໗. ມຫາຘນວາຓິຊວຕ຺ຖຸ

ວາຓິໂຊວາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ມຫາຘນວາຓິຊໍ ອາຣພ຺ຠ ກເຖສິ.

ຕສ຺ສ ກິຣ ວາຓິຊສ຺ສ ເຄເຫ ປຎ຺ຈສຕາ ໂຈຣາ ໂອຕາຣໍ ຄເວສມານາ ໂອຕາຣໍ ນ ລຠິໍສຸ. ອປເຣນ ສມເຍນ ວາຓິໂຊ ປຎ຺ຈ ສກຏສຕານິ ຠຓ຺ຑສ຺ສ ປູເຣຕ຺ວາ ຠິກ຺ຂູນໍ ອາໂຣຈາເປສິ – ‘‘ອຫໍ ອສຸກຏ຺ຐານໍ ນາມ ວາຓິຊ຺ຊຕ຺ຖາຍ ຄຈ຺ຉາມິ, ເຍ, ອຍ຺ຍາ, ຕໍ ຐານໍ ຄນ຺ຕຸກາມາ, ເຕ ນິກ຺ຂມນ຺ຕຸ, ມຄ຺ເຄ ຠິກ຺ຂາຍ ນ ກິລມິສ຺ສນ຺ຕີ’’ຕິ. ຕໍ ສຸຕ຺ວາ ປຎ຺ຈສຕາ ຠິກ຺ຂູ ເຕນ ສທ຺ຘິໍ ມຄ຺ຄໍ ປຏິປຊ຺ຊິໍສຸ. ເຕປິ ໂຈຣາ ‘‘ໂສ ກິຣ ວາຓິໂຊ ນິກ຺ຂນ຺ໂຕ’’ຕິ ຄນ຺ຕ຺ວາ ອຏວິຍໍ ອຏ຺ຐໍສຸ. ວາຓິໂຊປິ ຄນ຺ຕ຺ວາ ອຏວິມຸເຂ ເອກສ຺ມິໍ ຄາເມ ວາສໍ ກຕ຺ວາ ທ຺ເວ ຕໂຍປິ ທິວເສ ໂຄຓສກຏາທີນິ ສໍວິທຫິ, ເຕສໍ ປນ ຠິກ຺ຂູນໍ ນິພທ຺ຘໍ ຠິກ຺ຂໍ ເທຕິເຍວ. ໂຈຣາ ຕສ຺ມິໍ ອຕິຈິຣາຍນ຺ເຕ ‘‘ຄຈ຺ຉ, ຕສ຺ສ ນິກ຺ຂມນທິວສໍ ຎຕ຺ວາ ເອຫີ’’ຕິ ເອກໍ ປຸຣິສໍ ປຫິຓິໍສຸ. ໂສ ຕໍ ຄາມໍ ຄນ຺ຕ຺ວາ ເອກໍ ສຫາຍກໍ ປຸຈ຺ຉິ – ‘‘ກທາ ວາຓິໂຊ ນິກ຺ຂມິສ຺ສຕີ’’ຕິ. ໂສ ‘‘ທ຺ວີຫຕີຫຈ຺ຈເຍນາ’’ຕິ ວຕ຺ວາ ‘‘ກິມຕ຺ຖໍ ປນ ປຸຈ຺ຉສີ’’ຕິ ອາຫ. ອຖສ຺ສ ໂສ ‘‘ມຍໍ ປຎ຺ຈສຕາ ໂຈຣາ ເອຕສ຺ສຕ຺ຖາຍ ອຏວິຍໍ ຐິຕາ’’ຕິ ອາຈິກ຺ຂິ. ອິຕໂຣ ‘‘ເຕນ ຫິ ຄຈ຺ຉ, ສີຆໍ ນິກ຺ຂມິສ຺ສຕີ’’ຕິ ຕໍ ອຸຍ຺ໂຍເຊຕ຺ວາ, ‘‘ກິໍ ນຸ ໂຂ ໂຈເຣ ວາເຣມິ, ອຸທາຫຸ ວາຓິຊ’’ນ຺ຕິ ຈິນ຺ເຕຕ຺ວາ, ‘‘ກິໍ ເມ ໂຈເຣຫິ, ວາຓິຊໍ ນິສ຺ສາຍ ປຎ຺ຈສຕາ ຠິກ຺ຂູ ຊີວນ຺ຕິ, ວາຓິຊສ຺ສ ສຎ຺ຎໍ ທສ຺ສາມີ’’ຕິ ໂສ ຕສ຺ສ ສນ຺ຕິກໍ ຄນ຺ຕ຺ວາ ‘‘ກທາ ຄມິສ຺ສຖາ’’ຕິ ປຸຈ຺ຉິຕ຺ວາ ‘‘ຕຕິຍທິວເສ’’ຕິ ວຸຕ຺ເຕ ມຍ຺ຫໍ ວຈນໍ ກໂຣຖ, ອຏວິຍໍ ກິຣ ຕຸມ຺ຫາກໍ ອຕ຺ຖາຍ ປຎ຺ຈສຕາ ໂຈຣາ ຐິຕາ, ມາ ຕາວ ຄມິຕ຺ຖາຕິ. ຕ຺ວໍ ກຖໍ ຊານາສີຕິ? ເຕສໍ ອນ຺ຕເຣ ມມ ສຫາໂຍ ອຕ຺ຖິ, ຕສ຺ສ ເມ ກຖາຍ ຎາຕນ຺ຕິ. ‘‘ເຕນ ຫິ ‘ກິໍ ເມ ເອຕ຺ໂຕ ຄເຕນາ’ຕິ ນິວຕ຺ຕິຕ຺ວາ ເຄຫເມວ ຄມິສ຺ສາມີ’’ຕິ ອາຫ. ຕສ຺ມິໍ ຈິຣາຍນ຺ເຕ ປຸນ ເຕຫິ ໂຈເຣຫິ ເປສິໂຕ ປຸຣິໂສ ອາຄນ຺ຕ຺ວາ ຕໍ ສຫາຍກໍ ປຸຈ຺ຉິຕ຺ວາ ຕໍ ປວຕ຺ຕິໍ ສຸຕ຺ວາ ‘‘ນິວຕ຺ຕິຕ຺ວາ ເຄຫເມວ ກິຣ ຄມິສ຺ສຕີ’’ຕິ ຄນ຺ຕ຺ວາ ໂຈຣານໍ ອາໂຣເຈສິ. ຕໍ ສຸຕ຺ວາ ໂຈຣາ ຕໂຕ ນິກ຺ຂມິຕ຺ວາ ອິຕຣສ຺ມິໍ ມຄ຺ເຄ ອຏ຺ຐໍສຸ, ຕສ຺ມິໍ ຈິຣຍນ຺ເຕ ປຸນປິ ເຕ ໂຈຣາ ຕສ຺ສ ສນ຺ຕິກໍ ປຸຣິສໍ ເປເສສຸໍ. ໂສ ເຕສໍ ຕຕ຺ຖ ຐິຕຠາວໍ ຎຕ຺ວາ ປຸນ ວາຓິຊສ຺ສ ອາໂຣເຈສິ. ວາຓິໂຊ ‘‘ອິຘາປິ ເມ ເວກລ຺ລໍ ນຕ຺ຖິ, ເອວໍ ສນ຺ເຕ ເນວ ເອຕ຺ໂຕ ຄມິສ຺ສາມິ, ນ ອິໂຕ, ອິເຘວ ຠວິສ຺ສາມີ’’ຕິ ຠິກ຺ຂູນໍ ສນ຺ຕິກໍ ຄນ຺ຕ຺ວາ ອາຫ – ‘‘ຠນ຺ເຕ, ໂຈຣາ ກິຣ ມໍ ວິລຸມ຺ປິຕຸກາມາ ມຄ຺ເຄ ຐິຕາ, ‘ປຸນ ນິວຕ຺ຕິສ຺ສຕີ’ຕິ ສຸຕ຺ວາ ອິຕຣສ຺ມິໍ ມຄ຺ເຄ ຐິຕາ, ອຫໍ ເອຕ຺ໂຕ ວາ ອິໂຕ ວາ ອຄນ຺ຕ຺ວາ ໂຖກໍ ອິເຘວ ຠວິສ຺ສາມິ, ຠທນ຺ຕາ ອິເຘວ ວສິຕຸກາມາ ວສນ຺ຕຸ, ຄນ຺ຕຸກາມາ ອຕ຺ຕໂນ ຣຸຈິໍ ກໂຣນ຺ຕູ’’ຕິ. ຠິກ຺ຂູ ‘‘ເອວໍ ສນ຺ເຕ ມຍໍ ນິວຕ຺ຕິສ຺ສາມາ’’ຕິ ວາຓິຊໍ ອາປຸຈ຺ຉິຕ຺ວາ ປຸນເທວ ສາວຕ຺ຖິໍ ຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ນິສີທິໍສຸ. ສຕ຺ຖາ ‘‘ກິໍ, ຠິກ຺ຂເວ, ມຫາຘນວາຓິເຊນ ສທ຺ຘິໍ ນ ຄມິຕ຺ຖາ’’ຕິ ປຸຈ຺ຉິຕ຺ວາ ‘‘ອາມ, ຠນ຺ເຕ, ມຫາຘນວາຓິຊສ຺ສ ວິລຸມ຺ປນຕ຺ຖາຍ ທ຺ວີສຸປິ ມຄ຺ເຄສຸ ໂຈຣາ ປຣິຍຸຏ຺ຐິໍສຸ, ເຕນ ໂສ ຕຕ຺ເຖວ ຐິໂຕ, ມຍໍ ປນ ຕໍ ອາປຸຈ຺ຉິຕ຺ວາ ອາຄຕາ’’ຕິ ວຸຕ຺ເຕ, ‘‘ຠິກ຺ຂເວ, ມຫາຘນວາຓິໂຊ ໂຈຣານໍ ອຕ຺ຖິຕາຍ ມຄ຺ຄໍ ປຣິວຊ຺ຊຕິ, ຊີວິຕຸກາໂມ ວິຍ ປຸຣິໂສ ຫລາຫລໍ ວິສໍ ປຣິວຊ຺ເຊຕິ, ຠິກ຺ຂຸນາປິ ‘ຕໂຍ ຠວາ ໂຈເຣຫິ ປຣິຍຸຏ຺ຐິຕມຄ຺ຄສທິສາ’ຕິ ຎຕ຺ວາ ປາປໍ ປຣິວຊ຺ເຊຕຸໍ ວຏ຺ຏຕີ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໒໓. ‘‘ວາຓິໂຊວ ຠຍໍ ມຄ຺ຄໍ, ອປ຺ປສຕ຺ໂຖ ມຫທ຺ຘໂນ;

