໑໒. ສຸປ຺ປພຸທ຺ຘສກ຺ຍວຕ຺ຖຸ

ນ ອນ຺ຕລິກ຺ເຂຕິ ອິມໍ ຘມ຺ມເທສນໍ ສຕ຺ຖາ ນິຄ຺ໂຣຘາຣາເມ ວິຫຣນ຺ໂຕ ສຸປ຺ປພຸທ຺ຘໍ ສກ຺ກໍ ອາຣພ຺ຠ ກເຖສິ.

ໂສ ກິຣ ‘‘ອຍໍ ມມ ຘີຕຣໍ ຉຑ຺ເຑຕ຺ວາ ນິກ຺ຂນ຺ໂຕ ຈ, ມມ ປຸຕ຺ຕໍ ປພ຺ພາເຊຕ຺ວາ ຕສ຺ສ ເວຣິຏ຺ຐາເນ ຐິໂຕ ຈາ’’ຕິ ອິເມຫິ ທ຺ວີຫິ ກາຣເຓຫິ ສຕ຺ຖຣິ ອາຆາຕໍ ພນ຺ຘິຕ຺ວາ ເອກທິວສໍ ‘‘ນ ທານິສ຺ສ ນິມນ຺ຕນຏ຺ຐານໍ ຄນ຺ຕ຺ວາ ຠຸຎ຺ຊິຕຸໍ ທສ຺ສາມີ’’ຕິ ຄມນມຄ຺ຄໍ ປິທຫິຕ຺ວາ ອນ຺ຕຣວີຖິຍໍ ສຸຣໍ ປິວນ຺ໂຕ ນິສີທິ. ອຖສ຺ສ ສຕ຺ຖຣິ ຠິກ຺ຂຸສງ຺ຆປຣິວຸເຕ ຕໍ ຐານໍ ອາຄເຕ ‘‘ສຕ຺ຖາ ອາຄໂຕ’’ຕິ ອາໂຣເຈສຸໍ. ໂສ ອາຫ – ‘‘ປຸຣໂຕ ຄຈ຺ຉາຕິ ຕສ຺ສ ວເທຖ, ນາຍໍ ມຍາ ມຫລ຺ລກຕໂຣ, ນາສ຺ສ ມຄ຺ຄໍ ທສ຺ສາມີ’’ຕິ ປຸນປ຺ປຸນໍ ວຸຈ຺ຈມາໂນປິ ຕເຖວ ວຕ຺ວາ ນິສີທິ. ສຕ຺ຖາ ມາຕຸລສ຺ສ ສນ຺ຕິກາ ມຄ຺ຄໍ ອລຠິຕ຺ວາ ຕໂຕ ນິວຕ຺ຕິ. ໂສປິ ເອກໍ ຈຣປຸຣິສໍ ເປເສສິ ‘‘ຄຈ຺ຉ, ຕສ຺ສ ກຖໍ ສຸຕ຺ວາ ເອຫີ’’ຕິ. ສຕ຺ຖາປິ ນິວຕ຺ຕນ຺ໂຕ ສິຕໍ ກຕ຺ວາ ອານນ຺ທຕ຺ເຖເຣນ ‘‘ໂກ ນຸ ໂຂ, ຠນ຺ເຕ, ສິຕສ຺ສ ປາຕຸກມ຺ມສ຺ສ ປຈ຺ຈໂຍ’’ຕິ ປຸຏ຺ໂຐ ອາຫ – ‘‘ປສ຺ສສິ, ອານນ຺ທ, ສຸປ຺ປພຸທ຺ຘ’’ນ຺ຕິ. ປສ຺ສາມິ, ຠນ຺ເຕຕິ. ຠາຣິຍໍ ເຕນ ກມ຺ມໍ ກຕໍ ມາທິສສ຺ສ ພຸທ຺ຘສ຺ສ ມຄ຺ຄໍ ອເທນ຺ເຕນ, ອິໂຕ ສຕ຺ຕເມ ທິວເສ ເຫຏ຺ຐາປາສາເທ ໂສປານປາທມູເລ ປຖວິໍ ປວິສິສ຺ສຕີຕິ. ຈຣປຸຣິໂສ ຕໍ ກຖໍ ສຸຕ຺ວາ ສຸປ຺ປພຸທ຺ຘສ຺ສ ສນ຺ຕິກໍ ຄນ຺ຕ຺ວາ ‘‘ກິໍ ມມ ຠາຄິເນຍ຺ເຍນ ນິວຕ຺ຕນ຺ເຕນ ວຸຕ຺ຕ’’ນ຺ຕິ ປຸຏ຺ໂຐ ຍຖາສຸຕໍ ອາໂຣເຈສິ. ໂສ ຕສ຺ສ ວຈນໍ ສຸຕ຺ວາ ‘‘ນ ທານິ ມມ ຠາຄິເນຍ຺ຍສ຺ສ ກຖາຍ ໂທໂສ ອຕ຺ຖິ, ອທ຺ຘາ ຍໍ ໂສ ວທຕິ, ຕໍ ຕເຖວ ໂຫຕິ. ເອວໍ ສນ຺ເຕປິ ນໍ ອິທານິ ມຸສາວາເທນ ນິຄ຺ຄຓ຺ຫິສ຺ສາມິ. ໂສ ຫິ ມໍ ‘ສຕ຺ຕເມ ທິວເສ ປຖວິໍ ປວິສິສ຺ສຕີ’ຕິ ອນິຍເມນ ອວຕ຺ວາ ‘ເຫຏ຺ຐາປາສາເທ ໂສປານປາທມູເລ ປຖວິໍ ປວິສິສ຺ສຕີ’’’ຕິ ອາຫ. ‘‘ອິໂຕ ທານິ ປຏ຺ຐາຍາຫໍ ຕໍ ຐານໍ ນ ຄມິສ຺ສາມິ, ອຖ ນໍ ຕສ຺ມິໍ ຐາເນ ປຖວິໍ ອປວິສິຕ຺ວາ ມຸສາວາເທນ ນິຄ຺ຄຓ຺ຫິສ຺ສາມີ’’ຕິ ອຕ຺ຕໂນ ອຸປໂຠຄຊາຕໍ ສພ຺ພໍ ສຕ຺ຕຠູມິກປາສາທສ຺ສ ອຸປຣິ ອາໂຣເປຕ຺ວາ ໂສປານໍ ຫຣາເປຕ຺ວາ ທ຺ວາຣໍ ປິທຫາເປຕ຺ວາ ເອເກກສ຺ມິໍ ທ຺ວາເຣ ທ຺ເວ ທ຺ເວ ມລ຺ເລ ຐເປຕ຺ວາ ‘‘ສຈາຫໍ ປມາເທນ ເຫຏ຺ຐາ ໂອໂຣຫິຕຸກາໂມ ໂຫມິ, ນິວາເຣຍ຺ຍາຖ ມ’’ນ຺ຕິ ວຕ຺ວາ ສຕ຺ຕເມ ປາສາທຕເລ ສິຣິຄພ຺ເຠ ນິສີທິ. ສຕ຺ຖາ ຕໍ ປວຕ຺ຕິໍ ສຸຕ຺ວາ, ‘‘ຠິກ຺ຂເວ, ສຸປ຺ປພຸທ຺ໂຘ ນ ເກວລໍ ປາສາທຕເລ ເວຫາສໍ ອຸປ຺ປຕິຕ຺ວາ ອາກາເສ ວາ ນິສີທຕຸ, ນາວາຍ ວາ ສມຸທ຺ທໍ ປກ຺ຂນ຺ທຕຸ, ປພ຺ພຕນ຺ຕຣໍ ວາ ປວິສຕຸ, ພຸທ຺ຘານໍ ກຖາຍ ທ຺ວິຘາຠາໂວ ນາມ ນຕ຺ຖິ, ມຍາ ວຸຕ຺ຕຏ຺ຐາເນເຍວ ໂສ ປຖວິໍ ປວິສິສ຺ສຕີ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໒໘. ‘‘ນ ອນ຺ຕລິກ຺ເຂ ນ ສມຸທ຺ທມຊ຺ເຌ, ນ ປພ຺ພຕານໍ ວິວຣໍ ປວິສ຺ສ;

ນ ວິຊ຺ຊຕີ ໂສ ຊຄຕິປ຺ປເທໂສ, ຍຕ຺ຖຏ຺ຐິຕໍ ນປ຺ປສເຫຍ຺ຍ ມຈ຺ຈູ’’ຕິ.

