໓໔. ໂຊຕິກຕ຺ເຖຣວຕ຺ຖຸ

ໂຍຘ ຕຓ຺ຫນ຺ຕິ ປຸນ ອິມໍ ຘມ຺ມເທສນໍ ສຕ຺ຖາ ເວຬຸວເນ ວິຫຣນ຺ໂຕ ໂຊຕິກຕ຺ເຖຣໍ ອາຣພ຺ຠ ກເຖສິ.

ອຊາຕສຕ຺ຕຸກຸມາໂຣ ຫິ ເທວທຕ຺ເຕນ ສທ຺ຘິໍ ເອກໂຕ ຫຸຕ຺ວາ ປິຕຣໍ ຆາເຕຕ຺ວາ ຣຊ຺ເຊ ປຕິຏ຺ຐິໂຕ ‘‘ໂຊຕິກເສຏ຺ຐິສ຺ສ ມຫາປາສາທໍ ຄຓ຺ຫິສ຺ສາມີ’’ຕິ ຍຸທ຺ຘສຊ຺ໂຊ ນິກ຺ຂມິຕ຺ວາ ມຓິປາກາເຣ ສປຣິວາຣສ຺ສ ອຕ຺ຕໂນ ຉາຍໍ ທິສ຺ວາ ‘‘ຄຫປຕິໂກ ຍຸທ຺ຘສຊ຺ໂຊ ຫຸຕ຺ວາ ພລໍ ອາທາຍ ນິກ຺ຂນ຺ໂຕ’’ຕິ ສລ຺ລກ຺ເຂຕ຺ວາ ອຸປຄນ຺ຕຸໍ ນ ວິສຫິ. ເສຏ຺ຐິປິ ຕໍ ທິວສໍ ອຸໂປສຖິໂກ ຫຸຕ຺ວາ ປາໂຕວ ຠຸຕ຺ຕປາຕຣາໂສ ວິຫາຣໍ ຄນ຺ຕ຺ວາ ສຕ຺ຖຸ ສນ຺ຕິເກ ຘມ຺ມໍ ສຸຓນ຺ໂຕ ນິສິນ຺ໂນ ໂຫຕິ. ປຐເມ ທ຺ວາຣໂກຏ຺ຐເກ ອາຣກ຺ຂໍ ຄເຫຕ຺ວາ ຐິໂຕ ປນ ຍມໂກຬິ ນາມ ຍກ຺ໂຂ ຕໍ ທິສ຺ວາ ‘‘ກຫໍ ຄຈ຺ຉສີ’’ຕິ ສປຣິວາຣໍ ວິທ຺ຘໍເສຕ຺ວາ ທິສາວິທິສາສຸ ອນຸພນ຺ຘິ. ຣາຊາ ວິຫາຣເມວ ອຄມາສິ.

