໑໑. ຕໂຍຊນວຕ຺ຖຸ

ນ ອນ຺ຕລິກ຺ເຂຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ຕໂຍ ຊເນ ອາຣພ຺ຠ ກເຖສິ.

ສຕ຺ຖຣິ ກິຣ ເຊຕວເນ ວິຫຣນ຺ເຕ ສມ຺ພຫຸລາ ຠິກ຺ຂູ ສຕ຺ຖຸ ທສ຺ສນຕ຺ຖາຍ ອາຄຈ຺ຉນ຺ຕາ ເອກໍ ຄາມໍ ປິຓ຺ຑາຍ ປວິສິໍສຸ. ຄາມວາສິໂນ ເຕ ສມ຺ປຕ຺ເຕ ອາທາຍ ອາສນສາລາຍ ນິສີທາເປຕ຺ວາ ຍາຄຸຂຊ຺ຊກໍ ທຕ຺ວາ ປິຓ຺ຑປາຕເວລໍ ອາຄມຍມານາ ຘມ຺ມໍ ສຸຓນ຺ຕາ ນິສີທິໍສຸ. ຕສ຺ມິໍ ຂເຓ ຠຕ຺ຕໍ ປຈິຕ຺ວາ ສູປພ຺ຍຎ຺ຊນໍ ຘູປຍມານາຍ ເອກິສ຺ສາ ອິຕ຺ຖິຍາ ຠາຊນໂຕ ອຄ຺ຄິຊາລາ ອຸຏ຺ຐຫິຕ຺ວາ ຉທນໍ ຄຓ຺ຫິ. ຕໂຕ ເອກໍ ຕິຓກຣຬໍ ອຸຏ຺ຐຫິຕ຺ວາ ຊລມານໍ ອາກາສໍ ປກ຺ຂນ຺ທິ. ຕສ຺ມິໍ ຂເຓ ເອໂກ ກາໂກ ອາກາເສນ ຄຈ຺ຉນ຺ໂຕ ຕຕ຺ຖ ຄີວໍ ປເວເສຕ຺ວາ ຕິຓວລ຺ລິເວຐິໂຕ ຌາຍິຕ຺ວາ ຄາມມຊ຺ເຌ ປຕິ. ຠິກ຺ຂູ ຕໍ ທິສ຺ວາ ‘‘ອໂຫ ຠາຣິຍໍ ກມ຺ມໍ, ປສ຺ສຖາວຸໂສ, ກາເກນ ປຕ຺ຕໍ ວິປ຺ປກາຣໍ, ອິມິນາ ກຕກມ຺ມໍ ອຎ຺ຎຕ຺ຣ ສຕ຺ຖາຣາ ໂກ ຊານິສ຺ສຕິ, ສຕ຺ຖາຣມສ຺ສ ກມ຺ມໍ ປຸຈ຺ຉິສ຺ສາມາ’’ຕິ ຈິນ຺ເຕຕ຺ວາ ປກ຺ກມິໍສຸ.

ອປເຣສມ຺ປິ ຠິກ຺ຂູນໍ ສຕ຺ຖຸ ທສ຺ສນຕ຺ຖາຍ ນາວໍ ອຠິຣຸຍ຺ຫ ຄຈ຺ຉນ຺ຕານໍ ນາວາ ສມຸທ຺ເທ ນິຈ຺ຈລາ ອຏ຺ຐາສິ. ມນຸສ຺ສາ ‘‘ກາຬກຓ຺ຓິນາ ເອຕ຺ຖ ຠວິຕພ຺ພ’’ນ຺ຕິ ສລາກໍ ວິຈາເຣສຸໍ. ນາວິກສ຺ສ ຈ ຠຣິຍາ ປຐມວເຍ ຐິຕາ ທສ຺ສນີຍາ ປາສາທິກາ, ສລາກາ ຕສ຺ສາ ປາປຸຓິ. ‘‘ສລາກໍ ປຸນ ວິຈາເຣຖາ’’ຕິ ວຕ຺ວາ ຍາວຕຕິຍໍ ວິຈາເຣສຸໍ, ຕິກ຺ຂຕ຺ຕຸມ຺ປິ ຕສ຺ສາ ເອວ ປາປຸຓິ. ມນຸສ຺ສາ ‘‘ກິໍ, ສາມີ’’ຕິ ນາວິກສ຺ສ ມຸຂໍ ໂອໂລເກສຸໍ. ນາວິໂກ ‘‘ນ ສກ຺ກາ ເອກິສ຺ສາ ອຕ຺ຖາຍ ມຫາຊນໍ ນາເສຕຸໍ, ອຸທເກ ນໍ ຂິປຖາ’’ຕິ ອາຫ. ສາ ຄເຫຕ຺ວາ ອຸທເກ ຂິປິຍມານາ ມຣຓຠຍຕຊ຺ຊິຕາ ວິຣວໍ ອກາສິ. ຕໍ ສຸຕ຺ວາ ນາວິໂກ ໂກ ອຕ຺ໂຖ ອິມິສ຺ສາ ອາຠຣເຓຫິ ນຏ຺ເຐຫິ, ສພ຺ພາຠຣຓານິ ໂອມຸຎ຺ຈິຕ຺ວາ ເອກໍ ປິໂລຕິກໍ ນິວາສາເປຕ຺ວາ ຉຑ຺ເຑຖ ນໍ, ອຫໍ ປເນຕໍ ອຸທກປິຏ຺ເຐ ປ຺ລວມານໍ ທຏ຺ຐຸໍ ນ ສກ຺ຂິສ຺ສາມີ ຕສ຺ມາ ຍຖາ ນໍ ອຫໍ ນ ປສ຺ສາມິ, ຕຖາ ເອກໍ ວາລຸກກຸຏໍ ຄີວາຍ ພນ຺ຘິຕ຺ວາ ສມຸທ຺ເທ ຂິປຖາຕິ. ເຕ ຕຖາ ກຣິໍສຸ. ຕມ຺ປິ ປຕິຕຏ຺ຐາເນເຍວ ມຈ຺ຉກຈ຺ຉປາ ວິລຸມ຺ປິໍສຸ. ຠິກ຺ຂູ ຕໍ ປວຕ຺ຕິໍ ຎຕ຺ວາ ‘‘ຐເປຕ຺ວາ ສຕ຺ຖາຣໍ ໂກ ອຎ຺ໂຎ ເອຕິສ຺ສາ ອິຕ຺ຖິຍາ ກຕກມ຺ມໍ ຊານິສ຺ສຕິ, ສຕ຺ຖາຣໍ ຕສ຺ສາ ກມ຺ມໍ ປຸຈ຺ຉິສ຺ສາມາ’’ຕິ ອິຈ຺ຉິຕຏ຺ຐານໍ ປຕ຺ວາ ນາວາໂຕ ໂອຣຸຍ຺ຫ ປກ຺ກມິໍສຸ.

ອປເຣປິ ສຕ຺ຕ ຠິກ຺ຂູ ສຕ຺ຖຸ ທສ຺ສນຕ຺ຖາຍ ຄຈ຺ຉນ຺ຕາ ສາຍໍ ເອກໍ ວິຫາຣໍ ປວິສິຕ຺ວາ ວສນຏ຺ຐານໍ ປຸຈ຺ຉິໍສຸ. ເອກສ຺ມິຎ຺ຈ ເລເຓ ສຕ຺ຕ ມຎ຺ຈາ ໂຫນ຺ຕິ. ເຕສໍ ຕເທວ ລຠິຕ຺ວາ ຕຕ຺ຖ ນິປນ຺ນານໍ ຣຕ຺ຕິຠາເຄ ກູຏາຄາຣມຕ຺ໂຕ ປາສາໂຓ ປວຏ຺ຏມາໂນ ອາຄນ຺ຕ຺ວາ ເລຓທ຺ວາຣໍ ປິທຫິ. ເນວາສິກາ ຠິກ຺ຂູ ‘‘ມຍໍ ອິມໍ ເລຓໍ ອາຄນ຺ຕຸກຠິກ຺ຂູນໍ ປາປຍິມ຺ຫາ, ອຍຎ຺ຈ ມຫາປາສາໂຓ ເລຓທ຺ວາຣໍ ປິທຫນ຺ໂຕ ອຏ຺ຐາສິ, ອປເນສ຺ສາມ ນ’’ນ຺ຕິ ສມນ຺ຕາ ສຕ຺ຕຫິ ຄາເມຫິ ມນຸສ຺ເສ ສນ຺ນິປາເຕຕ຺ວາ ວາຍມນ຺ຕາປິ ຐານາ ຈາເລຕຸໍ ນາສກ຺ຂິໍສຸ. ອນ຺ໂຕ ປວິຏ຺ຐຠິກ຺ຂູປິ ວາຍມິໍສຸເຍວ. ເອວໍ ສນ຺ເຕປິ ສຕ຺ຕາຫໍ ປາສາຓໍ ຈາເລຕຸໍ ນາສກ຺ຂິໍສຸ. ອາຄນ຺ຕຸກາ ສຕ຺ຕາຫໍ ຉາຕຊ຺ຌຕ຺ຕາ ມຫາທຸກ຺ຂໍ ອນຸຠວິໍສຸ. ສຕ຺ຕເມ ທິວເສ ປາສາໂຓ ສຍເມວ ປວຏ຺ຏິຕ຺ວາ ອປຄໂຕ. ຠິກ຺ຂູ ນິກ຺ຂມິຕ຺ວາ ‘‘ອມ຺ຫາກໍ ອິມໍ ປາປໍ ອຎ຺ຎຕ຺ຣ ສຕ຺ຖາຣາ ໂກ ຊານິສ຺ສຕິ, ສຕ຺ຖາຣໍ ປຸຈ຺ຉິສ຺ສາມາ’’ຕິ ຈິນ຺ເຕຕ຺ວາ ປກ຺ກມິໍສຸ. ເຕ ປຸຣິເມຫິ ສທ຺ຘິໍ ອນ຺ຕຣາມຄ຺ເຄ ສມາຄນ຺ຕ຺ວາ ສພ຺ເພ ເອກໂຕວ ສຕ຺ຖາຣໍ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ຕໍ ນິສິນ຺ນາ ສຕ຺ຖາຣາ ກຕປຏິສນ຺ຖາຣາ ອຕ຺ຕນາ ອຕ຺ຕນາ ທິຏ຺ຐານຸຠູຕານິ ກາຣຓານິ ປຏິປາຏິຍາ ປຸຈ຺ຉິໍສຸ.

