໑໐. ນງ຺ຄລກຸລຕ຺ເຖຣວຕ຺ຖຸ

ອຕ຺ຕນາ ໂຈທຍຕ຺ຕານນ຺ຕິ ອິມໍ ຘມ຺ມເທສນໍ ສຕ຺ຖາ ເຊຕວເນ ວິຫຣນ຺ໂຕ ນງ຺ຄລກຸລຕ຺ເຖຣໍ ອາຣພ຺ຠ ກເຖສິ.

ເອໂກ ກິຣ ທຸຄ຺ຄຕມນຸສ຺ໂສ ປເຣສໍ ຠຕິໍ ກຕ຺ວາ ຊີວຕິ, ຕໍ ເອໂກ ຠິກ຺ຂຸ ປິໂລຕິກຂຓ຺ຑນິວຕ຺ຖໍ ນງ຺ຄລໍ ອຸກ຺ຂິປິຕ຺ວາ ຄຈ຺ຉນ຺ຕໍ ທິສ຺ວາ ເອວມາຫ – ‘‘ກິໍ ປນ ເຕ ເອວໍ ຊີວນໂຕ ປພ຺ພຊິຕຸໍ ນ ວຣ’’ນ຺ຕິ. ໂກ ມໍ, ຠນ຺ເຕ, ເອວໍ ຊີວນ຺ຕໍ ປພ຺ພາເຊສ຺ສຕີຕິ? ສເຈ ປພ຺ພຊິສ຺ສສິ, ອຫໍ ຕໍ ປພ຺ພາເຊສ຺ສາມີຕິ. ສາຘຸ ຠນ຺ເຕ, ສເຈ ມໍ ປພ຺ພາເຊສ຺ສຖ, ປພ຺ພຊິສ຺ສາມີຕິ. ອຖ ນໍ ໂສ ເຖໂຣ ເຊຕວນໍ ເນຕ຺ວາ ສຫຕ຺ເຖນ, ນ຺ຫາເປຕ຺ວາ ມາຬເກ ຐເປຕ຺ວາ ປພ຺ພາເຊຕ຺ວາ ນິວຕ຺ຖປິໂລຕິກຂຓ຺ເຑນ ສທ຺ຘິໍ ນງ຺ຄລໍ ມາຬກສີມາຍເມວ ຣຸກ຺ຂສາຂາຍໍ ຐປາເປສິ. ໂສ ອຸປສມ຺ປນ຺ນກາເລປິ ນງ຺ຄລກຸລຕ຺ເຖໂຣຕ຺ເວວ ປຎ຺ຎາຍິ. ໂສ ພຸທ຺ຘານໍ ອຸປ຺ປນ຺ນລາຠສກ຺ກາຣໍ ນິສ຺ສາຍ ຊີວນ຺ໂຕ ອຸກ຺ກຓ຺ຐິຕ຺ວາ ອຸກ຺ກຓ຺ຐິຕໍ ວິໂນເທຕຸໍ ອສກ຺ໂກນ຺ໂຕ ‘‘ນ ທານິ ສທ຺ຘາເທຍ຺ຍານິ ກາສາຍານິ ປຣິທຫິຕ຺ວາ ຄມິສ຺ສາມີ’’ຕິ ຕໍ ຣຸກ຺ຂມູລໍ ຄນ຺ຕ຺ວາ ອຕ຺ຕນາວ ອຕ຺ຕານໍ ໂອວທິ – ‘‘ອຫິຣິກ, ນິລ຺ລຊ຺ຊ, ອິທໍ ນິວາເສຕ຺ວາ ວິພ຺ຠມິຕ຺ວາ ຠຕິໍ ກຕ຺ວາ ຊີວິຕຸກາໂມ ຊາໂຕ’’ຕິ. ຕສ຺ເສວໍ ອຕ຺ຕານໍ ໂອວທນ຺ຕສ຺ເສວ ຈິຕ຺ຕໍ ຕນຸກຠາວໍ ຄຕໍ. ໂສ ນິວຕ຺ຕິຕ຺ວາ ປຸນ ກຕິປາຫຈ຺ຈເຍນ ອຸກ຺ກຓ຺ຐິຕ຺ວາ ຕເຖວ ອຕ຺ຕານໍ ໂອວທິ, ປຸນສ຺ສ ຈິຕ຺ຕໍ ນິວຕ຺ຕິ. ໂສ ອິມິນາວ ນີຫາເຣນ ອຸກ຺ກຓ຺ຐິຕອຸກ຺ກຓ຺ຐິຕກາເລ ຕຕ຺ຖ ຄນ຺ຕ຺ວາ ອຕ຺ຕານໍ ໂອວທິ. ອຖ ນໍ ຠິກ຺ຂູ ຕຕ຺ຖ ອຠິຓ຺ຫໍ ຄຈ຺ຉນ຺ຕໍ ທິສ຺ວາ, ‘‘ອາວຸໂສ, ນງ຺ຄລຕ຺ເຖຣ ກສ຺ມາ ເອຕ຺ຖ ຄຈ຺ຉສີ’’ຕິ ປຸຈ຺ຉິໍສຸ. ໂສ ‘‘ອາຈຣິຍສ຺ສ ສນ຺ຕິກໍ ຄຈ຺ຉາມິ, ຠນ຺ເຕ’’ຕິ ວຕ຺ວາ ກຕິປາເຫເນວ ອຣຫຕ຺ຕໍ ປາປຸຓິ.