ຕຕ຺ຖ ຍຕ຺ຖ ຐິຕໍ ນປ຺ປສເຫຍ຺ຍ, ມຈ຺ຈູຕິ ຍສ຺ມິໍ ປເທເສ ຐິຕໍ ມຣຓໍ ນປ຺ປສເຫຍ຺ຍ ນາຠິຠເວຍ຺ຍ, ເກສຄ຺ຄມຕ຺ໂຕປິ ປຖວິປ຺ປເທໂສ ນຕ຺ຖິ. ເສສໍ ປຸຣິມສທິສເມວາຕິ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ສຕ຺ຕເມ ທິວເສ ສຕ຺ຖຸ ຠິກ຺ຂາຈາຣມຄ຺ຄສ຺ສ ນິຣຸທ຺ຘເວລາຍ ເຫຏ຺ຐາປາສາເທ ສຸປ຺ປພຸທ຺ຘສ຺ສ ມງ຺ຄລສ຺ໂສ ອຸທ຺ທາໂມ ຫຸຕ຺ວາ ຕໍ ຕໍ ຠິຕ຺ຕິໍ ປຫຣິ. ໂສ ອຸປຣິ ນິສິນ຺ໂນວສ຺ສ ສທ຺ທໍ ສຸຕ຺ວາ ‘‘ກິເມຕ’’ນ຺ຕິ ປຸຈ຺ຉິ. ‘‘ມງ຺ຄລສ຺ໂສ ອຸທ຺ທາໂມ’’ຕິ. ໂສ ປນສ຺ໂສ ສຸປ຺ປພຸທ຺ຘໍ ທິສ຺ວາວ ສນ຺ນິສີທຕິ. ອຖ ນໍ ໂສ ຄຓ຺ຫິຕຸກາໂມ ຫຸຕ຺ວາ ນິສິນ຺ນຏ຺ຐານາ ອຸຏ຺ຐາຍ ທ຺ວາຣາຠິມຸໂຂ ອໂຫສິ, ທ຺ວາຣານິ ສຍເມວ ວິວຏານິ, ໂສປານໍ ສກຏ຺ຐາເນເຍວ ຐິຕໍ. ທ຺ວາເຣ ຐິຕາ ມລ຺ລາ ຕໍ ຄີວາຍໍ ຄເຫຕ຺ວາ ເຫຏ຺ຐາຠິມຸຂໍ ຂິປິໍສຸ. ເອເຕນຸປາເຍນ ສຕ຺ຕສຸປິ ຕເລສຸ ທ຺ວາຣານິ ສຍເມວ ວິວຏານິ, ໂສປານານິ ຍຖາຐາເນ ຐິຕານິ. ຕຕ຺ຖ ຕຕ຺ຖ ມລ຺ລາ ຕໍ ຄີວາຍເມວ ຄເຫຕ຺ວາ ເຫຏ຺ຐາຠິມຸຂໍ ຂິປິໍສຸ. ອຖ ນໍ ເຫຏ຺ຐາປາສາເທ ໂສປານປາທມູລໍ ສມ຺ປຕ຺ຕເມວ ມຫາປຖວີ ວິວຣມານາ ຠິຊ຺ຊິຕ຺ວາ ສມ຺ປຏິຈ຺ຉິ, ໂສ ຄນ຺ຕ຺ວາ ອວີຈິມ຺ຫິ ນິພ຺ພຕ຺ຕີຕິ.

ສຸປ຺ປພຸທ຺ຘສກ຺ຍວຕ຺ຖຸ ທ຺ວາທສມໍ.

ປາປວຄ຺ຄວຓ຺ຓນາ ນິຏ຺ຐິຕາ.

ນວໂມ ວຄ຺ໂຄ.