໙. ໂກກສຸນຂລຸທ຺ທກວຕ຺ຖຸ

ໂຍ ອປ຺ປທຸຏ຺ຐສ຺ສາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ໂກກໍ ນາມ ສຸນຂລຸທ຺ທກໍ ອາຣພ຺ຠ ກເຖສິ.

ໂສ ກິຣ ເອກທິວສໍ ປຸພ຺ພຓ຺ຫສມເຍ ຘນຸໍ ອາທາຍ ສຸນຂປຣິວຸໂຕ ອຣຎ຺ຎໍ ຄຈ຺ຉນ຺ໂຕ ອນ຺ຕຣາມຄ຺ເຄ ເອກໍ ປິຓ຺ຑາຍ ປວິສນ຺ຕໍ ຠິກ຺ຂຸໍ ທິສ຺ວາ ກຸຊ຺ຌິຕ຺ວາ ‘‘ກາຬກຓ຺ຓິ ເມ ທິຏ຺ໂຐ, ອຊ຺ຊ ກິຎ຺ຈິ ນ ລຠິສ຺ສາມີ’’ຕິ ຈິນ຺ເຕຕ຺ວາ ປກ຺ກາມິ. ເຖໂຣປິ ຄາເມ ປິຓ຺ຑາຍ ຈຣິຕ຺ວາ ກຕຠຕ຺ຕກິຈ຺ໂຈ ປຸນ ວິຫາຣໍ ປາຍາສິ. ອິຕໂຣປິ ອຣຎ຺ເຎ ວິຈຣິຕ຺ວາ ກິຎ຺ຈິ ອລຠິຕ຺ວາ ປຈ຺ຈາຄຈ຺ຉນ຺ໂຕ ປຸນ ເຖຣໍ ທິສ຺ວາ ‘‘ອຊ຺ຊາຫໍ ອິມໍ ກາຬກຓ຺ຓິໍ ທິສ຺ວາ ອຣຎ຺ຎໍ ຄໂຕ ກິຎ຺ຈິ ນ ລຠິໍ, ອິທານິ ເມ ປຸນປິ ອຠິມຸໂຂ ຊາໂຕ, ສຸນເຂຫິ ນໍ ຂາທາເປສ຺ສາມີ’’ຕິ ສຎ຺ຎໍ ທຕ຺ວາ ສຸນເຂ ວິສ຺ສຊ຺ເຊສິ. ເຖໂຣປິ ‘‘ມາ ເອວໍ ກຣິ ອຸປາສກາ’’ຕິ ຍາຈິ. ໂສ ‘‘ອຊ຺ຊາຫໍ ຕວ ສມ຺ມຸຂີຠູຕຕ຺ຕາ ກິຎ຺ຈິ ນາລຕ຺ຖໍ, ປຸນປິ ເມ ສມ຺ມຸຂີຠາວມາຄໂຕສິ, ຂາທາເປສ຺ສາເມວ ຕ’’ນ຺ຕິ ວຕ຺ວາ ສຸນເຂ ອຸຍ຺ໂຍເຊສິ. ເຖໂຣ ເວເຄນ ເອກໍ ຣຸກ຺ຂໍ ອຠິຣຸຫິຕ຺ວາ ປຸຣິສປ຺ປມາເຓ ຐາເນ ນິສີທິ. ສຸນຂາ ຣຸກ຺ຂໍ ປຣິວາເຣສຸໍ. ລຸທ຺ທໂກ ຄນ຺ຕ຺ວາ ‘‘ຣຸກ຺ຂໍ ອຠິຣຸຫໂຕປິ ເຕ ໂມກ຺ໂຂ ນຕ຺ຖີ’’ຕິ ຕໍ ສຣຕຸຓ຺ເຑນ ປາທຕເລ ວິຊ຺ຌິ. ເຖໂຣ ‘‘ມາ ເອວໍ ກໂຣຫີ’’ຕິ ຕໍ ຍາຈິເຍວ. ອິຕໂຣ ຕສ຺ສ ຍາຈນໍ ອນາທິຍິຕ຺ວາ ປຸນປ຺ປຸນໍ ວິຊ຺ຌິເຍວ. ເຖໂຣ ເອກສ຺ມິໍ ປາທຕເລ ວິຊ຺ຌິຍມາເນ ຕໍ ອຸກ຺ຂິປິຕ຺ວາ ທຸຕິຍໍ ປາທໍ ໂອລມ຺ພິຕ຺ວາ ຕສ຺ມິໍ ວິຊ຺ຌິຍມາເນ ຕມ຺ປິ ອຸກ຺ຂິປຕິ, ເອວມສ຺ສ ໂສ ຍາຈນໍ ອນາທິຍິຕ຺ວາວ ທ຺ເວປິ ປາທຕລານິ ວິຊ຺ຌິເຍວ. ເຖຣສ຺ສ ສຣີຣໍ ອຸກ຺ກາຫິ ອາທິຕ຺ຕໍ ວິຍ ອໂຫສິ. ໂສ ເວທນານຸວຕ຺ຕິໂກ ຫຸຕ຺ວາ ສຕິໍ ປຈ຺ຈຸປຏ຺ຐາເປຕຸໍ ນາສກ຺ຂິ, ປາຣຸຕຈີວຣໍ ຠສ຺ສນ຺ຕມ຺ປິ ນ ສລ຺ລກ຺ເຂສິ. ຕໍ ປຕມານໍ ໂກກໍ ສີສໂຕ ປຏ຺ຐາຍ ປຣິກ຺ຂິປນ຺ຕເມວ ປຕິ. ສຸນຂາ ‘‘ເຖໂຣ ປຕິໂຕ’’ຕິ ສຎ຺ຎາຍ ຈີວຣນ຺ຕຣໍ ປວິສິຕ຺ວາ ອຕ຺ຕໂນ ສາມິກໍ ລຸຎ຺ຊິຕ຺ວາ ຂາທນ຺ຕາ ອຏ຺ຐິມຕ຺ຕາວເສສໍ ກຣິໍສຸ. ສຸນຂາ ຈີວຣນ຺ຕຣໂຕ ນິກ຺ຂມິຕ຺ວາ ພຫິ ອຏ຺ຐໍສຸ.

