໑໑. ວກ຺ກລິຕ຺ເຖຣວຕ຺ຖຸ

ປາໂມຊ຺ຊພຫຸໂລຕິ ອິມໍ ຘມ຺ມເທສນໍ ສຕ຺ຖາ ເວຬຸວເນ ວິຫຣນ຺ໂຕ ວກ຺ກລິຕ຺ເຖຣໍ ອາຣພ຺ຠ ກເຖສິ.

ໂສ ກິຣາຍສ຺ມາ ສາວຕ຺ຖິຍໍ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວຍປ຺ປຕ຺ໂຕ ປິຓ຺ຑາຍ ປວິຏ຺ຐໍ ຕຖາຄຕໍ ທິສ຺ວາ ສຕ຺ຖຸ ສຣີຣສມ຺ປຕ຺ຕິໍ ໂອໂລເກຕ຺ວາ ສຣີຣສມ຺ປຕ຺ຕິທສ຺ສເນນ ອຕິຕ຺ໂຕ ‘‘ເອວາຫໍ ນິຈ຺ຈກາລໍ ຕຖາຄຕໍ ທຏ຺ຐຸໍ ລຠິສ຺ສາມີ’’ຕິ ສຕ຺ຖຸ ສນ຺ຕິເກ ປພ຺ພຊິຕ຺ວາ ຍຕ຺ຖ ຐິເຕນ ສກ຺ກາ ທສພລໍ ປສ຺ສິຕຸໍ, ຕຕ຺ຖ ຐິໂຕ ສຊ຺ຌາຍກມ຺ມຏ຺ຐານມນສິກາຣາທີນິ ປຫາຍ ສຕ຺ຖາຣໍ ໂອໂລເກນ຺ໂຕວ ວິຈຣຕິ. ສຕ຺ຖາ ຕສ຺ສ ຎາຓປຣິປາກໍ ອາຄເມນ຺ໂຕ ກິຎ຺ຈິ ອວຕ຺ວາ ‘‘ອິທານິສ຺ສ ຎາຓໍ ປຣິປາກໍ ຄຕ’’ນ຺ຕິ ຎຕ຺ວາ ‘‘ກິໍ ເຕ, ວກ຺ກລິ, ອິມິນາ ປູຕິກາເຍນ ທິຏ຺ເຐນ, ໂຍ ໂຂ, ວກ຺ກລິ, ຘມ຺ມໍ ປສ຺ສຕິ, ໂສ ມໍ ປສ຺ສຕິ. ໂຍ ມໍ ປສ຺ສຕິ, ໂສ ຘມ຺ມໍ ປສ຺ສຕີ’’ຕິ (ສໍ. ນິ. ໓.໘໗) ວຕ຺ວາ ໂອວທິ. ໂສ ເອວໍ ໂອວທິໂຕປິ ສຕ຺ຖຸ ທສ຺ສນໍ ປຫາຍ ເນວ ອຎ຺ຎຕ຺ຖ ຄນ຺ຕຸໍ ສກ຺ໂກຕິ. ອຖ ນໍ ສຕ຺ຖາ ‘‘ນາຍໍ ຠິກ຺ຂຸ ສໍເວຄໍ ອລຠິຕ຺ວາ ພຸຊ຺ຌິສ຺ສຕີ’’ຕິ ອຸປກຏ຺ຐາຍ ວສ຺ສູປນາຍິກາຍ ຣາຊຄຫໍ ຄນ຺ຕ຺ວາ ວສ຺ສູປນາຍິກທິວເສ ‘‘ອເປຫິ, ວກ຺ກລິ, ອເປຫິ, ວກ຺ກລີ’’ຕິ ປຓາເມສິ. ໂສ ‘‘ນ ມໍ ສຕ຺ຖາ ອາລປຕີ’’ຕິ ເຕມາສໍ ສຕ຺ຖຸ ສມ຺ມຸເຂ ຐາຕຸໍ ອສກ຺ໂກນ຺ໂຕ ‘‘ກິໍ ມຍ຺ຫໍ ຊີວິເຕນ, ປພ຺ພຕາ ອຕ຺ຕານໍ ປາເຕສ຺ສາມີ’’ຕິ ຄິຊ຺ຌກູຏໍ ອຠິຣຸຫິ.

