໑. ປສາທພຫຸລພ຺ຣາຫ຺ມຓວຕ຺ຖຸ

ຉິນ຺ທ ໂສຕນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ປສາທພຫຸລໍ ພ຺ຣາຫ຺ມຓໍ ອາຣພ຺ຠ ກເຖສິ.

ໂສ ກິຣ ພ຺ຣາຫ຺ມໂຓ ຠຄວໂຕ ຘມ຺ມເທສນໍ ສຸຕ຺ວາ ປສນ຺ນຈິຕ຺ໂຕ ອຕ຺ຕໂນ ເຄເຫ ໂສຬສມຕ຺ຕານໍ ຠິກ຺ຂູນໍ ນິຈ຺ຈຠຕ຺ຕໍ ປຏ຺ຐເປຕ຺ວາ ຠິກ຺ຂູນໍ ອາຄຕເວລາຍ ປຕ຺ຕໍ ຄເຫຕ຺ວາ ‘‘ອາຄຈ຺ຉນ຺ຕຸ ໂຠນ຺ໂຕ ອຣຫນ຺ໂຕ, ນິສີທນ຺ຕຸ ໂຠນ຺ໂຕ ອຣຫນ຺ໂຕ’’ຕິ ຍໍກິຎ຺ຈິ ວທນ຺ໂຕ ອຣຫນ຺ຕວາທປຏິສໍຍຸຕ຺ຕເມວ ວທຕິ. ເຕສຸ ປຸຖຸຊ຺ຊນາ ‘‘ອຍໍ ອມ຺ເຫສຸ ອຣຫນ຺ຕສຎ຺ຎີ’’ຕິ ຈິນ຺ຕຍິໍສຸ, ຂີຓາສວາ ‘‘ອຍໍ ໂນ ຂີຓາສວຠາວໍ ຊານາຕີ’’ຕິ. ເອວໍ ເຕ ສພ຺ເພປິ ກຸກ຺ກຸຈ຺ຈາຍນ຺ຕາ ຕສ຺ສ ເຄຫໍ ນາຄມິໍສຸ. ໂສ ທຸກ຺ຂີ ທຸມ຺ມໂນ ‘‘ກິນ຺ນຸ ໂຂ, ອຍ຺ຍາ, ນາຄຈ຺ຉນ຺ຕີ’’ຕິ ວິຫາຣໍ ຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ຕມຕ຺ຖໍ ອາໂຣເຈສິ. ສຕ຺ຖາ ຠິກ຺ຂູ ອາມນ຺ເຕຕ຺ວາ ‘‘ກິໍ ເອຕໍ, ຠິກ຺ຂເວ’’ຕິ ປຸຈ຺ຉິຕ຺ວາ ເຕຫິ ຕສ຺ມິໍ ອຕ຺ເຖ ອາໂຣຈິເຕ ‘‘ສາທິຍຖ ປນ ຕຸມ຺ເຫ, ຠິກ຺ຂເວ, ອຣຫນ຺ຕວາທ’’ນ຺ຕິ ອາຫ. ‘‘ນ ສາທິຍາມ ມຍໍ, ຠນ຺ເຕ’’ຕິ. ‘‘ເອວໍ ສນ຺ເຕ ມນຸສ຺ສານໍ ເອຕໍ ປສາທຠຎ຺ຎໍ, ອນາປຕ຺ຕິ, ຠິກ຺ຂເວ, ປສາທຠຎ຺ເຎ, ອປິ ຈ ໂຂ ປນ ພ຺ຣາຫ຺ມຓສ຺ສ ອຣຫນ຺ເຕສຸ ອຘິມຕ຺ຕໍ ເປມໍ, ຕສ຺ມາ ຕຸມ຺ເຫຫິປິ ຕຓ຺ຫາໂສຕໍ ເຉຕ຺ວາ ອຣຫຕ຺ຕເມວ ປຕ຺ຕຸໍ ຍຸຕ຺ຕ’’ນ຺ຕິ ວຕ຺ວາ ຘມ຺ມໍ ເທເສນ຺ໂຕ ອິມໍ ຄາຖມາຫ –

໓໘໓. ‘‘ຉິນ຺ທ ໂສຕໍ ປຣກ຺ກມ຺ມ, ກາເມ ປນຸທ ພ຺ຣາຫ຺ມຓ;

ສງ຺ຂາຣານໍ ຂຍໍ ຎຕ຺ວາ, ອກຕຎ຺ຎູສິ ພ຺ຣາຫ຺ມຓາ’’ຕິ.

ຕຕ຺ຖ ປຣກ຺ກມ຺ມາຕິ ຕຓ຺ຫາໂສຕໍ ນາມ ນ ອປ຺ປມຕ຺ຕເກນ ວາຍາເມນ ຉິນ຺ທິຕຸໍ ສກ຺ກາ, ຕສ຺ມາ ຎາຓສມ຺ປຍຸຕ຺ເຕນ ມຫນ຺ເຕນ ປຣກ຺ກເມນ ປຣກ຺ກມິຕ຺ວາ ຕໍ ໂສຕໍ ຉິນ຺ທ. ອຸໂຠປິ ກາເມ ປນຸທ ນີຫຣ. ພ຺ຣາຫ຺ມຓາຕິ ຂີຓາສວານໍ ອາລປນເມຕໍ. ສງ຺ຂາຣານນ຺ຕິ ປຎ຺ຈນ຺ນໍ ຂນ຺ຘານໍ ຂຍໍ ຊານິຕ຺ວາ. ອກຕຎ຺ຎູຕິ ເອວໍ ສນ຺ເຕ ຕ຺ວໍ ສຸວຓ຺ຓາທີສຸ ເກນຈິ ອກຕສ຺ສ ນິພ຺ພານສ຺ສ ຊານນໂຕ ອກຕຎ຺ຎູ ນາມ ໂຫສີຕິ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ປສາທພຫຸລພ຺ຣາຫ຺ມຓວຕ຺ຖຸ ປຐມໍ.