ຠິກ຺ຂູ ເຕນ ສທ຺ຘິໍ ເກຬິໍ ກໂຣນ຺ຕາ ອາຫໍສຸ – ‘‘ອາວຸໂສ ນງ຺ຄລຕ຺ເຖຣ, ຕວ ວິຈຣຓມຄ຺ໂຄ ອວຬຎ຺ໂຊ ວິຍ ຊາໂຕ, ອາຈຣິຍສ຺ສ ສນ຺ຕິກໍ ນ ຄຈ຺ຉສິ ມຎ຺ເຎ’’ຕິ. ອາມ, ຠນ຺ເຕ, ມຍໍ ສໍສຄ຺ເຄ ສຕິ ອຄມິມ຺ຫາ, ອິທານິ ປນ ໂສ ສໍສຄ຺ໂຄ ຉິນ຺ໂນ, ເຕນ ນ ຄຈ຺ຉາມາຕິ. ຕໍ ສຸຕ຺ວາ ຠິກ຺ຂູ ‘‘ເອສ ອຠູຕໍ ວຕ຺ວາ ອຎ຺ຎໍ ພ຺ຍາກໂຣຕີ’’ຕິ ສຕ຺ຖຸ ຕມຕ຺ຖໍ ອາໂຣເຈສຸໍ. ສຕ຺ຖາ ‘‘ອາມ, ຠິກ຺ຂເວ, ມມ ປຸຕ຺ໂຕ ອຕ຺ຕນາວ ອຕ຺ຕານໍ ໂຈເທຕ຺ວາ ປພ຺ພຊິຕກິຈ຺ຈສ຺ສ ມຕ຺ຖກໍ ປຕ຺ໂຕ’’ຕິ ວຕ຺ວາ ຘມ຺ມໍ ເທເສນ຺ໂຕ ອິມາ ຄາຖາ ອຠາສິ –

໓໗໙. ‘‘ອຕ຺ຕນາ ໂຈທຍຕ຺ຕານໍ, ປຏິມໍເສຖ ອຕ຺ຕນາ;

ໂສ ອຕ຺ຕຄຸຕ຺ໂຕ ສຕິມາ, ສຸຂໍ ຠິກ຺ຂຸ ວິຫາຫິສິ.