ສຕ຺ຖາປິ ເຕສໍ ປຏິປາຏິຍາ ເອວໍ ພ຺ຍາກາສິ – ‘‘ຠິກ຺ຂເວ, ໂສ ຕາວ ກາໂກ ອຕ຺ຕນາ ກຕກມ຺ມເມວ ອນຸໂຠສິ. ອຕີຕກາເລ ຫິ ພາຣາຓສິຍໍ ເອໂກ ກສ຺ສໂກ ອຕ຺ຕໂນ ໂຄຓໍ ທເມນ຺ໂຕ ທເມຕຸໍ ນາສກ຺ຂິ. ໂສ ຫິສ຺ສ ໂຄໂຓ ໂຖກໍ ຄນ຺ຕ຺ວາ ນິປຊ຺ຊິ, ໂປເຖຕ຺ວາ ອຸຏ຺ຐາປິໂຕປິ ໂຖກໍ ຄນ຺ຕ຺ວາ ປຸນປິ ຕເຖວ ນິປຊ຺ຊິ. ໂສ ວາຍມິຕ຺ວາ ຕໍ ທເມຕຸໍ ອສກ຺ໂກນ຺ໂຕ ໂກຘາຠິຠູໂຕ ຫຸຕ຺ວາ ‘ອິໂຕ ທານິ ປຏ຺ຐາຍ ສຸຂໍ ນິປຊ຺ຊິສ຺ສສີ’ຕິ ປລາລປິຓ຺ຑໍ ວິຍ ກໂຣນ຺ໂຕ ປລາເລນ ຕສ຺ສ ຄີວໍ ປລິເວເຐຕ຺ວາ ອຄ຺ຄິມທາສິ, ໂຄໂຓ ຕຕ຺ເຖວ ຌາຍິຕ຺ວາ ມໂຕ. ຕທາ, ຠິກ຺ຂເວ, ເຕນ ກາເກນ ຕໍ ປາປກມ຺ມໍ ກຕໍ. ໂສ ຕສ຺ສ ວິປາເກນ ທີຆຣຕ຺ຕໍ ນິຣເຍ ປຈ຺ຈິຕ຺ວາ ວິປາກາວເສເສນ ສຕ຺ຕກ຺ຂຕ຺ຕຸໍ ກາກໂຍນິຍໍ ນິພ຺ພຕ຺ຕິຕ຺ວາ ເອວເມວ ອາກາເສ ຌາຍິຕ຺ວາວ ມໂຕ’’ຕິ.

