໒໗. ສາຣິປຸຕ຺ຕຕ຺ເຖຣວຕ຺ຖຸ

ອາສາ ຍສ຺ສາຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສາຣິປຸຕ຺ຕຕ຺ເຖຣໍ ອາຣພ຺ຠ ກເຖສິ.

ເຖໂຣ ກິຣ ປຎ຺ຈຠິກ຺ຂຸສຕປຣິວາໂຣ ຊນປເທ ເອກໍ ວິຫາຣໍ ຄນ຺ຕ຺ວາ ວສ຺ສໍ ອຸປຄຎ຺ຉິ. ມນຸສ຺ສາ ເຖຣໍ ທິສ຺ວາ ພຫຸໍ ວສ຺ສາວາສິກໍ ປຏິສ຺ສຸຓິໍສຸ. ເຖໂຣ ປວາເຣຕ຺ວາ ສພ຺ພສ຺ມິໍ ວສ຺ສາວາສິເກ ອສມ຺ປຕ຺ເຕເຍວ ສຕ຺ຖຸ ສນ຺ຕິກໍ ຄຈ຺ຉນ຺ໂຕ ຠິກ຺ຂູ ອາຫ – ‘‘ທຫຣານຎ຺ເຈວ ສາມເຓຣານຎ຺ຈ ມນຸສ຺ເສຫິ ວສ຺ສາວາສິເກ ອາຫເຏ ຄເຫຕ຺ວາ ເປເສຍ຺ຍາຖ, ຐເປຕ຺ວາ ວາ ສາສນໍ ປຫິເຓຍ຺ຍາຖາ’’ຕິ. ເອວໍ ວຕ຺ວາ ຈ ປນ ສຕ຺ຖຸ ສນ຺ຕິກໍ ອຄມາສິ. ຠິກ຺ຂູ ກຖໍ ສມຸຏ຺ຐາເປສຸໍ ‘‘ອຊ຺ຊາປິ ມຎ຺ເຎ ສາຣິປຸຕ຺ຕຕ຺ເຖຣສ຺ສ ຕຓ຺ຫາ ອຕ຺ຖິເຍວ. ຕຖາ ຫິ ມນຸສ຺ເສຫິ ວສ຺ສາວາສິເກ ທິນ຺ເນ ອຕ຺ຕໂນ ສທ຺ຘິວິຫາຣິການໍ ‘ວສ຺ສາວາສິກໍ ເປເສຍ຺ຍາຖ, ຐເປຕ຺ວາ ວາ ສາສນໍ ປຫິເຓຍ຺ຍາຖາ’ຕິ ຠິກ຺ຂູນໍ ວຕ຺ວາ ອາຄໂຕ’’ຕິ. ສຕ຺ຖາ ອາຄນ຺ຕ຺ວາ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິຕ຺ວາ ‘‘ອິມາຍ ນາມາ’’ຕິ ວຸຕ຺ເຕ ‘‘ນ, ຠິກ຺ຂເວ, ມມ ປຸຕ຺ຕສ຺ສ ຕຓ຺ຫາ ອຕ຺ຖິ, ມນຸສ຺ສານໍ ປນ ປຸຎ຺ຎໂຕ ທຫຣສາມເຓຣານຎ຺ຈ ຘມ຺ມິກລາຠໂຕ ປຣິຫານິ ມາ ອໂຫສີຕິ ເຕເນວໍ ກຖິຕ’’ນ຺ຕິ ວຕ຺ວາ ອິມໍ ຄາຖມາຫ –

໔໑໐. ‘‘ອາສາ ຍສ຺ສ ນ ວິຊ຺ຊນ຺ຕິ, ອສ຺ມິໍ ໂລເກ ປຣມ຺ຫິ ຈ;

ນິຣາສາສໍ ວິສໍຍຸຕ຺ຕໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ອາສາຕິ ຕຓ຺ຫາ. ນິຣາສາສນ຺ຕິ ນິຕ຺ຕຓ຺ຫໍ. ວິສໍຍຸຕ຺ຕນ຺ຕິ ສພ຺ພກິເລເສຫິ ວິສໍຍຸຕ຺ຕໍ ຕມຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ສາຣິປຸຕ຺ຕຕ຺ເຖຣວຕ຺ຖຸ ສຕ຺ຕວີສຕິມໍ.