໑໓. ເອກພ຺ຣາຫ຺ມຓວຕ຺ຖຸ

ນ ຈາຫນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ເອກໍ ພ຺ຣາຫ຺ມຓໍ ອາຣພ຺ຠ ກເຖສິ.

ໂສ ກິຣ ‘‘ສມໂຓ ໂຄຕໂມ ອຕ຺ຕໂນ ສາວເກ ພ຺ຣາຫ຺ມຓາຕິ ວທຕິ ອຫຎ຺ຈມ຺ຫິ ພ຺ຣາຫ຺ມຓໂຍນິຍໍ ນິພ຺ພຕ຺ໂຕ, ມມ຺ປິ ນຸ ໂຂ ເອວໍ ວຕ຺ຕຸໍ ວຏ຺ຏຕີ’’ຕິ ສຕ຺ຖາຣໍ ອຸປສງ຺ກມິຕ຺ວາ ຕມຕ຺ຖໍ ປຸຈ຺ຉິ. ອຖ ນໍ ສຕ຺ຖາ ‘‘ນາຫໍ, ພ຺ຣາຫ຺ມຓ, ພ຺ຣາຫ຺ມຓໂຍນິຍໍ ນິພ຺ພຕ຺ຕມຕ຺ເຕເນວໍ ວທາມິ, ໂຍ ປນ ອກິຎ຺ຈໂນ ອຄຫໂຓ, ຕມຫໍ ພ຺ຣາຫ຺ມຓໍ ວທາມີ’’ຕິ ວຕ຺ວາ ອິມໍ ຄາຖມາຫ –

໓໙໖. ‘‘ນ ຈາຫໍ ພ຺ຣາຫ຺ມຓໍ ພ຺ຣູມິ, ໂຍນິຊໍ ມຕ຺ຕິສມ຺ຠວໍ;

ໂຠວາທິ ນາມ ໂສ ໂຫຕິ, ສເຈ ໂຫຕິ ສກິຎ຺ຈໂນ;

ອກິຎ຺ຈນໍ ອນາທານໍ, ຕມຫໍ ພ຺ຣູມິ ພ຺ຣາຫ຺ມຓ’’ນ຺ຕິ.

ຕຕ຺ຖ ໂຍນິຊນ຺ຕິ ໂຍນິຍໍ ຊາຕໍ. ມຕ຺ຕິສມ຺ຠວນ຺ຕິ ພ຺ຣາຫ຺ມຓິຍາ ມາຕຸ ສນ຺ຕເກ ອຸທຣສ຺ມິໍ ສມ຺ຠູຕໍ. ໂຠວາທີຕິ ໂສ ປນ ອາມນ຺ຕນາທີສຸ ‘‘ໂຠ, ໂຠ’’ຕິ ວຕ຺ວາ ວິຈຣນ຺ໂຕ ໂຠວາທິ ນາມ ໂຫຕິ, ສເຈ ຣາຄາທີຫິ ກິຎ຺ຈເນຫິ ສກິຎ຺ຈໂນ. ອຫໍ ປນ ຣາຄາທີຫິ ອກິຎ຺ຈນໍ ຈຕູຫິ ອຸປາທາເນຫິ ອນາທານໍ ພ຺ຣາຫ຺ມຓໍ ວທາມີຕິ ອຕ຺ໂຖ.

ເທສນາວສາເນ ໂສ ພ຺ຣາຫ຺ມໂຓ ໂສຕາປຕ຺ຕິຜເລ ປຕິຏ຺ຐຫິ, ສມ຺ປຕ຺ຕານມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ເອກພ຺ຣາຫ຺ມຓວຕ຺ຖຸ ເຕຣສມໍ.