂເວ, ມຣຓາສນ຺ນກາເລ ສໍກິລິຏ຺ຐຈິຕ຺ຕສ຺ສ ທຸຄ຺ຄຕິ ປາຏິກງ຺ຂາ’’ຕິ ທສ຺ເສນ຺ໂຕ ອິມາຍ ອຏ຺ຐຸປ຺ປຕ຺ຕິຍາ ອິທໍ ສຸຕ຺ຕໍ ເທເສສິ.

ຕຕ຺ຖ ອິຘາຕິ ເທສາປເທເສ ນິປາໂຕ. ສ຺ວາຍໍ ກຕ຺ຖຈິ ປເທສໍ ອຸປາທາຍ ວຸຈ຺ຈຕິ ‘‘ອິເຘວ ຕິຏ຺ຐມານສ຺ສ, ເທວຠູຕສ຺ສ ເມ ສໂຕ’’ຕິອາທີສຸ (ທີ. ນິ. ໒.໓໖໙). ກຕ຺ຖຈິ ສາສນໍ ອຸປາທາຍ ‘‘ອິເຘວ, ຠິກ຺ຂເວ, ສມໂຓ ອິຘ ທຸຕິໂຍ ສມໂຓ’’ຕິອາທີສຸ (ມ. ນິ. ໑.໑໓໙; ອ. ນິ. ໔.໒໔໑). ກຕ຺ຖຈິ ປທປູຣຓມຕ຺ເຕ ‘‘ອິຘາຫໍ, ຠິກ຺ຂເວ, ຠຸຕ຺ຕາວີ ອສ຺ສໍ ປວາຣິໂຕ’’ຕິອາທີສຸ (ມ. ນິ. ໑.໓໐). ກຕ຺ຖຈິ ໂລກໍ ອຸປາທາຍ ວຸຈ຺ຈຕິ ‘‘ອິຘ ຕຖາຄໂຕ ໂລເກ ອຸປ຺ປຊ຺ຊຕີ’’ຕິອາທີສຸ (ອ. ນິ. ໓.໖໑). ອິຘາປິ ໂລເກ ເອວ ທຏ຺ຐພ຺ໂພ. ເອກຈ຺ຈນ຺ຕິ ເອກໍ, ອຎ຺ຎຕຣນ຺ຕິ ອຕ຺ໂຖ. ປຸຄ຺ຄລນ຺ຕິ ສຕ຺ຕໍ. ໂສ ຫິ ຍຖາປຈ຺ຈຍໍ ກຸສລາກຸສລານໍ ຕພ຺ພິປາການຎ຺ຈ ປູຣຓໂຕ ມຣຓວເສນ ຄລນໂຕ ຈ ປຸຄ຺ຄໂລຕິ ວຸຈ຺ຈຕິ. ປທຸຏ຺ຐຈິຕ຺ຕນ຺ຕິ ປໂທເສນ ອາຆາເຕນ ທຸຏ຺ຐຈິຕ຺ຕໍ. ອຖ ວາ ປທຸຏ຺ຐຈິຕ຺ຕນ຺ຕິ ໂທເສນ ຣາຄາທິນາ ປທູສິຕຈິຕ຺ຕໍ. ເອຕ຺ຖ ຈ ເອກຈ຺ຈນ຺ຕິ ອິທໍ ປທຸຏ຺ຐຈິຕ຺ຕສ຺ສ ປຸຄ຺ຄລສ຺ສ ວິເສສນໍ. ຍສ຺ສ ຫິ ປຏິສນ຺ຘິທາຍກກມ຺ມໍ ໂອກາສມກາສິ, ໂສ ຕຖາ ວຸຕ຺ໂຕ. ຍສ຺ສ ຈ ອກຸສລປ຺ປວຕ຺ຕິໂຕ ຈິຕ຺ຕໍ ນິວຕ຺ເຕຕ຺ວາ ກຸສລວເສນ ໂອຕາເຣຕຸໍ ນ ສກ຺ກາ, ເອວໍ ອາສນ຺ນມຣໂຓ. ເອວນ຺ຕິ ອິທານິ ວຕ຺ຕພ຺ພາກາຣໍ ທສ຺ເສຕິ. ເຈຕສາຕິ ອຕ຺ຕໂນ ຈິຕ຺ເຕນ ເຈໂຕປຣິຍຎາເຓນ. ເຈໂຕຕິ ຕສ຺ສ ປຸຄ຺ຄລສ຺ສ ຈິຕ຺ຕໍ. ປຣິຈ຺ຈາຕິ ປຣິຈ຺ຉິນ຺ທິຕ຺ວາ ປຊານາມິ. ນນຸ ຈ ຍຖາກມ຺ມຸປຄຎາຓສ຺ສາຍໍ ວິສໂຍຕິ? ສຈ຺ຈເມຕໍ, ຕທາ ປວຕ຺ຕມານອກຸສລຈິຕ຺ຕວເສນ ປເນຕໍ ວຸຕ຺ຕໍ.