ສາປິ, ຠິກ຺ຂເວ, ອິຕ຺ຖີ ອຕ຺ຕນາ ກຕກມ຺ມເມວ ອນຸໂຠສິ. ສາ ຫິ ອຕີເຕ ພາຣາຓສິຍໍ ເອກສ຺ສ ຄຫປຕິກສ຺ສ ຠຣິຍາ ອຸທກຫຣຓໂກຏ຺ຏນປຈນາທີນິ ສພ຺ພກິຈ຺ຈານິ ສຫຕ຺ເຖເນວ ອກາສິ. ຕສ຺ສາ ເອໂກ ສຸນໂຂ ຕໍ ເຄເຫ ສພ຺ພກິຈ຺ຈານິ ກຸຣຸມານໍ ໂອໂລເກນ຺ໂຕວ ນິສີທຕິ. ເຂຕ຺ເຕ ຠຕ຺ຕໍ ຫຣນ຺ຕິຍາ ທາຣຸປຓ຺ຓາທີນໍ ວາ ອຕ຺ຖາຍ ອຣຎ຺ຎໍ ຄຈ຺ຉນ຺ຕິຍາ ຕາຍ ສທ຺ຘິໍເຍວ ຄຈ຺ຉຕິ. ຕໍ ທິສ຺ວາ ທຫຣມນຸສ຺ສາ ‘‘ອມ຺ໂຠ ນິກ຺ຂນ຺ໂຕ ສຸນຂລຸທ຺ທໂກ, ອຊ຺ຊ ມຍໍ ມໍເສນ ຠຸຎ຺ຊິສ຺ສາມາ’’ຕິ ອຸປ຺ປຓ຺ເຑນ຺ຕິ. ສາ ເຕສໍ ກຖາຍ ມງ຺ກຸ ຫຸຕ຺ວາ ສຸນຂໍ ເລຑ຺ຑຸທຓ຺ຑາທີຫິ ປຫຣິຕ຺ວາ ປລາເປຕິ, ສຸນໂຂ ນິວຕ຺ຕິຕ຺ວາ ປຸນ ອນຸພນ຺ຘຕິ. ໂສ ກິຣສ຺ສາ ຕຕິເຍ ອຕ຺ຕຠາເວ ຠຕ຺ຕາ ອໂຫສິ, ຕສ຺ມາ ສິເນຫໍ ຉິນ຺ທິຕຸໍ ນ ສກ຺ໂກຕິ. ກິຎ຺ຈາປິ ຫິ ອນມຕຄ຺ເຄ ສໍສາເຣ ຊາຍາ ວາ ປຕິ ວາ ອຠູຕປຸພ຺ພາ ນາມ ນຕ຺ຖິ, ອວິທູເຣ ປນ ອຕ຺ຕຠາເວ ຎາຕເກສຸ ອຘິມຕ຺ໂຕ ສິເນໂຫ ໂຫຕິ, ຕສ຺ມາ ໂສ ສຸນໂຂ ຕໍ ວິຊຫິຕຸໍ ນ ສກ຺ໂກຕິ. ສາ ຕສ຺ສ ກຸຊ຺ຌິຕ຺ວາ ເຂຕ຺ຕໍ ສາມິກສ຺ສ ຍາຄຸໍ ຫຣມານາ ຣຊ຺ຊຸໍ ອຸຈ຺ຉງ຺ເຄ ຐເປຕ຺ວາ ອຄມາສິ, ສຸນໂຂ ຕາເຍວ ສທ຺ຘິໍ ຄໂຕ. ສາ ສາມິກສ຺ສ ຍາຄຸໍ ທຕ຺ວາ ຕຸຈ຺ຉກຸຏໍ ອາທາຍ ເອກໍ ອຸທກຏ຺ຐານໍ ຄນ຺ຕ຺ວາ ກຸຏໍ ວາລຸກາຍ ປູເຣຕ຺ວາ ສມີເປ ໂອໂລເກຕ຺ວາ ຐິຕສ຺ສ ສຸນຂສ຺ສ ສທ຺ທມກາສິ. ສຸນໂຂ ‘‘ຈິຣສ຺ສໍ ວຕ ເມ ອຊ຺ຊ ມຘຸຣກຖາ ລທ຺ຘາ’’ຕິ ນງ຺ຄຸຏ຺ຐໍ ຈາເລນ຺ໂຕ ຕໍ ອຸປສງ຺ກມິ. ສາ ຕໍ ຄີວາຍໍ ທຬ຺ຫໍ ຄເຫຕ຺ວາ ເອກາຍ ຣຊ຺ຊຸໂກຏິຍາ ກຸຏໍ ພນ຺ຘິຕ຺ວາ ເອກໍ ຣຊ຺ຊຸໂກຏິໍ ສຸນຂສ຺ສ ຄີວາຍໍ ພນ຺ຘິຕ຺ວາ ກຸຏໍ ອຸທກາຠິມຸຂໍ ປວຏ຺ເຏສິ. ສຸນໂຂ ກຸຏໍ ອນຸພນ຺ຘນ຺ໂຕ ອຸທເກ ປຕິຕ຺ວາ ຕຕ຺ເຖວ ກາລມກາສິ. ສາ ຕສ຺ສ ກມ຺ມສ຺ສ ວິປາເກນ ທີຆຣຕ຺ຕໍ ນິຣເຍ ປຈ຺ຈິຕ຺ວາ ວິປາກາວເສເສນ ອຕ຺ຕຠາວສເຕ ວາລຸກກຸຏໍ ຄີວາຍໍ ພນ຺ຘິຕ຺ວາ ອຸທເກ ປກ຺ຂິຕ຺ຕາ ກາລມກາສີຕິ.

