໒໖. ອຎ຺ຎຕຣຕ຺ເຖຣວຕ຺ຖຸ

ໂຍຘ ທີຆນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ອຎ຺ຎຕຣຕ຺ເຖຣໍ ອາຣພ຺ຠ ກເຖສິ.

ສາວຕ຺ຖິຍໍ ກິເຣໂກ ມິຈ຺ຉາທິຏ຺ຐິໂກ ພ຺ຣາຫ຺ມໂຓ ສຣີຣຄນ຺ຘຄຫຓຠເຍນ ອຸຕ຺ຕຣສາຏກໍ ອປເນຕ຺ວາ ເອກມນ຺ເຕ ຐເປຕ຺ວາ ເຄຫທ຺ວາຣາຠິມຸໂຂ ນິສີທິ. ອເຖໂກ ຂີຓາສໂວ ຠຕ຺ຕກິຈ຺ຈໍ ກຕ຺ວາ ວິຫາຣໍ ຄຈ຺ຉນ຺ໂຕ ຕໍ ສາຏກໍ ທິສ຺ວາ ອິໂຕ ຈິໂຕ ຈ ໂອໂລເກຕ຺ວາ ກຎ຺ຈິ ອປສ຺ສນ຺ໂຕ ‘‘ນິສ຺ສາມິໂກ ອຍ’’ນ຺ຕິ ປໍສຸກູລໍ ອຘິຏ຺ຐຫິຕ຺ວາ ຄຓ຺ຫິ. ອຖ ນໍ ພ຺ຣາຫ຺ມໂຓ ທິສ຺ວາ ອກ຺ໂກສນ຺ໂຕ ອຸປສງ຺ກມິຕ຺ວາ ‘‘ມຸຓ຺ຑກ, ສມຓ, ມມ ສາຏກໍ ຄຓ຺ຫສີ’’ຕິ ອາຫ. ຕເວໂສ, ພ຺ຣາຫ຺ມຓາຕິ. ອາມ, ສມຓາຕິ. ‘‘ມຍາ ກຎ຺ຈິ ອປສ຺ສນ຺ເຕນ ປໍສຸກູລສຎ຺ຎາຍ ຄຫິໂຕ, ຄຓ຺ຫ ນ’’ນ຺ຕິ ຕສ຺ສ ທຕ຺ວາ ວິຫາຣໍ ຄນ຺ຕ຺ວາ ຠິກ຺ຂູນໍ ຕມຕ຺ຖໍ ອາໂຣເຈສິ. ອຖສ຺ສ ວຈນໍ ສຸຕ຺ວາ ຠິກ຺ຂູ ເຕນ ສທ຺ຘິໍ ເກຬິໍ ກໂຣນ຺ຕາ ‘‘ກິໍ ນຸ ໂຂ, ອາວຸໂສ, ສາຏໂກ ທີໂຆ ຣສ຺ໂສ ຖູໂລ ສຓ຺ໂຫ’’ຕິ. ອາວຸໂສ, ທີໂຆ ວາ ໂຫຕຸ ຣສ຺ໂສ ວາ ຖູໂລ ວາ ສຓ຺ໂຫ ວາ, ນຕ຺ຖິ ມຍ຺ຫໍ ຕສ຺ມິໍ ອາລໂຍ, ປໍສຸກູລສຎ຺ຎາຍ ນໍ ຄຓ຺ຫິນ຺ຕິ. ຕໍ ສຸຕ຺ວາ ຠິກ຺ຂູ ຕຖາຄຕສ຺ສ ອາໂຣເຈສຸໍ – ‘‘ເອສ, ຠນ຺ເຕ, ຠິກ຺ຂຸ ອຠູຕໍ ວຕ຺ວາ ອຎ຺ຎໍ ພ຺ຍາກໂຣຕີ’’ຕິ. ສຕ຺ຖາ ‘‘ຠູຕໍ, ຠິກ຺ຂເວ, ເອສ ກເຖຕິ, ຂີຓາສວາ ນາມ ປເຣສໍ ສນ຺ຕກໍ ນ ຄຓ຺ຫນ຺ຕີ’’ຕິ ວຕ຺ວາ ອິມໍ ຄາຖມາຫ –

໔໐໙. ‘‘ໂຍຘ ທີຆໍ ວ ຣສ຺ສໍ ວາ, ອຓຸໍ ຖູລໍ ສຸຠາສຸຠໍ;

ໂລເກ ອທິນ຺ນໍ ນາທິຍຕິ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕສ຺ສຕ຺ໂຖ – ສາຏກາຠຣຓາທີສຸ ທີຆໍ ວາ ຣສ຺ສໍ ວາ ມຓິມຸຕ຺ຕາທີສຸ ອຓຸໍ ວາ ຖູລໍ ວາ ມຫຄ຺ຆອປ຺ປຄ຺ຆວເສນ ສຸຠໍ ວາ ອສຸຠໍ ວາ ໂຍ ປຸຄ຺ຄໂລ ອິມສ຺ມິໍ ໂລເກ ປຣປຣິຄ຺ຄຫິຕໍ ນາທິຍຕິ, ຕມຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ອຎ຺ຎຕຣຕ຺ເຖຣວຕ຺ຖຸ ຉພ຺ພີສຕິມໍ.