໓໘໐. ‘‘ອຕ຺ຕາ ຫິ ອຕ຺ຕໂນ ນາໂຖ, ໂກ ຫິ ນາໂຖ ປໂຣ ສິຍາ;

ອຕ຺ຕາ ຫິ ອຕ຺ຕໂນ ຄຕິ;

ຕສ຺ມາ ສໍຍມມຕ຺ຕານໍ, ອສ຺ສໍ ຠທ຺ຣໍວ ວາຓິໂຊ’’ຕິ.

ຕຕ຺ຖ ໂຈທຍຕ຺ຕານນ຺ຕິ ອຕ຺ຕນາວ ອຕ຺ຕານໍ ໂຈທຍ ສາຣຍ. ປຏິມໍເສຖາຕິ ອຕ຺ຕນາວ ອຕ຺ຕານໍ ປຣິວີມໍສຖ. ໂສຕິ ໂສ ຕ຺ວໍ, ຠິກ຺ຂຸ, ເອວໍ ສນ຺ເຕ ອຕ຺ຕນາວ ຄຸຕ຺ຕຕາຍ ອຕ຺ຕຄຸຕ຺ໂຕ, ອຸປຏ຺ຐິຕສຕິຕາຍ ສຕິມາ ຫຸຕ຺ວາ ສພ຺ພິຣິຍາປເຖສຸ ສຸຂໍ ວິຫຣິສ຺ສສີຕິ ອຕ຺ໂຖ.

ນາໂຖຕິ ອວສ຺ສໂຍ ປຕິຏ຺ຐາ. ໂກ ຫິ ນາໂຖ ປໂຣຕິ ຍສ຺ມາ ປຣສ຺ສ ອຕ຺ຕຠາເວ ປຕິຏ຺ຐາຍ ກຸສລໍ ວາ ກຕ຺ວາ ສຄ຺ຄປຣາຍເຓນ ມຄ຺ຄໍ ວາ ຠາເວຕ຺ວາ ສຈ຺ຉິກຕຜເລນ ຠວິຕຸໍ ນ ສກ຺ກາ, ຕສ຺ມາ ໂກ ຫິ ນາມ ປໂຣ ນາໂຖ ຠເວຍ຺ຍາຕິ ອຕ຺ໂຖ. ຕສ຺ມາຕິ ຍສ຺ມາ ອຕ຺ຕາວ ອຕ຺ຕໂນ ຄຕິ ປຕິຏ຺ຐາ ສຣຓໍ, ຕສ຺ມາ ຍຖາ ຠທ຺ຣໍ ອສ຺ສາຊານີຍໍ ນິສ຺ສາຍ ລາຠໍ ປຕ຺ຖຍນ຺ໂຕ ວາຓິໂຊ ຕສ຺ສ ວິສມຏ຺ຐານຈາຣໍ ປຈ຺ຉິນ຺ທິຕ຺ວາ ທິວສສ຺ສ ຕິກ຺ຂຕ຺ຕຸໍ ນຫາເປນ຺ໂຕ ໂຠເຊນ຺ໂຕ ສໍຍເມຕິ ປຏິຊຄ຺ຄຕິ, ເອວໍ ຕ຺ວມ຺ປິ ອນຸປ຺ປນ຺ນສ຺ສ ອກຸສລສ຺ສ ອຸປ຺ປາທໍ ນິວາເຣນ຺ໂຕ ສຕິສມ຺ໂມເສນ ອຸປ຺ປນ຺ນໍ ອກຸສລໍ ປຊຫນ຺ໂຕ ອຕ຺ຕານໍ ສໍຍມ ໂຄປຍ, ເອວໍ ສນ຺ເຕ ປຐມຊ຺ຌານໍ ອາທິໍ ກຕ຺ວາ ໂລກິຍໂລກຸຕ຺ຕຣວິເສສໍ ອຘິຄມິສ຺ສສີຕິ ອຕ຺ໂຖ.

ເທສນາວສາເນ ພຫູ ໂສຕາປຕ຺ຕິຜລາທີນິ ປາປຸຓິໍສູຕິ.

ນງ຺ຄລກຸລຕ຺ເຖຣວຕ຺ຖຸ ທສມໍ.