໑໒. ກິສາໂຄຕມີວຕ຺ຖຸ

ປໍສຸກູລຘຣນ຺ຕິ ອິມໍ ຘມ຺ມເທສນໍ ສຕ຺ຖາ ຄິຊ຺ຌກູເຏ ປພ຺ພເຕ ວິຫຣນ຺ໂຕ ກິສາໂຄຕມິໍ ອາຣພ຺ຠ ກເຖສິ.

ຕທາ ກິຣ ສກ຺ໂກ ປຐມຍາມາວສາເນ ເທວປຣິສາຍ ສທ຺ຘິໍ ສຕ຺ຖາຣໍ ອຸປສງ຺ກມິຕ຺ວາ ວນ຺ທິຕ຺ວາ ເອກມນ຺ເຕ ສາຣຓີຍຘມ຺ມກຖໍ ສຸຓນ຺ໂຕ ນິສີທິ. ຕສ຺ມິໍ ຂເຓ ກິສາໂຄຕມີ ‘‘ສຕ຺ຖາຣໍ ປສ຺ສິສ຺ສາມີ’’ຕິ ອາກາເສນາຄນ຺ຕ຺ວາ ສກ຺ກໍ ທິສ຺ວາ ນິວຕ຺ຕິ. ໂສ ຕໍ ວນ຺ທິຕ຺ວາ ນິວຕ຺ຕນ຺ຕິໍ ທິສ຺ວາ ສຕ຺ຖາຣໍ ປຸຈ຺ຉິ – ‘‘ກາ ນາເມສາ, ຠນ຺ເຕ, ອາຄຈ຺ຉມານາວ ຕຸມ຺ເຫ ທິສ຺ວາ ນິວຕ຺ຕຕີ’’ຕິ? ສຕ຺ຖາ ‘‘ກິສາໂຄຕມີ ນາເມສາ, ມຫາຣາຊ, ມມ ຘີຕາ ປໍສຸກູລິກຕ຺ເຖຣີນໍ ອຄ຺ຄາ’’ຕິ ວຕ຺ວາ ອິມໍ ຄາຖມາຫ –

໓໙໕. ‘‘ປໍສຸກູລຘຣໍ ຊນ຺ຕຸໍ, ກິສໍ ຘມນິສນ຺ຖຕໍ;

ເອກໍ ວນສ຺ມິໍ ຌາຍນ຺ຕໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ກິສນ຺ຕິ ປໍສຸກູລິກາ ຫິ ອຕ຺ຕໂນ ອນຸຣູປໍ ປຏິປທໍ ປູເຣນ຺ຕາ ອປ຺ປມໍສໂລຫິຕາ ເຈວ ໂຫນ຺ຕິ ຘມນິສນ຺ຖຕຄຕ຺ຕາ ຈ, ຕສ຺ມາ ເອວມາຫ. ເອກໍ ວນສ຺ມິນ຺ຕິ ວິວິຕ຺ຕຏ຺ຐາເນ ເອກກໍ ວນສ຺ມິໍ ຌາຍນ຺ຕໍ ຕມຫໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ກິສາໂຄຕມີວຕ຺ຖຸ ທ຺ວາທສມໍ.