໓໕. ນຏປຸຕ຺ຕກຕ຺ເຖຣວຕ຺ຖຸ

ຫິຕ຺ວາຕິ ອິມໍ ຘມ຺ມເທສນໍ ສຕ຺ຖາ ເວຬຸວເນ ວິຫຣນ຺ໂຕ ເອກໍ ນຏປຸຕ຺ຕກໍ ອາຣພ຺ຠ ກເຖສິ.

ໂສ ກິຣ ເອກໍ ນຏກີຬໍ ກີຬຍມາໂນ ວິຈຣນ຺ໂຕ ສຕ຺ຖຸ ຘມ຺ມກຖໍ ສຸຕ຺ວາ ປພ຺ພຊິຕ຺ວາ ອຣຫຕ຺ຕໍ ປາປຸຓິ. ຕສ຺ມິໍ ພຸທ຺ຘປ຺ປມຸເຂນ ຠິກ຺ຂຸສງ຺ເຆນ ສທ຺ຘິໍ ປິຓ຺ຑາຍ ປວິສນ຺ເຕ ຠິກ຺ຂູ ເອກໍ ນຏປຸຕ຺ຕໍ ກີຬນ຺ຕໍ ທິສ຺ວາ, ‘‘ອາວຸໂສ, ເອສ ຕຍາ ກີຬິຕກີຬິຕໍ ກີຬຕິ, ອຕ຺ຖິ ນຸ ໂຂ ເຕ ເອຕ຺ຖ ສິເນໂຫ’’ຕິ ປຸຈ຺ຉິຕ຺ວາ ‘‘ນຕ຺ຖີ’’ຕິ ວຸຕ຺ເຕ ‘‘ອຍໍ, ຠນ຺ເຕ, ອຠູຕໍ ວຕ຺ວາ ອຎ຺ຎໍ ພ຺ຍາກໂຣຕີ’’ຕິ ອາຫໍສຸ. ສຕ຺ຖາ ເຕສໍ ກຖໍ ສຸຕ຺ວາ, ‘‘ຠິກ຺ຂເວ, ມມ ປຸຕ຺ໂຕ ສພ຺ພໂຍເຄ ອຕິກ຺ກນ຺ໂຕ’’ຕິ ວຕ຺ວາ ອິມໍ ຄາຖມາຫ –

໔໑໗. ‘‘ຫິຕ຺ວາ ມານຸສກໍ ໂຍຄໍ, ທິພ຺ພໍ ໂຍຄໍ ອຸປຈ຺ຈຄາ;

ສພ຺ພໂຍຄວິສໍຍຸຕ຺ຕໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ມານຸສກໍ ໂຍຄນ຺ຕິ ມານຸສກໍ ອາຍຸຎ຺ເຈວ ປຎ຺ຈ ກາມຄຸເຓ ຈ. ທິພ຺ພໂຍເຄປິ ເອເສວ ນໂຍ. ອຸປຈ຺ຈຄາຕິ ໂຍ ມານຸສກໍ ໂຍຄໍ ຫິຕ຺ວາ ທິພ຺ພໍ ໂຍຄໍ ອຕິກ຺ກນ຺ໂຕ, ຕໍ ສພ຺ເພຫິ ຈຕູຫິປິ ໂຍເຄຫິ ວິສໍຍຸຕ຺ຕໍ ອຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ນຏປຸຕ຺ຕກຕ຺ເຖຣວຕ຺ຖຸ ປຎ຺ຈຕິໍສຕິມໍ.