ຕຸມ຺ເຫຫິປິ, ຠິກ຺ຂເວ, ອຕ຺ຕນາ ກຕກມ຺ມເມວ ອນຸຠູຕໍ. ອຕີຕສ຺ມິຎ຺ຫິ ພາຣາຓສິວາສິໂນ ສຕ຺ຕ ໂຄປາລກທາຣກາ ເອກສ຺ມິໍ ອຏວິປເທເສ ສຕ຺ຕາຫວາເຣນ ຄາວິໂຍ ວິຈຣນ຺ຕາ ເອກທິວສໍ ຄາວິໂຍ ວິຈາເຣຕ຺ວາ ອາຄຈ຺ຉນ຺ຕາ ເອກໍ ມຫາໂຄຘໍ ທິສ຺ວາ ອນຸພນ຺ຘິໍສຸ. ໂຄຘາ ປລາຍິຕ຺ວາ ເອກໍ ວມ຺ມິກໍ ປາວິສິ. ຕສ຺ສ ປນ ວມ຺ມິກສ຺ສ ສຕ຺ຕ ຉິທ຺ທານິ, ທາຣກາ ‘‘ມຍໍ ທານິ ຄເຫຕຸໍ ນ ສກ຺ຂິສ຺ສາມ, ສ຺ເວ ອາຄນ຺ຕ຺ວາ ຄຓ຺ຫິສ຺ສາມາ’’ຕິ ເອເກໂກ ເອເກກໍ ສາຂຠງ຺ຄມຸຏ຺ຐິໍ ອາທາຍ ສຕ຺ຕປິ ຊນາ ສຕ຺ຕ ຉິທ຺ທານິ ປິທຫິຕ຺ວາ ປກ຺ກມິໍສຸ. ເຕ ປຸນທິວເສ ຕໍ ໂຄຘໍ ອມນສິກຕ຺ວາ ອຎ຺ຎສ຺ມິໍ ປເທເສ ຄາວິໂຍ ວິຈາເຣຕ຺ວາ ສຕ຺ຕເມ ທິວເສ ຄາວິໂຍ ອາທາຍ ຄຈ຺ຉນ຺ຕາ ຕໍ ວມ຺ມິກໍ ທິສ຺ວາ ສຕິໍ ປຏິລຠິຕ຺ວາ ‘‘ກາ ນຸ ໂຂ ຕສ຺ສາ ໂຄຘາຍ ປວຕ຺ຕີ’’ຕິ ອຕ຺ຕນາ ອຕ຺ຕນາ ປິທຫິຕານິ ຉິທ຺ທານິ ວິວຣິໍສຸ. ໂຄຘາ ຊີວິເຕ ນິຣາລຍາ ຫຸຕ຺ວາ ອຏ຺ຐິຈມ຺ມາວເສສາ ປເວຘມານາ ນິກ຺ຂມິ. ເຕ ຕໍ ທິສ຺ວາ ອນຸກມ຺ປໍ ກຕ຺ວາ ‘‘ມາ ນໍ ມາເຣຖ, ສຕ຺ຕາຫໍ ຉິນ຺ນຠຕ຺ຕາ ຊາຕາ’’ຕິ ຕສ຺ສາ ປິຏ຺ຐິໍ ປຣິມຊ຺ຊິຕ຺ວາ ‘‘ສຸເຂນ ຄຈ຺ຉາຫີ’’ຕິ ວິສ຺ສຊ຺ເຊສຸໍ. ເຕ ໂຄຘາຍ ອມາຣິຕຕ຺ຕາ ນິຣເຍ ຕາວ ນ ປຈ຺ຈິໍສຸ. ເຕ ປນ ສຕ຺ຕ ຊນາ ເອກໂຕ ຫຸຕ຺ວາ ຈຸທ຺ທສສຸ ອຕ຺ຕຠາເວສຸ ສຕ຺ຕ ສຕ຺ຕ ທິວສານິ ຉິນ຺ນຠຕ຺ຕາ ອເຫສຸໍ. ຕທາ, ຠິກ຺ຂເວ, ຕຸມ຺ເຫຫິ ສຕ຺ຕຫິ ໂຄປາລເກຫິ ຫຸຕ຺ວາ ຕໍ ກມ຺ມໍ ກຕນ຺ຕິ. ເອວໍ ສຕ຺ຖາ ເຕຫິ ປຸຏ຺ຐປຸຏ຺ຐໍ ປຎ຺ຫໍ ພ຺ຍາກາສິ.

