໖. ອຎ຺ຎຕຣພ຺ຣາຫ຺ມຓປພ຺ພຊິຕວຕ຺ຖຸ

ພາຫິຕປາໂປຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣໍ ພ຺ຣາຫ຺ມຓປພ຺ພຊິຕໍ ອາຣພ຺ຠ ກເຖສິ.

ເອໂກ ກິຣ ພ຺ຣາຫ຺ມໂຓ ພາຫິຣກປພ຺ພຊ຺ຊາຍ ປພ຺ພຊິຕ຺ວາ ‘‘ສມໂຓ ໂຄຕໂມ ອຕ຺ຕໂນ ສາວເກ ‘ປພ຺ພຊິຕາ’ຕິ ວທຕິ, ອຫຎ຺ຈມ຺ຫິ ປພ຺ພຊິໂຕ, ມມ຺ປິ ໂຂ ເອວໍ ວຕ຺ຕຸໍ ວຏ຺ຏຕີ’’ຕິ ຈິນ຺ເຕຕ຺ວາ ສຕ຺ຖາຣໍ ອຸປສງ຺ກມິຕ຺ວາ ເອຕມຕ຺ຖໍ ປຸຈ຺ຉິ. ສຕ຺ຖາ ‘‘ນາຫໍ ເອຕ຺ຕເກນ ‘ປພ຺ພຊິໂຕ’ຕິ ວທາມິ, ກິເລສມລານໍ ປນ ປພ຺ພາຊິຕຕ຺ຕາ ປພ຺ພຊິໂຕ ນາມ ໂຫຕີ’’ຕິ ວຕ຺ວາ ອິມໍ ຄາຖມາຫ –

໓໘໘. ‘‘ພາຫິຕປາໂປຕິ ພ຺ຣາຫ຺ມໂຓ, ສມຈຣິຍາ ສມໂຓຕິ ວຸຈ຺ຈຕິ;

ປພ຺ພາຊຍມຕ຺ຕໂນ ມລໍ, ຕສ຺ມາ ປພ຺ພຊິໂຕຕິ ວຸຈ຺ຈຕີ’’ຕິ.

ຕຕ຺ຖ ສມຈຣິຍາຕິ ສພ຺ພາກຸສລານິ ສເມຕ຺ວາ ຈຣເຓນ. ຕສ຺ມາຕິ ຍສ຺ມາ ພາຫິຕປາປຕາຍ ພ຺ຣາຫ຺ມໂຓ, ອກຸສລານິ ສເມຕ຺ວາ ຈຣເຓນ ສມໂຓຕິ ວຸຈ຺ຈຕິ, ຕສ຺ມາ ໂຍ ອຕ຺ຕໂນ ຣາຄາທິມລໍ ປພ຺ພາຊຍນ຺ໂຕ ວິໂນເທນ຺ໂຕ ຈຣຕິ, ໂສປິ ເຕນ ປພ຺ພາຊເນນ ປພ຺ພຊິໂຕຕິ ວຸຈ຺ຈຕີຕິ ອຕ຺ໂຖ.

ເທສນາວສາເນ ໂສ ພ຺ຣາຫ຺ມຓປພ຺ພຊິໂຕ ໂສຕາປຕ຺ຕິຜເລ ປຕິຏ຺ຐຫິ, ສມ຺ປຕ຺ຕານມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ອຎ຺ຎຕຣພ຺ຣາຫ຺ມຓປພ຺ພຊິຕວຕ຺ຖຸ ຉຏ຺ຐໍ.