໒. ສມ຺ພຫຸລຠິກ຺ຂຸວຕ຺ຖຸ

ຍທາ ທ຺ວເຍສູຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສມ຺ພຫຸເລ ຠິກ຺ຂູ ອາຣພ຺ຠ ກເຖສິ.

ເອກທິວສຎ຺ຫິ ຕິໍສມຕ຺ຕາ ທິສາວາສິກາ ຠິກ຺ຂູ ອາຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ນິສີທິໍສຸ. ສາຣິປຸຕ຺ຕຕ຺ເຖໂຣ ເຕສໍ ອຣຫຕ຺ຕສ຺ສ ອຸປນິສ຺ສຍໍ ທິສ຺ວາ ສຕ຺ຖາຣໍ ອຸປສງ຺ກມິຕ຺ວາ ຐິຕໂກວ ອິມໍ ປຎ຺ຫໍ ປຸຈ຺ຉິ – ‘‘ຠນ຺ເຕ, ທ຺ເວ ຘມ຺ມາຕິ ວຸຈ຺ຈນ຺ຕິ, ກຕເມ ນຸ ໂຂ ທ຺ເວ ຘມ຺ມາ’’ຕິ? ອຖ ນໍ ສຕ຺ຖາ ‘‘ທ຺ເວ ຘມ຺ມາຕິ ໂຂ, ສາຣິປຸຕ຺ຕ, ສມຖວິປສ຺ສນາ ວຸຈ຺ຈນ຺ຕີ’’ຕິ ວຕ຺ວາ ອິມໍ ຄາຖມາຫ –

໓໘໔. ‘‘ຍທາ ທ຺ວເຍສຸ ຘມ຺ເມສຸ, ປາຣຄູ ໂຫຕິ ພ຺ຣາຫ຺ມໂຓ;

ອຖສ຺ສ ສພ຺ເພ ສໍໂຍຄາ, ອຕ຺ຖໍ ຄຈ຺ຉນ຺ຕິ ຊານໂຕ’’ຕິ.

ຕຕ຺ຖ ຍທາຕິ ຍສ຺ມິໍ ກາເລ ທ຺ວິຘາ ຐິເຕສຸ ສມຖວິປສ຺ສນາຘມ຺ເມສຸ ອຠິຎ຺ຎາປາຣຄາທິວເສນ ອຍໍ ຂີຓາສໂວ ປາຣຄູ ໂຫຕິ, ອຖສ຺ສ ວຏ຺ຏສ຺ມິໍ ສໍໂຍຊນສມຕ຺ຖາ ສພ຺ເພ ກາມໂຍຄາທໂຍ ສໍໂຍຄາ ເອວໍ ຊານນ຺ຕສ຺ສ ອຕ຺ຖໍ ປຣິກ຺ຂຍໍ ຄຈ຺ຉນ຺ຕີຕິ ອຕ຺ໂຖ.

ເທສນາວສາເນ ສພ຺ເພປິ ເຕ ຠິກ຺ຂູ ອຣຫຕ຺ເຕ ປຕິຏ຺ຐຫິໍສູຕິ.

ສມ຺ພຫຸລຠິກ຺ຂຸວຕ຺ຖຸ ທຸຕິຍໍ.