໗. ສາຣິປຸຕ຺ຕຕ຺ເຖຣວຕ຺ຖຸ

ນ ພ຺ຣາຫ຺ມຓສ຺ສາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສາຣິປຸຕ຺ຕຕ຺ເຖຣໍ ອາຣພ຺ຠ ກເຖສິ.

ເອກສ຺ມິໍ ກິຣ ຐາເນ ສມ຺ພຫຸລາ ມນຸສ຺ສາ ‘‘ອໂຫ ອມ຺ຫາກໍ, ອຍ຺ໂຍ, ຂນ຺ຕິພເລນ ສມນ຺ນາຄໂຕ, ອຎ຺ເຎສຸ ອກ຺ໂກສນ຺ເຕສຸ ວາ ປຫຣນ຺ເຕສຸ ວາ ໂກປມຕ຺ຕມ຺ປິ ນຕ຺ຖີ’’ຕິ ເຖຣສ຺ສ ຄຸເຓ ກຖຍິໍສຸ. ອເຖໂກ ມິຈ຺ຉາທິຏ຺ຐິໂກ ພ຺ຣາຫ຺ມໂຓ ‘‘ໂກ ເອສ ນ ກຸຊ຺ຌຕີ’’ຕິ ປຸຈ຺ຉິ. ‘‘ອມ຺ຫາກໍ ເຖໂຣ’’ຕິ. ‘‘ນໍ ກຸຊ຺ຌາເປນ຺ໂຕ ນ ຠວິສ຺ສຕີ’’ຕິ? ‘‘ນຕ຺ເຖຕໍ, ພ຺ຣາຫ຺ມຓາ’’ຕິ. ‘‘ເຕນ ຫິ ອຫໍ ນໍ ກຸຊ຺ຌາເປສ຺ສາມີ’’ຕິ? ‘‘ສເຈ ສກ຺ໂກສິ, ກຸຊ຺ຌາເປຫີ’’ຕິ. ໂສ ‘‘ໂຫຕຸ, ຊານິສ຺ສາມິສ຺ສ ກຕ຺ຕພ຺ພ’’ນ຺ຕິ ເຖຣໍ ຠິກ຺ຂາຍ ປວິຏ຺ຐໍ ທິສ຺ວາ ປຈ຺ຉາຠາເຄນ ຄນ຺ຕ຺ວາ ປິຏ຺ຐິມຊ຺ເຌ ມຫນ຺ຕໍ ປາຓິປ຺ປຫາຣມທາສິ. ເຖໂຣ ‘‘ກິໍ ນາເມຕ’’ນ຺ຕິ ອໂນໂລເກຕ຺ວາວ ຄໂຕ. ພ຺ຣາຫ຺ມຓສ຺ສ ສກລສຣີເຣ ຑາໂຫ ອຸປ຺ປຊ຺ຊິ. ໂສ ‘‘ອໂຫ ຄຸຓສມ຺ປນ຺ໂນ, ອຍ຺ໂຍ’’ຕິ ເຖຣສ຺ສ ປາທມູເລ ນິປຊ຺ຊິຕ຺ວາ ‘‘ຂມຖ ເມ, ຠນ຺ເຕ’’ຕິ ວຕ຺ວາ ‘‘ກິໍ ເອຕ’’ນ຺ຕິ ຈ ວຸຕ຺ເຕ ‘‘ອຫໍ ວີມໍສນຕ຺ຖາຍ ຕຸມ຺ເຫ ປຫຣິ’’ນ຺ຕິ ອາຫ. ‘‘ໂຫຕຸ ຂມາມິ ເຕ’’ຕິ. ‘‘ສເຈ ເມ, ຠນ຺ເຕ, ຂມຖ, ມມ ເຄເຫເຍວ ນິສີທິຕ຺ວາ ຠິກ຺ຂໍ ຄຓ຺ຫຖາ’’ຕິ ເຖຣສ຺ສ ປຕ຺ຕໍ ຄຓ຺ຫິ, ເຖໂຣປິ ປຕ຺ຕໍ ອທາສິ. ພ຺ຣາຫ຺ມໂຓ ເຖຣໍ ເຄຫໍ ເນຕ຺ວາ ປຣິວິສິ.