ອຖ ເນສໍ ເຖໂຣ ເອກໍ ສຸກ຺ຂທຓ຺ຑກໍ ຠຎ຺ຊິຕ຺ວາ ຂິປິ. ສຸນຂາ ເຖຣໍ ທິສ຺ວາ ‘‘ສາມິໂກວ ອມ຺ເຫຫິ ຂາທິໂຕ’’ຕິ ຎຕ຺ວາ ອຣຎ຺ຎໍ ປວິສິໍສຸ. ເຖໂຣ ກຸກ຺ກຸຈ຺ຈໍ ອຸປ຺ປາເທສິ ‘‘ມມ ຈີວຣນ຺ຕຣໍ ປວິສິຕ຺ວາ ເອສ ນຏ຺ໂຐ, ອໂຣຄໍ ນຸ ໂຂ ເມ ສີລ’’ນ຺ຕິ. ໂສ ຣຸກ຺ຂາ ໂອຕຣິຕ຺ວາ ສຕ຺ຖຸ ສນ຺ຕິກໍ ຄນ຺ຕ຺ວາ ອາທິໂຕ ປຏ຺ຐາຍ ສພ຺ພໍ ຕໍ ປວຕ຺ຕິໍ ອາໂຣເຈຕ຺ວາ – ‘‘ຠນ຺ເຕ, ມມ ຈີວຣໍ ນິສ຺ສາຍ ໂສ ອຸປາສໂກ ນຏ຺ໂຐ, ກຈ຺ຈິ ເມ ອໂຣຄໍ ສີລໍ, ອຕ຺ຖິ ເມ ສມຓຠາໂວ’’ຕິ ປຸຈ຺ຉິ. ສຕ຺ຖາ ຕສ຺ສ ວຈນໍ ສຸຕ຺ວາ ‘‘ຠິກ຺ຂຸ ອໂຣຄໍ ເຕ ສີລໍ, ອຕ຺ຖິ ເຕ ສມຓຠາໂວ, ໂສ ອປ຺ປທຸຏ຺ຐສ຺ສ ປທຸສ຺ສິຕ຺ວາ ວິນາສໍ ປຕ຺ໂຕ, ນ ເກວລຎ຺ຈ ອິທາເນວ, ອຕີເຕປິ ອປ຺ປທຸຏ຺ຐານໍ ປທຸສ຺ສິຕ຺ວາ ວິນາສໍ ປຕ຺ໂຕເຍວາ’’ຕິ ວຕ຺ວາ ຕມຕ຺ຖໍ ປກາເສນ຺ໂຕ ອຕີຕໍ ອາຫຣິ –