ວິສໍ ຊີວິຕຸກາໂມວ, ປາປານິ ປຣິວຊ຺ຊເຍ’’ຕິ.

ຕຕ຺ຖ ຠຍນ຺ຕິ ຠາຍິຕພ຺ພໍ, ໂຈເຣຫິ ປຣິຍຸຏ຺ຐິຕຕ຺ຕາ ສປ຺ປຏິຠຍນ຺ຕິ ອຕ຺ໂຖ. ອິທໍ ວຸຕ຺ຕໍ ໂຫຕິ – ຍຖາ ມຫາຘນວາຓິໂຊ ອປ຺ປສຕ຺ໂຖ ສປ຺ປຏິຠຍໍ ມຄ຺ຄໍ, ຍຖາ ຈ ຊີວິຕຸກາໂມ ຫລາຫລໍ ວິສໍ ປຣິວຊ຺ເຊຕິ, ເອວໍ ປຓ຺ຑິໂຕ ຠິກ຺ຂຸ ອປ຺ປມຕ຺ຕການິປິ ປາປານິ ປຣິວຊ຺ເຊຍ຺ຍາຕິ.

ເທສນາວສາເນ ເຕ ຠິກ຺ຂູ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິໍສຸ, ສມ຺ປຕ຺ຕມຫາຊນສ຺ສາປິ ສາຕ຺ຖິກາ ຘມ຺ມເທສນາ ອໂຫສີຕິ.

ມຫາຘນວາຓິຊວຕ຺ຖຸ ສຕ຺ຕມໍ.