໙. ສນ຺ຕກາຍຕ຺ເຖຣວຕ຺ຖຸ

ສນ຺ຕກາໂຍຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ສນ຺ຕກາຍຕ຺ເຖຣໍ ນາມ ອາຣພ຺ຠ ກເຖສິ.

ຕສ຺ສ ກິຣ ຫຕ຺ຖປາທກຸກ຺ກຸຈ຺ຈໍ ນາມ ນາໂຫສິ, ກາຍວິຊມ຺ຠນຣຫິໂຕ ສນ຺ຕອຕ຺ຕຠາໂວວ ອໂຫສິ. ໂສ ກິຣ ສີຫໂຍນິໂຕ ອາຄໂຕ ເຖໂຣ. ສີຫາ ກິຣ ເອກທິວສໍ ໂຄຈຣໍ ຄເຫຕ຺ວາ ຣຊຕສຸວຓ຺ຓມຓິປວາຬຄຸຫານໍ ອຎ຺ຎຕຣໍ ປວິສິຕ຺ວາ ມໂນສິລາຕເລ ຫຣິຕາລຈຸຓ຺ເຓສຸ ສຕ຺ຕາຫໍ ນິປຊ຺ຊິຕ຺ວາ ສຕ຺ຕເມ ທິວເສ ອຸຏ຺ຐາຍ ນິປນ຺ນຏ຺ຐານໍ ໂອໂລເກຕ຺ວາ ສເຈ ນງ຺ຄຸຏ຺ຐສ຺ສ ວາ ກຓ຺ຓານໍ ວາ ຫຕ຺ຖປາທານໍ ວາ ຈລິຕຕ຺ຕາ ມໂນສິລາຫຣິຕາລຈຸຓ຺ຓານໍ ວິປ຺ປກິຓ຺ຓຕໍ ປສ຺ສນ຺ຕິ, ‘‘ນ ເຕ ອິທໍ ຊາຕິຍາ ວາ ໂຄຕ຺ຕສ຺ສ ວາ ປຕິຣູປ’’ນ຺ຕິ ປຸນ ສຕ຺ຕາຫໍ ນິຣາຫາຣາ ນິປຊ຺ຊນ຺ຕິ, ຈຸຓ຺ຓານໍ ປນ ວິປ຺ປກິຓ຺ຓຠາເວ ອສຕິ ‘‘ອິທໍ ເຕ ຊາຕິໂຄຕ຺ຕານໍ ອນຸຈ຺ຉວິກ’’ນ຺ຕິ ອາສຍາ ນິກ຺ຂມິຕ຺ວາ ວິຊມ຺ຠິຕ຺ວາ ທິສາ ອນຸວິໂລເກຕ຺ວາ ຕິກ຺ຂຕ຺ຕຸໍ ສີຫນາທໍ ນທິຕ຺ວາ ໂຄຈຣາຍ ປກ຺ກມນ຺ຕິ. ເອວຣູປາຍ ສີຫໂຍນິຍາ ອາຄໂຕ ອຍໍ ຠິກ຺ຂຸ. ຕສ຺ສ ກາຍສມາຈາຣໍ ທິສ຺ວາ ຠິກ຺ຂູ ສຕ຺ຖຸ ອາໂຣເຈສຸໍ – ‘‘ນ ໂນ, ຠນ຺ເຕ, ສນ຺ຕກາຍຕ຺ເຖຣສທິໂສ ຠິກ຺ຂຸ ທິຏ຺ຐປຸພ຺ໂພ. ອິມສ຺ສ ຫິ ນິສິນ຺ນຏ຺ຐາເນ ຫຕ຺ຖຈລນໍ ວາ ປາທຈລນໍ ວາ ກາຍວິຊມ຺ຠິຕາ ວາ ນຕ຺ຖີ’’ຕິ. ຕໍ ສຸຕ຺ວາ ສຕ຺ຖາ, ‘‘ຠິກ຺ຂເວ, ຠິກ຺ຂຸນາ ນາມ ສນ຺ຕກາຍຕ຺ເຖເຣນ ວິຍ ກາຍາທີຫິ ອຸປສນ຺ເຕເນວ ຠວິຕພ຺ພ’’ນ຺ຕິ ວຕ຺ວາ ອິມໍ ຄາຖມາຫ –

໓໗໘. ‘‘ສນ຺ຕກາໂຍ ສນ຺ຕວາໂຈ, ສນ຺ຕວາ ສຸສມາຫິໂຕ;

ວນ຺ຕໂລກາມິໂສ ຠິກ຺ຂຸ, ອຸປສນ຺ໂຕຕິ ວຸຈ຺ຈຕີ’’ຕິ.

ຕຕ຺ຖ ສນ຺ຕກາໂຍຕິ ປາຓາຕິປາຕາທີນໍ ອຠາເວນ ສນ຺ຕກາໂຍ, ມຸສາວາທາທີນໍ ອຠາເວນ ສນ຺ຕວາໂຈ, ອຠິຊ຺ຌາທີນໍ ອຠາເວນ ສນ຺ຕວາ, ກາຍາທີນໍ ຕິຓ຺ຓມ຺ປິ ສຸຏ຺ຐຸ ສມາຫິຕຕ຺ຕາ ສຸສມາຫິໂຕ, ຈຕູຫິ ມຄ຺ເຄຫິ ໂລກາມິສສ຺ສ ວນ຺ຕຕາຍ ວນ຺ຕໂລກາມິໂສ ຠິກ຺ຂຸ ອພ຺ຠນ຺ຕເຣ ຣາຄາທີນໍ ອຸປສນ຺ຕຕາຍ ອຸປສນ຺ໂຕຕິ ວຸຈ຺ຈຕີຕິ ອຕ຺ໂຖ.

ເທສນາວສາເນ ໂສ ເຖໂຣ ອຣຫຕ຺ເຕ ປຕິຏ຺ຐຫິ, ສມ຺ປຕ຺ຕານມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ສນ຺ຕກາຍຕ຺ເຖຣວຕ຺ຖຸ ນວມໍ.