໑໒. ອງ຺ກຸຣວຕ຺ຖຸ

ຕິຓໂທສານີຕິ ອິມໍ ຘມ຺ມເທສນໍ ສຕ຺ຖາ ປຓ຺ຑຸກມ຺ພລສິລາຍໍ ວິຫຣນ຺ໂຕ ອງ຺ກຸຣໍ ອາຣພ຺ຠ ກເຖສິ. ວຕ຺ຖຸ ‘‘ເຍ ຌານປ຺ປສຸຕາ ຘີຣາ’’ຕິ (ຘ. ປ. ໑໘໑) ຄາຖາຍ ວິຕ຺ຖາຣິຕເມວ. ວຸຕ຺ຕຎ຺ເຫຕໍ ຕຕ຺ຖ ອິນ຺ທກໍ ອາຣພ຺ຠ. ໂສ ກິຣ ອນຸຣຸທ຺ຘຕ຺ເຖຣສ຺ສ ອນ຺ໂຕຄາມໍ ປິຓ຺ຑາຍ ປວິຏ຺ຐສ຺ສ ອຕ຺ຕໂນ ອາຠຕໍ ກຏຈ຺ຉຸມຕ຺ຕກໍ ຠິກ຺ຂໍ ທາເປສິ. ຕທສ຺ສ ປຸຎ຺ຎໍ ອງ຺ກຸເຣນ ທສວສ຺ສສຫສ຺ສານິ ທ຺ວາທສໂຍຊນິກໍ ອຸທ຺ຘນປນ຺ຕິໍ ກຕ຺ວາ ທິນ຺ນທານໂຕ ມຫປ຺ຜລຕຣໍ ຊາຕໍ. ຕສ຺ມາ ເອວມາຫ. ເອວໍ ວຸຕ຺ເຕ ສຕ຺ຖາ, ‘‘ອງ຺ກຸຣ, ທານໍ ນາມ ວິເຈຍ຺ຍ ທາຕຸໍ ວຏ຺ຏຕິ, ເອວໍ ຕໍ ສຸເຂຕ຺ເຕ ສຸວຸຕ຺ຕພີຊໍ ວິຍ ມຫປ຺ຜລໍ ໂຫຕິ. ຕ຺ວໍ ປນ ຕຖາ ນາກາສິ, ເຕນ ເຕ ທານໍ ນ ມຫປ຺ຜລໍ ຊາຕ’’ນ຺ຕິ ອິມມຕ຺ຖໍ ວິຠາເວນ຺ໂຕ –

‘‘ວິເຈຍ຺ຍ ທານໍ ທາຕພ຺ພໍ, ຍຕ຺ຖ ທິນ຺ນໍ ມຫປ຺ຜລໍ;

ວິເຈຍ຺ຍ ທານໍ ສຸຄຕປ຺ປສຕ຺ຖໍ,

ເຍ ທກ຺ຂິເຓຍ຺ຍາ ອິຘ ຊີວໂລເກ;

ເອເຕສຸ ທິນ຺ນານິ ມຫປ຺ຜລານິ,

ພີຊານິ ວຸຕ຺ຕານິ ຍຖາສຸເຂຕ຺ເຕ’’ຕິ. (ເປ. ວ. ໓໒໙) –

ວຕ຺ວາ ອຸຕ຺ຕຣິມ຺ປິ ຘມ຺ມໍ ເທເສນ຺ໂຕ ອິມາ ຄາຖາ ອຠາສິ –

໓໕໖. ‘‘ຕິຓໂທສານິ ເຂຕ຺ຕານິ, ຣາຄໂທສາ ອຍໍ ປຊາ;

ຕສ຺ມາ ຫິ ວີຕຣາເຄສຸ, ທິນ຺ນໍ ໂຫຕິ ມຫປ຺ຜລໍ.

໓໕໗. ‘‘ຕິຓໂທສານິ ເຂຕ຺ຕານິ, ໂທສໂທສາ ອຍໍ ປຊາ;

ຕສ຺ມາ ຫິ ວີຕໂທເສສຸ, ທິນ຺ນໍ ໂຫຕິ ມຫປ຺ຜລໍ.

໓໕໘. ‘‘ຕິຓໂທສານິ ເຂຕ຺ຕານິ, ໂມຫໂທສາ ອຍໍ ປຊາ;

ຕສ຺ມາ ຫິ ວີຕໂມເຫສຸ, ທິນ຺ນໍ ໂຫຕິ ມຫປ຺ຜລໍ.

໓໕໙. ‘‘ຕິຓໂທສານິ ເຂຕ຺ຕານິ, ອິຈ຺ຉາໂທສາ ອຍໍ ປຊາ;

ຕສ຺ມາ ຫິ ວິຄຕິຈ຺ເຉສຸ, ທິນ຺ນໍ ໂຫຕິ ມຫປ຺ຜລ’’ນ຺ຕິ.

ຕຕ຺ຖ ຕິຓໂທສານີຕິ ສາມາກາທີນິ ຕິຓານິ ອຸຏ຺ຐຫນ຺ຕານິ ປຸພ຺ພຓ຺ຓາປຣຓ຺ຓານິ ເຂຕ຺ຕານິ ທູເສນ຺ຕິ, ເຕນ ຕານິ ນ ພຫຸຜລານິ ໂຫນ຺ຕິ. ເອວໍ ສຕ຺ຕານມ຺ປິ ອນ຺ໂຕ ຣາໂຄ ອຸປ຺ປຊ຺ຊນ຺ໂຕ ສຕ຺ເຕ ທູເສຕິ, ເຕນ ເຕສຸ ທິນ຺ນໍ ມຫປ຺ຜລໍ ນ ໂຫຕິ. ຂີຓາສເວສຸ ທິນ຺ນໍ ປນ ມຫປ຺ຜລໍ ໂຫຕິ. ເຕນ ວຸຕ຺ຕໍ –

‘‘ຕິຓໂທສານິ ເຂຕ຺ຕານິ, ຣາຄໂທສາ ອຍໍ ປຊາ;

ຕສ຺ມາ ຫິ ວີຕຣາເຄສຸ, ທິນ຺ນໍ ໂຫຕິ ມຫປ຺ຜລ’’ນ຺ຕິ. –

ເສສຄາຖາສຸປິ ເອເສວ ນໂຍ.

ເທສນາວສາເນ ອງ຺ກຸໂຣ ຈ ອິນ຺ທໂກ ຈ ໂສຕາປຕ຺ຕິຜເລ ປຕິຏ຺ຐຫິໍສຸ, ສມ຺ປຕ຺ຕານມ຺ປິ ສາຕ຺ຖິກາ ຘມ຺ມເທສນາ ອໂຫສີຕິ.

ອງ຺ກຸຣວຕ຺ຖຸ ທ຺ວາທສມໍ.

ຕຓ຺ຫາວຄ຺ຄວຓ຺ຓນາ ນິຏ຺ຐິຕາ.

ຈຕຸວີສຕິໂມ ວຄ຺ໂຄ.