ອິມມ຺ຫິ ຈາຍໍ ສມເຍຕິ ອິມສ຺ມິໍ ກາເລ, ອິມາຍໍ ວາ ປຈ຺ຈຍສາມຄ຺ຄິຍໍ, ອຍໍ ປຸຄ຺ຄໂລ ຊວນວີຖິຍາ ອປຣຠາເຄ ກາລໍ ກເຣຍ຺ຍ ເຈຕິ ອຕ຺ໂຖ. ນ ຫິ ຊວນກ຺ຂເຓ ກາລໍກິຣິຍາ ອຕ຺ຖິ. ຍຖາຠຕໍ ນິກ຺ຂິຕ຺ໂຕ ເອວໍ ນິຣເຍຕິ ຍຖາ ອາຠຕໍ ກິຎ຺ຈິ ອາຫຣິຕ຺ວາ ຐປິຕໍ, ເອວໍ ອຕ຺ຕໂນ ກມ຺ມຸນາ ນິກ຺ຂິຕ຺ໂຕ ນິຣເຍ ຐປິໂຕ ເອວາຕິ ອຕ຺ໂຖ. ກາຍສ຺ສ ເຠທາຕິ ອຸປາທິນ຺ນກ຺ຂນ຺ຘປຣິຈ຺ຈາຄາ. ປຣໍ ມຣຓາຕິ ຕທນນ຺ຕຣໍ ອຠິນິພ຺ພຕ຺ຕກ຺ຂນ຺ຘຄ຺ຄຫເຓ. ອຖ ວາ ກາຍສ຺ສ ເຠທາຕິ ຊີວິຕິນ຺ທ຺ຣິຍສ຺ສ ອຸປຈ຺ເຉທາ. ປຣໍ ມຣຓາຕິ ຈຸຕິໂຕ ອຸທ຺ຘໍ.