ອຖ ນໍ ເສຏ຺ຐິ ທິສ຺ວາວ ‘‘ກິໍ, ເທວາ’’ຕິ ວຕ຺ວາ ອຸຏ຺ຐາຍາສນາ ອຏ຺ຐາສິ. ຄຫປຕິ, ກິໍ ຕ຺ວໍ ຕວ ປຸຣິເສ ‘‘ມຍາ ສທ຺ຘິໍ ຍຸຊ຺ຌຖາ’’ຕິ ອາຓາເປຕ຺ວາ ອິຘາຄມ຺ມ ຘມ຺ມໍ ສຸຓນ຺ໂຕ ວິຍ ນິສິນ຺ໂນຕິ. ກິໍ ປນ ເທໂວ ມມ ເຄຫໍ ຄຓ຺ຫິຕຸໍ ຄໂຕຕິ? ອາມ, ຄໂຕມ຺ຫີຕິ. ມມ ອນິຈ຺ຉາຍ ມມ ເຄຫໍ ຄຓ຺ຫິຕຸໍ ຣາຊສຫສ຺ສມ຺ປິ ນ ສກ຺ໂກຕິ, ເທວາຕິ. ໂສ ‘‘ກິໍ ປນ ຕ຺ວໍ ຣາຊາ ຠວິສ຺ສສີ’’ຕິ ກຸຊ຺ຌິ. ນາຫໍ ຣາຊາ, ມມ ສນ຺ຕກໍ ປນ ທສິກສຸຕ຺ຕມ຺ປິ ມມ ອນິຈ຺ຉາຍ ຣາຊູຫິ ວາ ໂຈເຣຫິ ວາ ຄເຫຕຸໍ ນ ສກ຺ກາຕິ. ກິໍ ປນາຫໍ ຕວ ຣຸຈິຍາ ຄຓ຺ຫິສ຺ສາມີຕິ? ເຕນ ຫິ, ເທວ, ອິມາ ເມ ທສສຸ ອງ຺ຄຸລີສຸ ວີສຕິ ມຸທ຺ທິກາ, ອິມາຫໍ ຕຸມ຺ຫາກໍ ນ ເທມິ. ສເຈ ສກ຺ໂກຖ, ຄຓ຺ຫຖາຕິ. ໂສ ປນ ຣາຊາ ຠູມິຍໍ ອຸກ຺ກຸຏິກໍ ນິສີທິຕ຺ວາ ອຸລ຺ລງ຺ຆນ຺ໂຕ ອຏ຺ຐາຣສຫຕ຺ຖໍ ຐານໍ ອຠິຣຸຫຕິ, ຐຕ຺ວາ ອຸລ຺ລງ຺ຆນ຺ໂຕ ອສີຕິຫຕ຺ຖໍ ຐານໍ ອຠິຣຸຫຕິ. ເອວໍມຫາພໂລ ສມາໂນປິ ອິໂຕ ຈິໂຕ ຈ ປຣິວຕ຺ເຕນ຺ໂຕ ເອກໍ ມຸທ຺ທິກມ຺ປິ ກຑ຺ຒິຕຸໍ ນາສກ຺ຂິ. ອຖ ນໍ ເສຏ຺ຐິ ‘‘ສາຏກໍ ປຕ຺ຖຣ, ເທວາ’’ຕິ ວຕ຺ວາ ອງ຺ຄຸລິໂຍ ອຸຊຸກາ ອກາສິ, ວີສຕິປິ ມຸທ຺ທິກາ ນິກ຺ຂມິໍສຸ. ອຖ ນໍ ເສຏ຺ຐິ ‘‘ເອວໍ, ເທວ, ມມ ສນ຺ຕກໍ ມມ ອນິຈ຺ຉາຍ ນ ສກ຺ກາ ຄຓ຺ຫິຕຸ’’ນ຺ຕິ ວຕ຺ວາ ຣຎ຺ໂຎ ກິຣິຍາຍ ອຸປ຺ປນ຺ນສໍເວໂຄ ‘‘ປພ຺ພຊິຕຸໍ ເມ ອນຸຊານ, ເທວາ’’ຕິ ອາຫ. ໂສ ‘‘ອິມສ຺ມິໍ ປພ຺ພຊິເຕ ສຸຂໍ ປາສາທໍ ຄຓ຺ຫິສ຺ສາມີ’’ຕິ ຈິນ຺ເຕຕ຺ວາ ເອກວຈເນເນວ ‘‘ຕ຺ວໍ ປພ຺ພຊາຫີ’’ຕິ ອາຫ. ໂສ ສຕ຺ຖຸ ສນ຺ຕິເກ ປພ຺ພຊິຕ຺ວາ ນ ຈິຣສ຺ເສວ ອຣຫຕ຺ຕໍ ປຕ຺ວາ ໂຊຕິກຕ຺ເຖໂຣ ນາມ ອໂຫສິ. ຕສ຺ສ ອຣຫຕ຺ຕໍ ປຕ຺ຕກ຺ຂເຓເຍວ ສພ຺ພາປິ ສາ ສມ຺ປຕ຺ຕິ ອນ຺ຕຣຘາຍິ, ຕມ຺ປິສ຺ສ ສຕຸລກາຍິໍ ນາມ ຠຣິຍໍ ເທວຕາ ອຸຕ຺ຕຣກຸຣຸເມວ ນຍິໍສຸ.

ອເຖກທິວສໍ ຠິກ຺ຂູ ຕໍ ອາມນ຺ເຕຕ຺ວາ, ‘‘ອາວຸໂສ ໂຊຕິກ, ຕສ຺ມິໍ ປນ ເຕ ປາສາເທ ວາ ອິຕ຺ຖິຍາ ວາ ຕຓ຺ຫາ ອຕ຺ຖີ’’ຕິ ປຸຈ຺ຉິຕ຺ວາ ‘‘ນຕ຺ຖາວຸໂສ’’ຕິ ວຸຕ຺ເຕ ສຕ຺ຖຸ ອາໂຣເຈສຸໍ – ‘‘ອຍໍ, ຠນ຺ເຕ, ອຠູຕໍ ວຕ຺ວາ ອຎ຺ຎໍ ພ຺ຍາກໂຣຕີ’’ຕິ. ສຕ຺ຖາ ‘‘ນຕ຺ເຖວ, ຠິກ຺ຂເວ, ມມ ປຸຕ຺ຕສ຺ສ ຕສ຺ມິໍ ຕຓ຺ຫາ’’ຕິ ວຕ຺ວາ ອິມໍ ຄາຖມາຫ –

໔໑໖. ‘‘ໂຍຘ ຕຓ຺ຫໍ ປຫນ຺ຕ຺ວານ, ອນາຄາໂຣ ປຣິພ຺ພເຊ;

ຕຓ຺ຫາຠວປຣິກ຺ຂີຓໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ອິມິສ຺ສາ ຄາຖາຍຕ຺ໂຖ ເຫຏ຺ຐາ ຊຏິລຕ຺ເຖຣວຕ຺ຖຸມ຺ຫິ ວຸຕ຺ຕນເຍເນວ ເວທິຕພ຺ໂພ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ໂຊຕິກຕ຺ເຖຣວຕ຺ຖຸ ຈຕຸຕິໍສຕິມໍ.