໘. ມຫາປຊາປຕິໂຄຕມີວຕ຺ຖຸ

ຍສ຺ສ ກາເຍນ ວາຈາຍາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ມຫາປຊາປຕິໍ ໂຄຕມິໍ ອາຣພ຺ຠ ກເຖສິ.

ຠຄວຕາ ຫິ ອນຸປ຺ປນ຺ເນ ວຕ຺ຖຸສ຺ມິໍ ປຎ຺ຎຕ຺ເຕ ອຏ຺ຐ ຄຣຸຘມ຺ເມ ມຓ຺ຑນກຊາຕິໂຍ ປຸຣິໂສ ສຸຣຠິປຸປ຺ຜທາມໍ ວິຍ ສິຣສາ ສມ຺ປຏິຈ຺ຉິຕ຺ວາ ສປຣິວາຣາ ມຫາປຊາປຕິ ໂຄຕມີ ອຸປສມ຺ປທໍ ລຠິ, ອຎ຺ໂຎ ຕສ຺ສາ ອຸປຊ຺ຌາໂຍ ວາ ອາຈຣິໂຍ ວາ ນຕ຺ຖິ. ເອວໍ ລທ຺ຘູປສມ຺ປທໍ ເຖຣິໍ ອາຣພ຺ຠ ອປເຣນ ສມເຍນ ກຖໍ ສມຸຏ຺ຐາເປສຸໍ ‘‘ມຫາປຊາປຕິຍາ ໂຄຕມິຍາ ອາຈຣິຍຸປຊ຺ຌາຍາ ນ ປຎ຺ຎາຍນ຺ຕິ, ສຫຕ຺ເຖເນວ ກາສາຍານິ ຄຓ຺ຫີ’’ຕິ. ເອວຎ຺ຈ ປນ ວຕ຺ວາ ຠິກ຺ຂຸນິໂຍ ກຸກ຺ກຸຈ຺ຈາຍນ຺ຕິໂຍ ຕາຍ ສທ຺ຘິໍ ເນວ ອຸໂປສຖໍ ນ ປວາຣຓໍ ກໂຣນ຺ຕິ, ຕາ ຄນ຺ຕ຺ວາ ຕຖາຄຕສ຺ສປິ ຕມຕ຺ຖໍ ອາໂຣເຈສຸໍ. ສຕ຺ຖາ ຕາສໍ ກຖໍ ສຸຕ຺ວາ ‘‘ມຍາ ມຫາປຊາປຕິຍາ ໂຄຕມິຍາ ອຏ຺ຐ ຄຣຸຘມ຺ມາ ທິນ຺ນາ, ອຫເມວສ຺ສາຈຣິໂຍ, ອຫເມວ ອຸປຊ຺ຌາໂຍ. ກາຍທຸຈ຺ຈຣິຕາທິວິຣຫິເຕສຸ ຂີຓາສເວສຸ ກຸກ຺ກຸຈ຺ຈໍ ນາມ ນ ກາຕພ຺ພ’’ນ຺ຕິ ວຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໓໙໑. ‘‘ຍສ຺ສ ກາເຍນ ວາຈາຍ, ມນສາ ນຕ຺ຖິ ທຸກ຺ກຏໍ;

ສໍວຸຕໍ ຕີຫິ ຐາເນຫິ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ທຸກ຺ກຏນ຺ຕິ ສາວຊ຺ຊໍ ທຸກ຺ຂຸທ຺ຣຍໍ ອປາຍສໍວຕ຺ຕນິກໍ ກມ຺ມໍ. ຕີຫິ ຐາເນຫີຕິ ເອເຕຫິ ກາຍາທີຫິ ຕີຫິ ກາຣເຓຫິ ກາຍທຸຈ຺ຈຣິຕາທິປເວສນິວາຣຓຕ຺ຖາຍ ທ຺ວາຣໍ ປິຫິຕໍ, ຕໍ ອຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ມຫາປຊາປຕິໂຄຕມີວຕ຺ຖຸ ອຏ຺ຐມໍ.