ມນຸສ຺ສາ ກຸຊ຺ຌິຕ຺ວາ ‘‘ອິມິນາ ອມ຺ຫາກໍ ນິຣປຣາໂຘ ອຍ຺ໂຍ ປຫໂຏ, ທຓ຺ເຑນປິສ຺ສ ໂມກ຺ໂຂ ນຕ຺ຖິ, ເອຕ຺ເຖວ ນໍ ມາເຣສ຺ສາມາ’’ຕິ ເລຑ຺ຑຸທຓ຺ຑາທິຫຕ຺ຖາ ພ຺ຣາຫ຺ມຓສ຺ສ ເຄຫທ຺ວາເຣ ອຏ຺ຐໍສຸ. ເຖໂຣ ອຸຏ຺ຐາຍ ຄຈ຺ຉນ຺ໂຕ ພ຺ຣາຫ຺ມຓສ຺ສ ຫຕ຺ເຖ ປຕ຺ຕໍ ອທາສິ. ມນຸສ຺ສາ ຕໍ ເຖເຣນ ສທ຺ຘິໍ ຄຈ຺ຉນ຺ຕໍ ທິສ຺ວາ, ‘‘ຠນ຺ເຕ, ຕຸມ຺ຫາກໍ ປຕ຺ຕໍ ຄເຫຕ຺ວາ ພ຺ຣາຫ຺ມຓໍ ນິວຕ຺ເຕຖາ’’ຕິ ອາຫໍສຸ. ກິໍ ເອຕໍ ອຸປາສກາຕິ? ພ຺ຣາຫ຺ມເຓນ ຕຸມ຺ເຫ ປຫຏາ, ມຍມສ຺ສ ກຕ຺ຕພ຺ພໍ ຊານິສ຺ສາມາຕິ. ກິໍ ປນ ຕຸມ຺ເຫ ອິມິນາ ປຫຏາ, ອຸທາຫຸ ອຫນ຺ຕິ? ຕຸມ຺ເຫ, ຠນ຺ເຕຕິ. ‘‘ມໍ ເອສ ປຫຣິຕ຺ວາ ຂມາເປສິ, ຄຈ຺ຉຖ ຕຸມ຺ເຫ’’ຕິ ມນຸສ຺ເສ ອຸຍ຺ໂຍເຊຕ຺ວາ ພ຺ຣາຫ຺ມຓໍ ນິວຕ຺ຕາເປຕ຺ວາ ເຖໂຣ ວິຫາຣເມວ ຄໂຕ. ຠິກ຺ຂູ ອຸຊ຺ຌາຍິໍສຸ ‘‘ກິໍ ນາເມຕໍ ສາຣິປຸຕ຺ຕຕ຺ເຖໂຣ ເຍນ ພ຺ຣາຫ຺ມເຓນ ປຫໂຏ, ຕສ຺ເສວ ເຄເຫ ນິສີທິຕ຺ວາ ຠິກ຺ຂໍ ຄເຫຕ຺ວາ ອາຄໂຕ. ເຖຣສ຺ສ ປຫຏກາລໂຕ ປຏ຺ຐາຍ ອິທານິ ໂສ ກສ຺ສ ລຊ຺ຊິສ຺ສຕິ, ອວເສເສ ໂປເຖນ຺ໂຕ ວິຈຣິສ຺ສຕີ’’ຕິ. ສຕ຺ຖາ ອາຄນ຺ຕ຺ວາ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິຕ຺ວາ ‘‘ອິມາຍ ນາມາ’’ຕິ ວຸຕ຺ເຕ, ‘‘ຠິກ຺ຂເວ, ພ຺ຣາຫ຺ມໂຓ ພ຺ຣາຫ຺ມຓໍ ປຫຣນ຺ໂຕ ນາມ ນຕ຺ຖິ, ຄິຫິພ຺ຣາຫ຺ມເຓນ ປນ ສມຓພ຺ຣາຫ຺ມໂຓ ປຫໂຏ ຠວິສ຺ສຕິ, ໂກໂຘ ນາເມສ ອນາຄາມິມຄ຺ເຄນ ສມຸຄ຺ຆາຕໍ ຄຈ຺ຉຕີ’’ຕິ ວຕ຺ວາ ຘມ຺ມໍ ເທເສນ຺ໂຕ ອິມາ ຄາຖາ ອຠາສິ –

໓໘໙. ‘‘ນ ພ຺ຣາຫ຺ມຓສ຺ສ ປຫເຣຍ຺ຍ, ນາສ຺ສ ມຸຎ຺ເຈຖ ພ຺ຣາຫ຺ມໂຓ;

ຘີ ພ຺ຣາຫ຺ມຓສ຺ສ ຫນ຺ຕາຣໍ, ຕໂຕ ຘີ ຍສ຺ສ ມຸຎ຺ຈຕິ.