ສຕ຺ຖາ ຕສ຺ສ ກິລມນຠາວໍ ຎຕ຺ວາ ‘‘ອຍໍ ຠິກ຺ຂຸ ມມ ສນ຺ຕິກາ ອສ຺ສາສໍ ອລຠນ຺ໂຕ ມຄ຺ຄຜລານໍ ອຸປນິສ຺ສຍໍ ນາເສຍ຺ຍາ’’ຕິ ອຕ຺ຕານໍ ທສ຺ເສຕຸໍ ໂອຠາສໍ ມຸຎ຺ຈິ. ອຖສ຺ສ ສຕ຺ຖຸ ທິຏ຺ຐກາລໂຕ ປຏ຺ຐາຍ ຕາວມຫນ຺ໂຕປິ ໂສໂກ ປຫີຍິ. ສຕ຺ຖາ ສຸກ຺ຂຕຬາກໍ ໂອເຆນ ປູເຣນ຺ໂຕ ວິຍ ເຖຣສ຺ສ ພລວປີຕິປາໂມຊ຺ຊໍ ອຸປ຺ປາເທຕຸໍ ອິມໍ ຄາຖມາຫ –

໓໘໑. ‘‘ປາໂມຊ຺ຊພຫຸໂລ ຠິກ຺ຂຸ, ປສນ຺ໂນ ພຸທ຺ຘສາສເນ;

ອຘິຄຈ຺ເຉ ປທໍ ສນ຺ຕໍ, ສງ຺ຂາຣູປສມໍ ສຸຂ’’ນ຺ຕິ.

ຕສ຺ສຕ຺ໂຖ – ປກຕິຍາປິ ປາໂມຊ຺ຊພຫຸໂລ ຠິກ຺ຂຸ ພຸທ຺ຘສາສເນ ປສາທໍ ໂຣເຈຕິ, ໂສ ເອວໍ ປສນ຺ໂນ ພຸທ຺ຘສາສເນ ສນ຺ຕໍ ປທໍ ສງ຺ຂາຣູປສມໍ ສຸຂນ຺ຕິ ລທ຺ຘນາມໍ ນິພ຺ພານໍ ອຘິຄຈ຺ເຉຍ຺ຍາຕິ. ອິມຎ຺ຈ ປນ ຄາຖໍ ວຕ຺ວາ ສຕ຺ຖາ ວກ຺ກລິຕ຺ເຖຣສ຺ສ ຫຕ຺ຖໍ ປສາເຣຕ຺ວາ –

‘‘ເອຫິ ວກ຺ກລິ ມາ ຠາຍິ, ໂອໂລເກຫິ ຕຖາຄຕໍ;

ອຫໍ ຕໍ ອຸທ຺ຘຣິສ຺ສາມິ, ປງ຺ເກ ສນ຺ນໍວ ກຸຎ຺ຊຣໍ.

‘‘ເອຫິ ວກ຺ກລິ ມາ ຠາຍິ, ໂອໂລເກຫິ ຕຖາຄຕໍ;

ອຫໍ ຕໍ ໂມຈຍິສ຺ສາມິ, ຣາຫຸຄ຺ຄຫໍວ ສູຣິຍໍ.

‘‘ເອຫິ ວກ຺ກລິ ມາ ຠາຍິ, ໂອໂລເກຫິ ຕຖາຄຕໍ;

ອຫໍ ຕໍ ໂມຈຍິສ຺ສາມິ, ຣາຫຸຄ຺ຄຫໍວ ຈນ຺ທິມ’’ນ຺ຕິ. –

ອິມາ ຄາຖາ ອຠາສິ. ໂສ ‘‘ທສພໂລ ເມ ທິຏ຺ໂຐ, ເອຫີຕິ ຈ ອວ຺ຫານມ຺ປິ ລທ຺ຘ’’ນ຺ຕິ ພລວປີຕິໍ ອຸປ຺ປາເທຕ຺ວາ ‘‘ກຸໂຕ ນຸ ໂຂ ຄນ຺ຕພ຺ພ’’ນ຺ຕິ ຄມນມຄ຺ຄໍ ອປສ຺ສນ຺ໂຕ ທສພລສ຺ສ ສມ຺ມຸເຂ ອາກາເສ ອຸປ຺ປຕິຕ຺ວາ ປຐມປາເທ ປພ຺ພເຕ ຐິເຕເຍວ ສຕ຺ຖາຣາ ວຸຕ຺ຕຄາຖາ ອາວຊ຺ເຊນ຺ໂຕ ອາກາເສເຍວ ປີຕິໍ ວິກ຺ຂມ຺ເຠຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ຕຖາຄຕໍ ວນ຺ທມາໂນວ ໂອຕຣິຕ຺ວາ ສຕ຺ຖຸ ສນ຺ຕິເກ ອຏ຺ຐາສິ. ອຖ ນໍ ສຕ຺ຖາ ອປຣຠາເຄ ສທ຺ຘາຘິມຸຕ຺ຕານໍ ອຄ຺ຄຏ຺ຐາເນ ຐເປສີຕິ.

ວກ຺ກລິຕ຺ເຖຣວຕ຺ຖຸ ເອກາທສມໍ.