໕. ອານນ຺ທຕ຺ເຖຣວຕ຺ຖຸ

ທິວາ ຕປຕີຕິ ອິມໍ ຘມ຺ມເທສນໍ ສຕ຺ຖາ ມິຄາຣມາຕຸປາສາເທ ວິຫຣນ຺ໂຕ ອານນ຺ທຕ຺ເຖຣໍ ອາຣພ຺ຠ ກເຖສິ.

ປເສນທິ ໂກສໂລ ກິຣ ມຫາປວາຣຓາຍ ສພ຺ພາຠຣຓປຏິມຓ຺ຑິໂຕ ຄນ຺ຘມາລາທີນິ ອາທາຍ ວິຫາຣໍ ອຄມາສິ. ຕສ຺ມິໍ ຂເຓ ກາຬຸທາຍິຕ຺ເຖໂຣ ຌານໍ ສມາປຊ຺ຊິຕ຺ວາ ປຣິສປຣິຍນ຺ເຕ ນິສິນ຺ໂນ ໂຫຕິ, ນາມເມວ ປນສ຺ເສຕໍ, ສຣີຣໍ ສຸວຓ຺ຓວຓ຺ຓໍ. ຕສ຺ມິໍ ປນ ຂເຓ ຈນ຺ໂທ ອຸຄ຺ຄຈ຺ຉຕິ, ສູຣິໂຍ ອຕ຺ຖເມຕິ. ອານນ຺ທຕ຺ເຖໂຣ ອຕ຺ຖເມນ຺ຕສ຺ສ ຈ ສູຣິຍສ຺ສ ອຸຄ຺ຄຈ຺ຉນ຺ຕສ຺ສ ຈ ຈນ຺ທສ຺ສ ໂອຠາສໍ ໂອໂລເກນ຺ໂຕ ຣຎ຺ໂຎ ສຣີໂຣຠາສໍ ເຖຣສ຺ສ ສຣີໂຣຠາສໍ ຕຖາຄຕສ຺ສ ຈ ສຣີໂຣຠາສໍ ໂອໂລເກສິ. ຕຕ຺ຖ ສພ຺ໂພຠາເສ ອຕິກ຺ກມິຕ຺ວາ ສຕ຺ຖາວ ວິໂຣຈຕິ. ເຖໂຣ ສຕ຺ຖາຣໍ ວນ຺ທິຕ຺ວາ, ‘‘ຠນ຺ເຕ, ອຊ຺ຊ ມມ ອິເມ ໂອຠາເສ ໂອໂລເກນ຺ຕສ຺ສ ຕຸມ຺ຫາກເມວ ໂອຠາໂສ ຣຸຈ຺ຈຕິ. ຕຸມ຺ຫາກຎ຺ຫິ ສຣີຣໍ ສພ຺ໂພຠາເສ ອຕິກ຺ກມິຕ຺ວາ ວິໂຣຈຕີ’’ຕິ ອາຫ. ອຖ ນໍ ສຕ຺ຖາ, ‘‘ອານນ຺ທ, ສູຣິໂຍ ນາມ ທິວາ ວິໂຣຈຕິ, ຈນ຺ໂທ ຣຕ຺ຕິໍ, ຣາຊາ ອລງ຺ກຕກາເລເຍວ, ຂີຓາສເວ ຄຓສງ຺ຄຓິກໍ ປຫາຍ ອນ຺ໂຕສມາປຕ຺ຕິຍໍເຍວ ວິໂຣຈຕິ, ພຸທ຺ຘາ ປນ ຣຕ຺ຕິມ຺ປິ ທິວາປິ ປຎ຺ຈວິເຘນ ເຕເຊນ ວິໂຣຈນ຺ຕີ’’ຕິ ວຕ຺ວາ ອິມໍ ຄາຖມາຫ –

໓໘໗. ‘‘ທິວາ ຕປຕິ ອາທິຈ຺ໂຈ, ຣຕ຺ຕິມາຠາຕິ ຈນ຺ທິມາ;

ສນ຺ນທ຺ໂຘ ຂຕ຺ຕິໂຍ ຕປຕິ, ຌາຍີ ຕປຕິ ພ຺ຣາຫ຺ມໂຓ;

ອຖ ສພ຺ພມໂຫຣຕ຺ຕິໍ, ພຸທ຺ໂຘ ຕປຕິ ເຕຊສາ’’ຕິ.

ຕຕ຺ຖ ທິວາ ຕປຕີຕິ ທິວາ ວິໂຣຈຕິ, ຣຕ຺ຕິໍ ປນສ຺ສ ຄຕມຄ຺ໂຄປິ ນ ປຎ຺ຎາຍຕິ. ຈນ຺ທິມາຕິ ຈນ຺ໂທປິ ອພ຺ຠາທີຫິ ວິມຸຕ຺ໂຕ ຣຕ຺ຕິເມວ ວິໂຣຈຕິ, ໂນ ທິວາ. ສນ຺ນທ຺ໂຘຕິ ສຸວຓ຺ຓມຓິວິຈິຕ຺ເຕຫິ ສພ຺ພາຠຣເຓຫິ ປຏິມຓ຺ຑິໂຕ ຈຕຸຣງ຺ຄິນິຍາ ເສນາຍ ປຣິກ຺ຂິຕ຺ໂຕວ ຣາຊາ ວິໂຣຈຕິ, ນ ອຎ຺ຎາຕກເວເສນ ຐິໂຕ. ຌາຍີຕິ ຂີຓາສໂວ ປນ ຄຓໍ ວິໂນເທຕ຺ວາ ຌາຍນ຺ໂຕວ ວິໂຣຈຕິ. ເຕຊສາຕິ ສມ຺ມາສມ຺ພຸທ຺ໂຘ ປນ ສີລເຕເຊນ ທຸສ຺ສີລ຺ຍເຕຊໍ, ຄຸຓເຕເຊນ ນິຄ຺ຄຸຓເຕຊໍ, ປຎ຺ຎາເຕເຊນ ທຸປ຺ປຎ຺ຎເຕຊໍ, ປຸຎ຺ຎເຕເຊນ ອປຸຎ຺ຎເຕຊໍ, ຘມ຺ມເຕເຊນ ອຘມ຺ມເຕຊໍ ປຣິຍາທິຍິຕ຺ວາ ອິມິນາ ປຎ຺ຈວິເຘນ ເຕຊສາ ນິຈ຺ຈກາລເມວ ວິໂຣຈຕີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ອານນ຺ທຕ຺ເຖຣວຕ຺ຖຸ ປຎ຺ຈມໍ.