໓໙໐. ‘‘ນ ພ຺ຣາຫ຺ມຓສ຺ເສຕທກິຎ຺ຈິ ເສຍ຺ໂຍ, ຍທາ ນິເສໂຘ ມນໂສ ປິເຍຫິ;

ຍໂຕ ຍໂຕ ຫິໍສມໂນ ນິວຕ຺ຕຕິ, ຕໂຕ ຕໂຕ ສມ຺ມຕິເມວ ທຸກ຺ຂ’’ນ຺ຕິ.

ຕຕ຺ຖ ປຫເຣຍ຺ຍາຕິ ‘‘ຂີຓາສວພ຺ຣາຫ຺ມໂຓຫມສ຺ມີ’’ຕິ ຊານນ຺ໂຕ ຂີຓາສວສ຺ສ ວາ ອຎ຺ຎຕຣສ຺ສ ວາ ຊາຕິພ຺ຣາຫ຺ມຓສ຺ສ ນ ປຫເຣຍ຺ຍ. ນາສ຺ສ ມຸຎ຺ເຈຖາຕິ ໂສປິ ປຫໂຏ ຂີຓາສວພ຺ຣາຫ຺ມໂຓ ອສ຺ສ ປຫຣິຕ຺ວາ ຐິຕສ຺ສ ເວຣໍ ນ ມຸຎ຺ເຈຖ, ຕສ຺ມິໍ ໂກປໍ ນ ກເຣຍ຺ຍາຕິ ອຕ຺ໂຖ. ຘີ ພ຺ຣາຫ຺ມຓສ຺ສາຕິ ຂີຓາສວພ຺ຣາຫ຺ມຓສ຺ສ ຫນ຺ຕາຣໍ ຄຣຫາມິ. ຕໂຕ ຘີຕິ ໂຍ ປນ ຕໍ ປຫຣນ຺ຕໍ ປຏິປຫຣນ຺ໂຕ ຕສ຺ສ ອຸປຣິ ເວຣໍ ມຸຎ຺ຈຕິ, ຕໍ ຕໂຕປິ ຄຣຫາມິເຍວ.

ເອຕທກິຎ຺ຈິ ເສຍ຺ໂຍຕິ ຍໍ ຂີຓາສວສ຺ສ ອກ຺ໂກສນ຺ຕໍ ວາ ອປຈ຺ຈກ຺ໂກສນໍ, ປຫຣນ຺ຕໍ ວາ ອປ຺ປຏິປຫຣຓໍ, ເອຕໍ ຕສ຺ສ ຂີຓາສວພ຺ຣາຫ຺ມຓສ຺ສ ນ ກິຎ຺ຈິ ເສຍ຺ໂຍ, ອປ຺ປມຕ຺ຕກໍ ເສຍ຺ໂຍ ນ ໂຫຕິ, ອຘິມຕ຺ຕເມວ ເສຍ຺ໂຍຕິ ອຕ຺ໂຖ. ຍທາ ນິເສໂຘ ມນໂສ ປິເຍຫີຕິ ໂກຘນສ຺ສ ຫິ ໂກຘຸປ຺ປາໂທວ ມນໂສ ປິໂຍ ນາມ. ໂກໂຘ ຫິ ປເນສ ມາຕາປິຕູສຸປິ ພຸທ຺ຘາທີສຸປິ ອປຣຊ຺ຌຕິ. ຕສ຺ມາ ໂຍ ອສ຺ສ ເຕຫິ ມນໂສ ນິເສໂຘ ໂກຘວເສນ ອຸປ຺ປຊ຺ຊມານສ຺ສ ຈິຕ຺ຕສ຺ສ ນິຄ຺ຄໂຫ, ເອຕໍ ນ ກິຎ຺ຈິ ເສຍ຺ໂຍຕິ ອຕ຺ໂຖ. ຫິໍສມໂນຕິ ໂກຘມໂນ. ໂສ ຕສ຺ສ ຍໂຕ ຍໂຕ ວຕ຺ຖຸໂຕ ອນາຄາມິມຄ຺ເຄນ ສມຸຄ຺ຆາຕໍ ຄຈ຺ຉນ຺ໂຕ ນິວຕ຺ຕຕິ. ຕໂຕ ຕໂຕຕິ ຕໂຕ ຕໂຕ ວຕ຺ຖຸໂຕ ສກລມ຺ປິ ວຏ຺ຏທຸກ຺ຂໍ ນິວຕ຺ຕຕິເຍວາຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ສາຣິປຸຕ຺ຕຕ຺ເຖຣວຕ຺ຖຸ ສຕ຺ຕມໍ.