ອປາຍນ຺ຕິອາທິ ສພ຺ພໍ ນິຣຍສ຺ເສວ ເວວຈນໍ. ນິຣໂຍ ຫິ ອຍສງ຺ຂາຕາ ສຸຂາ ອເປໂຕຕິ ອປາໂຍ; ສຄ຺ຄໂມກ຺ຂເຫຕຸຠູຕາ ວາ ປຸຎ຺ຎສມ຺ມຕາ ອຍາ ອເປໂຕຕິປິ ອປາໂຍ. ທຸກ຺ຂສ຺ສ ຄຕິ ປຏິສຣຓນ຺ຕິ ທຸຄ຺ຄຕິ; ໂທສພຫຸລຕ຺ຕາ ວາ ທຸຏ຺ເຐນ ກມ຺ມຸນາ ນິພ຺ພຕ຺ຕາ ຄຕີຕິປິ ທຸຄ຺ຄຕິ. ວິວສາ ນິປຕນ຺ຕິ ເອຕ຺ຖ ທຸກ຺ກຏກມ຺ມກາຣິໂນ, ວິນສ຺ສນ຺ຕາ ວາ ເອຕ຺ຖ ນິປຕນ຺ຕິ ສມ຺ຠິຊ຺ຊມານງ຺ຄປຈ຺ຈງ຺ຄາຕິ ວິນິປາໂຕ. ນຕ຺ຖິ ເອຕ຺ຖ ອສ຺ສາທສຎ຺ຎິໂຕ ອໂຍຕິ ນິຣສ຺ສາທຏ຺ເຐນ ນິຣໂຍ. ອຖ ວາ ອປາຍຄ຺ຄຫເຓນ ຕິຣຈ຺ຉານໂຍນິ ວຸຈ຺ຈຕິ. ຕິຣຈ຺ຉານໂຍນິ ຫິ ອປາໂຍ ສຸຄຕິໂຕ ອເປຕຕ຺ຕາ, ນ ທຸຄ຺ຄຕິ ມເຫສກ຺ຂານໍ ນາຄຣາຊາທີນໍ ສມ຺ຠວໂຕ. ທຸຄ຺ຄຕິຄ຺ຄຫເຓນ ເປຕ຺ຕິວິສໂຍ. ໂສ ຫິ ອປາໂຍ ເຈວ ທຸຄ຺ຄຕິ ຈ ສຸຄຕິໂຕ ອເປຕຕ຺ຕາ ທຸກ຺ຂສ຺ສ ຈ ຄຕິຠູຕຕ຺ຕາ, ນ ວິນິປາໂຕ ອສຸຣສທິສໍ ອວິນິປາຕຕ຺ຕາ. ວິນິປາຕຄ຺ຄຫເຓນ ອສຸຣກາໂຍ. ໂສ ຫິ ຍຖາວຸຕ຺ເຕນ ອຕ຺ເຖນ ອປາໂຍ ເຈວ ທຸຄ຺ຄຕິ ຈ, ສພ຺ພສມ຺ປຕ຺ຕິສມຸສ຺ສເຍຫິ ວິນິປຕິຕຕ຺ຕາ ວິນິປາໂຕຕິ ຈ ວຸຈ຺ຈຕິ. ນິຣຍຄ຺ຄຫເຓນ ອວີຈິອາທິອເນກປ຺ປກາໂຣ ນິຣໂຍວ ວຸຈ຺ຈຕິ. ອິຘ ປນ ສພ຺ພປເທຫິປິ ນິຣໂຍວ ວຸຕ຺ໂຕ. ອຸປປຊ຺ຊນ຺ຕີຕິ ປຏິສນ຺ຘິໍ ຄຓ຺ຫນ຺ຕິ.

ຄາຖາສຸ ປຐມຄາຖາ ສງ຺ຄີຕິກາເລ ຘມ຺ມສງ຺ຄາຫກຕ຺ເຖເຣຫິ ຐປິຕາ. ຎຕ຺ວານາຕິ ປຸພ຺ພກາລກິຣິຍາ. ຎາຓປຸພ຺ພກຎ຺ຫິ ພ຺ຍາກຣຓໍ. ເຫຕຸອຕ຺ໂຖ ວາ ຕ຺ວາ-ສທ຺ໂທ ຍຖາ ‘‘ສີຫໍ ທິສ຺ວາ ຠຍໍ ໂຫຕີ’’ຕິ, ຊານນເຫຕູຕິ ອຕ຺ໂຖ. ພຸທ຺ໂຘ, ຠິກ຺ຂູນໍ ສນ຺ຕິເກຕິ ພຸທ຺ໂຘ ຠຄວາ ອຕ຺ຕໂນ ສນ຺ຕິເກ ຠິກ຺ຂູນໍ ເອຕໍ ປຣໂຕ ທ຺ວີຫິ ຄາຖາຫິ ວຸຈ຺ຈມານໍ ອຕ຺ຖໍ ພ຺ຍາກາສິ. ເສສໍ ວຸຕ຺ຕນຍເມວ.

ທສມສຸຕ຺ຕວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.