໙. ສາຣິປຸຕ຺ຕຕ຺ເຖຣວຕ຺ຖຸ

ຍມ຺ຫາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສາຣິປຸຕ຺ຕຕ຺ເຖຣໍ ອາຣພ຺ຠ ກເຖສິ.

ໂສ ກິຣາຍສ຺ມາ ອສ຺ສຊິຕ຺ເຖຣສ຺ສ ສນ຺ຕິເກ ຘມ຺ມໍ ສຸຕ຺ວາ ໂສຕາປຕ຺ຕິຜລໍ ປຕ຺ຕກາລໂຕ ປຏ຺ຐາຍ ‘‘ຍສ຺ສໍ ທິສາຍໍ ເຖໂຣ ວສຕີ’’ຕິ ສຸຓາຕິ, ຕໂຕ ອຎ຺ຊລິໍ ປຄ຺ຄຍ຺ຫ ຕໂຕວ ສີສໍ ກຕ຺ວາ ນິປຊ຺ຊຕິ. ຠິກ຺ຂູ ‘‘ມິຈ຺ຉາທິຏ຺ຐິໂກ ສາຣິປຸຕ຺ໂຕ, ອຊ຺ຊາປິ ທິສາ ນມສ຺ສມາໂນ ວິຈຣຕີ’’ຕິ ຕມຕ຺ຖໍ ຕຖາຄຕສ຺ສ ອາໂຣເຈສຸໍ. ສຕ຺ຖາ ເຖຣໍ ປກ຺ໂກສາເປຕ຺ວາ ‘‘ສຈ຺ຈໍ ກິຣ ຕ຺ວໍ, ສາຣິປຸຕ຺ຕ, ທິສາ ນມສ຺ສນ຺ໂຕ ວິຈຣສີ’’ຕິ ປຸຈ຺ຉິຕ຺ວາ, ‘‘ຠນ຺ເຕ, ມມ ທິສາ ນມສ຺ສນຠາວໍ ວາ ອນມສ຺ສນຠາວໍ ວາ ຕຸມ຺ເຫວ ຊານາຖາ’’ຕິ ວຸຕ຺ເຕ ‘‘ນ, ຠິກ຺ຂເວ, ສາຣິປຸຕ຺ໂຕ ທິສາ ນມສ຺ສຕິ, ອສ຺ສຊິຕ຺ເຖຣສ຺ສ ປນ ສນ຺ຕິກາ ຘມ຺ມໍ ສຸຕ຺ວາ ໂສຕາປຕ຺ຕິຜລໍ ປຕ຺ຕຕາຍ ອຕ຺ຕໂນ ອາຈຣິຍໍ ນມສ຺ສຕິ. ຍຎ຺ຫິ ອາຈຣິຍໍ ນິສ຺ສາຍ ຠິກ຺ຂຸ ຘມ຺ມໍ ວິຊານາຕິ, ເຕນ ໂສ ພ຺ຣາຫ຺ມເຓນ ອຄ຺ຄິ ວິຍ ສກ຺ກຈ຺ຈໍ ນມສ຺ສິຕພ຺ໂພເຍວາ’’ຕິ ວຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໓໙໒. ‘‘ຍມ຺ຫາ ຘມ຺ມໍ ວິຊາເນຍ຺ຍ, ສມ຺ມາສມ຺ພຸທ຺ຘເທສິຕໍ;

ສກ຺ກຈ຺ຈໍ ຕໍ ນມສ຺ເສຍ຺ຍ, ອຄ຺ຄິຫຸຕ຺ຕໍວ ພ຺ຣາຫ຺ມໂຓ’’ຕິ.

ຕຕ຺ຖ ອຄ຺ຄິຫຸຕ຺ຕໍວາຕິ ຍຖາ ພ຺ຣາຫ຺ມໂຓ ອຄ຺ຄິຫຸຕ຺ຕໍ ສມ຺ມາ ປຣິຈຣເຓນ ເຈວ ອຎ຺ຊລິກມ຺ມາທີຫິ ຈ ສກ຺ກຈ຺ຈໍ ນມສ຺ສຕິ, ເອວໍ ຍມ຺ຫາ ອາຈຣິຍາ ຕຖາຄຕປເວທິຕໍ ຘມ຺ມໍ ວິຊາເນຍ຺ຍ, ຕໍ ສກ຺ກຈ຺ຈໍ ນມສ຺ເສຍ຺ຍາຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ສາຣິປຸຕ຺ຕຕ຺ເຖຣວຕ຺ຖຸ ນວມໍ.