ອຕີເຕ ກິເຣໂກ ເວຊ຺ໂຊ ເວຊ຺ຊກມ຺ມຕ຺ຖາຍ ຄາມໍ ວິຈຣິຕ຺ວາ ກິຎ຺ຈິ ກມ຺ມໍ ອລຠິຕ຺ວາ ຉາຕຊ຺ຌຕ຺ໂຕ ນິກ຺ຂມິຕ຺ວາ ຄາມທ຺ວາເຣ ສມ຺ພຫຸເລ ກຸມາຣເກ ກີຬນ຺ເຕ ທິສ຺ວາ ‘‘ອິເມ ສປ຺ເປນ ຑໍສາເປຕ຺ວາ ຕິກິຈ຺ຉິຕ຺ວາ ອາຫາຣໍ ລຠິສ຺ສາມີ’’ຕິ ເອກສ຺ມິໍ ຣຸກ຺ຂພິເລ ສີສໍ ນິຫຣິຕ຺ວາ ນິປນ຺ນໍ ສປ຺ປໍ ທສ຺ເສຕ຺ວາ, ‘‘ອມ຺ໂຠ, ກຸມາຣກາ ເອໂສ ສາຬິກໂປຕໂກ, ຄຓ຺ຫຖ ນ’’ນ຺ຕິ ອາຫ. ອເຖໂກ ກຸມາຣໂກ ສປ຺ປໍ ຄີວາຍໍ ທຬ຺ຫໍ ຄເຫຕ຺ວາ ນີຫຣິຕ຺ວາ ຕສ຺ສ ສປ຺ປຠາວໍ ຎຕ຺ວາ ວິຣວນ຺ໂຕ ອວິທູເຣ ຐິຕສ຺ສ ເວຊ຺ຊສ຺ສ ມຕ຺ຖເກ ຂິປິ. ສປ຺ໂປ ເວຊ຺ຊສ຺ສ ຂນ຺ຘຏ຺ຐິກໍ ປຣິກ຺ຂິປິຕ຺ວາ ທຬ຺ຫໍ ຑໍສິຕ຺ວາ ຕຕ຺ເຖວ ຊີວິຕກ຺ຂຍໍ ປາເປສິ, ເອວເມສ ໂກໂກ ສຸນຂລຸທ຺ທໂກ ປຸພ຺ເພປິ ອປ຺ປທຸຏ຺ຐສ຺ສ ປທຸສ຺ສິຕ຺ວາ ວິນາສໍ ປຕ຺ໂຕເຍວາຕິ.

ສຕ຺ຖາ ອິມໍ ອຕີຕໍ ອາຫຣິຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໒໕. ‘‘ໂຍ ອປ຺ປທຸຏ຺ຐສ຺ສ ນຣສ຺ສ ທຸສ຺ສຕິ, ສຸທ຺ຘສ຺ສ ໂປສສ຺ສ ອນງ຺ຄຓສ຺ສ;

ຕເມວ ພາລໍ ປຈ຺ເຈຕິ ປາປໍ, ສຸຂຸໂມ ຣໂຊ ປຏິວາຕໍວ ຂິຕ຺ໂຕ’’ຕິ.

ຕຕ຺ຖ ອປ຺ປທຸຏ຺ຐສ຺ສາຕິ ອຕ຺ຕໂນ ວາ ສພ຺ພສຕ຺ຕານໍ ວາ ອທຸຏ຺ຐສ຺ສ. ນຣສ຺ສາຕິ ສຕ຺ຕສ຺ສ. ທຸສ຺ສຕີຕິ ອປຣຊ຺ຌຕິ. ສຸທ຺ຘສ຺ສາຕິ ນິຣປຣາຘສ຺ເສວ. ໂປສສ຺ສາຕິ ອິທມ຺ປິ ອປເຣນາກາເຣນ ສຕ຺ຕາຘິວຈນເມວ. ອນງ຺ຄຓສ຺ສາຕິ ນິກ຺ກິເລສສ຺ສ. ປຈ຺ເຈຕີຕິ ປຕິເອຕິ. ປຏິວາຕນ຺ຕິ ຍຖາ ເອເກນ ປຸຣິເສນ ປຏິວາເຕ ຐິຕໍ ປຫຣິຕຸກາມຕາຍ ຂິຕ຺ໂຕ ສຸຂຸໂມ ຣໂຊຕິ ຕເມວ ປຸຣິສໍ ປຈ຺ເຈຕິ, ຕສ຺ເສວ ອຸປຣິ ປຕຕິ, ເອວເມວ ໂຍ ປຸຄ຺ຄໂລ ອປທຸຏ຺ຐສ຺ສ ປຸຣິສສ຺ສ ປາຓິປ຺ປຫຣາທີນິ ທທນ຺ໂຕ ປທຸສ຺ສຕິ, ຕເມວ ພາລໍ ທິຏ຺ເຐວ ຘມ຺ເມ, ສມ຺ປຣາເຍ ວາ ນິຣຍາທີສຸ ວິປຈ຺ຈມານໍ ຕໍ ປາປໍ ວິປາກທຸກ຺ຂວເສນ ປຈ຺ເຈຕີຕິ ອຕ຺ໂຖ.

ເທສນາວສາເນ ໂສ ຠິກ຺ຂຸ ອຣຫຕ຺ເຕ ປຕິຏ຺ຐຫິ, ສມ຺ປຕ຺ຕປຣິສາຍປິ ສາຕ຺ຖິກາ ຘມ຺ມເທສນາ ອໂຫສີຕິ.

ໂກກສຸນຂລຸທ຺ທກວຕ຺ຖຸ ນວມໍ.