ອເຖໂກ ຠິກ຺ຂຸ ສຕ຺ຖາຣໍ ອາຫ – ‘‘ກິໍ ປນ, ຠນ຺ເຕ, ປາປກມ຺ມໍ ກຕ຺ວາ ອາກາເສ ອຸປ຺ປຕິຕສ຺ສປິ ສມຸທ຺ທໍ ປກ຺ຂນ຺ທສ຺ສາປິ ປພ຺ພຕນ຺ຕຣໍ ປວິຏ຺ຐສ຺ສາປິ ໂມກ຺ໂຂ ນຕ຺ຖີ’’ຕິ. ສຕ຺ຖາ ‘‘ເອວເມຕໍ, ຠິກ຺ຂເວ, ອາກາສາທີສຸປິ ເອກປເທໂສປິ ນຕ຺ຖິ, ຍຕ຺ຖ ຐິໂຕ ປາປກມ຺ມໂຕ ມຸຈ຺ເຈຍ຺ຍາ’’ຕິ ວຕ຺ວາ ອນຸສນ຺ຘິໍ ຆເຏຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໑໒໗. ‘‘ນ ອນ຺ຕລິກ຺ເຂ ນ ສມຸທ຺ທມຊ຺ເຌ, ນ ປພ຺ພຕານໍ ວິວຣໍ ປວິສ຺ສ;

ນ ວິຊ຺ຊຕີ ໂສ ຊຄຕິປ຺ປເທໂສ, ຍຕ຺ຖຏ຺ຐິໂຕ ມຸຈ຺ເຈຍ຺ຍ ປາປກມ຺ມາ’’ຕິ.

ຕສ຺ສຕ຺ໂຖ – ສເຈ ຫິ ໂກຈິ ‘‘ອິມິນາ ອຸປາເຍນ ປາປກມ຺ມໂຕ ມຸຈ຺ຈິສ຺ສາມີ’’ຕິ ອນ຺ຕລິກ຺ເຂ ວາ ນິສີເທຍ຺ຍ, ຈຕຸຣາສີຕິໂຍຊນສຫສ຺ສຄມ຺ຠີຣໍ ມຫາສມຸທ຺ທໍ ວາ ປວິເສຍ຺ຍ, ປພ຺ພຕນ຺ຕເຣ ວາ ນິສີເທຍ຺ຍ, ເນວ ປາປກມ຺ມໂຕ ມຸຈ຺ເຈຍ຺ຍ. ປຸຣຕ຺ຖິມາທີສຸ ຊຄຕິປເທເສສຸ ປຖວີຠາເຄສຸ ນ ໂສ ວາລຄ຺ຄມຕ຺ໂຕປິ ໂອກາໂສ ອຕ຺ຖິ, ຍຕ຺ຖ ຐິໂຕ ປາປກມ຺ມໂຕ ມຸຈ຺ຈິຕຸໍ ສກ຺ກຸເຓຍ຺ຍາຕິ.

ເທສນາວສາເນ ເຕ ຠິກ຺ຂູ ໂສຕາປຕ຺ຕິຜລາທີນິ ປາປຸຓິໍສຸ, ສມ຺ປຕ຺ຕມຫາຊນສ຺ສາປິ ສາຕ຺ຖິກາ ຘມ຺ມເທສນາ ອໂຫສີຕິ.

ຕໂຍຊນວຕ຺ຖຸ ເອກາທສມໍ.